Mülhakatıyla Sayda Eyâleti Vâlîsi ve mecidiye-i nişâne hümâyûnun birinci rütbesinin ha’iz ve hasıl vezirim Mehmed Hurşid Paşa iclâlehûya ve Beyrut kadısı zîdetu fezâ’ilühûya ve a‘za-yı meclis zîde kadruhûma hüküm
Sayda Eyâleti dahilinde kâ’in Cebel-i Lübnan Nasârâ ka’imakamlığına tabi‘ Ba‘ira Karyesi ahalisinden ve teba‘a-i devlet-i ‘aliyemden katîlen vefât iden Yeşare Yusuf ‘un velâyeti li-ebeveyn erkarındaşı Yusuf’a ve kızkarındaşı Mera’ya inhisârı ba’de’t-tahakkuku’ş-şer‘î verese-i merkûman yine karye-i mezbûre ahalisinden ve teba‘a-i devlet-i ‘aliyemden Yusuf bin Sa‘id ile meclisde ber nehc-i şer‘î hin-ü terâfü‘lerinde Beyrut civarında Mehalne İspayi derununda merkûm Yusuf’a tekaddüm katl kasdıyla mütevefâ-yı merkûm Yeşare’yi bıçak ile sol memesi üzerinden ‘amden darb ve cerh iderek müte’essiren vefât eylediği karye-i mezbûre ahalisinden ve teba‘a-i devlet-i ‘aliyeden ‘Abdürrezzak bin Sahun ve Vavı-yı Şehrûr Karyesi sakinlerinden Potrus nam kimesneler şahâdetleriyle sabit ve mütehakkık ve katil-i merkûmun icrâ-yı kısasına hükm-i şer‘î lahık olmuş olduğu bâ-mazbata ve i‘lâm inhâ olunmuş ve mufad-ı i‘lâma nazaren katil-i merkûm Yusuf’un maktûl-u merkûm Yeşare’yi muceb-i kısas olan katl ile katl eylediği şahidan-ı mersuman şahâdetleriyle ber nehc-i şer‘î sabit olmuş olmağın bu suretde ümm-i mezbûre ile uht-u mezbûreden biri katil-i mersum Yusuf’u kısasdan ‘afv itmediği halde bi şett-hüsema(?) huzurlarında talebleriyle katil-i merkûm Yusuf’a kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış ve keyfiyet-i tatbik-i kavanin cem‘iyetine lede’l-havale katil-i merkûm Yusuf’un maktûl-u merkûm Yeşare’yi muceb-i kısas olan katl ile katl eylediği ber nehc-i şer‘î sabit olmasıyla ber-muceb-i kayd-ı fetvahane vereseden biri katil-i merkûm Yusuf’u kısasdan ‘afv itmediği halde bi şett-hüsema(?) huzurlarında talebleriyle katil-i merkûm Yusuf’un icrâ-yı kısası ve eğer ‘afv ider veya sulh olurlar ise ol-halde kısas-ı sakıt olacağından muceb-i şer‘inin icrâsıyla keyfiyetin bâ-mazbata ve i‘lâm-ı iş‘ârı bâ-müzekkere beyan olunmuş olduğundan ol-babda iktiza iden emr-i şerifimin ahrarı meclis-i vâlâ-yı mezkûrdan bâ-mazbata ifade olunduğu beyanıyla
S.46-47/B.82: (S.46) Ber-mentûk-u emr-i ‘ali katil-i merkûmun verese-i maktûl
huzurunda icrâ-yı kısasına ibtidâr olduğunu natık varıd olan mazbata ve tahrirat me’alleri bâ-ferman-ı ‘ali şerh virildi.
Fî 15 R (Rebî‘ü’l-Âhir) Sene (12)75
(22 Kasım 1858) Bir sureti
Mülhakatıyla İzmir Eyâleti Vâlîsi ve mecidiye-i nişâne hümâyûnun birinci rütbesinin ha’iz ve hasıl Vezir Mustafa Paşa iclâlehûya ve rütbe-i saniye ashabından Denizli Sancağı Ka’imakamı ‘İzzet zîde ‘uluvvuhûya ve Denizli Na’ib ve Müftüsü zîde ‘ilmühuya ve a‘za-yı meclis zîde kadruhûma
Denizli Sancağı’nda kâ’in Ezine Lazkiye nam-ı diğer Sarayköy Kasabası ahalisinden olub bundan akdem katîlen vefât iden Çakır oğlu Memiş bin Mehmed ‘Ali’nin veraseti vâlidesi Ayşe ve li-ebeveyn erkarındaşı Hasan ve kızkarındaşı Ayşe ve Şerife’ye muhzıra olduğu ba’de’t-tahakkuku’ş-şer‘î verese-i mezbûre yine kasabâ-i mezbûre ahalisinden Parmaksız oğlu Mehmed ‘Ali bin Mustafa ile meclisde ber nehc-i şer‘î hin-ü terâfü‘lerinde (S.47) merkûm Mehmed ‘Ali mütevefa-yı merkûm Memiş’i piştov kurşunuyla sol kasığından ‘amden ve bi-gayr-ı hak darb ve katl eylediği tav‘an ikrârıyla sabit ve mütehakkık ve katil-i merkûmun icrâ-yı kısasına hükm-i şer‘î lahık olmuş olduğu bâ-mazbata ve i‘lâm inhâ olunmuş ve ve mufad-ı i‘lâma nazaren katil-i merkûm Mehmed ‘Ali’nin maktûl-u mezbûr Memiş’i muceb-i kısas olan katl ile katl eylediği tav‘an ikrârıyla sabit olmuş olmağın bu suretde cümle verese veyahud içlerinden biri katil-i merkûmu kısasdan ‘afv itmediği halde bizzatihi huzurlarında talebleriyle katil-i merkûma ber nehc-i şer‘î icrâ-yı kısas lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış ve keyfiyet-i tatbik-i kavanin cem‘iyetine lede’l-havale katil-i merkûm Mehmed ‘Ali’nin maktûl-u mezbûr Memiş’i muceb-i kısas olan katl ile katl eylediği tav‘an ikrârıyla sabit olmuş olduğundan ber-muceb-i kayd-ı fetvahane cümle verese veyahud içlerinden biri katil-i merkûmu kısasdan ‘afv itmediği halde bizzat huzurlarında talebleriyle katil-i merkûmun icrâ-yı kısası ve ve eğer vereseden biri katil-i merkûmu ‘afv ider veya sulh olur ise ol-halde kısas-ı sakıt ve mes’ele diyete münkalib olacağından icab-ı şer‘inin icrâsıyla keyfiyetinin bâ-i‘lâm ve mazbata iş‘ârı bâ-müzekkere beyan olunmuş
olduğundan ol-babda iktiza iden emr-i şerifimin ahrarı meclis-i vâlâ-yı mezkûrdan bâ- mazbata ifade olunduğu beyanıyla
Kezâlik S.47/B.83: Mirmiran-ı kiramdan Niş Sancağı Mutasarrıfı olub mecidiye-i nişâne hümâyûnun üçüncü rütbesinin ha’iz ve hasıl olan Zeynel Paşa dâme ikbâlühûya ve Niş Na’ib ve Müftüsü’ne ve a‘za-yı meclis zîde kadruhûma hüküm
Niş Sancağı’nda vaki‘ Rolence Karyesi mütemekkinlerinden ve teba‘a-i devlet-i ‘aliyemden olub bundan akdem katîlen vefât iden Melanko veled Osnobko’nun veraseti anası Melena bint-i Radomer ile zevce-i metrûkesi Ezranko bint-i Osnanko ve sulbiye-i sağire kızı Bevanko’ya muhzıra olduğu ba‘de’t-tahakkuku’ş-şer‘î ümm ve zevce-i mezbûrnana yine karye-i mezbûre mütemekkinlerinden ve teba‘a-i devlet-i ‘aliyemden Nikoma veled İsnanko ile meclisde ber nehc-i şer‘î hin-ü terâfü‘lerinde maktûl-u merkûmun hanesine kurbünde harman yerinde merkûm Nikola maktûl-u merkûm Melanko’yu piştov kurşunuyla göğsünden bi-gayr-ı hak ‘amden darb ve cerh iderek müte’essiren vefât eylediği tav‘an ikrârıyla sabit ve mütehakkık ve katil-i merkûmun kısasına hükm-i şer‘î lahık olduğu bâ-mazbata i‘lâm inhâ olunmuş ve mufad-ı i‘lâma nazaren maktûl-u mersum Melanko’ya katil-i mesfur Nikola’nın muceb-i kısas olan katl ile katl eylediği tav‘an ikrârıyla sabit olmuş olmağın bu suretde vereseden kebirnan-ı mersumnan veyahud biri katil-i mesfuru kısasdan ‘afv itmedikleri halde bi şett- hüsema(?) huzurlarında talebleriyle katil-i mefsur ber nehc-i şer‘î kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış ve (okunmuyor) inhâya nazaren maktûl-u merkûm Melanko’ya katil-i merkûm Nikola’nın muceb-i kısas olan katl ile katl eylediği tav‘an ikrârıyla sabit olmuş olduğundan ber- muceb-i kayd-ı fetvahane verese-i maktûldan biri katil-i mekûmu kısasdan ‘afv itmediği halde bizzat huzurlarında talebleriyle katil-i merkûmun icrâ-yı kısası ve eğer verese-i mezbûrdan biri katil-i merkûmu kısasdan ‘afv itmediği halde kısas-ı sakıt ve mes’ele diyete münkalib olacağından iktiza-yı şer‘înin icrâsıyla keyfiyetin bâ-mazbata ve i‘lâm-ı iş‘ar olunması babında lazım gelen emr-i şerifimin ahrarı meclis-i vâlâ-yı ahkâm-ı ‘adliyemden bâ-mazbata ifade olunmuş ve keyfiyet-i taraf-ı eşref şâhâneme ‘arz ile lede’l-istîzân ber minval-i meşrûh icrâsı hususuna irade-i seniyye-i mülûkânem ta‘allukuyla emr-i hümâyûn-u pâdişâhâneme sünûh ve südûr eylemiş olmakdan naşi siz ki mutasarrıf ve Na’ib ve müftü vesa’ir mûmâ-ileyhimsiz keyfiyet-i ma‘lûmunuz
oldukda ber minval-i muharrer icrâ-yı ahkâm-ı şeri‘at-ı garraya müsaberet ve ‘alâ kile’t-takdireyn keyfiyeti dar-bar-ı şevket-karar mülûkâneme inhâ ve iş‘ârına mübaderet eyleyesiz
Fî Evâi’l-i S (Safer) Sene (1)275
(10 - 19 Eyül 1858)
S.47-48/B.84: (S.47) Rütbe-i saniye ashabından Alâiye Sancağı Ka’imakamı İskender Beğ zîde ‘uluvvuhûya ve Alâiye Na’ib ve Müftüsü zîde ‘ilmühuya ve a‘za-yı meclise hüküm
Alâiye Sancağı’na muzafe Kızılağaç Karyesi ahalisinden olub bundan akdem katîlen vefât iden Öksüz oğlu Hüseyin bin Mehmed’in veraseti zevcesi Fatma bint-i Hüseyin ile mezbûreden mütevellid sulbi sağir oğulları Mehmed ve Mustafa ve vâlidesi Ümmühan’a muhzıra olduğu ba‘de’t-tahakkuku’ş-şer‘î sağiran-ı mezbûranın vasî-i mensûbeleri zevce-i mezbûre Fatma ve mezbûre Ümmühan Hâtûnlar ile katil-i bulunan karye-i mezbûre ahalisinden Köne Hasan oğlu Kerim’in oğlu Hasan’ın meclisde ber nehc-i şer‘î hin-ü terâfü‘lerinde mezbûr Hasan yedinde bulunan kebir yatağan bıçağı ile mütevefa-yı merkûm Hüseyin’in göbeği altından bi-gayr-ı hak ‘amden darb ve cerh idüb cerh-i mezkûrdan müte’essiren vefât eylediği ‘udul-u ahrar-i ricâl-i müslimiyetden ve karye-i mezbûre ahalisinden Hüseyin bin Mehmed ve diğer Hüseyin bin Ahmed nam kimesneler şahâdetleriyle sabit ve mütehakkık ve katil-i merkûm Hasan’ın kısasına hükm-i şer‘î lahık olmuş olduğu bâ-i‘lâm ve mazbata inhâ olunmuş ve mufad-ı i‘lâma nazaren maktûl-u mezbûr Hüseyin’i katil-i merkûm Hasan’ın muceb-i kısas olan katl ile katl eylediği şahidan-ı mezbûran şahâdetleriyle sabit olmuş olmağın bu suretde vereseden kebirnan-ı mezbûrnan yahud birisi katil-i merkûmu kısasdan ‘afv itmedikleri halde bizatihi huzurlarında talebleriyle katil-i merkûm Hasan kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan ber-muceb-i kayd-ı fetvahane vereseden kebirnan-ı mezbûrnan yahud birisi katil-i merkûmu kısasdan ‘afv (S.48) itmedikleri halde bizatihi huzurlarında talebleriyle katil-i merkûm Hasan’ın icrâ-yı kısası ve eğer birisi ‘afv ider veya sulh olur ise ol-halde kısas-ı sakıt ve mes’ele-i diyete münkalib olacağından icab-ı şer‘inin icrâsıyla keyfiyetin bâ-mazbata ve i‘lâm-ı iş‘ârı babında iktiza iden emr-i şerifimin ahrarı meclis- i vâlâ-yı ahkâm-ı ‘adliyemden bâ-mazbata ifade kılınmış ve ol-vechile icrâsı hususuna irade-i seniyye-i mülûkânem ta‘allukuyla emr-i hümâyûn-u şâhâneme sünûh ve südûr
itmiş olmağın siz ki ka’imakam ve Na’ib ve müftü vesa’ir mûmâ-ileyhimsiz keyfiyet-i ma‘lûmunuz oldukda ber minval-i muharrer icrâ-yı ahkâm-ı şeri‘at-ı garraya müsaberet ve ‘alâ kile’t-takdireyn keyfiyeti der-bar-ı şevket-karar mülûkâneme inhâ ve iş‘ara mübaderet eyleyesiz
Fî Evâhir-i S (Safer) sene (1)275 (30 Eylül - 9 Ekim 1858) S.48/B.85: Tashih olunduğu vechile tebdil olunmuşdur
Mülhakatıyla Bosna Eyâleti Vâlîsi ve mecidiye-i nişâne hümâyûnumun üçüncü rütbesinin ha’iz ve hasıl vezirim Gani Paşa iclâlehûya ve rütbe-i saniye ashabından Benaloka Sancağı Ka’imakamı Adem zîde ‘uluvvuhûya ve Benaloka Na’ib ve Müftüsü zîde ‘ilmühûya ve a‘za-yı meclis zîde kadruhûma hüküm
Benaloka Sancağı dahilinde kâ’in Deriner Kazası’na tabi‘ İclavya Karyesi sakinlerinden ve teba‘a-i devlet-i ‘aliyemden olub maktûlen vefât iden Papas Todari veled Kobo’nun veraseti sulbiye-i kebire kızı Marte ve sulbiye-i sağire kızları Coyna ve Boka ve Veyre ile li-ebeveyn kebire kızkarındaşları Yave ve ‘İlikya ve Vaselidi’ye inhisârı ba’de’t-tahakkuku’ş-şer‘î suğar-ı mezbûranın vasî-i mensubları ‘ammleri oğlu Bevo veled Tepko ve marü’z-zikr Marte ve Yave ve ‘İlikya ve Vaseldi’nin liva-i mezbûr dahilinde kâ’in Teşne Kazası’na tabi‘ Bekişler Palenkası sakinlerinden Hammer bin ‘Aydasa ile meclisde ber nehc-i şer‘î hin-ü terâfü‘lerinde merkûm Hammer mütevefa-yı merkûm Todori’nin ‘amden ve bi-gayr-ı hak piştov kurşunuyla sol koltuğu altından darb ve cerh ile katl eylediğini tav‘an ikrâr ittiği Dermez sakinlerinden Hasan bin Ahmed ve İbrahim bin ‘Osman nam kimesneler şahâdetleriyle sabit ve mütehakkık ve katil-i merkûmun icrâ-yı kısasına hükm-i şer‘î lahık olduğu bâ-mazbata ve i‘lâm inhâ olunmuş ve mufad-ı i‘lâma nazaren teba‘a-i devlet-i ‘aliyeden maktûl-u mersum Todori katil-i merkûm Hammer’i muceb-i kısas olan katl ile katl eylediği tav‘an ikrârı şahidan-ı mezbûran şahâdetleriyle sabit olmuş olmağın bu suretde kebiran-ı mersuman yahud içlerinden biri katil-i mezbûru kısasdan ‘afv itmediği halde bizzatihi huzurlarında talebleriyle katil-i mezbûr Hammer’e icrâ-yı kısas lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış ve katil-i merkûm Hammer’in maktûl-u merkûm Todori’ye mucebi kısas olan katl ile katl eylediği tav‘an ikrârı şahidan-ı merkûman şahâdetleriyle sabit olmuş olmasıyla bu halde kübar-ı vereseden biri katil-i
mezbûru kısasdan ‘afv itmediği halde ber-muceb-i kayd-ı fetvahane bizzat huzurlarında talebleriyle katil-i merkûm Hammer’e icrâ-yı kısas olunmak ve eğer ‘afv ider veya sulh olur ise ol-halde kısas-ı sakıt ve mes’ele-i diyete münkalib olacağından icab-ı şer‘inin icrâsıyla keyfiyetin bâ-mazbata ve i‘lâm-ı iş‘ârı babında lazım gelen emr-i şerifimin ahrarı meclis-i vâlâ-yı ahkâm-ı ‘adliyemden bâ-mazbata ifade olunmuş ve keyfiyet-i taraf-ı eşref şâhâneme ‘arz ile lede’l-istîzân ber minval-i meşrûh icrâsı hususuna irade-i seniyye-i mülûkânem ta‘allukuyla emr-i hümâyûn-u pâdişâhâneme sünûh ve südûr eylemiş olmağın siz ki vâlî-i müşâr ve ka’imakam ve Na’ib ve müftü vesa’ir mûmâ- ileyhimsiz ma‘lumunuz oldukda ber minval-i muharrer icrâ-yı ahkâm-ı şeri‘at-ı garraya müsaberet ve ‘alâ kile’t-takdireyn keyfiyeti der-bar-ı şevket-karar mülûkâneme tahrir ve iş‘ara mübaderet eyleyesiz
Fî Evâsıt-ı RÂ (Rebî‘ü’l-Evvel) Sene (12)75 ( 19 - 28 Ekim 1858) S.48-49/B.86: (S.48) Mülhakatıyla İzmir Eyâleti Vâlîsi ve mecidiye-i nişâne hümâyûnumun birinci rütbesinin ha’iz ve hasıl vezirim Mustafa Paşa iclâlehûya ve Rumili Beğlerbeğiliği payelûlerinden Aydın Sancağı Ka’imakamı Mahmud Paşa dâmet ma‘aliyeye ve Güzelhisar Aydın Na’ib ve Müftüsü’ne ve a‘za-yı meclise hüküm
Aydın Sancağı dahilinde kâ’in Tebre Kazası’nda İbn-i Hatib Mahallesi sakinlerinden olub bundan akdem katîlen vefât iden Seyid oğlu Mehmed bin Mehmed’in veraseti zevcesi Şerife bint-i Mehmed ile vâlidesi Emine bint-i Mustafa ve sulbi sağir oğlu Mehmed’e inhisârı ba‘de’t-tahakkuku’ş-şer‘î sağir-i mezbûrun vasîye-i mensûbesi olan zevce-i mezbûre bi’l-vesaye ve ümm-i mezbûre dahi bi’l-asale yine kaza-i mezbûr mahallatından Teke Mahallesi sakinlerinden Halil Çavuş ibn-i ‘Osman ile meclisde ber nehc-i şer‘î hin-ü terâfü‘lerinde merkûm Halil Çavuş mütevefa-yı merkûm Mehmed’in sol kasığından kebir yatağan bıçağı ile ‘amden ve bi-gayr-ı hak darb ve cerh iderek müte’essiren ol-anda vefât eylediği kaza-i mezbûr ahalisinden Hacı ‘Abdi bin Hacı ‘Abdi Gezzâr Mahmud oğlu Ahmed nam kimesneler şahâdetleriyle sabit ve mütehakkık ve katil-i merkûmun kısasına hükm-i şer‘î lahık olmuş olduğu bâ- mazbata ve i‘lâm inhâ olunmuş ve mufad-ı i‘lâma nazaren maktûl-u merkûm Mehmed’i katil-i merkûm Halil Çavuş’un muceb-i kısas olan katl ile katl eylediği şahidan-ı mezbûran (S.49) şahâdetleriyle sabit olmuş olmağın bu suretde vereseden kebirnan-ı mezbûran yahud birisi katil-i merkûmu kısasdan ‘afv itmediği halde bizzatihi
huzurlarında talebleriyle katil-i merkûm ber nehc-i şer‘î kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan ber- muceb-i kayd-ı fetvahane maktûl-u merkûm Mehmed’i katil-i merkûm Halil Çavuş’un muceb-i kısas olan katl ile katl eylediği ber nehc-i şer‘î sabit olmasıyla kebirnan-ı mezbûrnan veyahud birisi katil-i merkûmu kısasdan ‘afv itmediği halde bizzat huzurlarında talebleriyle katil-i merkûma icrâ-yı kısas olunması ve eğer ‘afv ider veya sulh olur ise ol-halde kısas-ı sakıt ve mes’ele diyete münkalib olacağından icab-ı şer‘inin icrâsıyla katil-i merkûmun icrâ-yı mücâsereti zımnında keyfiyetin bâ-mazbata ve i‘lâm bu tarafa iş‘ârı babında lazım gelen emr-i şerifimin ahrarı meclis-i vâlâ-yı ahkâm-ı ‘adliyemden bâ-mazbata ifade olunması ve keyfiyet-i taraf-ı eşref şâhâneme ‘arz ile lede’l-istîzân ber minval-i muharrer icrâsı hususuna irade-i seniyye-i mülûkânem ta‘allukuyla emr-i hümâyûn-u pâdişâhâneme sünûh ve südûr eylemiş olmağla siz ki vâlî ve ka’imakam-ı müşâr ve Na’ib ve müftü vesa’ir mûmâ-ileyhimsiz ma‘lûmunuz oldukda oldukda ber minval-i meşrûh icrâ-yı ahkâm-ı şeri‘at-ı garraya müsaberet ve ‘alâ kile’t-takdireyn keyfiyet-i der-bar-ı şevket-karar mülûkâneme tahrir ve iş‘ara mübaderet eyleyesiz
Fî Evâhir-i RÂ (Rebî‘ü’l-Evvel) Sene (12)75 (29 Ekim - 7 Kasım 1858)