Mülhakatıyla Selanik Eyâleti Vâlîsi ve mecidiye-i nişâne hümâyûnumun birinci rütbesini ha’iz ve hasıl Vezir Mehmed Sa‘id Paşa iclâlehûya ve mir-i miran kiramımdan Drama Sancağı Ka’imakamı ‘İzzet Paşa zîde ikbâlühûya ve Drama Na’ib ve Müftüsü zîde ‘ilmühuya ve ‘aza-yı meclis zîde kadruhûma
Selanik Eyâleti dahilinde vaki‘ Karaçura Kazası’na tabi‘ Koşran Karyesi ahalisinden ve Drama Sancağı’nda kâ’in emlak-ı hümâyûndan Eskiköy Çiftliği hizmetkârlarından olub bundan akdem mecrûhen vefât iden Hüseyin bin Hasan’ın veraseti li-ebeveyn erkarındaşı Bekir ve Mustafa’ya inhisârı ba‘de’t-tahakku’ş-şer‘î varisan-ı merkûman ile maktûl-u merkûm katili bulunan fi’l-asl Anadolu’da Nevşehir Kasabası mahallatında Orta Mahallesi ahalisinden olub çiftlik-i mezbûrun yazıcısı olan İstrati veled Goram ile meclisde ber nehc-i şer‘î hin-ü terâfü‘lerinde katil-i merkûm maktûl-u merkûmu yedinde bulunan saçma memlu tüfenk ile sağ koltuğu altından darb ve cerh iderek cerh-i mezkûrdan müte’essiren vefât eylediği ahrar-i ricâl-i müslimiyetden ve Kaytan Mahallesi sakinlerinden Kortigali bin Karaman ve Hüseyin bin Mehmed nam kimesneler şahâdetleriyle sabit ve katil-i merkûmun kısasına hükm-i şer‘î lahık olmuş olduğu bâ-mazbata i‘lâm ve inhâ olunmuş ve mufad-ı i‘lâma nazaren maktûl-u merkûm Hüseyin’i katil-i mersum İstrati’nin muceb-i kısas olan katl ile katl eylediği şahidan-ı mezbûran şahâdetleriyle sabit olmuş olmağın bu suretde varisan-ı mezbûran yahud birisi katil-i mersumu kısasdan ‘afv itmedikleri halde bizzatihi huzurlarında talebleriyle katil-i mersuma ber nehc-i şer‘î kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan
varisan-ı mezbûran ve yahud birisi katil-i merkûmu kısasdan ‘afv itmedikleri halde ber- muceb-i kayd-ı fetvahane bizzat huzurlarında talebleriyle katil-i merkûm hakkında icrâ- yı kısas olunması ve eğer biri dahi ‘afv ider veya sulh olur ise ol-halde kısas-ı sakıt ve mes’ele diyete münkalib olacağından icab-ı şer‘înin ifâsıyla icrâ-yı mücâseret-i kanûniyesi içün habsi tarihi gösterilerek bu tarafa gönderilmesi babında emr-i şerife
ahrarı meclis-i vâlâ-yı mezkûrdan bâ-mazbata ifade olunduğu beyanıyla Aslına tatbiken
S.63-64/B.116: (S.63) Bir sureti
‘Asakir-i nizamiye-i şâhâne müşiratından mülhakatıyla Edirne Eyâleti Vâlîsi mecidiye-i nişâne hümâyûnumun birinci rütbesini ha’iz ve hasıl Vezir Mustafa Paşa iclâlehûya ve Edirne Kadısı zîdetu fezâ’ilühûya ve a‘za-yı meclis-i zîde mecdühûya
Edirne Eyâleti dahilinde kâ’in Kırkkilise Kazası’na tabi‘ Koru Karyesi mütemekkinlerinden olub bundan akdem cerhen vefât iden Kaleb veled Meze’nin veraseti babası mersum Meze ve vâlidesi Ostobanki ve zevce-i metrûkesi Milence veled Menola nam nasraniyeler ile sulbi sağir oğlu Menro’ya muhzıra olduğu ba‘de’t- tahakku’ş-şer‘î sağir-i merkûmun men-i kabl olub cedi ve tesviye-i umuruna kabl-i şer‘den mensub-u vasîsi Meze bi’l-verase ve bi’l-vesaye ve zevce-i mersume Milence ve Ostobanki nasraniyeler bi’l-asale maktûl-u merkûmun katili bulunan Berkos Kasabası ahalisinden Cengiz Mehmed bin Mustafa ile meclisde ber nehc-i şer‘î hin-ü terâfü‘lerinde maktûl-u mersum kaza-i mezbûre tabi‘ Koru Karyesi’ne (okunmuyor) mesafe Bağlarbaşı nam mahalde kâ’in Koru derûnunda ağnam ra‘i ider iken katil-i merkûm yedinde bulunan alet-i cariheden hatb baltasıyla başına ‘amden ve bi-gayr-ı hak darb ve cerh idüb cerh-i mezkûrdan müte’essiren vefât eylediğini bi’t-tav‘ ikrâr ve i‘tiraf eylediğinden verese-i kübar içün istifa-yı kısas (S.64) lazım geldiği bâ-i‘lâm ve mazbata inhâ olunmuş ve mufad-ı i‘lâma nazaren maktûl-u mersum Filib’i katil-i merkûm Mehmed’in muceb-i kısas olan katl ile katl eylediği tav‘an ikrârıyla sabit olmuş olmağın verese-i kübarın küllisi yahud ba‘zısı katil-i merkûmu kısasdan ‘afv itmedikleri halde bi şett-hüsema(?) huzurlarında talebleriyle katil-i merkûm Mehmed’e ber nehc-i şer‘î kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan verese-i kübarın cümlesi yahud ba‘zısı katil-i merkûmu kısasdan ‘afv itmedikleri halde ber-muceb-i kayd-ı fetvahane bizzat huzurlarında talebleriyle katil-i merkûma icrâ-yı kısas olunması ve eğer biri merkûmu
kısadan ‘afv ider veya sulh olur ise ol-halde kısas-ı sakıt ve mes’ele diyete münkalib olacağından icab-ı şer‘înin ifâsıyla katil-i merkûmun icrâ-yı mücâseret-i kanûniyesi içün habsi tarihi gösterilerek bu tarafa gönderilmesi babında emr-i şerifimin ahrarı meclis-i vâlâ-yı mezkûrdan bâ-mazbata ifade olunduğu beyanıyla
Aslına tatbiken S.64/B.117: Katil-i merkûmun verese-i maktûl huzurunda icrâ-yı kısasına
ibtidâr olunmuş olduğu natık varıd olan i‘lâm ve mazbata ve inhâ me’alleri bâ-ferman-ı ‘ali kaydı bâlâsına şerh virildi
Fî 15 CÂ (Cemâziye’l-Evvel) Sene (12)75
(21 Aralık 1858)
Mülhakatıyla Silistre Eyâleti Vâlîsi olub mecidiye-i nişâne hümâyûnumun birinci rütbesini ha’iz ve hasıl olan vezirim İsma‘il Hami Paşa iclâlehûya mirmiran-ı kiramdan Şemni Ka’imakamı ve nişâne-i mezkûrun beşinci rütbesini ha’iz ve hasıl Hüseyin Paşa dâme ikbâlühûya ve Şemni Na’ib ve Müftüsü’ne a‘za-yı meclis zîde kadruhûma hüküm
Şemni Sancağı’na tabi‘ ‘Osman Bazarı Kazası’na muzafe Dosbanlan Karyesi sakinlerinden olub bundan akdem katîlen vefât iden Cafer Mehmed oğlu Hüseyin nam kimesnenin veraseti zevce-i menkûhe-i metrûkesi Rukiye bint-i ‘Ömer ile mezbûreden mütevellid sulbi sağir oğlu ‘Osman ve Hüseyin ve sulbiye-i sağire kızları Rukiye ve Zeyneb’e muhzıra olduğu ba‘de’t-tahakku’ş-şer‘î suğar-ı mezbûrenin vasîen mensûbeleri vâlideleri mezbûre Rukiye Hâtûn’a bi’l-asale ve bi’l-vesaye maktûl-u merkûmun katil-i olan karye-i mezbûre sakinlerinden Ahmed bin ‘Osman ile meclisde ber nehc-i şer‘î hin-ü terâfü‘lerinde katil-i merkûm maktûl-u merkûmu Harmak havalisinde tüfenk kurşunuyla ‘amden ve bi-gayr-ı hak sırdından darb ve cerh iderek müte’essiren vefât eylediği karye-i mezbûre ahalisinden ahrar-i ricâl-i müslimiyetden Salih bin Mustafa ve Hüseyin bin İbrahim nam kimesneler şahâdetleriyle sabit ve mütehakkık ve katil-i merkûmun kısasına hükm-i şer‘î lahık olmuş olduğu bâ-i‘lâm ve mazbata inhâ olumuş ve mufad-ı i‘lâma nazaren maktûl-u merkûm Hüseyin’i katil-i merkûm Ahmed’in muceb-i kısas olan katl ile katl eylediği şahidan-ı mezbûran şahâdetleriyle sabit olmuş olmağın bu suretde vereseden kebire zevce-i mezbûre katil-i merkûmu kısasdan ‘afv itmediği halde bizzat huzurlarında talebleriyle katil-i merkûm
Ahmed’e ber nehc-i şer‘î icrâ-yı kısas lazım geleceği canib-i fetvahaneden zahr-u i‘lâm- ı mezkûre tahrir ve işaret kılınmış olduğundan ber-muceb-i kayd-ı fetvahane vereseden zevce-i mezbûre katil-i merkûmu kısasdan ‘afv itmediği halde bizzat huzurunda talebiyle katil-i merkûm Ahmed’e icrâ-yı kısas olunması ve eğer ‘afv ider veya sulh olur ise ol-halde kısas-ı sakıt ve mes’ele-i diyete münkalib olacağından icab-ı şer‘înin icrâsıyla katil-i merkûmun icrâsı mücâseret-i kanûniyesi zımnında habsi tarihi gösterilerek bu tarafa gönderilmesi babında lazım gelen emr-i şerifimin ahrarı meclis-i vâlâ-yı ahkâm-ı ‘adliyemden bâ-mazbata ifade olunarak keyfiyet-i taraf-ı eşref şâhâneme ‘arz ile lede’l-istîzân ol-vechile icrâsı hususuna irade-i seniyye-i mülûkânem ta‘allukuyla emr-i hümâyûn-u şâhânem sünûh ve südûr itmiş olmağın siz ki vâlî-i müşâr ve ka’imakam ve Na’ib ve müftü vesa’ir mûmâ-ileyhimsiz ma‘lûmunuz oldukda ber minval-i meşrûh icrâ-yı ahkâm-ı şeri‘at-ı garraya müsaberet ve ‘alâ kile’t-takdireyn keyfiyeti der-bar-ı şevket-karar mülûkâneme tahrir ve iş‘ara mübaderet eyleyesiz
Fî Evâsıt-ı N (Ramazân) Sene (1)275 (14 - 23 Nisan 1859) S.64-65/B.118: (S.64) Bir sureti
Mülhakatıyla Sivas Eyâleti Vâlîsi olub mecidiye-i nişâne hümâyûnumun ikinci rütbesini ha’iz ve hasıl olan Vezir Mehmed Paşa iclâlehûya ve Sivas Na’ib ve Müftüsü’ne ve a‘za-yı meclise
Sivas Eyâleti dahilinde Zile Kazası karyelerinden Kızılıca İn Karyesi sakinlerinden olub bundan akdem katîlen vefât iden Memli Mehmed bin ‘Abdülkerim’in veraseti babası merkûm ‘Abdülkerim ile vâlidesi Sultan bint-i Mehmed’e muhzıra olan mezbûre Sultan mütevefiye olmasıyla veraseti zevci merkûm ‘Abdülkerim ile vâlidesi Şemsi bint-i Süleyman ve sadri sağir oğulları ‘Osman ve İsma‘il ve Hüseyin ve sadriye kebire kızı Fatma ve sağire kızı Ayşe’ye inhisârı ba‘de’t- tahakku’ş-şer‘î ibn-i merkûm ‘Abdülkerim bi’l-asale ve bi‘l-verase ve suğar-ı mezbûrun tarafından bi‘l-verase ve ümm-i mezbûre Şemsi ve kebire kızı mezbûre Fatma tarafından dahi bi’l-vekâle karye-i mezbûre ahalisinden Caniklioğlu Halil bin Mehmed ile meclisde ber nehc-i şer‘î hin-ü terâfü‘lerinde merkûm Halil mütevefa-yı mezbûr Memli Mehmed’in tüfenk kurşunuyla göbeği altından darb ve cerh ve kurşun arka tarafından hürûc iderek müte’essiren vefât eylediği karye-i mezbûre sakinlerinden Hasankeş oğlu Hüseyin bin (S.65) ‘Osman ve Deli Hacı oğlu Hüseyin bin Salih nam
kimesneler şahâdetleriyle sabit olarak katil-i merkûmun kısasına hüm-i şer‘î lahık olmuş olduğu bâ-i‘lâm ve mazbata inhâ olunmuş ve mufad-ı i‘lâma nazaren maktûl-u merkûm Memli Mehmed’i katil-i merkûm Halil’in muceb-i kısas olan katl ile katl eylediği şahidan-ı mezbûran şahâdetleriyle sabit olmuş olmağın bu suretde verese-i kübarın küllisi veyahud ba‘zısı katil-i merkûmu kısasdan ‘afv itmedikleri halde bizzatihi huzurlarında talebleriyle katil-i merkûm ber nehc-i şer‘î kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan ber- muceb-i kayd-ı fetvahane verese-i kübarın cümlesi veyahud ba‘zısı katil-i merkûmu kısasdan ‘afv itmedikleri halde bizzat huzurlarında talebleriyle katil-i merkûm Halil’e icrâ-yı kısas olunması ve eğer vereseden biri ‘afv ider veya sulh olur ise ol-halde kısas-ı sakıt ve mes’ele-i diyete münkalib olacağından icab-ı şer‘înin ifâsıyla katil-i merkûmun icrâ-yı mücâseret-i kanûniyesi zımnında tarih-i habsi gösterilerek bu tarafa gönderilmesi babında lazım gelen emr-i şerifimin ahrarı meclis-i ahkâm-ı mezkûrdan bâ-mazbata ifade olunduğu beyanıyla
Aslına tatbiken S.65/B.119: Mülhakatıyla Üsküb Eyâleti Vâlîsi olub mecidiye-i nişâne hümâyûnumun ikinci rütbesini ha’iz ve hasıl olan vezirim Gani Paşa iclâlehûya ve Pirizrin Na’ib ve Müftüsü zîde ‘ilmühuya ve a‘za-yı meclis zîde kadruhûma hüküm
Üsküb Eyâleti dahilinde Pirizrin Sancağı’na tabi‘ İsiran Kazası sakinlerinden olub bundan akdem katîlen fevt olan İsma‘il bin ‘Ali’nin veraseti vâlidesi Gülizar bint-i Hacı ‘Abdullah ile li-ebeveyn erkarındaşı Eyüb ve kızkarındaşları Kelkaruh ve Hanım nam hâtûnlara muhzıra olduğu ba‘de’t-tahakku’ş-şer‘î merkûm Eyüb asaleten ve anası mezbûre Gülizar’a ve kızkarındaşları mezbûrnan Kelkaruh ve hanım taraflarından vekâleten maktûl-u merkûmun katil-i bulunan kasabâ-i mezbûre sakinlerinden Süleyman bin Ahmed ile meclisde ber nehc-i şer‘î hin-ü terâfü‘lerinde katil-i merkûm Süleyman maktûl-u merkûm İsma‘il’in arkası iki küreği ortasından tabanca kurşunuyla bi-gayr-ı hak ‘amden darb ve cerh idüb cerh-i mezkûrdan müte’essiren dokuz sa‘at mürûrunda vefât itmiş olduğu ‘udûl-u ahrar-i ricâl-i müslimiden kasabâ-i mezbûre ahalisinden Mevlâ Yakub bin Veysel ve İbrahim bin ‘Abdülnazif nam kimesneler şahâdetleriyle sabit ve mütehakkık ve katil-i merkûmun kısasına hükm-i şer‘î lahık olmuş olduğu bâ-mazbata ve i‘lâm inhâ olunmuş ve mufad-ı i‘lâma nazaren katil-i merkûm Süleyman’ın maktûl-u mezbûr İsma‘il’i muceb-i kısas olan katl ile ‘amden katl
eylediği şahidan-ı mezbûran şahâdetleriyle sabit olmuş olmağın bu suretde veresenin küllisi yahud ba‘zısı katil-i merkûmu kısasdan ‘afv itmedikleri halde bizzatihi huzurlarında talebleriyle katil-i merkûm Süleyman’ın ber nehc-i şer‘î kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olmağın bu suretde veresenin cümlesi veyahud ba‘zısı katil-i merkûmu kısadan ‘afv itmedikleri halde ber-muceb-i işaret-i mezkûre bizzat huzurlarında talebleriyle katil-i merkûm Süleyman’a icrâ-yı kısas olunması ve eğer bunlardan biri ‘afv ider veya sulh olurlar ise ol-halde kısas-ı sakıt ve mes’ele diyete münkalib olacağından icab-ı şer‘înin ifâsıyla katil-i merkûmun icrâ-yı mücâseret-i kanûniyesi zımnında habsi tarihi gösterilerek bu tarafa gönderilmesi babında iktiza iden emr-i şerifimin ahrarı meclis-i vâlâ-yı ahkâ-ı âdliyemden bâ-mazbata ifade olunarak ol-vechile icrâsı hususuna irade-i seniyye-i mülûkânem ta‘allukuyla emr-i hümâyûn-u şâhânem sünûh ve südûr itmiş olmağla siz ki vâlî-i müşâr ve Na’ib ve müftü vesa’ir mûmâ-ileyhimsiz ma‘lumunuz oldukda ber-vech-i muharrir icrâ-yı ahkâm-ı şeri‘at-ı garraya müsaberet ve ‘alâ kile’t- takdireyn keyfiyeti bu tarafa inhâ ve iş‘ara mübaderet eyleyesiz
Fî Evâhir-i Şevvâl Sene (12)75 (24 Mayıs - 2 Haziran 1859) S.65-66/B.120: (S.65) Bir sureti
Yine vâlî-i müşârün-ileyh ve Na’ib ve müftü vesa’ire
Üsküb Eyâleti dahilinde vaki‘ Pirizerin Sancağı’na tabi‘ Velcezrin Kazası sakinlerinden olub bundan akdem katîlen fevt olan Ağoş bin İbrahim’in veraseti babası merkûm İbrahim ile vâlidesi Rüya bint-i Bekir nam hâtûna muhzıra olduğu ba‘de’t- tahakku’ş-şer‘î babası merkûm İbrahim asaleten ve mezbûre tarafından vekaleten maktûl-u merkûmun katili bulunan kasabâ-i mezbûre sakinlerinden Hüseyin bin Hacı Tahir ile meclisde ber nehc-i şer‘î (S.66) hin-ü terâfü‘lerinde katil-i merkûm Hüseyin maktûl-u merkûm Ağoş’un arkasından tabanca kurşunuyla bi-gayr-ı hak ‘amden darb ve cerh idüb cerh-i mezkûrdan müte’essiren vefât eylediği ‘udûl-u ahrar-i ricâl-i müslimiden ve kasabâ-i mezbûre ahalisinden Şeyh El-hâc Mehmed bin Yusuf ve Yunus bin Ahmed nam kimesneler şahâdetleriyle sabit ve mütehakkık ve katil-i merkûmun kısasına hükm-i şer‘î lahık olmuş olduğu bâ-mazbata ve i‘lâm inhâ kılınmış ve mufad-ı i‘lâma nazaren katil-i merkûm Hüseyin maktûl-u mezbûr Ağoş’u muceb-i kısas olan katl ile katl eylediği şahidan-ı mezbûran şahâdetleriyle sabit olmuş olmağın bu suretde
li-ebeveyn mezbûranın yahud birisi katil-i merkûmu kısasdan ‘afv itmedikleri halde bizzatihi huzurlarında talebleriyle katil-i merkûm Hüseyin ber nehc-i şer‘î kısas olmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olmağla li-ebeveyn mezbûran yahud birisi katil-i merkûmu kısadan ‘afv itmedikleri halde ber-muceb-i işaret-i mezkûre bizzat huzurlarında talebleriyle katil-i merkûm Hüseyin’e icrâ-yı kısas olunması ve biri ‘afv veya olurlar ise ol-halde kısas-ı sakıt ve mes’ele diyete münkalib olacağından iktiza-yı şer‘înin ifâsıyla katil-i merkûmun icrâ-yı mücâseret-i kanûniyesi zımnında habsi tarihi gösterilerek bu tarafa gönderilmesi babında lazım gelen emr-i şerifimin ahrarı meclis-i vâlâ-yı ahkâm-ı ‘adliyemden bâ- mazbata ifade olunduğu beyanıyla denilerek
Aslına tatbiken S.66/B.121: Ber-muceb-i emr-i ‘ali katil-i merkûmun verese-i maktûl
huzurlarında kısas icrâ olunduğu mubeyn-i varıd olan i‘lâm ve mazbata bâ-ferman-ı ‘ali şerh virildi
Fî 8 M (Muharrem) Sene 1276 (7 Ağutos 1859)
Bir sureti
Mirmiran-ı kiramdan Niş Eyâleti Mutasarrıfı olub mecidiye-i nişâne hümâyûnun üçüncü rütbesini hasıl olan Zeynel Paşa dâme ikbâlühûya ve Niş Na’ib ve Müftüsü’ne ve a‘za-yı meclise
Niş Kazası’na tabi‘ Bala Manakçe Karyesi mütemekkinlerinden ve teba‘a-i devlet-i ‘aliyemden olub bundan akdem katîlen fevt olan Koço veled Estefan’ın veraseti li-ebeveyn erkarındaşı İrzafko ile kızkarındaşları Korke ve Yoselfe ve Nerele’ye muhzıra olduğu ba‘de’t-tahakku’ş-şer‘î merkûm İzrafko ile mezbûran Korke ve Yoselfe ve Nerele bi’l-asale maktûl-u merkûmun katili bulunan Keylan Kazası’na tabi‘ Beyah Karyesi mütemekkinlerinlerinden ve teba‘a-i devlet-i ‘aliyemden mezkûr Bala Manakçe Karyesi bağlarının bekçisi Baranko veled Boran ile meclisde ber nehc-i şer‘î hin-ü terâfü‘lerinde katil-i merkûm Baranko maktûl-u merkûm Kocoli tüfenk kurşunuyla göğsü sağ memesi altından bi-gayr-ı hak ‘amden darb ve cerh iderek cerh-i mezkûrdan müte’essiren vefât itmiş olduğu Bala Manokçe Karyesi mütemekkinlerinden Teşo veled Niko ve Dina veled Radobko nam kimesneler şahâdetleriyle sabit ve mütehakkık ve
katil-i merkûmun kısasına hükm-i şer‘î lahık olmuş olduğu bâ-mazbata ve i‘lâm inhâ olunmuş ve mufad-ı i‘lâma nazaren maktûl-u mersum Kocoli katil-i mersum Baranko’nun muceb-i kısas olan katl ile katl eylediği şahidan-ı mesfuran şahâdetleriyle sabit olmuş olmağın bu suretde veresenin küllisi veyahud ba‘zısı katil-i mersumu kısadan ‘afv itmedikleri halde bi şett-hüsema(?) huzurlarında talebleriyle katil-i mersumun ber nehc-i şer‘î kısas olunması lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan verese-i mezbûrenin cümlesi veyahud ba‘zısı katil-i merkûmu kısasdan ‘afv itmedikleri halde ber-muceb-i işaret-i mezkûre bizzat huzurlarında talebleriyle katil-i merkûma icrâ-yı kısas olunması ve eğer vereseden biri ‘afv ider veya sulh olur ise ol-halde kısas-ı sakıt ve mes’ele diyete münkalib olacağından iktiza-yı şer‘înin ifâsıyla katil-i merkûmun mücâseret-i kanûniyesi zımnında habsi tarihi gösterilerek bu tarafa gönderilmesi babında lazım gelen emr-i şerifimin ahrarı meclis-i vâlâ-yı mezkûrdan bâ-mazbata ifade olunduğu beyanıyla denilerek
Kezâlik S.66-67/B.122: (S.66) Bir sureti
Mülhakatıyla Bosna Eyâleti Vâlîsi olub mecidiye-i nişâne hümâyûnumun birinci rütbesini ha’iz ve hasıl olan Vezir ‘Osman Mazhar Paşa iclâlehûya ve Benaloka Kazası Na’ib ve Müftüsü’ne ve a‘za-yı meclise
Benaloka Sancağı dahilinde kâ’in Teşne Kazası’na tabi‘ Linçe Karyesi sakinlerinden olub bundan akdem maktûlen vefât iden İbrahim bin Hüseyin’in veraseti zevcesi Hanife bint-i Salih ile vâlidesi Zilan bint-i ‘Abdullah ve babası merkûm Hüseyin ile sulbi sağir oğulları Salih ve ‘Abid ve İbrahim ve sulbiye-i sağire kızları Saliha’ya (S.67) inhizarı ba‘de’t-tahakku’ş-şer‘î suğar-ı mezbûrun vekilleri mezbûr Hüseyin asaleten ve veraseten ve mezbûrnan Hanife ve Zilan dahi asaleten maktûl-u merkûmun katilleri bulunan kaza-i mezbûra tabi‘ Zeybak Karyesi sakinlerinden Matya veled İntov ile ve karındaşı İzari veledan Bofa nam kimesneler ile meclisde ber nehc-i şer‘î hin-ü terâfü‘lerinde maktûl-u merkûm İbrahim’i merkûmundan İli ve İzori bi’l-itâ İli ve Matya dahi kebir sopa ile ma‘an başına vesa’ir a‘zasına bi-gayr-ı hak ‘amden darb ve cerh iderek cerh-i mezkûrdan müte’essiren vefât itmiş olduğu ahrar-i ricâl-i müslimiyetden ve mezkûr Linçe Karyesi sakinlerinden Hüseyin bin Mustafa Zeybak Karyesi mütemekkinlerinden ve teba‘a-i devleti ‘aliyeden Golko veled Nado ve Tolof
veled Bayo nam kimesneler şahâdetleriyle sabit ve mütehakkık ve katilun-u merkûmunun kısaslarına hükm-i şer‘î lahık olmuş olduğu bâ-i‘lâm ve tahrirat inhâ olunmuş ve mufad-ı i‘lâma nazaren katilun-u mersumunun maktûl-u merkûm İbrahim’i muceb-i kısas olan katl ile ma‘an katl eyledikleri şahidan-ı mezbûrun şahâdetleriyle sabit olmuş olmağın bu suretde vereseden kübar-ı mezbûrun yahud ba‘zısı katilun-u mersumunu kısasdan ‘afv itmedikleri halde bizzatihi huzurlarında talebleriyle katilun-u mersumuna ber nehc-i şer‘î kısas olunmak lazım geleceği canib-i fetvahaneden zahr-u i‘lâm-ı mezkûre tahrir ve işaret kılınmış olduğundan verese-i kübar yahud ba‘zısı ‘afv itmedikleri halde ber-muceb-i işaret-i mezbûre bizzat huzurlarında talebleriyle katilun-u merkûmuna icrâ-yı kısas olunması ve eğer vereseden biri ‘afv ider veya sulh olur ise ol- halde kısas-ı sakıt olacağından icab-ı şer‘înin ifâsıyla mücâseret-i kanûniyelerinin icrâsı içün merkûmların tarih-i habsleri gösterilerek bu tarafa gönderilmeleri babında iktiza iden emr-i şerifimin ahrarı meclis-i vâlâ-yı mezkûrdan bâ-mazbata ifade olunduğu beyanıyla
Kezâlik S.67/B.123: Katil-i merkûmu verese-i merkûmandan maktûlun babası Markos
dahi Hemadi bi’l-asale ve bi’l-vekale kılıç ile vech-i şer‘î üzere katl ile i‘dam eylemiş
olduğunu natık varıd olan mazbata ve i‘lâm me’alleri bâ-ferman-ı ‘ali şerh virildi Fî Gurre-i Safer Sene (1)276
(30 Ağustos 1859)
Mirmiran-ı kiramdan Musul Eyâleti Mutasarrıfı Veysi Paşa dâme ikbâlühûya ve Musul Na’ib ve Müftüsü zîde ‘ilmühuya ve a‘za-yı meclis zîde kadruhûma hüküm
Musul mahallatından Mahmûdiye Mahallesi sakinlerinden olub bundan akdem katîlen vefât iden Süleyman bin Hacı Hemadi’nin veraseti babası merkûm Hemadi ile vâlidesi Kosole bint-i Nahid’e inhisârı ba‘de’t-tahakku’ş-şer‘î merkûm Hacı Hemadi ve mezbûre Kosole bi’l-asale maktûl-u merkûmun katil-i bulunan yine Musul mahallatından Çorak Mahallesi ahalisinden Seyid Hüseyin bin ‘Abdülkadir ile meclisde ber nehc-i şer‘î hin-ü terâfü‘lerinde katil-i merkûm yedinde bulunan hançer ta‘bir olunur bıçak ile maktûl-u merkûmun sol omzundan bi-gayr-ı hak ‘amden darb ve