nâhiyesinde vâkı„ ze„âmeti karyelerinden ve tevâbi„ii karyeler bin doksan dokuz senesine mahsûb olmak üzere tarafından Pişegah? Bekirağazâde Mehmed Ağa dimekle ma„rûf kimesneye iki bin guruş der„uhde ve ilzâm ve mezbûr dahi ahz u kabz edip bir mikdârın alıp sene-i mezbûr derʻuhdesi hesâbından mezbûrun zimmetinde bin beş yüz guruş hakkı olup hâliyâ taleb eyledikde vermekde ta„allül üzere olduğun bildirip şer„le görülüp alıverilmek bâbında hükm-i hümâyûnum recâ etmeğin sen ki vezîr-i müşarunileysin şer„le görülmek içün yazılmışdır.
Evâil-i C. sene [1]100.
226
Hâslar kādîsına hüküm ki,
Kazâ-i mezbûr muzâfâtından Terkoz nâhiyesine tâbiʻ Istıranca nâm karye ahâlîsi gelip yine karye-i mezbûrede sâkin avârız ve sâir emr-i şerîfimle vâkı„ tekâlîf îcâb eder emlâk ve arâzî tasarruf eden müsellemânlardan a„lâ ve evsat ve ednâ iʻtibârıyla tahammüllerine göre avârız ve emr-i şerîf vâkı„ olan tekâlîfden hisselerine isâbet eden tekâlîflerin taleb eyledikde biz müsellemân olmağla vermeyiz deyü ta„allül üzere oldukların bildirip emr-i şerîfim recâ etmeğin tasarruflarında hâne-i avârızına bağlı emlâk ve kadîmî arâzîleri olanlardan emr-i şerîfimle uhdelerine lâzım gelen tekâlîfi ale's-seviyye tahammüllerine [göre] vermekde ta„allül eyledikleri vâkı„ ise özr ü bahâne etdirmeyip alıverilmek emrim olmuşdur deyü yazılmışdır.
Evâil-i Ca. sene 1100.
227
Denizli kādîsına ve Denizli voyvodasına hüküm ki,
Bi‟l-fi„l Dârü's-saʻâdetim Ağası el-Hâc Mustafa Ağa arz gönderip taht-ı nezâretinde olan Gedik Ahmed Paşa Evkāfı'ndan Karahisar-ı sâhib'de vâkiʻ câmiʻ-i şerîfleri akārâtından nefs-i Denizli'de vâkiʻ bedestânın sakfı muhterik olmağla sâbıkan Dârü's-saʻâde Ağası Yusuf Ağa maʻrifetiyle hâliyâ vakfın kâtibi olan Ahmed sekiz yüz guruş mikdârı akçe ile taʻmîr eylemişken hevâsına tâbiʻ kādîya istinâd ile iki yük yirmi dört bin akçeye keşf etdirip vakfa küllî gadr etmekle ebniye husûsunda vukūf ve şuʻûru olan müslimîn ile maʻrifet-i şer„le müceddeden keşf olunup masrûfundan ziyâde zimmetinde kalan akçe vakıf içün alıverilmek bâbında emr-i şerîfim ricâsına i„lâm etmeğin vech-i meşrûh üzere amel olunmak üzere yazılmışdır.
175 228
Uzuncaabad-ı Hasköy kādîsına hüküm ki,
Seyyidetü'l-muhadderât Hadice Sultân dâmet ismetûhânın hâslarından kazâ-i mezbûra tâbi„ Kızılca Müsellemliği ve tevâbiʻi hâslar voyvodası olan Mehmed zîde kadruhû arzuhâl edip havâss-ı mezbûr karyelerinden kazâ-i mezbûra tâbi„ Temrezli nâm karye sâkinlerinden Emir Mustafa ve Ömer nâm kimesneler kendü hâllerinde olmayıp havâss-ı mezbûr karyeleri re„âyâların tahrîk ve ihtilâl ve cemʻiyyeti memnû„ iken cemʻiyyet ve alâka ve medhali olmayan il mesâlihi ve hâss-ı merkūm umûruna karışıp Mart mahsûlü ve sâir hukūk ve rüsûmun cemʻine mâni„ olup hâss-ı mezbûr mahsûlüne noksân müterettib olduğun bildirip şer„ u kānûn üzere kimesneye müdâhale etdirilmemek emrim olmuşdur deyü yazılmışdır.
Evâil-i Ca. sene 1100.
229
(…) ve (…) ve (…) ve (… ) kādîlarına hüküm ki,
Hüseyin gelip Aydın sancağının bedel-i beldârın tahsîline meʼmûr olup Kuşadası varoşunda sâkin Emir Eyüb ve Alacamescid mahallesinde Dalyancı Hacı Mehmed ve Türkmen mahallesinde Demirci Hacı Mehmed ve Yenicami mahallesinde Bozoğlan ve Câmi„-i atîk mahallesinde Abdi Hoca ve payanda? eden kal„ada sâkin Hüseyin Efendi çarşı ve pazârı kapadıp cemʻiyyet ve mâl-ı mirîyi kabz etmekle Dîvân-ı Edirne'ye ihzâr[ları] içün yazılmışdır.
Evâhir-i Ca. sene 1100.
230
Edirne kādîsına ve Dimetoka nâibine hüküm ki,
Dimetoka kazâsı muzâfâtından Cebel nâhiyesinde vâkı„ Kızıl Deli Baba Tekyesi Evkāfı'nın mütevellîsi Hacı Osmân gelip vâkıf-ı merkūmun defterde mukayyed evkāfının gallesi tekyesine mürûr u ubûr eden âyende ve revendenin itʻâm-ı taʻâmına meşrûta vakıf olup lâkin vakf-ı merkūm kurâ ve mezâriʻ olmağla (…) nâm kimesne birkaç seneden berü vakf-ı mezbûrdan yevmî yirmi akçe medrese vazîfesi ihdâs etdirmekle ol mikdâr akçe vazîfesin vermeğe râzı iken mezbûr kanâʻat etmeyip yevmî elli beşer akçe vazîfe taleb edip mukaddemâ men„ birle emr-i şerîf verilmişken gerü ol vechile rencîdeden hâlî olmadığın ve şeyhülislâmdan fetvâ-yı şerîfesi olduğun bildirip mûcebince amel olunmak bâbında hükm-i hümâyûnum recâ etmeğin fetvâ-yı şerîfesi ve mukaddemâ verilen emr-i şerîf mûcebince amel olunup şart-ı vâkıfdan ziyâde bir akçe alıverilmemek emrim olmuşdur deyü yazılmışdır.
176 231
Hezargrad kādîsına hüküm ki,
(…) ve (…) ve (…) nâm kimesneler ve sâirleri arzuhâl edip bin doksan dokuz senesinde kazâ-i mezbûre ahâlîsine fermânım olan nefîr-i âmm içün kazâ-i mezbûre ahâlîsi bunları ücret ile tutmağla bunlar dahi yüz beş nefer kimesneler ile defʻe meʼmûr oldukları mahalle varıp edâ-yı hizmet eylediklerinde ellerinde temessükleri olup kusûrları olmayıp dahl olunmak îcâb etmez iken kazâ-i mezbûre ahâlîsi ücret nâmıyla verdikleri akçenin nısfını gerü taleb edip taʻaddî eylediklerin bildirip hilâf-ı şer„ u kānûn ve bilâ-emr-i hümâyûn ta„addî ve tecâvüzleri menʻ olunmak içün yazılmışdır.
Evâhir-i C. sene [1]100.
232
Ber-vech-i arpalık Selanik sancağına mutasarrıf olan Vezîr İsmâʻîl Paşa'ya ve Selanik kādîsına hüküm ki,
Kıdvetü'l-emâsil ve'l-akrân el-Hâc Hüseyin arzuhâl sunup Serfice kazâsı sâkinlerinden Gazanfer nâm kimesne zimmetinde memhûr deyn temessüğü mûcebince sekiz yüz guruş hakkı olup almadın fevt olmağla muhallefâtın kabz eden vârislerinden ol tarafa ta„yîn olunan (...) çavuş maʻrifetiyle şerʻle görülmek içün yazılmışdır.
Evâhir-i C. sene 1100.
233
Edirne'den Kerkük kazâsına varınca yol üzerinde [vâkiʻ] kādîlara ve yeniçeri serdârlarına hüküm ki,
Muhâfazaya meʼmûr neferâtdan kırk beş bölükden Ali nâm yeniçeri meʼmûr olduğu Kerkük kalʻasına revâne olmağın muhâfaza-i merkūma varınca mürûr eylediği mahallerde ve iskelelerde hilâf-ı şer„-i şerîf rencîde etdirilmemek içün yazılmışdır.
Ağa-yı Yeniçeriyân mübâşir. Evâhir-i C. sene 1100.
177 234
Tırnovi nâibine hüküm ki,
Âişe nâm hâtûn gelip kazâ-i mezbûra tâbiʻ Kosik? nâm karye sâkinlerinden Benli Seyyid Mehmed nâm kimesne bunun karındaşı Ahmed'i bi-gayrı hakkın katl edip mahallinde yı hakk mümkin olmamağla yedinde olan keşf hücceti mûcebince mahallinde şer„le icrâ-yı hakk mümkin olmaz ise Dîvân-ı Edirne'ye ihzâr olunmak bâbında hükm-i hümâyûnum recâ etmeğin mahallinde şer„le icrâ-yı hakk olmaz ise zâbiti maʻrifetiyle Dîvân-ı Edirne'ye ihzâr olunmak içün yazılmışdır.
Evâil-i C. sene 1100.
235
İstanbul kāimmakāmına ve İstanbul kādîsına hüküm ki,
Ümerâ-i deryâdan müteveffâ Mahmud Paşa'nın oğlu olan Mustafa dâme izzuhû arzuhâl edip babası müteveffâ-yı mezbûr sâlyânesi mukābelesinde mutasarrıf olduğu İnebahtı sancağının mütesellimliğin bin doksan dört senesinde mahmiye-i İstanbul sâkinlerinden Piyale Paşa mütevellîsi olan Ahmed nâm kimesnenin kefâletiyle iki bin beş yüz elli guruşa Mehmed nâm kimesneye derʻuhde ve meblâğ-ı mezbûrdan bin yedi yüz guruşu teslîm ve bir sene tamâmına değin zabt ve mahsûlât ve rüsûmâtın ahz u kabz etmeğin meblâğ-ı mezbûrdan bâkī kalan sekiz yüz elli guruşu edâ etmeden mezbûr mütesellim Mehmed fevt olmağla mezbûr Ahmed'den kefâleti hasebiyle memhûr temessüğü mûcebince taleb eyledikde yüz yetmiş guruşun verip bâkī altı yüz seksen guruş kalmağla taleb eyledikde yüz yetmiş guruş verip bâkī altı yüz seksen guruş kalmağla taleb eyledikde edâsında taʻallül ve inâd eylediğin bildirip zimmetinde zuhûr eden hakkı alıverilmek bâbında emr-i şerîfim recâ etmeğin yedinde olan memhûr temessüğü mûcebince şerʻle teveccüh eden hakkı bi't-tamâm alıverilip taʻallül ve muhâlefet etdirilmemek üzere yazılmışdır.
Evâil-i C. sene [1]100.
236
Niğbolu ve (…) ve (… ) kādîlarına hüküm ki,
Ebubekir arzuhâl edip merhûm ve mağfûrun-leh Yıldırım Bâyezid Hân tâbe serâhu Evkāfı'ndan taht-ı kazânızda vâkı„ bin doksan beş ve doksan altı ve doksan sekiz ve doksan (...) senelerinde uhdesinde olan Gāzî İvaz ve Kavak Baba mukātaʻalarının zâbiti Mustafa nâm kimesne bundan derʻuhde etmekle sene tamâmına değin zabt ve hâsıl olan mahsûlât ve rüsûmâtın ahz u kabz edip iltizâmından zimmetinde bin beş yüz guruş bakāyâsı kalmağla şerʻle taleb eyledikde zarar eyledim deyü taʻallül etmekle mahsûlü yerli yerinde teftîş ve tefahhus olunup zimmetinde zuhûr eden hakkı tarafından nasb ve irsâl eylediği vekîli (...) nâm
178