Köprünün kaldırılması da‘vâsında uyuşma

Sâdır olan emr-ı âlîlerine imtisâlen Tersâne-i Âmire kethudâları dâ‘îleri nezâretinde âsûde evkāfdan merhûm Ruznâçe İbrahim Efendi Vakfı

müsekkafâtından olup mahrûse-i Galata hısn-ı ebvâbından Kireç Kapısı hâricinde Kaılıç Ali Paşa Mahallesi'nde vâki‘ tarîk-i hâsda kâ’in menâzil-i adîdeden ale'l- iştirâki's-sivâ bir bal menzilin bi'l-icâreteyn mutasarrıfaları Çeçilye bint-i Abram ve Serpohi bint-i Bedros nâm Nasrâniyyeler Galata Bâb Mahkemesi'nde meclis-i şer‘-i münîrde vakf-ı mezkûrdan menzil-i merkûma muttasıl kezâlik ale'l-iştirâki'

[12a]

sivâ bir bâb menzilin bi'l-icâreteyn mutasarrıfları derûn-ı isimleri merkûm Abraham ve karındaşı Kigork veled-i Andon ve kız karındaşı müştereki mesfûr Kigork tarafından husûs-ı âti'z-zikrde vekîl olup ber-nehc-i şer‘î vekâleti sâbit ve sübût-ı vekâlete hükm-i şer‘î lâhık olan merkûm Abraham muvâcehesinde mütevellî-i vakf-ı mezkûr es-Seyyid Nu‘mân Efendi hâzır olduğu hâlde bin iki yüz iki senesi Zi'l- hiccesinin yirminci günü tarihiyle müverrah ve bâlâsı musahhah işbu cüz’-i arzuhâl hâmişinde bir kıt‘a arzuhâl mantûku üzere mesfûrân Abraham ve karındaşı Kigork mutasarrıf oldukları bağçelerine mürûr ve ubûr için kadîmden mevcud köprüye adem-i kanâ‘atlerinden nâşî zikr olunan atik köprü ittisâlinde hulefâ’-i mi‘mâ mesâhalarıyla tûlen dört zirâ‘ dört parmak ve arzan üç zirâ‘ on dokuz parmak ve kadden on bir zirâ‘ on beş parmak menzil-i mezkûrlarından bağçe-i merkûme kezâlik mürûr ve ubûr için sakfı mevcud ve ahşâbdan müceddeden köprü binâ ve ihdâs etmeleriyle bize ve sâ’ire bir bâb tarîk-i hâssa zarar-ı şer‘îsi olmağla su’âl olunup kal‘ u ref‘ olunması matlûbumuzdur deyü mahallinde tarafımızdan vekîl olan sâhib-i arzuhâl işbu bi'l-meclis Mığırdıç veled-i İstefan nâm zimmî bi'l-vekâle da‘vâ

eyledikde onlar dahi cevablarında mârru'z-zikr münâza‘un-fîh olan köprü kadim olup târih-i i‘lâmdan on sekiz sene mukaddem vaku bulan harîkde muhterik oldukda vaz‘- ı kadîmi ve hey’et-i asliyyesini binâ etmiş-idik, deyü hudûsunu inkâr ve bizimle münâza‘a ve beynimizde vukû‘-ı muhâsame ile nizâ‘ımız mümted olmuş-idi, el- hâletü hâzihî zikr olunan köprünün hedmi her hâlde vakf-ı merkûma muzır ve bekāsı vakf-ı şerîfe enfa‘ olmağla mesfûrân Abraham ve Kigork veled-i Andon'un her birine köprü-yı merkûmun ibkāsına tarafımızdan izin ve ref‘ ve kal‘ına müte‘allika âmme-i da‘vâdan mesfûrân Abraham ve karındaşı Kigork'u ibrâ eylediğimizden sonra onlar dahi ba‘de'l-kabûl lâkin mesfûretân Çeçilya bint-i Abraham ve Serpohi bint-i Bedros'dan her biri mesfûrân Abraham ve Kigork veled-i Andon'a dâima münâza‘a

ve muhâsameden hâlî olmadıklarına binâ’en mesfûrân Abraham ve Kigork kendi mallarından teberru‘an mesfûretân Çeçilya ve Serpohi'ye kat‘an li'n-nizâ‘ beş yüz guruş verip medfû‘larından zimmetlerini ibrâ yine onlar dahi meblağ-ı mezbûru ba‘de'l-ahz zikr olunan köprünün kal‘ u ref‘‘ine müte‘allika târih-i i‘lâmâta gelince hukûk-ı sâ’ireye müte‘allika âmme-i da‘vâdan mesfûrân Abraham ve Kigork'un zimmetlerini ibrâ-yı âmm-i râfi‘ü'l-hısâm ile ibrâ ve iskāt ve onlar dahi medfû‘ları olan meblağ-ı mezkûr beş yüz guruşa ve sâ’ire müte‘allika da‘vâdan mesfûretânın zimmetlerini ibrâ ve iskāt eyleyip ve her biri ber-vech-i muharrer âharın ibrâsını kabul eyleyip bu vechile kat‘-ı nizâ‘ ve ref‘-ı husûmet eyledikleri tescîl ve mübâşirleri Mehmed Es‘ad Çavuş kulları yediyle huzûr-ı âlîlerine i‘lâm olundu. *

Ma‘rûz-ı dâ‘î

Hüküm 2: Alacak hakkının kabulü

Galata'da sâkin es-Seyyid el-Hâc Hüseyin Ağa bin Mehmed nâm kimesne Galata Bâb Mahkemesi'nde meclis-i şer‘de Petro veled-i Yani nâm zimmî

muvâcehesinde benim gâ’ib ani'l-meclis Yaş Yatuz zimmetinde cihet-i karzdan yüz guruşdan bâkî doksan guruş alacak hakkım olup merkûm Yaş Yatuz zimmînin dahi merkûm Petro zimmî zimmetinde cihet-i mezkûreden doksan beş guruş alacak hakkı olmağla medyûnum merkûm Yaş Yatuz zimmî deyn-i mezkûruyla merkûm Petro zimmî üzerine üçümüz bir meclisde iken havâle-i sahîha-i şer‘iyye ile havâle ve her birimiz ber-vech-i muharrer havâle-i mezkûreyi kabul eylediğimizden sonra merkûm Petro meblağ-ı mezkûrun elli yedi guruşunu bana edâ ve teslîm, bâkî kalan otuz sekiz guruşu merkûm Petro'dan taleb ederim deyü da‘vâ eyledikde ol dahi cevâbında ber- vech-i muharrer ikrâr ve i‘tirâf etmeğin mûcebince meblağ-ı bâkî-i mezkûr otuz sekiz

guruşu müdde‘î-i mezbûra bi-hükmi'l-havâle edâ ve teslîm merkûm Petro'ya tenbîh olunduğu huzûr-ı âlîlerine i‘lâm olundu.

Fî 17 Ra. Sene [1]203.

*

Hüküm 3: Alacak hakkının kabulü

Galata'da sâkine Hüseyin bin nâm kimesne Galata Bâb Mahkemesi'nde meclis-i şer‘de bakkal Arslan veled-i Sava nâm zimmî muvâcehesinde merkûm Arslan

zimmetinde bundan akdem be-her vukıyyesi on sekiz paraya olmak üzere yedimden iştirâ ve kabz eylediği elli vukıyye revgan-ı zeyt semeninden yirmi iki buçuk guruş hakkım olmağla hâlâ taleb ederim deyü ba‘de'd-da‘vâ ve'l-inkâr müdde‘î-i mezbûr es-Seyyid Hüseyin ber-vech-i muharrer müdde‘âsını kalyoncu Hüseyin Beşe bin Mustafa ve Mehmed Beşe bin el-Hâc Hüseyin nâm kimesne şehâdetleriyle merkûm Arslan muvâcehesinde vech-i şer‘î üzere isbât etmeğin mûcebince meblağ-ı mezkûr yirmi iki buçuk guruşu müdde‘î-i mezbûr es-Seyyid Hüseyin'e edâ ve teslîme merkûm Arslan zimmîye tenbîh olunduğu huzûr-ı âlîlerine i‘lâm olundu. Fî 19 Ra. Sene [1]203.

*