Edebsizlikten şikâyet

[4a]

İmamı sâhib-i arzuhâl es-Seyyid eş-Şeyh Mustafa Efendi ve Müezzin Molla İsmail ve ahâlisinden el-Hâc Hasan ve Salih ve Molla Hasan ve el-Hâc Mehmed ve Abdullah ve Abdurrahman ve Mustafa Beşe vesâ’irleri Galata Bâb Mahkemesi'nde meclis-i şer‘de mahalle-i mezbûrede müste’ciren sâkin derûn-ı arzuhâlde mezkûru'l- ism lüleci Ahmed Beşe bin Mustafa nâm kimesne muvâcehesinde mezbûr Ahmed Beşe ile zevcesi gâ’ibe ani'l-meclis Zeyneb nâm hâtun kendi hallerinde nâ-

mahremden ictinâbları olmayıp yed ve lisanlarıyla daima bizi ta‘ciz ve tekdirden hâlî olmamalarıyla kendülere tehbih eylediğimizde bir türlü mütenebbihler olmayıp ızrârlarında ısrar etmeleriyle bir vecih ile kendülerinden emn ü râhatımız meslûb olup hoşnud ve razı değilleriz deyü teşekkî ve mahalle-i mezbûreden hurûclarını iltimâs eyledikleri mübâşirleri Halil Çavuş kulları yediyle huzûr-ı âlîlerine i‘lâm olundu. Bakiyyü'l-emr li-men lehü'l-emr.

Fî 11 M. Sene [1]203.

Hüküm 2: Zimmetten alacak talebi

Mellâh tâifesinden İsmail bin İbrahim nâm kimesne Galata Bâb Mahkemesi'nde meclis-i şer‘de tüccârdan el-Hâc Süleyman bin Mustafa nâm kimesne muvâcehesinde mezbûr el-Hâc Sülayman zimmetinde ma‘lûmü'l-vezn bir kazgan ve ma‘lûmü'z-zirâ‘ beyaz ve kırmızı bukası semeninden yüz altı guruşdan bâkî otuz guruş alacak hakkım olmakla hâlâ taleb ederim deyü da‘vâ eyledikde ol dahi ber-vech-i muharrer ikrâr ve i‘tirâf etmeğin mûcebince meblağ-ı bâkî-i mezbûr el-Hâc Süleyman Ağa'ya tenbîh olunduğu huzûr-ı âlîlerine i‘lâm olundu. Bakiyyü'l- emr li-men lehü'l-emr.

Fî 11 M. Sene [1]203.

*

Hüküm 3: Zimmetten alacak talebi

Mellah tâifesinden Hristo veled-i Yezo nâm zimmî Galata Bâb

Mahkemesi'nde meclis-i şer‘de sefîne re’îslerinden Tanaş veled-i Vaşo nâm zimmî muvâcehesinde; ben bundan akdem merkûm Tanaş'ın talebiyle râkib olduğum sefînesinde bât kavliyle Âsitâne'den Bahr-i Siyâh'da vâki‘ Vasilikos İskelesi'ne ve ondan yine gelince üç ayda eylediğim mülâhık hizmetimin üç misli olan otuz dört buçuk guruşu bana tamâmen edâ ve teslîm edip ve meblağ-ı mezkûr hizmetimin ecr-i misline mu‘âdil olmağın lâkin re’îs-i merkûm ecr-i mislim olarak ziyâde otuz beş buçuk guruş dahi bana versin deyü tasaddî eylediği da‘vâsı takrîr-i meşrûh üzere olmayıp bî-vech mu‘ârazadan men‘ olunduğu huzûr-ı âlîlerine i‘lâm olundu. Bakiyyü'l-emr li-men lehü'l-emr.

Fî 11 M. Sene [1]203.

Hüküm 4: Cihet-i karzdan alacak talebi

Galata hâricinde Kamer Hâtun Mahallesi'nde mütemekkin bî-zebân Serope veled-i Karabet nâm zimmînin zevcesi tarafından mahzar-ı hasm-ı hâssa âtîde işaret-i ma‘hûdesiyle vekîl-i müseccel-i şer‘îsi mu‘arrefetü'ş-şahs Tuti bint-i Serkiz nâm Nasrâniyye Galata Bâb Mahkemesi'nde meclis-i şer‘de kezâlik mu‘arrefetü'ş-şahs Serpohi bint-i Karabet nâm Nasrâniyye muvâcehesinde; zevcim müvekkilem merkûm Serope'nin merkûme Serpohi Nasrâniyye zimmetinde cihet-i karzdan kırk guruş alacak hakkı olmakla hâlâ bi'l-vekâle taleb ederim deyü da‘vâ eyledikde ol dahi cevâbında külliyen ba‘de'l-inkâr vekîl-i müdde‘iye-i merkûme Tuti Nasrâniyye ber vech-i muharrer müdde‘âsını isbâta kādir olmayıp bi't-taleb merkûme Serpohi Nasrâniyye ba‘de't-tahlîfi'ş-şer‘i mûcebince vekîl-i müdde‘iye-i merkûme ber-vech-i muharrer da‘vâ-yı mezkûresiyle bilâ-beyyine mu‘ârazadan men‘ olunduğu huzûr-ı âlîlerine i‘lâm olundu. Bâkıyyü'l-emr li-men lehü'l-emr.

Fî 12 M. Sene [1]203.

*

Ma‘rûz-ı dâ‘î

Hüküm 5: Cihet-i karzdan alacak talebi

Galata hâricinde Beyoğlu nâm mahallede mütemekkin sâhib-i arzuhâl tabib Andon veled-i Avanis nâm zimmî Galata Bâb Mahkemesi'nde meclis-i şer‘de derûn-ı arzuhâlde merkûmu'l-ism Halebli sandalcı Elis nâm zimmî muvâcehesinde merkûm Elis zimmî zimmetinde işbu temessük nâtık olduğu üzere cihet-i karzdan üç yüz elli guruş alacak hakkım olmakla hâlâ taleb ederim deyü da‘vâ eyledikde ol dahi

cevâbında ben müdde‘î-i merkûma cihet-i mezkûreden benim olan meblağ-ı mezkûr üç yüz elli guruş mukābelesinde malımdan kırk beş kıymetli savalı bir entari ve yirmi

beş guruş kıymetli şeritli şâlî bir cübbe ve seksen guruş kıymetli bir çiçekliye kaplı bir sincab kürk ve yirmi beş guruş kıymetli bir entari ve seksen dört guruş kıymetli bir elmas küpeyi yedine vaz‘ı rehin eylediğimden sonra müdde‘î-i merkûm bilâ-devr- i şer‘î ruba nâmıyla benden bi-gayri hakkın ahz u kabz eylediği be-her şehr dörder buçuk guruşdan üç sene iki ayda müctemi‘a yüz yetmiş bir guruş deyn-i mezkûrum olan meblağ-ı mezkûr üç yüz eli guruşun yüz yetmiş bir guruşu yedimden ahz birle eşyâ’-i mezkûreyi müdde‘î-i merkûmdan geri taleb ederim deyü da‘vâsını müdde‘î-i merkûm ba‘de'l-inkâr merkûm Elis zimmî ribâ-yı meblağ-ı mezkûr ile eşyâyı rihân-ı mezkûre müdde‘âlarını isbâta kādir olmayıp riba-yı meblağ-ı mezkûre bi't-taleb merkûm Andon ba‘de't-tahlîfi'ş-şer‘î ve eşyâ’-i rihân-ı mezkûra tâlib-i tahlîf olmayıp mersûm Elis zimmî ribâ-yı meblağ-ı mezkûr yüz yetmiş bir guruş ile eşyâ’-i mezkûre da‘vâsıyla bilâ-beyyine mu‘ârazadan ba‘de'l-men‘ merkûm Elis zimmînin mûcebince lâzım gelen meblağ-ı mezkûr üç yüz elli guruşu müdde‘î-i merkûm Andon zimmîye edâ ve teslîme, merkûm Elis zimmîye tenbîh olunduğu mübâşirleri Mehmed Çavuş kulları yediyle huzûr-ı âlîlerine i‘lâm olundu. El-emr li-men lehü'l-emr.

Fî 10 M. Sene [1]203.

*

Hüküm 6: Zimmetten alacak talebi

Mellâh tâifesinden İsmâ‘il bin İbrahim nâm kimesne Galata Bâb Mahkemesi'nde meclis-i şer‘de tüccârdan el-Hâc Süleyman bin Mustafa nâm kimesne muvâcehesinde mezbûr el-Hâc Süleyman zimmetinde ma‘lûmü'l-vezn bir kazgan ve ma‘lûmü'z-zirâ‘ beyaz bukası semeninden altmış altı guruş alacak hakkım olmağla hâlâ taleb ederim deyü da‘vâ eyledikde ol dahi ber-vech-i muharrer ikrâr ve i‘tirâf etmeğin mûcebince meblağ-ı mezkûr altmış altı guruşu müdde‘î-i mezbûr

İsmail'e edâ ve teslîme mezbûr el-Hâc Süleyman'a tenbîh olunduğu huzûr-ı âlîlerine i‘lâm olundu. El-emr li-men lehü'l-emr.

Fî 12 M. Sene [1]203.

*