TRANSKRİPSİYONU
Hüküm 6: Vakıf mütevelliliği davası
Galata'ya muzāfe kasaba-i Tophane'de Fîrûz Ağa Mahallesi'nde sâkine mu‘arrefetü'z-zât a‘mâ Emetullah bint-i Ali bin Ahmed nâm hâtun Galata Bâb Mahkemesi'nde meclis-i şer‘de Galata kādīları efendiler dâ‘îleri nezâretinde âsûde olan evkāfdan olup kasaba-i mezbûrede vâki‘ eshâb-ı hayrâttan merhûm İliyas Çelebi Mescid-i Şerifi Vakfının evlâdiyyet ve meşrûtiyyet üzere bâ-berât-ı âlî-şân hâlâ mütevelliyesi sâhibe-i arzuhâl mu‘arrefetü'z-zât Ümmü Gülsüm bint-i Mehmed bin
Abdi nâm hâtun muvâcehesinde ve mütevelliye-i mezbûre Ümmü Gülsüm Hâtun'un bâ-hüccet-i şer‘iyye hâlâ kāim-i makāmı eş-Şeyh Mehmed Efendi ibn-i eş-Şeyh Mustafa Efendi ile mescid-i mezbûrun İmamı eş-Şeyh Mustafa Efendi ve mürtezika-i vakf-ı mezkûr hâzır oldukları hâlde ben vakf-ı mezbûra mukaddemâ bâ-berât
mütevelliye iken mezbûre Ümmü Gülsüm Hâtun üzerimden ref‘ ve kendüye berât ettirmekle evlâd-ı vâkıfdan olmamla tevliyet-i mezkûreyi taleb ederim deyü da‘vâ eyledikde mezbûre Ümmü Gülsüm Hâtun cevâbında bin iki yüz altmış altı senesi Zi'l-hiccesi gurresi tarihiyle müverrah Galata Mahkemesi sicillâtından muhrec ve bâlâsı musahhah iki yüz yetmiş sekiz senesi Zilka‘desinin on dokuzuncu günü tarihiyle müverrah iki kıt‘a i‘lâm-i şer‘î mantûklarını münderic bâlâsı sahh-ı
mekârim-i semhle müveşşah bin yüz seksen senesi Zilka‘desinin yirmi birinci günü tarihiyle müverrah ve ol hînde Galata Kādīsı Çelebi-zâde merhûm Mehmed Esad Efendi'nin hâtemini hâvî işbu
[9b]
işbu bir kıt‘a i‘lâm-i şer‘î mantûkınca ceddim mezbûr İliyas Çelebi merhûm el-Hâc Memi nâm sâhibü'l-hayr ile karındaşlarolmağla müstakıllen binâ eyledikleri mescid-i şeriflerinin tevliyetlerini her biri kendü evlâdlarına şart edip ben mezbûr İliyas Çelebi evlâdından ve mezbûr Emetullah mezbûr el-Hâc Memi evlâdından olup hatta babam mezbûr Mehmed hayâtında mezbûr İliyas Çelebi Vakfı'na kırk sene mikdarı evlâdiyyet ve meşrûtiyyet üzere mütevellî olup ba‘de vefâtihî kız karındaşım Emine nâm hâtun kezâlik müddet-i medîdede mütevelliye olup ba‘de vefâtihâ tevbet-i mukarrer bana geldikde sağîre bulunduğum cihetle mezbure Emetullah hilâf-ı şart-ı vâkıf tevliyet-i mezkûreyi bir takrîb üzerine berât ettirmekle ben dahi bundan akdem kendü ile Dîvân-ı Sadr-ı A‘zamî'de Arz Odası'nda bi'd-defe‘ât terâfu‘ olunduğumuzda mezbûre Emetullah mezbûr el-Hâc Memi evlâdından olup öteden beri abâ ve ecdâdından bir ferd zikr olunan İliyas Çelebi Vakfı'na mütevellî olmayıp benim abâ ve ecdâdım evlâdiyyet ve
meşrûtiyyet üzere mütevellî olagelip mezbûre Emetullah İliyas Çelebi evlâdından olmadığı yedimde olan senedât-i şer‘iyye ve i‘lâmât-ı mer‘iyye ve evâmir-i aliyye mantûklarınca zâhir olup ve mezbûre Emetullah min-ba‘d İliyas Çelebi Vakfı
mütevelliyetine müdâhale ve mu‘ârazadan defe‘âtle men‘ olunmuşdur deyü mezbûre Ümmü Gülsüm Hâtun'un ibrâz eylediği evâmir-i aliyye ve üç kıt‘a i‘lâm-ı şer‘îlerin mantûkları mezbûre Ümmü Gülsüm Hâtun'un bi'l-cümle takrîr-i meşrûhuna mutâbık olup ve merhûm mezbûr Çelebi-zâde Mehmed Esad Efendi'nin i‘lâm-ı mezkûrunun mazmûnunu mezbûre Emetullah münkire olmağla mezbûre Ümmü Gülsüm Hâtun mazmûn-ı i‘lâm-ı mezkûru lede't-tezkiye inde't-takrîr zâhir olan es-Seyyid Süleyman ibn-i es-Seyyid Mehmed ve Ali bin Ahmed ve Hâfız Mustafa Efendi ibn-i el-Hâc Mehmed ve İshak Ağa ibn-i el-Hâc Mehmed nâm kimesneler şehâdetleriyle mezbûre Emetullah Hâtun muvâcehesinde vech-i şer‘î üzere isbât eyledikten sonra mezbûre Ümmü Gülsüm Hâtun'un babası müteveffâ Mehmed tevliyet-i mezkûreyi kırk sene evlâdiyyet ve meşrûtiyyet üzere mutasarrıf oldu ve ba‘dehû kezâlik kız karındaşı mezbûre Rukıyye ve ba‘dehû mezbûre Ümmü Gülsüm Hâtun dahi işbu târih-i i‘lâma gelince kırk üç sene ilâ-hâze'l-ân bilâ-nizâ‘ mutasarrıf olup mezbûre Emetullah'ın kat‘â tevliyet-i mezkûrede alâkası olmadığı lede'ş-şer‘ zâhir ve nümâyân olmağın, mezbûre Emetullah'ın da‘vâ-yı mezkûresine iltifât olunmayıp tevliyet-i mezkûre kemâ-fi'l-evvel mezbûre Ümmü Gülsüm Hâtun'un yedinde ibkā ve fîmâ-ba‘d
mezbûre Emetullah şâ’ibe-i tezevvüresiyle mezbûre Ümmü Gülsüm Hâtun'u rencîde ve ta‘cîz etmemek üzere emr-i âlîlerini istirhâm eylediği huzûr-ı âlîlerine i‘lâm olundu.
Fî 24 Safer, sene 1203.
[10a]
Hüküm 1: Alacak hakkı talebiGalata'ya muzāfe kasaba-i Kasım Paşa Piyale Paşa-yı Sağîr Mahallesi'nde sâkine mu‘arrefetü'z-zât Şerife Âmine bint-i es-Seyyid Abdurrahman nâm hâtun Galata Bâb Mahkemesi'nde meclis-i şer‘de zevc-i sâbıkı Çukadar es-Seyyid Mustafa Ağa bin İbrahim nâm kimesme muvâcehesinde mezbûr es-Seyyid Mustafa
zimmetinde cihet-i karzdan otuz beş guruş hakkım olmağla hâlâ taleb ederim deyü ba‘de'd-da‘vâ ve'l-ikrâr mûcebince meblağ-ı mezkûr otuz beş guruşu müdde‘iye-i mezbûre Şerife Emine Hâtun'a edâ ve teslîme mezbûr es-Seyyid Mustafa Ağa'ya tenbîh olunduğu huzûr-ı âlîlerine i‘lâm olundu.
Fî 8 Safer, Sene 1203.
*
Hüküm 2: Alacak hakkı talebi
Havâss-ı Refî‘a kazâsına tâbi‘ Hasköy'de sâkine yazıcı Ömer bin İbrahim nâm kimesne Galata Bâb Mahkemesi'nde meclis-i şer‘de Galata'da mütemekkin Markar veled-i Parsiç nâm zimmî muvâcehesinde merkûm Markar zimmî zimmetinde cihet-i karzdan otuz altı buçuk guruş alacak hakkım olmağla hâlâ taleb ederim deyü ba‘de'd- da‘vâ ve'l-inkâr müdde‘î-i mezbûr ber-vech-i muharrer müdde‘âsını şehâdetleri makbule olan İbrahim bin Halil, Mustafa bin Halil nâm kimesne şehâdetleriyle merkûm Markar muvâcehesinde vech-i şer‘î üzere isbât etmeğin mûcebince meblağ-ı mezkûr otuz altı buçuk guruşu müdde‘î-i mezbûr Ömer Beşe'ye edâ ve teslîme merkûm Markar zimmîye tenbîh olunduğu huzûr-ı âlîlerine i‘lâm olundu. Fî 27 S. Sene [1]203.