İşbu sene sitte ve tis‘în ve elf Cemâziyelevvelînin yedinci günü Yedi sancağına sürüci içün bâ-fermân-ı âlî Hüseyin Paşa tarafından Ayazmand’e varınca üç nefer adama bargir viresiz deyu buyruldı
154/64-2 Ulak Hükmü
Ba‘de tarih-i mezkûr Cemâziyelevvelinin yedinci günü sefer sürüci izzetlü Hüseyin Paşahazretleri tarafından üç nefer ademe üç re’s menzil bargiri tedârik eyleyesin ve Mağnisa kazâsına bir gama ve hademe ve ol dahi İlçeye varup gelince yol üzerinde olan kazâ-i Efendide hatt-ı hümâyûn buyrıldı virildi kayd
154/64-3
Muradiye Evkafından Kafirboz Mukata’asının İltizamı
Sa‘âdetlü sultanım hazretlerinin huzûr-ı şerîflerine dürer-i du‘â ve lâyika dâ‘î esnâ-yı fâika-i takdîrce ne minvâl hüccet Mahmiye-i Mağnisa’da vâki merhûm Sultan Murad Han hazretlerinin binâ ve ihdâs eylediği câmi‘i şerîf ve imâret-i âmireleri evkâfından taht-ı hükûmetinde vâki‘ Kâfirboz mukâta‘ası bin doksan altı martı ibtidâsıdnan istid‘âsına varınca vâki‘ olan mahsûlât ve sâir bâd-ı hevâsın bâ‘is-i mektûb-ı meveddet Mustafa Ağa’ya bin üç yüz kuruşa iltizâm der-uhde olunup zabta içün tarafımızdan mektûb tahrîr olunup irsâl-i huzûr kılındı vüsûlünde mezbûrun vech-i meşrûh üzere iltizâm ve kabûlün tescîl kadîmden olıgeldiği mukâta‘a-i mezbûre merkûma zabt-ı vâki‘ olan mahsûlât ve mahlûlât ve sâir cüz’î ve küllî bâd-ı hevâsın merkûme ahz ve kabz itdirmeğe olur
128
154/64-4
Saruhan Memlahasından Tuz Taşımakla Görevli Devecilerin Vazifelerini Yapmadıkları
Akzâ kuzâtü’l-müslimîn evlâ vülâtü’l-muvahhidîn ma‘denü’l-fazl ve’l-yakîn hüccetü’l-hak ale’l-halkı ecma‘în vâris-i ulûmü’l-enbiyâi ve’l-mürselîn el-muhtass bi-mezîdi inâyeti’l-meliki’l-mu‘în Mağnisa ve İzmir kadıları zîde fazluhumâ ve mefâhirü’l-hükkâm ma‘denü’l-fezâil ve’l-kelâm Alaşehir kadısı ve Mağnisa sancağında vâki‘ olan kadılar zîde fazluhum kıdvetü’l-emâsil ve’l-akrân Mağnisa sancağı mütesellimi…………..zîde kadruhû tevkî‘-u refî‘-u hümâyûn vâsıl olıcak ma‘lûm ola ki bin doksan bir senesine mahsûb olmak üzere Saruhan muhassallığına tâbi‘ Menemen memlehası mukâta‘asında hâsıl olan mîrî tuzu tarih-i mezbûrda memlehasınca emîni olan Abdülbâkî tuzu işledüp hâzır ve âmâde eyledikden sonra (tahrip olmuş) olan Deveci tâifesi vakt ü zamanıyla tuzu elekden ihrâc itmeyüp zâyi‘ ve telef olduğu keşf olunup i‘lâm olundukda taraf-ı mîrî muhassallığıçün emr-i şerîfimle Ahmed Çavuş zîde kadruhû meclis-i şer‘de bulunan deve sâhibleri tarih-i mezbûrda edâ-yı hizmet eylediklerine emînân temessük taleb eylediğinde deve sâhibleri temessük ibrâz itmeğe kâdir olmayup re‘âyâsı (tahrip olmuş) ve askerîsi bir (tahrip olmuş) kuruş virmek üzere ta‘ahhüd eylediklerine Mağnisa memlehâsı Mevlânâ Mehmed zîde fezâiluhû hüccet-i şer‘iyye virmekle mûcibince livâ-i mezbûrda bulunan deve sâhiblerinden mâl-ı mîrîyi bi-eyy-i hâlin tahsîl ve bir gün evvel teslîm-i hazîne itdirüp biz asâkiri ve sâdâtız deyu ve kuzât ve sâir bahâne ile bir ferde inâd ve muhâlefet itdirilmeyüp mukaddemâ ve hâlâ virilen emr-i şerîfim ve kıbel-i şer‘de hükm-i birle virilen hüccet-i şer‘iyye mûcibince tahsîl itdirilmek fermânım olmuşdur buyurdum ki hükm-i şerîfimle Dergâh-ı Mu‘allam çavuşlarından kıdvetü’l-emâsil ve’l-akrân Ahmed Çavuş zîde kadruhû vardukda bu bâbda sâdır olan emrim üzere amel idüp dahi vech-i meşrûh üzere memleha-i mezbûreden hâsıl olan mîrî tuzu ihrâcları ile üç günlükden ihrâc idegelen deve sâhibleri tekâsülleri sebebiyle mîrî memlehadan hâsıl olan tuzu me’mûr oldukları üzere elekden ihrâc itmeyüp edâ-i hizmet eylemedikleri içün şer‘-i şerîfe ta‘ahhüd eyledikleri akçeyi bu bâbda viregeldikleri hüccet-i şer‘iyye mûcibince bi-eyy-i hâlin tahsîl ve bir gün evvel mübâşir ma‘rifetiyle teslîm itdirüp biz askerî ve kuzât ve sâdât tâifesindenüz ve bu bâbda bir bahâne ile bir ferde ta‘allül ve nizâ‘ itdirmeyüp mukaddemâ virilen evâmir-i şerîfim ve hüccet-i şer‘iyyeye muhâlif kimesneye iş itdirmeyesin şöyle
129
bilesin alâmet-ş şerîfe i‘timâd kılasın tahrîren fi’l-yevmi’t-tâsi‘ şehr-i Saferü’l-hayr sene sitte ve tis‘în ve elf
Be-makâm-ı Edirne el-mahrûse Kayd fî 5 Cemâziyelevvel sene 96
154/65-1
Vefat Eden Askerî Taifesinin Muhallefatlarının Gönderilen Memura Teslim Olunması
Mefâhirü’l-kuzât ve’l-hükkâm ma‘denü’l-fazl ve’l-kelâm Edirne’den Anadolu’nun sağ kolunda vâki‘ olan kadılar zîde fazluhum ve kıdvetü’l-emâsil ve’l-akrân taht-ı kazâlarınızda Yeniçeri Serdârları zîde kadruhum tevkî‘i refî‘i hümâyûn vâsıl olıcak ma‘lûm ola ki taht-ı kazâlarınızda mukîm ve müsâfir bilâ-vâris-i ma‘rûf fevt olan yeniçeri ve acemi oğlanı ve cebeci ve topcu tâifesinden serdârlarının ahz ve kabz eyledikleri muhallefât ve nükûdu yedlerinden ahz ve bu tarafa getürmek içün Dergâh-ı Mu‘allam yeniçerileri çavuşlarından kıdvetü’l-emâsil ve’l-akrân sekizinci bölüğün Mehmed Çavuş nâm yeniçeri nezâretiyle irsâl olunmağın taht-ı kazâlarınızda olan serdârların makbûzâtları olan muhallefât ve nükûdu minvâl-i meşrûh üzere muhzır ve mahtûm-ı müfredât defterleriyle merkûmûna teslîm ve bu tarafa îsâl itdirilüp ve ehl-i sefer yeniçerileri ve topcu ve cebeci neferâtı me’mûr oldukları sefer-i hümâyûn ve serhadlerine umûmen yollayup ve korucu ve etrak olanları dahi bi’l-cümle Âsitâne-i Sa‘âdete irsâl eyleyesiz deyu bi’l-fi‘i vezâretle Dergâh-ı Mu‘allam yeniçerileri ağası olan düstûr-ı mükerrem müşîr-i mufahham nizâmü’l-âlem vezîrim Zülfikar Paşaedâmallâhu te‘âlâ iclâlehû tarafından mühürlü mektûb virilmeğin mûcibince amel olunmak emrim olmuşdur buyurdum ki vusûl buldukda bu bâbda sâdır olan fermân-ı celîlü’l-kadrim ve müşârun-ileyh tarafından virilen mühürlü mektûb mûcibince amel idüp min ba‘d şer‘-i şerîfe ve emr-i hümâyûnuma muhâlif hilâfa rızâ ve cevaz göstermeyesin husûs-ı mezbûr içün tekrar emrim varmalu eylemeyesin şöyle bilesin alâmet-i şerîfe i‘timâd kılasın tahrîren fî evâyil-işehr-i Rebiülâhir sene sitte ve tis‘în ve elf
Be-makâm-ı Edirne
130
154/65-2
Vefat Eden Asker Taifesinin Muhallefatlarının Gönderilen Memura Teslim Olunması
Şerî‘at-şi‘âr efâzıl-ı (tahrip olmuş) mahmiye-i Edirne’den Anadolu’nun sağ kolunda vâki‘ olan mevâlî-i izâm dâme izzuhum kuzât Efendileri zîde fazluhum ve yeniçeri serdârları inhâ olunan oldur ki taht-ı kazâlarınızda mukîm ve müsâfir bilâ-vâris-i ma‘rûf fevt olan yeniçeri ve acemi oğlanı ve cebeci ve topcu yoldaşların serdarları ahz ve kabz eylediği muhallefât ve nukudu yedlerinden ahz ve bu tarafa getürmek içün işbu mektûb tahrîr olunup Dergâh-ı âlî yeniçeri çavuşlarından kıdvetü’l-emâsil ve’l-akrân sekizinci bölüğün Mehmed Çavuş müteferrika emekdârımız Bâyezid nâm yoldaş nâzır ta‘yîn ve irsâl kılınmışdır lede’l-vusûl zikr olunan serdarların makbûzları olan muhallefât ve nükûdı ne minvâl üzere mümzî ve mahtûm merkûmâna teslîm ve taraf-ı beytü’l-mâle irsâl ve îsâl itdirmekde mesâlih-i cemîle buyuralar ve siz ki serdarların tavâif-i mezbûrların bazı eylediğiniz beytü’l-mâl ve nükûdu bi’l-cümle mümzî ve mahtûm müfredât defterleriyle merkûmâna teslîm eyleyüp bir nesne ketm ve ihfâ eylemekden begâyet ihtirâz eyleyesiz şöyle ki zikr olunan beytü’l-mâlden bir nesne ihfâ idecek olursanız sonra bir vechle cevâba kâdir olamayup mu‘âteb olmanız mukarrerdir ve taht-ı hükûmetlerinizde ehl-i sefer yeniçeri ve topçu ve cebeci neferâtı me’mûr oldukları sefer-i hümâyûna serhadlerine yollayup ve korucu ve oturak olanları dahi bi’l-cümle Âsitâne-i Sa‘âdete irsâl eyleyesiz şöyle ki tavâif-i mezbûrdan himâyesi ile bir ferd kalmak ihtimâli olursa her vechle ikâb olmanız mukarrerdir şöyle bilüp mektûb ile âmil olasız fî evâyil-i Şehr-i Rebiülâhir sene sitte ve tis‘în ve elf
El-fakîr Zülfikar ağayân-ı Yeniçeriyân-ı Dergâh-ı âlî hâlâ Kayd fî 10 Cemâziyel evvelî sene 96
154/65-3
Ahalinin Şikayetçi Olduğu Muhzırların Görevden Alınması
Meclis-i şerîfleri savbına da‘vât-ı lâyıka ittihâfıyla inhâ olunur ki ashâbü’l-mektûb Mağnisa ahâlisi Mağnisa mahkemesinde muhzır olan Ebubekir ve Mustafa ve Hüseyin nâm kimesneden teşekkî idüp muhzır olmalarıyla bazı fesâd itmelerini
131
ihbâr idüp mezbûrlar hizmet-i muhzıriyyeden men‘ ve hacr olunmak üzere emr-i sultânî isdâr itmişleri gerekdir ki ber-mûceb-i emr-i âlî mezbûrları men‘ ve hacr idüp hizmet-i mezbûrede istihdâm itmeyesin bâkî der-seccâde-i şerîf bâd
Fi’l-muhlis Ali el-fakîr gufire anh Kayd fî 10 min Cemâziyelevvelî sene 96
154/66-1
Manisa’ya Kadı Tayini
Akzâ kuzâtü’l-müslimîn evlâ vülâtü’l-muvahhidîn ma‘denü’l-fazl ve’l-yakîn hüccetü’l-hak ale’l-halkı ecma‘în vâris-i ulûmi’l-enbiyâi ve’l-mürselîn el-muhtass bi-mezîdi inâyeti’l-meliki’l-mu‘în sâbıkan Kayseriye kadısı olan Mevlânâ Ömer zîde fezâilluhû tevkî‘u refî‘u hümâyûn vâsıl olıcak ma‘lûm ola ki sen ehl-i ilm ve sâhib-i fazîlet ve müteferri‘ ve dindâr olduğun ecilden hâliyâ hakkında mezîd-i inâyet-i aliyye-i şâhâne ve meziyet-i râfet-i seniyye-i pâdişâhî zuhûra getürilüp işbu sene sitte ve tis‘în ve elf Cemâziyelevvelî gurresinden zabt itmek üzere hatt-ı hümâyûn-ı sa‘âdet-makrûnumla Mağnisa kazâsı sana tevcîh ve inâyet idüp i‘lâmiçün ta‘yîn olunmuşdur buyurdum ki vusûl buldukda hatt-ı hümâyûn-ı sa‘âdet-makrûnumla sâdır olan fermân-ı celîlü’l-kadrim mûcibince kazâ-i mezbûre gurre-i şehr-i mezbûrdan zabt etmek üzere sen mutasarrıf olup ahâlisi beyninde icrâ-yı ahkâm-ı şer‘iyye-i nebeviye ve infâz-ı evâmir-i aliyye-i Mustafavî zıllullâhı te‘âlâ alâ şâri‘ihâ bezl-i makdûr ve sa‘y-i nâ-mahsûr eyleyüp ve mu‘accelen ademin gönderüp berâtın ihrâc itdirüresin şöyle bilesin alâmet-i şerîfe i‘timâd kılasın tahrîren fî evâsıt-ı Şehr-i Rebiülâhir li-sene sitte ve tis‘în ve elf
Be-makâm-ı Edirne el-mahrûse
Kayd fî 29 min şehr-i Rebiülâhir sene 96
154/66-2
Resm-i Âdât İltizamı
Fazîletlü Efendi hazretlerinin huzûrlarına muhibbâne inhâmız budur ki işbu bin doksan altı Cemâziyelevvelinin gurresinden nefs-i Mağnisa’da vâki‘ olan resm-i âdât tarafımızdan kıdvetü’l-emâsil ve’l-akrân Hasan Çelebi’ye virmişizdir
132
me’mûldür ki mu‘tâd-ı kadîm üzere tarafımıza âid olan resm-i âdata mezbûr Hasan Çelebi’ye zabt itdirüp müdâhale itdirmeyesiz tahrîren fî mâh-ı mezbûr sene 96
Bâkî (tahrip olmuş)
Kayd fî 4 min Cemâziyelevvel sene 97 El-fakîr Ca‘fer kâimmakâm-ı Saruhan hâlâ
154/66-3