saniye ashabından Viranşehir Sancağı Ka’imakamı Hakkı zîde ‘uluvvuhûya ve Viranşehir Na’ib ve Müftüsü zîde ‘ilmühuya ve a‘za-yı meclis zîde kadruhûma hüküm
Viranşehir Sancağı dahilinde kâ’in Emasiri Kazası’na tabi‘ Karonlı Divanında vaki‘ Serdaroğlu Karyesi sakinlerinden olub bundan akdem katîlen vefât iden Hüseyin bin Mehmed’in veraseti vâlidesi Hanife bint-i Kara Hüseyin ile li-ebeveyn erkarındaşları ‘Ali ve Ahmed ve Mehmed ve li-ebeveyn kızkarındaşı İcres ve Mecnune Ayşe’ye muhzıra olduğu ba‘de’t-tahakku’ş-şer‘î ümm-i mezbûre Hanife bi’l-verase ve
Mecnune-i mezbûre Ayşe tarafından bi’l-vesaye ve li-ebeveyn-imezbûrun ‘Ali ve Ahmed ve Mehmed bi’l-asale Bartın Kazası’na tabi‘ Lostorabe Divanında vaki‘ Beyroğlu Karyesi sakinlerinden Çavuşoğlu Mehmed bin Hasan ve yine kaza-i mezbûra tabi‘ Terke Karyesi ahalisinden Ceynazoğlu Halil bin Mehmed ve Menet Divanında vaki‘ Garkaoğlu Karyesi sakinlerinden Kara İbrahim oğlu İbrahim ile meclisde bi’l- asale ve bi’l-vesaye hin-ü terâfü‘lerinde mezbûr Mehmed ile merkûman Halil ve İbrahim Cebecioğlu Mehmed’in menziline dühûl iderek sanduğını gasb ve ahz ile firar eyledikleri ahali-i karyenin ma‘lûmu oldukda arkalarından yetişüb sandık mezkûru hamil olan mezbûr İbrahim’i sandık ile beraber ahz ve girifte eylemeleriyle refikleri bulunan merkûman Mehmed ve Halil mezbûr İbrahim’in tahlisi içün ‘avdet ve ahali-i merkûme üzerine hücum iderek ba‘zı kimesneyi darb ve cerh itdikden sonra merkûm Mehmed mütevefa-yı merkûm Hüseyin’in sağir mil bıçağıyla sağ böğrüne bi-gayr-ı hak ‘amilen darb ve cerh iderek müte’essiren vefât eylediği ‘udûl-u ahrar-i ricâl-i müslimiyetten ve Serdar Karyesi ahalisinden Serdaroğlu İbrahim bin ‘Osman ve diğer Serdaroğlu İbrahim bin Mehmed nam kimesneler şahâdetleriyle sabit ve katil-i merkûm Mehmed’in icrâ-yı kısasına hükm-i şer‘î lahık olmuş olduğu bâ-mazbata ve i‘lâm inhâ olunmuş ve mufad-ı i‘lâma nazaren maktûl-u mezbûr Hüseyin’i katil-i merkûm Mehmed’in mucebi kısas olan katl ile katl eylediği şahidan-ı mezbûran şahâdetleriyle sabit olmuş olmağın bu suretde ümm-i mezbûre ile uhuvvet-i merkûmun yahud bunlardan biri katil-i merkûmu kısasdan ‘afv itmedikleri halde bizzatihi huzurlarında talebleriyle katil-i mezbûr Mehmed’e icrâ-yı kısas olunmak ve merkûman Halil ve İbrahim’e takrir-i ikâme kılınmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan ber-muceb-i kayd-ı fetvahane li-ümm-i mezbûre ile uhuvvet-i merkûmun yahud bunlardan biri katil-i merkûmu kısasdan ‘afv itmedikleri halde huzurlarında talebleriyle katil-i mezbûr Mehmed’e icrâ-yı kısas olunması ve eğer bunlardan biri ‘afv ider veya sulh olur ise ol-halde kısas-ı sakıt ve mes’ele-i diyete münkalib olacağından icab-ı şer‘înin ifâsıyla habsi tarihi gösterilerek katil-i merkûmun icrâ-yı mücâseret-i kanûniyesi zımnında bu tarafa gönderilmesi ve refikleri bulunan merkûman Halil ve İbrahim’in harekât-ı vakı‘aları kutta‘-i tarîk derecesinde bulunmağla merkûmanın dahi yedişer sene müddetle küreğe konulmak içün tarih-i habslerinin beyanıyla beraber bu tarafa irsal olunmaları babında lazım gelen emr- i şerifimin ahrarı meclis-i vâlâ-yı ahkâm-ı ‘adliyemden bâ-mazbata ifade olunmuş ve ol- vechile icrâ-yı iktizası hususuna emr ve irade-i seniyye-i mülûkânem ta‘alluk ve
şerefsüdûr olmuş olmağın siz ki vâlî-i müşâr ve ka’imakam ve Na’ib ve müftü vesa’ir mûmâ-ileyhimsiz ma‘lûmunuz oldukda ber minval-i muharrer icrâ-yı ahkâm-ı şeri‘at-ı garraya müsaberet ve ‘alâ kile’t-takdireyn keyfiyeti der-bar-ı şevket-karar mülûkâneme tahrir ve iş‘ara ve merkûman Halil ve İbrahim’in dahi ber minval-i muharrer küreğe konulmak üzere tarih-i habslerinin beyanıyla beraber bu tarafa i‘zam ve irsale mübaderet eyleyesiz
Fî Evâsıt-ı R (Rebî‘ü’l-Âhir) Sene (12)75 (18 - 27 Kasım 1858)
S.54-55/B.98: (S.54) Katil-i merkûm İsma‘il’in verese-i merkûmun huzurlarında
kısas icrâ olunduğu natık varıd olan i‘lâm ve mazbata ve inhâ me’alleri bâ-ferman-ı ‘ali şerh virildi.
Fî 29 Safer Sene 1276 (27 Eylül 1859)
Ankara Sancağı’nda kâ’in Bayat İli Kazası’na tabi‘ Lozmeş Karyesi sakinlerinden ve müşahid-i eşkıyadan Kanlı Mahmud’un ahrar buyrulan işbu ferman-ı ‘ali mucebince icrâ-yı kısası sırada meclisde beraber bulunan mücriminden bir takım adam ile bir takrib firar ile ol-havâlide icrâ-yı şekâvet eyledikleri haber alındığının üzerine ahz ve giriftleri içün gönderilen neferat-ı muzafeya teşhir-i silah itmeleriyle berü tarafdan dahi olunan mukabelede merkûm Mahmud ile üç nefer rüfekası i‘dâm olunub ve (okunmuyor) dört neferi firar itmiş olduğu Kastamonu Bolu meclislerinin varıd olan iki kıt‘a mazbatalarında beyan olunmuş olduğundan bu halde merkûmun dahi hedr olub kimesne hakkında şer‘an birşey terettüb itmeyeceğinin beyanıyla beraber firarî-i merkûmların bi’t-tehaddi der-destleriyle def‘-i muzırratlarına i‘tina olunmasının Kastamonu Vâlîsi Paşa hazretlerine iş‘ar ile merkûm Mahmud’un şu suretle telef idilmiş idüğünün ferman-ı ‘ali-i mezkûr kaydı bâlâsına şerh virilmesinin dahi (okunmuyor) bildirilmesi meclis-i vâlâ-yı ahkâm-ı ‘adliyemden bâ-mazbata ifade olunmuş olmağla mucebince iş bu mahalle şerh virildikten sonra zikr olunan mazbatalar bab-ı ‘ali evrâk odasına virilmiştir
Fî 20 Rebî‘ü’l-Âhir Sene (1)276
Mülhakatıyla Bozok Eyâleti Vâlîsi ve mecidiye-i nişâne hümâyûnumun ikinci rütbesinin ha’iz ve hasıl vezirim Hayreddin Paşa iclâlehûya ve mirmiran-ı kiramdan Ankara Sancağı Ka’imakamı Rıza Paşa dâme ikbalühûya ve Ankara Na’ib ve Müftüsü zîde ‘ilmühuya ve a‘za-yı meclis zîde kadruhûma hüküm
Ankara Sancağı dahilinde vaki‘ Bayat İli Kazası’na tabi‘ Lozmeş Karyesi sakinlerinden olub bundan akdem maktûlen fevt olan Hasan bin Halil’in veraseti zevcesi Emine bint-i ‘Abdullah ve sulbi kebir oğulları Bekir ve İbrahim ve İsma‘il ve Ahmed ile sulbiye-i kebire kızları Şerife ve Kezban ve diğer Emine’ye muhzıra olduğu ba‘de’t-tahakku’ş-şer‘î merkûm Bekir verese-i mezbûrun İbrahim ve Ahmed ve Emine ve Şerife ve Kezban ve diğer Emine tarfından vekâleten ve asalaten ve merkûm İsma‘il dahi asaleten mezkûr Lozmeş Karyesi ahalisinden Mahmud bin Mustafa ve diğer İsma‘il bin Mustafa nam kimesneler ile meclisde ber nehc-i şer‘î hin-ü terâfü‘lerinde beynlerinde vuku‘ bulan münâza‘adan dolayı merkûm Mahmud ve İsma‘il yedlerinde bulunan alet-i cariheden kebir teke bıçağı ile maktûl-u mezbûr Hasan’ın sol kolu altından ve omzu başından ma‘an ve bi-gayr-ı hak ‘amden darb ve cerh eylediklerinden müte’essiren yigirmi sa‘at mürûrunda vefât eylemiş olduğu karye-i mezbûre ahalisinden Mehmed bin İbrahim ve Hüseyin bin Ebubekir nam kimesneler şahâdetleriyle sabit ve katilan-ı merkûmanın kısaslarına hükm-i şer‘î lahık olmuş olduğu bâ-i‘lâm ve mazbata inhâ olunmuş ve mufad-ı i‘lâma nazaren maktûl-u mezbûr Hasan’ı katilan-ı merkûman Mahmud ve İsma‘il’in muceb-i kısas olan katl ile katl eyledikleri şahidan-ı mezbûran şahâdetleriyle sabit olmuş olmağın bu suretde verese-i mezbûre yahud içlerinden birisi katilan-ı merkûmanı kısasdan ‘afv itmedikleri halde mecmu‘ veresenin bizzatihi huzurlarında talebleriyle katilan-ı merkûman Mahmud ve İsma‘il’e icrâ-yı kısas lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan ber-muceb-i kayd-ı fetvahane verese-i mezbûre veyahud içlerinden birisi katilan-ı (S.55) merkûmanı kısasdan ‘afv itmedikleri halde bizzatihi huzurlarında talebleriyle katilan-ı merkûmana icrâ-yı kısas olunması ve eğer ‘afv ider veye sulh olur ise ol-halde kısas-ı sakıt ve mes’ele-i diyete münkalib olacağından icab-ı şer‘înin icrâsıyla katilan-ı merkûman hakkında mu‘amele-i kanûniye icrâ olunmak üzere keyfiyetin bâ-mazbata ve i‘lâm inhâ olunması babında lazım gelen emr-i şerifimin ahrarı meclis-i vâlâ-yı ahkâm-ı ‘adliyemden bâ-mazbata ifade kılınmış ve ol-vechile icrâsı hususuna irade-i seniyye-i mülûkânem ta‘allukuyla emr-i hümâyûn-u şâhâneme sünûh ve südûr eylemiş olmağın siz ki vâlî-i müşâr ve ka’imakam ve Na’ib ve müftü
vesa’ir mûmâ-ileyhimsiz keyfiyet-i ma‘lumunuz oldukda ber minval-i muharrer ‘amil ve harekete icrâ-yı ahkâm-ı şeri‘at-ı garraya müsaberet ve ‘alâ kile’t-takdireyn keyfiyeti der-bar-ı şevket-karar mülûkâneme tahrir ve iş‘ara mübaderet eyleyesiz
Fî Evâhir-i R (Rebî‘ü’l-Âhir) Sene (12)75 (28 Kasım - 7 Aralık 1858) S.55/B.99: Bir sureti
‘Irak ve Hicaz ordu-yı hümâyûn müşirliği inzimamıyla Bağdad Eyâleti Vâlîsi olub serdar-ı ekremlik ‘ünvanını ve mecidiye ve imtiyaz-ı nişâne hümâyûnlarımın birinci rütbelerini ha’iz ve hasıl olan vezir-i virasetimden ‘Ömer Paşa iclâlehûya ve Bağdad kadısı zîdetu fezâ’ilühûya ve a‘za-yı meclise
Memalik-i İraniyeden Borsitan’a tabi‘ Pidelü Aşireti’nden olub katîlen vefât iden Rıza bin Rahmete’s-ser’in veraseti zevcesi Herme bint-i Nazır ‘Ali ile mezbûreden mütevellid sulbi sağir oğlu Mehmed ‘Ali ve sulbiye-i sağire kızı Redve’ye muhzıra olduğu ba‘de’t-tahakku’ş-şer‘î zevce-i mezbûre Herme sağiran-ı mezbûran tarafından bi’l-vekâle ve bi’l-asale Bağdad’a muzayafa Menrelciye Kazası kurasından Kazaniye Karyesi’nde Çay Mahallesi ahalisinden ve Kürdi Aşireti’nden ‘Ali bin Dağyirağ ile müvehhiren meclisde ber nehc-i şer‘î hin-ü terâfü‘lerinde katil-i merkûm ‘Ali kendi menzilinde merkûm Rıza’yı kılıç ile bi-gayr-ı hak ‘amden darb ve cerh iderek müte’essiren ol-anda fevt olduğu mukaddemâ ikrâr eylediği zevce-i mezbûre da‘vâ itmiş ve merkûm ‘Ali dahi mukaddema vuku‘ bulan ikrârı kazib idüğünü beyan eylemiş olmasıyla merkûm ‘Ali katil-i merkûm ‘Ali’in ikrâr-ı mezkûrunda kazib olmadığına müdda‘ine mezbûre bi’t-taleb tehlif olunarak bu vechile mü’ehhiren katil-i merkûm ‘Ali’nin kısasına hükm-i şer‘î lahık olmuş olduğu bâ-i‘lâm ve mazbata inhâ olunmuş ve mufad-ı i‘lâma nazaren müdda‘ine-i mezbûre Herme bi’l-asale ve bi’l-vesaye tasaddi eylediği zevci ve mevarisi Rıza’yı muceb-i kısas olan katl ile katl eylediği mukaddema tav‘an ikrâr-ı müra‘asını müdda‘i ‘Ali’ye merkûm ‘Ali tav‘an ikrâr ve i‘tiraf idüb ancak mukaddema katil-i mezkûru ikrârında kazib olduğunu irad itmekle mezbûre Herme merkûm ‘Ali ikrâr-ı mezkûrda kazib olmadığına bi’t-taleb tehlif olunmuş olunduğu beyandan ‘ibaret olmağın bu suretde mezbûr Herme kısasdan ‘afv itmediği halde bizzatihi huzurlarında talebiyle merkûm ‘Ali ikrârı mucebince ber nehc-i şer‘î kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan ber-muceb-i kayd-ı fetvahane maktûl-u mezbûrun zevcesi ve sağir
ve sağire evladlarının vasîsi Herme kısasdan ‘afv itmediği halde bizzatihi huzurlarında talebleriyle merkûm ‘Ali’nin ikrârı mucebince icrâ-yı kısası ve eğer mezbûre katil-i merkûmu kısasdan ‘afv ider veya sulh olur ise ol-halde kısas-ı sakıt ve mes’ele-i diyete münkalib olacağından icab-ı şer‘înin icrâsıyla katil-i merkûmun yedi sene müddetle mahallinde vaz‘-ı pranga olunması babında lazım gelen emr-i şerifimin ahrarı meclis-i vâlâ-yı mezkûrdan bâ-mazbata ifade kılınmış olduğu beyanıyla
Aslına tatbiken S.55-56/B.100: (S.55) Mirmiran-ı kiramdan Mar‘aş Sancağı Mutasarrıfı Hurşid Paşa dâme ikbâlühûya ve Mar‘aş Na’ib ve Müftüsü zîde ‘ilmühuya ve a‘za-yı meclis zîde kadruhûma hüküm
Mar‘aş’da ‘Alemli Mahallesi sakinlerinden olub bundan akdem katîlen vefât iden Mustafa ibn-i Hacı ‘Ali’nin veraseti babası merkûm ‘Ali ve vâlidesi Hatice bint-i ‘Ali’ye inhisârı ba‘de’t-tahakku’ş-şer‘î ebeveyn-i merkûman liva-i mezbûr dahilinde kâ’in Senmanli ‘Aşireti ahalisinden Bektaş İbn-i Yusuf ile meclisde ber nehc-i şer‘î hin-ü terâfü‘lerinde merkûm Bektaş mütevefa-yı merkûmu yedinde bulunan tüfenk kurşunuyla sol memesi altından ‘amden ve bi-gayr-ı hak darb ve cerh iderek müte’essiren vefât eylediği ahrar-i ricâl-i müslimiyetden ve mezkûr ‘Alemli Mahallesi ahalisinden Mehmed ‘Ali bin ‘Ömer ve Homefli Mahallesi ahalisinden ‘Ömer ibn-i İbrahim nam kimesneler şahâdetleriyle sabit ve mütehakkık ve katil-i merkûmun icrâ-yı kısasına hükm-i şer‘î lahık olmuş olduğu bâ-mazbata ve i‘lâm inhâ olunmuş ve mufad-ı i‘lâma nazaren maktûl-u merkûm Mustafa’yı katil-i mezbûr Bektaş’ın muceb-i kısas olan katl ile katl eylediği şahidan-ı mezbûran şahâdetleriyle sabit olmuş olmağın bu suretde li-ebeveyn-i mezbûran yahud birisi katil-i mezbûru kısasdan ‘afv itmedikleri halde bizzatihi huzurlarında talebleriyle katil-i merkûm Bektaş’a icrâ-yı kısas lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan ber-muceb-i kayd-ı fetvahane ebeveyn-i merkûman yahud birisi katil-i merkûmu kısasdan ‘afv itmedikleri halde bizzat huzurlarında talebleriyle katil-i merkûma icrâ-yı kısas olunması ve eğer merkûmandan birisi ‘afv ider veya sulh olur ise ol-halde kısas-ı sakıt ve mes’ele-i diyete münkalib olacağından icab-ı şer‘înin icrâsıyla katil-i merkûmun icrâ-yı mücâsereti zımnında habsi tarihi (S.56) gösterilerek bu tarafa irsali babında lazım gelen emr-i şerifimin ahrarı meclis-i vâlâ-yı ahkâm-ı ‘adliyemden bâ-mazbata ifade olunmuş ve keyfiyet-i taraf-ı eşref şâhâneme ‘arz ile lede’l-istîzân ber
minval-i muharrer icrâsı hususuna irade-i seniyye-i mülûkânem ta‘allukuyla emr-i hümâyûn-u şâhâneme sünûh ve südûr itmiş olmağla siz ki mutasarrıf ve Na’ib ve müftü vesa’ir mûmâ-ileyhimsiz ma‘lumunuz oldukda ber minval-i meşrûh icrâ-yı ahkâm-ı şeri‘at-ı garraya müsaberet ve ‘alâ kile’t-takdireyn keyfiyet-i der-bar-ı şevket-karar mülûkâneme tahrir ve iş‘ara mübaderet eyleyesiz
Fî Evâi’l-i CÂ (Cemâziye’l-Evvel) Sene (12)75 (7 - 16 Aralık 1858) S.56/B.101: Ber-mentuk-u ferman-ı ‘adalet ‘unvân katil-i merkûmun verese-i
maktûl huzurlarında icrâ-yı kısasına ibtidâr olunmuş olduğu natık varıd olan i‘lâm ve mazbata me’alleri bâ-ferman-ı ‘ali şerh virildi.
Fî Gurre-i Receb Sene (12)75 (4 Şubat 1859)
Bir sureti
Rumili Beğlerbeğiliği payelûlerinden Hersek Sancağı Mutasarrıfı olub mecidiye- i nişâne hümâyûnumun üçüncü rütbesini ha’iz ve hasıl olan Vasıf Paşa dâmet ma‘aliyeye ve Mostar Kazası Na’ib ve Müftüsü’ne ve a‘za-yı meclis-i zîde kadruhûma
Hersek Sancağı dahilinde kâ’in Gacka Kazasında vaki‘ Menodya Mahallesi sakinlerinden olub bundan akdem katîlen vefât iden ‘Ali İbn-i Ahmed’in veraseti zevcesi Hanife bint-i Mehmed ve sulbi kebir oğlu Muharrem ve sağir oğulları Zeynel ve Süleyman ve sağire kızı Fatma’ya inhisârı ba‘de’t-tahakku’ş-şer‘î zevce-i mezbûre dahi mütevefiye olmasıyla anın dahi veraseti sadri kebir oğlu merkûm Muharrem ile sağirun mezbûrana muhzıra olmağla merkûm Muharrem bi’l-asale ve sağirun mezbûrun tarflarından bi’l-vesaye kaza-i mezbûra tabi‘ Yebde Karyesi mütemekkinlerinden ve hudud mer’vesesinden Lofica veled Koben ile meclisde ber nehc-i şer‘î hin-ü terâfü‘lerinde merkûm Lofica cend-i nefer-i hebadid ile esna-yı rahda mütevefa-yı merkûmun üzerine kurşun andahatıyla sağ memesi üzerinden darb ve cerh eylediklerinden sonra merkûm ‘Ali can havli ile kendisini kaldırım üzerine atub (silik) ve merkûm Lofica derun gelüb belinde bulunan yatağan bıçağıyla mütevefa-yı merkûm ‘Ali’nin (okunmuyor) kat‘ ile katl eylemiş olduğu ahrar-i ricâl-i müslimiyetden ve mezbûr Menodya Mahallesi ahalisinden Murad ibn-i Hacu Korto Beğ ve Mahmud ibn-i İbrahim nam kimesneler şahâdetleriyle sabit ve mütehakkık ve katil-i merkûmun icrâ-yı
kısasına hükm-i şer‘î lahık olmuş olduğu bâ-mazbata ve i‘lâm inhâ olunmuş ve mufad-ı i‘lâma nazaren maktûl-u merkûm ‘Ali’yi katil-i mersum Lofica’nın muceb-i kısas olan katl ile katl eylediği şahidan-ı mezbûran şahâdetleriyle sabit olmuş olmağın bu suretde vereseden kebir mezbûr katil-i mersumu kısasdan ‘afv itmediği halde bizzat huzurlarında talebiyle katil-i mersum ber nehc-i şer‘î kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan ber- muceb-i kayd-ı fetvahane vereseden kebir-i mezbûr katil-i merkûmu kısasdan ‘afv itmediği halde bizzat huzurlarında talebleriyle katil-i mersum Lofica’ya icrâ-yı kısas olunması ve eğer ‘afv ider veya sulh olur ise kısas-ı sakıt ve mes’ele diyete münkalib olacağından icab-ı şer‘înin ifâsıyla katil-i merkûmun icrâ-yı mücâsereti zımnında keyfiyetin bâ-i‘lâm ve mazbata iş‘ârı babında lazım gelen emr-i şerifimin ahrarı meclis-i vâlâ-yı mezkûrdan bâ-mazbata ifade olunduğu beyanıyla
Aslına tatbiken
S56-57/B.102: (S.56) Bir sureti
Mülhakatıyla Yanya Eyâleti Vâlîsi Vezir Hasan Paşa iclâlehûya ve mirmiran-ı kiramdan Berat Sancağı Ka’imakamı Hüseyin Paşa dâme ikbâlühûya ve Berat Na’ib ve Müftüsü’ne ve a‘za-yı meclise
Berat Kazası’na tabi‘ Tozar Karyesi sakinlerinden olub katîlen vefât iden Selim bin Vatse’nin veraseti zevcesi Hoşa bint-i Salih ve vâlidesi Hevi bint-i Süleyman ve sulbi sağir oğlu Hayrullah ve sulbiye-i sağire kızı Zeyneb’e muhzıra olduğu ba‘de’t- tahakku’ş-şer‘î sağiran-ı mezbûran vasî-i mensubeleri ümm-i mezbûre Hevi ve zevce-i mezbûre Hoşa taraflarından tevkil olunmuş olan Sebulce bin Zebye kaza-i mezbûra tabi‘ Tarpan Karyesi sakinlerinden Da’iblan ibn-i Cafer nam kimesne ile meclisde ber nehc-i şer‘î hin-ü terâfü‘lerinde merkûm Da’iblan mütevefa-yı merkûmun sağ kasığının altından piştov kurşunuyla bi-gayr-ı hak darb ve cerh iderek müte’essiren vefât eylediği tav‘an ikrârıyla sabit ve mütehakkık ve katil-i merkûmun icrâ-yı kısasına hükm-i şer‘î lahık olmuş olduğu bâ-mazbata ve i‘lâm inhâ olunmuş ve mufad-ı i‘lâma nazaren maktûl-u mezbûr Selim’i katil-i merkûm Da’iblan’ın muceb-i kısas olan katl ile katl eylediği tav‘an ikrârıyla (S.57) ikrarıyla sabit olmuş olmağın bu suretde kebirnan-ı mezbûrnan yahud bunlardan biri katil-i mezbûru kısasdan ‘afv itmedikleri halde bizzatihi huzurlarında talebleriyle katil-i merkûm Da’iblan ber nehc-i şer‘î kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret
kılınmış olduğundan ber-muceb-i kayd-ı fetvahane kebirnan-ı mezbûran veyahud içlerinden biri katil-i mezbûru kısasdan ‘afv itmedikleri halde bizzat huzurlarında katil-i merkûm Da’iblan icrâ-yı kısas olunması ve eğer biri ‘afv ider veya sulh olur ise ol-halde kısas-ı sakıt ve mes’ele-i diyete münkalib olacağından icab-ı şer‘înin ifâsıyla katil-i merkûmun icrâ-yı mücâsereti zımnında habsi tarihi gösterilerek bu tarafa irsali babında lazım gelen emr-i şerifimin ahrarı meclis-i vâlâ-yı mezkûrdan bâ-mazbata ifade olunduğu beyanıyla
Kezâlik S.57/B.103: Mirmiran-ı kiramdan Musul Eyâleti Mutasarrıfı Veysi Paşa dâme ikbâlühûya ve Musul Na’ib ve Müftüsü zîde ‘ilmühuya ve a‘za-yı meclise hüküm
Musul’da kâ’in Nakışlı Hamam Mahallesi sakinlerinden olub bundan akdem katîlen vefât iden Hasan bin Yunus’un veraseti zevcesi Sa‘ide bint-i Mahmud ve vâlidesi Şama bint-i Cercesi ile zevce-i mezbûre batınında (okunmuyor) cümle muhzıra olduğu ba‘de’t-tahakku’ş-şer‘î verese-i mezbûre yine mahalle-i mezbûre sakinlerinden İsma‘il bin ‘Ali nam kimesne ile meclisde ber nehc-i şer‘î hin-ü terâfü‘lerinde mütevefa-yı merkûm ile beynlerinde tahaddüs iden münâza‘adan dolayı merkûm İsma‘il yedinde bulunan hançer ta‘bir olunur bıçak ile mütevefa-yı merkûm Hasan’ı sol omzundan ve boğazı altından bi-gayr-ı hak ‘amden darb ve cerh iderek müte’essiren vefât eylediğini tav‘an ikrâr-ı ricâl-i ahrar-i müslimiyetden ve Cami‘-i Hazam Mahallesi ahalisinden ‘Abdültayf bin Mehmed ve Zaviye Hamamı Mahallesi ahalisinden Mehmed bin Zalnon nam kimesneler şahâdetleriyle sabit ve mütehakkık ve katil-i merkûmun kısasına hükm-i şer‘î lahık olmuş olduğu bâ-mazbata ve i’lâm inhâ olunmuş ve mufad-ı i’lâma nazaren katil-i mezbûr İsma‘il’in maktûl-u merkûm Hasan’ı muceb-i kısas olan katl ile katl eylediğini tav‘an ikrârıyla şahidan-ı mezbûran şahâdetleriyle sabit olmuş olmağın bu suretde katil-i merkûmun ikrâr-ı meşrûhu tav‘an olunduğu da‘vâda dahi takrir olunmuş ise verese-i mezbûre yahud içlerinden biri katil-i mezbûru kısasdan ‘afv itmedikleri halde bizzatihi huzurlarında talebleriyle katil-i merkûm İsma‘il’e icrâ-yı kısas olunması lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan ber-muceb-i kayd-ı fetvahane verese-i mezbûre yahud içlerinden biri katil-i merkûmu kısasdan ‘afv itmedikleri halde bizzat huzurlarında talebleriyle katil-i merkûm İsma‘il’e icrâ-yı kısas olunması ve eğer ‘afv ider veya sulh olur ise ol-halde kısas-ı sakıt ve mes’ele-i diyete münkalib olacağından icab-ı şer‘inin