NUMARALI KONYA ŞER’İYE SİCİLİ’NİN METNİ

Mahallât-ı hânehâ-i menzil el-vâki‘ fî gurre-i şehr-i Zî’l-ka‘de sene 1083.

Mahalle-i Hâcıeymîr hâne 3,5 / Mahalle-i Kürkçü hâne 2; rub‘ 1 / Mahalle-i Kaymakahmed hâne 0,5 / Mahalle-i Hocahabîb hâne 2,5 / Mahalle-i Bordabaşı hâne 2,5 / Mahalle-i Seb‘ahân hâne 2,5; rub‘ 1 /

Mahalle-i Şerefşirîn hâne 0,5 / Mahalle-i Karakurd ma‘a Sungur hâne 2 / Mahalle-i Tarhana hâne 1,5; rub‘ 1 / Mahalle-i Biremânî hâne 2; rub‘ 1 / Mahalle-i Yenice hâne 2; rub‘ 1 / Mahalle-i Kasabsinân hâne 1 / Mahalle-i Şeyhahmed hâne 2; rub‘ 1,

Mahalle-i ‘Abîd hâne 1,5 / Mahalle-i Medrese hâne 5, Mahalle-i Topraklık hâne 2,5; rub‘ 1 / Mahalle-i Turşucu hâne 0,5 / Mahalle-i ‘Alîşerbetî hâne 1; rub‘ 1 / Mahalle-i Fakîhdede hâne 2 /

Mahalle-i Şekerfürûş hâne 1,5; rub‘ 1 / Mahalle-i Uluırmak hâne 2; rub‘ 1 / Mahalle-i Öylebanladı hâne 2,5 / Mahalle-i Hocahasan hâne 2,5 / Mahalle-i Akbaş hâne 2 / Mahalle-i Bunârî hâne 1,5 /

Mahalle-i Kâdı‘alemşâh hâne 1 / Mahalle-i Sarıya‘kûb hâne 4 / Yekûn hâne 50.

1-2 Konya Menzilinin İltizâma Verilmesi

Mahmiye-i Konya Karakurd ma‘a Sungur Mahallesi sâkinlerinden râfi‘iyyü’l-kitâb el- Hâc İbrahîm Beşe bin Mehmed ve Ahmed Beg ibn ‘Abdî Beg nâm kimesneler meclis-i şer‘-i hatîr-ı lâzımü’t-tevkîrde hâlâ bazarbaşı olan el-Hâc İsma‘îl ve Âhî Baba el-Hâc Receb bin İlyâs ve Haffâf Derviş Mustafâ ibn el-Hâc Cum‘a ve Ahmed Efendi ibn Halîl ve Mehmed Halîfe ibn Receb ve Mehmed Çelebi ibn Mahmûd ve Dâvud Çelebi ibn Emrullah ve Helvacı Mustafâ ibn Ahmed ve Derzi Ahmed bin Bâlî ve Bezzâz Mehmed Çelebi nâm kimesneler mahzarlarında ikrâr ve takrîr-i kelâm idüp hâzır-ı bi’l-meclis olan el-Hâc Ahmed Beşe’nin senesi temâm olup geçen sene menzilci iken elli hânenin tekâlîf-i ‘örfiye ve şâkkasını alduğundan mâ‘adâ sâ’ir hâneler hâne başına ikişer guruş virmek üzere menzili kabûl idüp altı aydan sonra arpa bahâya çıkdı deyu ahâli-i vilâyete üçyüzyetmiş guruş dahî tevzî‘ ve tahsîl ve kabz eylemişiken hâlâ kanâ‘at itmeyüp dahî ziyâde taleb idüp ahâli-i vilâyet dahî ziyâde virmeğe iktidârımız yokdur dimeleriyle mezbûr Ahmed Beşe menzilden fâriğ olmağla ahâli-i vilâyete merhameten yüzyirmi guruş noksânıyla menzilcilik hidmetini ben kabûl idüp ahâli-i vilâyet ma‘rifetiyle kadîmî dört re’s bargir ile bin seksen üç Zî’l-ka‘desi gurresinden bir sene temâmına değin taraf-ı saltanat-ı ‘aliyyeden mürûr ve ‘ubûr iden ulaklara birden bine varınca yüklü ve yüksüz bargiri virüp vilâyet ahâlisine te‘addî olunmamak üzere kadîmî menzile ta‘yîn olunan elli hânenin bir senede vâki‘ ‘avârız ve nuzül ve beglerbegi arpası ve sâ’ir tekâlîf-i ‘örfiye ve şâkkanın cümlesini bana virüp ve sâ’ir hâneler hâne başına ikişer guruş ve ikişer sülüs imdâd eylemek üzere menzili kabûl ve der-‘uhde eyledim didikden sonra mahalle- i merkûme imâmı Molla İsma‘îl ibn ‘Îsâ ve Satı bin ‘Abdî ve Bayram Beşe ibn ‘Îsâ ve Mehmed bin Mustafâ ve ‘Alî bin Oruç ve ‘Osmân bin ‘Alî ve Mehmed bin Süleymân ve Ahmed bin Mustafâ nâm kimesneler mezbûrân el-Hâc İbrahîm Beşe ve Ahmed Beg’in üzerlerine edâsı lâzım gelen mâla ve hîn-i mutâlebede meclis-i şer‘a ihzârlarıyla emr ve kabûlü hâvî kefâletle kefîl-i bi’l-mâl olduk didiklerinde gıbbe’t-tasdîk mâ-vaka‘a bi’t-taleb ketb olundu fî’l-yevmi’l-râbi‘ ve’l-‘ışrîn min Şevvâli’l-mükerrem li-sene selâse ve semânîn ve elf (24 Şevvâl 1083 / 22 Mayıs 1672).

100

Fahrü’s-sâdât zehrü’l-kuzât es-Seyyid Hüseyin Efendi Kâ’im-makâm-ı nakîbü’l-eşrâf, Fahrü’l-kuzât Mustafâ Efendi ibn Mevlûd Beşe, Fahrü’l-müderrisîn Mehmed Efendi, Zehrü’l- müderrisîn Sarâc-zâde ‘Abdulkerîm Efendi, Ahmed Beg bin Pîrî Beg, es-Seyyid Süleymân Çelebi bin Seyyid Ahmed, el-Hâc Hüsâm Beg ibn Hasan, Fahrü’l-emsâl ‘Ömer Beşe serdâr, Süleymân Beşe serdâr-ı sâbık.

2-1 Konya Kazâsı’na Kâdı Ta‘yîni Hakkında Fermân

Tabbaka aslıhü’l-hatîr nemekahü’l- fakîr ileyhi sübhânehu Mehmed el-med‘uv be-kâdı- zâde el-kâdı be-medîne-i Kostantiniyye el-mahmiye ‘afâ ‘anhümâ.

Akzâ kuzâtü’l-müslimîn evlâ vülâtü’l-muvahhidîn ma‘denü’l-fazl ve’l-yakîn hüccetü’l- hakk ‘ale’l-halk-ı ecma‘în vâris-i ‘ulûmü’l-enbiyâ ve’l-mürselîn el-muhtas bi-mezîd-i ‘inâyeti’l-meliki’l-mu‘în sâbıkan Konya kâdısı olan Mevlânâ Mehmed zîdet fezâ’iluhu tevkî‘- i refî‘-i hümâyûn vâsıl olıcak ma‘lûm ola ki sen ehl-i ‘ilm ve sâhib-i fazîlet ve müteşerri‘ ve dîndâr olup mahal ve müstehak olduğun ecilden hâliyâ hakkında mezîd-i ‘inâyet-i ‘aliyye-i şâhâne ve mezîd-i re‘fet-i seniyye-i pâdişâhânem zuhûra getürüp işbu sene selâse ve semânîn ve elf Recebü’l-müreccebenin on altıncı gününden Konya Kazâsı’n sana tevcîh ve ‘inâyet idüp ‘ilâmıçün (boş) ta‘yîn olunmuşdur buyurdum ki vusûl buldukda sâdır olan fermân-ı celîlü’l-kadrîm mûcibince bir an ve bir sâ‘at te‘hir ve tevakkuf itmeyüp varup Konya Kazâsı’n mutasarrıf olup ahâlisi beyninde icrâ-yı ahkâm-ı şer‘iye-i nebevî ve infâz-ı evâmir-i ‘aliyye-i Mustafâvî sallallahu te‘âlâ ‘alâ şâri‘ihada bezl-i makdûr ve sa‘y-ı nâ-mahzûr eyleyüp mu‘accelen âdemin gönderüp berâtın ihrâcıyla mukayyed olasın şöyle bilesin ‘alâmet-i şerîfe i‘timâd kılasın tahrîren fî evâsıt-ı şehr-i Recebi’l-mürecceb sene selâse ve semânîn ve elf (11- 20 Receb 1083 / 2-11 Kasım 1672).

Be-yurd-ı Sahrâ-yı (boş).

Vasale fî 11 şehr-i Ramazân sene 1083 (31 Aralık 1672).

2-2 Konya Kâdısının Yerine Nâ’ib Ta‘yîn Ettiği Hakkında Mürâsele

Fahrü’l-kuzât Mehmed Efendi dâme mu‘azzezâ gıbbe’t-tahiyye inhâ olunur ki emr-i şerîf-i cihân-mutâ‘ ile mutasarrıf olduğumuz Konya Kazâsı’nın kendimiz varınca bâb-ı niyâbeti size tefvîz olunmuşdur gerekdir ki icrâ-yı ahkâm-ı şer‘iye idesiz ve’s-selâm hurrire fî’l-yevmi’s-sâbi‘ ve’l-‘ışrîn min Şa‘bâni’l-mu‘azzam sene 1083 (27 Şa‘bân 1083 / 18 Aralık 1672).

el-Fakîr Mahmûd el-kâdı be-medîne-i Konya gafara lehu. Kayd şud fî 11 şehr-i Ramazân sene1083 (31 Aralık 1672).

3-1 Tâcü’l Vezîr Medresesi Müderris ve Mütesellim Ta‘yîni Hakkında Tezkere Mederese-i Tâc-ı Vezîr ma‘a tevliyet-i der-Konya.

Kıdvetü’l-‘ulemâ’i’l-muhakkıkîn Mevlânâ ‘Alî Efendi zîde fazluhu ‘arz-ı hâl sunup medrese-i mezbûrenin müderrisi olan beş seneden mütecâviz edâ-i hidmet itmeyüp medrese mu‘attal kalmağın tevliyeti ile kendüye virilmek bâbında ‘inâyet ricâ itmeğin fazîletli şeyhü’l- islâm efendi hazretlerinin işâretleri ile virilmek buyruldu tahrîren fî 8 M selâse ve semânîn ve elf (8 Muharrem 1083 / 6 Mayıs 1672).

101

3-2 Konya Kazâsı’nın Kısmet-i ‘Askeriyesi Hakkında Tezkere ‘İzzet me’ab ‘Abdulkerîm Efendi kâmiyâb.

Tahiyyât-i sâfiye ithâfıyla inhâ olunur ki Konya Sancağı’nın kısmet-i ‘askeriyesi size sipâriş olunmuşdur vâki‘ olan mevtâ-yı ‘askeriyenin muhallefâtını tahrîr ve beyne’l-verese bi’l-farîzeti’ş-şer‘iye taksîm idesiz ve’s-selâm hurrire fî gurre-i Rebî‘ü’l-âhir li-sene selâse ve semânîn ve elf (1 Rebî‘ü’l-âhir 1083 / 27 Temmuz 1672).

el-fakîr Mehmed el-kâdı be-‘asker-i Anadolu.

Vasale fî 20 Cemâziye’l-ûlâ sene 1083 (12 Eylül 1672).

3-3 Merâm Hatîb-zâde Mehmed Çelebi Câmi‘i Mütevelli Berâtı Berât-ı tevliyet-i Merâm.

Nişân-ı şerîf-i ‘âlîşân hükmü oldur ki.

İşbu râfi‘-i tevkî‘-i refî‘ü’ş-şân-ı hâkânî Süleymân Çavuş dergâh-ı mu‘allâma gelüp mahrûse-i Konya’da vâki‘ Hatîb-zâde Mehmed Çelebi binâ eylediği câmi‘i-şerîf evkâfına meşrûtiyet üzere yevmî iki akça vazîfe ile kendüye tevcîh olunup berât-ı şerîfimle mutasarrıf olup üzerinde olup hidmetinde kusûru yoğiken âhardan Süleymân nâm kimesne hilâf-ı şart-ı vâkıf aldım deyu dahl idüp gadr itmekle mezbûr Süleymân ref‘ olunup kemâkân meşrûtiyet üzere ibkâ ve mukarrer kılınmak bâbında istid‘â-yı ‘inâyet ricâ itmeğin meşrûtası ise berât mûcibince tevcîh ve ‘inâyet idüp bu berât-ı hümâyûn sa‘âdet makrûnu virdim ve buyurdum ki ba‘de’l-yevm mezbûr varup ber-mûcib-i şart-ı vâkıf kemâkân mütevelli olup hidmet-i lâzımesin mer‘î ve mü’eddî kıldıkdan sonra ta‘yîn olunan yevmî iki akça vazîfesine mutasarrıf olup ol bâbda ref‘ olunan mezbûru ve taraf-ı âhardan bir ferd dahl ve ta‘arruz kılmaya şöyle bileler ‘alâmet-i şerîfe i‘timâd kılalar tahrîren fî evâhir-i şehr-i Şevvâli’l- mükerrem sene selâse ve semânîn ve elf (21-29 Şevvâl 1083 / 9-17 Şubat 1673).

Be-makâm-ı Edirne el-mahrûse.

Vasale fî 17 Zî’l-hicce sene 1083 (5 Nisan 1673). 4-1 Konya Kâdısının Göreve Başlama Kaydı Bismillahi’l-‘alîmi’l-fettâh.

Bâbü’l-kazâyâ ve’l-ahkâm mine’l-cerîde es-sâliseti nezemtu fî silki’t-tahrîr fî-zimeni’l- ‘âlemi’t-tahrîr ve’l-fâzıl el-kebîr hâviyyü’l-fezâ’il ve’l-fevâzıl câmi‘ü’l-mecâmid ve ehâsinü’l-hasâ’il Mûsâ Efendi el-kâdı yevme’izin be-medîneti Konya el-mahmiye.

4-2 Muhâla‘a

Derviş Mustafâ / muhâla‘a / ‘Âyşe.

Mahmiye-i Konya’da Türbe-i Celâliye Mahallesi sâkinlerinden Derviş Mustafâ ibn el- Hâc Mehmed meclis-i şer‘-i hatîr-ı lâzımü’t-tevkîrde zevcesi râfi‘atü’l-kitâb ‘Âyşe bint-i Habîb mahzârında ikrâr ve takrîr-i kelâm idüp zevcem merkûme ‘Âyşe ile beynimizde hüsn-i zindegânî ve musâfât olmamağla zimmetimde mütekarrer ve ma‘kûd-ı ‘aleyh olan dörtbin akça mehr-i mü’ecceli ve nafaka-i ‘iddet-i ma‘lûmesi ve me’ûnet-i süknâsı mukâbelesinde ve oğullarım Süleymân ve İbrahîm ve Mehmed’i bilâ nafaka ve kisve beslemek üzere mahalle-i merkûmede vâki‘ ‘inde’l-ahâli ve’l-cîrân ma‘lûmetü’l-hudûd olan menzilimden bir ahur ve bir tabhâne ve bir örtme ve bir mikdâr havluyu merkûme ‘Âyşe Hatun’a virüp ol dahî kabûl idüp merkûme ‘Âyşe ile muhâla‘a-i sahîha-i şer‘iye ile hul‘ idüp ol dahî hul‘u vech-i mübeyyen üzere ba‘de’l-kabûl zevciyete ve gayra müte‘allık cemî‘ de‘âvîden her birimiz âharın

102

zimmetini ibrâ ve iskât eyledik didikde gıbbe’t-tasdîk mâ-vaka‘a bi’t-taleb ketb olundu fî’l- yevmi’s-sâbi‘ min Rebî‘ü’l-evvel li-sene selâse ve semânîn ve elf (7 Rebî‘ü’l-evvel 1083 / 3 Temmuz 1672).

‘Abdulkâdir Çelebi bin Celâl Çelebi, Mehmed Efendi ibn Ezelî, Mehmed Çelebi bin Hâbil, Mustafâ bin Habîb.

4-3 Darb Da‘vâsı ‘Alî / tezârüb / Mahmûd.

Mahmiye-i Konya muzâfâtından Sahrâ Nâhiyesi’ne tâbi‘ Gödeler nâm karye sâkinlerinden râfi‘ü‘l-kitâb ‘Alî bin Üveys meclis-i şer‘-i hatîr-ı lâzımü’t-tevkîrde karye-i merkûme sâkinlerinden Mahmûd bin Nebî Beşe mahzarında da‘vâ ve takrîr-i kelâm idüp târîh-i kitâbdan üç gün mukaddem mezbûr Mahmûd’dan sâlyâne taleb eylediğimde mezbûr Mahmûd benim yüzüme ve ağzıma tabanca ile darb idüp ol darbdan sol tarafından üst dişlerimin bir azı dişim çıkdı su’âl olunup takrîri tahrîr ve icrâ-yı şer‘ olunması matlûbumdur didikde gıbbe’s-su’âl ve ‘akîbe’l-inkâr ve ba‘de’l-istişhâd ‘udûl-i müslimînden ‘İvaz ibn el- Hâc Bedel ve ‘Abdulganî bin Hızır nâm kimesneler li-ecli’ş-şehâde meclis-i şer‘a hâzırân olup istişhâd olunduklarında târîh-i kitâbdan üç gün mukaddem mezbûr ‘Alî merkûm Mahmûd’dan sâlyâne taleb eyledikde merkûm Mahmûd mezbûr ‘Alî’nin yüzüne ve ağzına tabanca ile darb eyledi biz bu husûsa bu vech üzere şâhidleriz şehâdet dahî ideriz deyu edâ-i şehâdet-i şer‘iye eylediklerinde şehâdetleri hayyiz-i kabûlde vâkı‘a olmağın mâ-vaka‘a bi’t- taleb ketb olundu fî’l-yevmi’s-sâbi‘ min Rebî‘ü’l-evvel li-sene selâse ve semânîn ve elf (7 Rebî‘ü’l-evvel 1083 / 3 Temmuz 1672).

Fahrü’l-kuzât Ahmed Efendi ibn Durmuş Beşe, Fahrü’l-a‘yân ‘Abdulkâdir Beşe bin Mehmed Beşe, Hızır bin Mehmed, ‘Osmân bin Süleymân, Ahmed bin Memiş.

4-4 Vasîden Malların Teslîm Alımı Da‘vâsında Sulh

Mahmiye-i Konya’da Göktaş Mahallesi sâkinelerinden ‘Âyşe bint-i Mehmed nâm bikr-i bâliğa meclis-i şer‘-i hatîr-ı lâzımü’t-tevkîrde râfi‘ü’l-kitâb Süleymân ibn el-Hâc Muharrem mahzarında ikrâr ve takrîr-i kelâm idüp bundan akdem ben sagîre iken mezbûr Süleymân vasîm olup babam Mehmed’den ve vâlidem Fâtıma’dan bana intikâl iden ‘akâr ve menkûlâtımı zabt idüp ve taraf-ı şer‘den bana takdîr itdirdiği nafakayı menkûlâtımdan alup kabz idüp bâkî kalan ‘akâr ve menkûlâtımı hâlâ ‘âkıle ve bâliğa olmam ile da‘vâ ve taleb eylediğimde bi-tavassuti’l-müslimîn ve bi-tarîki’s-sulh Karaüyük Irmağı kurbunda vâki‘ bir tarafı İbrahîm mülkü ve bir tarafı benim mülküm ve bir tarafı mezbûr Süleymân mülkü ve bir tarafı su yolu ile mahdûd el-Hâc Mustafâ’dan şirâ-i şer‘le iştirâ eylediği on dört puşta bağ ve on beş vakıyye bir leğen ve bir çift altun küpe ve bir kalice ve bir kilim ve seksen dirhem sîm kuşak ve bir yasdık ve bir palas ve bir keçe alup kabûl ve kabz idüp mâ‘adâ hakkımdan fâriga olup mezbûr Süleymân’ın zimmetini ibrâ-i kâti‘ü’n-nizâ‘la ibrâ ve iskât eyledim bâkî hak ve ‘alâkam kalmadı ba‘de’l-yevm babamın ve vâlidemin ‘akâr ve menkûlâtına müte‘allıka bir tarîkle da‘vâ idersem lede’l-hükkâmi’l-kirâm mesmû‘a ve makbûle olmaya didikde gıbbe’t- tasdîk mâ-vaka‘a bi’t-taleb ketb olundu fî’l-yevmi’s-sâmin min Rebî‘ü’l-evvel li-sene selâse ve semânîn ve elf (8 Rebî‘ü’l-evvel 1083 / 4 Temmuz 1672).

‘Abdusselâm Efendi bin Mehmed, Mehmed ‘Alî Çelebi bin Mustafâ Efendi, el-Hâc Süleymân bin Mustafâ, Hasan bin Şa‘bân, Mehmed Çelebi bin Bâlî, Seyyid Muharrem Çelebi bin Seyyid ‘Alî, Mustafâ Çelebi bin el-Hâc Nasrullah, İbrahîm bin Ahmed, Süleymân bin ‘Alî.

103 4-5 Muhâla‘a

Mahmiye-i Konya’da Hocahabîb Mahallesi sâkinelerinden Bağdâd bint-i ‘Osmân nâm hatun meclis-i şer‘-i hatîr-ı lâzımü’t-tevkîrde zevci râfi‘ü’l-kitâb Şa‘bân bin Mehmed mahzarında ikrâr ve takrîr-i kelâm idüp zevcim mezbûr Şa‘bân ile beynimizde hüsn-i zindegânî ve musâfât olmamağla zimmetinde mütekarrer ve ma‘kûd-ı ‘aleyh olan sekizbin akça mehr-i mü’eccelimden ve nafaka-i ‘iddet-i ma‘lûmemden ve bir çift yorgan ve bir döşeğimden fâriga olup ve me’ûnet-i süknâm dahî kendi üzerime olmak üzere mezbûr Şa‘bân ile muhâla‘a-i sahîha-i şer‘iye ile hul‘ idüp ol dahî vech-i mübeyyen üzere hul‘u ba‘de’l-kabûl zevciyete ve gayra müte‘allık cemî‘ de‘âvîden her biri âharın zimmetini ibrâ ve iskât eyledik didikde gıbbe’t-tasdîk mâ-vaka‘a bi’t-taleb ketb olundu fî’l-yevmi’s-sânî ‘aşer min Rebî‘ü’l- evvel li-sene selâse ve semânîn ve elf (12 Rebî‘ü’l-evvel 1083 / 8 Temmuz 1672).

Seydî Beg bin ‘Ömer, Seydî bin ‘Alî, İbrahîm bin ‘Alî, Satılmış bin ‘Abdulgaffâr, ‘Alî bin Nûrullah.

5-1 Arâzi Tasarrufu Da‘vâsı Fâtıma / ‘arz-ı mîrî.

Mahmiye-i Konya’da Akıncısultân Mahallesi sâkinelerinden râfi‘atü’l-kitâb Fâtıma bint-i Halîl nâm hatun meclis-i şer‘-i şerîfe gelüp takrîr-i kelâm idüp karındaşım olup Hatunsarâyı Nâhiyesi’ne tâbi‘ pâşâ hâssı olan May nâm karye sâkinlerinden iken bundan akdem vefât iden Davud Beşe’nin evlâd-ı zükûru kalmayup karye-i merkûmede vâki‘ taht-ı tasarrufunda olan arâzi mahlüle olmağla ol mahalde mîr-mîrân-ı Karaman olan mükârim-i ‘âde sâhibü’l-‘izz ve’s-sa‘âde ‘izzetlü Mehmed Pâşâ hazretlerinin kethüdâsı fahrü’l-akrân İsma‘îl Ağa karındaşım müteveffâ-yı mezbûrun cümle arâzisini tapu ile bana tefvîz idüp ben dahî tefevvüz ve kabûl idüp yedime tasarrufu içün mümzâ ve mahtûm tezkere virüp yirmi dört senedir zabt ve tasarruf iderin husûs-ı mezbûr ma‘lûmları olan müslimînden su’âl olunup ihbârları tahrîr ve yedimde olan tezkereye nazar olunması matlûbumdur deyu mûmâ-ileyh İsma‘îl Ağa’nın imzâsıyla mümzâ ve hatmıyla mahtûm mazmûnu takrîr-i meşrûhûna mutâbık tezkere ibrâz eylediğinden mâ‘adâ karye-i merkûme sâkinlerinden Mehmed bin Yûsuf ve Hüseyin bin Mustafâ nâm kimesneler mezkûr Dâvud Beşe mukaddemâ fevt oldukda evlâd-ı zükûru kalmayup taht-ı tasarrufunda olan arâzi mahlûle olmağla mezkûr İsma‘îl Ağa merkûme Fâtıma Hatun’a tapu ile virüp resm-i tapusun alup işbu tezkereyi virdi yirmi dört senedir mutasarrıfadır deyu ihbâr itmeğin ber-mûcib-i tezkere li-ecli’t-temessük bi’t-taleb ketb olundu fî’l-yevmi’t-tâsi‘ min Rebî‘ü’l-evvel li-sene selâse ve semânîn ve elf (9 Rebî‘ü’l- evvel 1083 / 5 Temmuz 1672).

‘Osmân Beşe bin Ahmed, Hamza bin Mehmed, Şahin bin ‘Alî, Hüseyin bin Durmuş. 5-2 Mülk (Ev) Satışı

Şahin / bey‘-i menzil / ‘İvâz.

Mahmiye-i Konya muzâfâtından Hatunsarây Nâhiyesi’ne tâbi‘ Bayat nâm karye sâkinlerinden Şahin bin ‘Alî meclis-i şer‘-i hatîr-ı lâzımü’t-tevkîrde râfi’ü’l-kitâb ‘İvaz bin Hâcı mahzârında ikrâr ve takrîr-i kelâm idüp mahmiye-i merkûmede Çinioğlu Mahallesi’nde vâki‘ bir tarafı Mahmûd mülkü ve bir tarafı Hasan mülkü ve bir tarafı mekâbir-i müslimîn ve bir tarafı tarîk-i ‘âmm ile mahdûd harâbe evlerimi mezbûr ‘İvaz‘a dokuzbuçuk esedî guruşa bey‘-i bât-ı sahîh-i şer‘î ile bey‘ idüp ol dahî semen-i merkûm ile iştirâ ve kabûl eylemeğin meblağ-ı mezbûr dokuzbuçuk guruşu mezbûr ‘İvaz yedinden bi’t-tamâm alup ahz ve kabz eyleyüp teslîm-i mebî‘ eyledim ba‘de’l-yevm mülk-i müşterâsıdır keyfe mâ-yeşâ ve yehtâr zabt ve tasarruf eylesün didikde gıbbe’t-tasdîk mâ-vaka‘a bi’t-taleb ketb olundu fî’l-yevmi’t-

104

tâsi‘ min Rebî‘ü’l-evvel li-sene selâse ve semânîn ve elf (9 Rebî‘ü’l-evvel 1083 / 5 Temmuz 1672).

Ebûbekir bin ‘Alî, Hasan bin Ca‘fer, Velî bin ‘Alî, Mustafâ bin Mehmed. 5-3 Mülk (Bağçe) Satışı

Mahmiye-i Konya’da Türbe-i Celâliye Mahallesi sâkinelerinden Marzıye bint-i Mûsâ meclis-i şer‘-i hatîr-ı lâzımü’t-tevkîrde râfi‘ü’l-kitâb Şeyh Hasan ibn el-Hâc Sefer mahzarında ikrâr ve tarîr-i kelâm idüp mahalle-i merkûmede vâki‘ bir tarafı mezbûr Şeyh Hasan mülkü ve bir tarafı Mustafâ Beg mülkü ve bir tarafı Gökköylü menzili ve bir tarafı Mahmûd mülkü ile mahdûd eşcâr ve kürûmu müştemil bir evlek bağçemi mezbûr Şeyh Hasan’a yirmibeş esedî guruşa bey‘-i bât-ı sahîh-i şer‘î ile bey‘ idüp ol dahî semen-i merkûm ile iştirâ ve kabûl eylemeğin meblağ-ı mezbûr yirmibeş guruşu mezkûr Şeyh Hasan yedinden bi’t-tamâm ahz ve kabz eyleyüp teslîm-i mebî‘ eyledim ba‘de’l-yevm mülk-i müşterâsıdır keyfe mâ-yeşâ ve yehtâr zabt ve tasarruf eylesün didikde gıbbe’t-tasdîk mâ-vaka‘a bi’t-taleb ketb olundu fî’l- yevmi’t-tâsi‘ min Rebî‘ü’l-evvel li-sene selâse ve semânîn ve elf (9 Rebî‘ü’l-evvel 1083 / 5 Temmuz 1672).

el-Hâc ‘Îsa Halîfe el-imâm, el-Hâc İdrîs bin el-Hâc İsma‘îl, Şa‘bân bin Mehmed, el-Hâc Mustafâ bin İsma‘îl, Mehmed Efendi bin Ezelî, Receb Beg bin ‘Abdulgaffâr.

5-4 Alacağını Aldığını Tescîl

Mahmiye-i Konya’da Sâkine bint-i el-Hâc Ulaş nâm hatun tarafından husûs-ı âtiyü’z- zikri ikrâra vekîl olup merkûmeyi ma‘rifet-i şer‘iye ile ‘ârifân olan el-Hâc Halîl bin Mûsâ ve Mehmed bin Halîl şehâdetleriyle şer‘an vekâleti sâbite olan zevci ‘Alî bin Mustafâ meclis-i şer‘-i hatîr-ı lâzımü’t-tevkîrde râfi‘ü’l-kitâb Helvacı Hasan bin Hüseyin mahzarında bi’l- vekâle ikrâr ve takrîr-i kelâm idüp müvekkilem merkûme Sâkine Hatun tahte’l-kal‘ada vâki‘ ‘inde’l-ahâli ve’l-cîrân ma‘lûmetü’l-hudûd olan bir bâb helva dükkânının içinde olan besâtı ve helvacı âlâtı ve on guruş sermâyesiyle târîh-i kitâbdan beş sene mukaddem mâh be-mâh yüzonbeşer akçaya îcâr idüp ol dahî istîcâr ve kabûl eylemişidi beş senelik mâh be-mâh yüzonbeşer akça icâreyi ve dükkânı ve içinde mevcûd olan helvacı âlâtını ve on guruş sermâyeyi mezkûr Hasan müvekkilem merkûme Sâkine’ye bi’t-temâm virüp teslîm idüp ol dahî yedinden alup kabz eyledi dükkân icâresinden ve helvâcı âlâtından ve on guruşdan mezbûr Hasan zimmetinde bâkî bir akça ve bir habbe kalmadı zimmetini ibrâ eyledim didi didikde gıbbe’t-tasdîk mâ-vaka‘a bi’t-taleb ketb olundu fî’l-yevmi’s-sânî ‘aşer min Rebî‘ü’l- evvel li-sene selâse semânîn ve elf (12 Rebî‘ü’l-evvel 1083 / 8 Temmuz 1672).

Fahrü’l-kuzât Ahmed Efendi ibn Durmuş, ‘Abdusselâm Efendi bin Mehmed, Bâyezîd bin ‘Osmân, Derviş Mevlûd.

5-5 Mülk (Bağ) Satışı

(ilk satır silik) nâm kimesne meclis-i şer‘-i hatîr-ı lâzımü’t-tevkîrde râfi‘ü’l-kitâb İbrahîm Beg ibn Çini mahzarında ikrâr ve takrîr-i kelâm idüp mahalle-i merkûmede vâki‘ kıbleten el-Hâc Şahin mülkü ve şarken Derviş Mevlûd mülkü ve şimâlen ‘Alî Beşe mülkü ve garben tarîk-i ‘âmm ile mahdûd bir oda ve bir tabhâne ve havlu ve harâbe ahur ve bir örtme ve bir kıt‘a bağımı mezkûr İbrahîm Beg’e râyic-i fî’l-vakt onikibinyirmibeş akçaya bey‘-i bât- ı sahîh-i şer‘î ile bey‘ idüp ol dahî semen-i merkûm ile iştirâ ve kabûl eylemeğin meblağ-ı