Bu Sayfa Mevcûd Değil

(Bu sayfa, defter numaralanırken sehven atlanmış olmalı).

56-1 Mîrâs (Tehârüc)

Mahmiye-i Konya’da Pîrîpâşâ Mahallesi sâkinelerinden ‘Âtike bint-i el-Hâc ‘Ömer nâm hatun tarafından husûs-ı âtiyyü’l-beyânı ikrâra vekîli olup zâtını ma‘rifet-i şer‘iye ile ‘ârifân olan sadrî oğulları ‘Abdulgaffâr Halîfe ve Molla Mustafâ ibney Hamza Efendi şehâdetleriyle şer‘an vekâleti sâbite olan Mehmed Efendi ibn ‘Abdulhalîm nâm kimesne meclis-i şer‘-i hatîr-ı lâzımü’t-tevkîrde müvekkile-i mezbûrenin li-ebevyn karındaşı olan bâ‘isü’l-kitâb Mevlevî Şeyh Süleymân Efendi mahzarında bi’l-vekâle ikrâr ve takrîr-i kelâm idüp müvekkilem merkûme ‘Âtike mukaddemâ vefât iden babası el-Hâc ‘Ömer’in ve vâlideleri ‘Âyşe’nin ve li-ebeveyn kız karındaşları Havvâ ve Râbi‘a’nın ve li-ebeveyn er karındaşı Hasan’ın mezbûr Şeyh Süleymân Efendi vâzı‘ü’l-yed olduğu terekelerinden hisse-i şâyi‘a-i şer‘iyesi mukâbelesinde şerâyit-i sulhu câmi‘ tehârüc-i şer‘î ile mezbûr Şeyh Süleymân Efendi yedinden otuz guruş ile on keyl buğday alup kabûl ve kabz idüp mâ‘adâdan fâriga olup müteveffâ-yı mezbûrûnun mezkûr Şeyh Süleymân Efendi vâzı‘ü’l-yed olduğu menzil ve sâ’ir bi’l-cümle terekelerine müte‘allık de‘âvî ve münâza‘âtından ancak merkûm Şeyh Süleymân Efendi’nin zimmetini ibrâ-i ‘âmm kâti‘ü’l-hısâm ile ibrâ ve iskât eyledi min ba‘d mezbûr Şeyh Süleymân Efendi’de bir akça ve bir habbe hak ve ‘alâkam ve da‘vâ ve nizâ‘ım kalmadı ba‘de’l-yevm bu husûsu mezkûr Süleymân Efendi’den da‘vâ idersem mesmû‘a olmaya didi didikde gıbbe’t-tasdîk mâ-vaka‘a bi’t-taleb ketb olundu fî gurre-i Cemâziye’l-âhir li-sene ‘aşere ve mi’ete ve elf (1 Cemâziye’l-âhir 1110 / 5 Aralık 1698)

Kıdvetü’l-meşâyihi’l-‘izâm zübdetü’s-sâdâti’l-kirâm eş-Şeyh es-Seyyid el-Hâc Bostân Efendi ibn Hazret-i Mevlânâ, Fahrü’s-sâdât es-Seyyid ‘Abdulhay Efendi Mesnevîhân-zâde, Şeyh Mehmed Efendi Mesnevîhân, Kâtib ‘Alî Efendi bin Süleymân, el-Hâc Halîl bin ‘Abdullah, Derviş Süleymân bin Derviş Mehmed.

122

56-2 Mîrâs (Tehârüc)

Mahmiye-i Konya’da Fakîhdede Mahallesi sâkinelerinden iken bundan akdem fevt olan ‘Âlime bint-i el-Hâc Süleymân nâm hatunun verâseti zevci Mehmed bin ‘Alî ve sadriye sagîre kızı Fâtıma bint-i Mehmed ve sadrî sagîr oğulları Ahmed ve Mahmûd ibney Mustafâ’ya münhasıra olduğu şer‘an mütehakkık oldukdan sonra sagîrân-ı mezbûrân Ahmed ve Mahmûd’un tesviye-i umûrlarına savb-ı şer‘den mansûb vasîleri olan Çâkiroğlu dimekle ma‘rûf Mehmed Çelebi ibn Mehmed nâm kimesne meclis-i şer‘-i hatîr-ı lâzımü’t-tevkîrde kendi tarafından asîl olup sulbiye sagîre kızı Fâtıma’nın tesviye-i umûruna savb-ı şer‘den mansûb vasîsi olan babası bâ‘isü’l-kitâb zevc-i mezkûr Mehmed mahzarında bi’l-vesâye ikrâr ve takrîr-i kelâm idüp müteveffât-ı merkûmenin bi’l-cümle muhallefâtını cânib-i şer‘den tahrîr olundukdan sonra ben vesâyetim hasebiyle bi’l-cümle muhallefâtı kendi tarafından asîl ve sagîre kızı mezbûre Fâtıma tarafından vasî olduğuna binâ’en ehl-i vukûf bî-garaz müslimîn takvîm ve tahmînleri üzere beynimizde taksîm idüp mahmiye-i merkûmede Fakîhdede Mahallesi’nde vâki‘ ma‘lûmü’l-hudûd bağı mezkûr Mehmed’e mecmû‘ terekeden rub‘ hissesi olmak üzere virüp ta‘yîn ve tahsîs idüp ve yedimizde olan defterimizde esâmî ve kıymetleri mestûre olan eşyâyı dahî kızı mezbûre Fâtıma’nın hissesi içün virüp ben dahî vasîsi olduğum sagîrân-ı mezbûrânın defterim nâtık olduğu eşyâyı hisseleri içün ahz ve kabz idüp tarafeyn biri birimizden kat‘-ı ‘alâka eyledik min ba‘d bir akça ve bir habbe mezbûrân Mehmed ve Fâtıma’nın sagîrân-ı mezkûrânda ve sagîrân-ı mezbûrânın dahî anlar yedinde hak ve ‘alâkaları ve da‘vâ ve nizâ‘ları kalmadı didikde mezbûr Mehmed vasî-i mezkûr Çâkiroğlu Mehmed Çelebi’yi bi’l-cümle kelimât-ı meşrûhasında tasdîk itmeğin mâ-vaka‘a bi’t-taleb ketb olundu fî’l-yevmi’l-hâmis min Cemâziye’l-ûlâ li-sene ‘aşere ve mi’ete ve elf (5 Cemâziye’l-evvel 1110 / 9 Kasım 1698).

el-Hâc ‘Abullah Halîfe bin ‘Abdulhalîm, Molla Mustafâ bin ‘Abdî Halîfe, Mehmed Çelebi bin Hasan, el-Hâc ‘Alî bin İbrahîm, Ahmed bin Dâvud, Molla Mehmed bin Zeynel‘âbidîn, el-Hâc Mustafâ bin Himmet, el-Hâc ‘Alî bin ‘Abdulhalîm, Hasan bin ‘Alî Efendi.

56-3 Vasî Ta‘yîni

Mahmiye-i Konya’da Fakîhdede Mahallesi sâkinelerinden iken bundan akdem fevt olan ‘Âlime bint-i el-Hâc Süleymân’ın sulbiye sagîre kızı Fâtıma’ya vâlidesi müteveffât-ı merkûmenin muhallefâtından irsen intikâl iden emvâl ve erzâkını zabt ve hıfza ve sâ’ir vâki‘ olan umûr-ı şer‘iyesini tesviyeye bir vasî lâzım ve mühim olmağın hâkim-i mevki‘ü’l-kitâb tûbâ lehu ve hüsn-i me’ab hazretleri sagîre-i merkûmenin babası bâ‘isü’l-kitâb Mehmed bin ‘Alî nâm kimesneyi mukaddem ve müstakîm olmağla vasî nasb ve ta‘yîn eyledikde ol dahî vesâyet-i merkûmeyi kabûl ve hidmet-i lâzımesini edâya te‘ahhüd ve iltizâm itmeğin mâ- vaka‘a bi’t-taleb ketb olundu fî’l-yevmi’l-hâmis min Cemâziye’l-âhir li-sene ‘aşere ve mi’ete ve elf (5 Cemâziye’l-âhir 1110 / 9 Aralık 1698).

Şuhûd-ı sâbıkûn.

57-1 Mülk Satışı (Mîrâs Hissesi Satışı)

Mahmiye-i Konya’da Fakîhdede Mahallesi sâkinlerinden Mehmed bin ‘Alî nâm kimesne meclis-i şer‘-i hatîr-ı lâzımü’t-tevkîrde bâ‘isü’l-kitâb el-Hâc ‘Alî bin ‘Abdulhalîm mahzarında ikrâr-ı tâm ve takrîr-i kelâm idüp mahalle-i mezbûrede vâki‘ bir tarafdan ba‘zen ‘İmrân Efendi Mescidi ve ba‘zen mu‘allimhâne ve ba‘zen mu‘allimhâne vakfı olan menzil ve ba‘zen Mûsâ Hoca menzili ve bir tarafdan mekâbir-i müslimîn ve bir tarafdan Molla Mehmed mülkü ve bir tarafdan tarîk-i ‘âmm ile mahdûd bir bâb beyt ve arz-ı hâliye ve eşcâr ve kürûmu müştemil merhûm Pîr Esed Vakfı’na senede yirmi akça icâresi olan bir kıt‘a mülk bağı

123

mukaddemâ zevcem ‘Âlime’nin muhallefâtından iken hîn-i taksîminde benim hisseme ta‘yîn ve tahsîs olunup benim müstakil mülküm olmağla mezbûr el-Hâc ‘Alî’ye altmışsekiz guruşa bey‘-i kat‘î-i sahîh-i şer‘î ile bey‘ idüp ol dahî semen-i merkûm ile iştirâ ve kabûl eylemeğin meblağ-ı merkûmu mezkûr yedinden bi’t-temâm ahz ve kabz eyleyüp teslîm-i mebî‘ eyledim ba‘de’l-yevm mülk-i müşterâsıdır keyfe mâ-yeşâ ve yehtâr zabt ve tasarruf eylesün didikde gıbbe’t-tasdîk mâ-vaka‘a bi’t-taleb ketb olundu fî’l-yevmi’l-hâmis min Cemâziye’l-âhir li- sene ‘aşere ve mi’ete ve elf (5 Cemâziye’l-âhir 1110 / 9 Aralık 1698).

Şuhûd-ı sâbıkûn.

57-2 Ölüm Keşfi (Tandıra Düşüp Yanarak Ölen Çocuğun Keşfi)

Keşf-i sagîre ‘Âyşe el-muhterika.

Mahmiye-i Konya’da Sadırlar Mahallesi sâkinlerinden ‘İvaz bin ‘İvaz nâm kimesne meclis-i şer‘-i hatîr-ı lâzımü’t-tevkîre gelüp takrîr-i kelâm ve ta‘bîr-i ‘ani’l-merâm idüp târîh-i kitâbdan bir gün mukaddem vakt-ı duhâda sulbiye sagîre kızım ‘Âyşe kendi menzilim içinde tennûr kenârında otururken melbûs olan sevbine ateş isâbet idüp tahlîs ider kimesne bulunmamağla muhterikaten vefât itmişdir savb-ı şer‘den üzerine varılup keşf ve tahrîr olunması matlûbumdur didikde cânib-i şer‘den Mevlânâ Seyyid Mehmed Efendi ibn Siyâvuş Ağa irsâl olunup ol dahî bi’l-fi‘l Eyâlet-i Karaman’a mutasarrıf olan düstûr-ı mükerrem müşîr-i mufahham vezîr-i rûşen-i zamîr ‘izzetlü sa‘âdetlü Hasan Pâşâ edâmallahu te‘âlâ iclâluhu hazretlerinin mütesellimi olan zehrü’l-akrân Süleymân Ağa tarafından husûs-ı mezbûra mübâşir ta‘yîn olunan ‘Ömer Ağa ve zeyl-i kitâbda muharrerü’l-esâmî olan müslimîn ile mahalle-i mezkûrede mezbûr ‘İvaz‘ın menziline varup tabhânesi içinde tennûr başında sagîre-i merkûme ‘Âyşe’yi meyyiten bulup ba‘de’l-keşf a‘zâ ve cevârihine nazar olundukda sol elinden mâ‘adâ bi’l-cümle a‘zâsı muhterika olup ihtirâkla vefât eylediğini mu‘âyene ve müşâhede eylediklerini mevlânâ-yı mezbûr mahallinde ketb ve tahrîr idüp ba‘dehu ma‘â ba‘s olunan Çukadâr Süleymân Beşe ile meclis-i şer‘a gelüp ‘alâ vukû‘a haber virmeğin mâ-vaka‘a bi’t-taleb ketb olundu fî’l-yevmi’l-hâmis min Cemâziye’l-âhir li-sene ‘aşere ve mi’ete ve elf (5 Cemâziye’l-âhir 1110 / 9 Aralık 1698).

Ahmed Efendi bin Velî, el-Hâc ‘Abdulkâdir Halîfe bin Ebûbekir Halîfe, el-Hâc Nûrullah bin el-Hâc Receb, Molla Mustafâ bin ‘Alî, Molla Mehmed bin Murtazâ, Molla ‘Alî (boş), Bayram Ağa bin Mehmed, Halîl bin Mehmed.

57-3 Mülk Satışı (Bağ Satışı)

Mahmiye-i Konya’da Esenlü Mahallesi sâkinlerinden iken bundan akdem fevt olan Alabardıoğlu dimekle ma‘rûf Derviş Hüseyin’in hasren vârisleri olan zevcesi Fâtıma bint-i ‘Abdulkerîm nâm hatun tarafından zikri âtî bey‘a ve kabz-ı semene vekîli olup zâtını ma‘rifet- i şer‘iye ile ‘ârifân olan Seyyid İbrahîm bin Mustafâ ve el-Hâc Seyyid Süleymân Halîfe bin Molla Mehmed şehâdetleriyle şer‘an vekâleti sâbite olan Etmekçi Satılmış bin İbrahîm vekâleten ve sulbiye kızı olup hâlâ on beş yaşında olduğunu ve ‘âkıle ve bâliğa olduğunu mu‘terife olup cüssesinin dahî bulûğuna tahammülü olan Hadîce asâleten meclis-i şer‘-i hatîr- ı lâzımü’t-tevkîrde bâ‘isü’l-kitâb Mustafâ bin Resûl mahzarında her biri ikrâr ve takrîr-i kelâm idüp mûrisimiz müteveffâ-yı merkûmun muhallefâtından mahmiye-i mezbûre zeylinde merhûm Hoca Fakîh Ahmed kuddise sırrıhu zâviyesi kurbunda Alabardı nâm mevzi‘de vâki‘ kıbleten ba‘zen Şu‘ayb mülkü ve ba‘zen Begşehrili Mehmed mülkü ve şarken İbrahîm mülkü ve şimâlen ba‘zen Yûsuf mülkü ve ba‘zen Hüseyin mülkü ve ba‘zen Molla ‘Alî mülkü ve garben tarîk-i ‘âmm ile mahdûd bir örtme ve bir havluyu ve arz-ı hâliye ve eşcârı ba‘zen puştalu ba‘zen müstevî bir kıt‘a mülk bağımızı mezkûr Mustafâ’ya yetmiş guruş ile keyli nâ- ma‘lûm bir mikdâr buğdaya vekâletimiz ve asâletimiz hasebiyle bey‘-i kat‘î-i sahîh-i şer‘î ile

124

bey‘ idüp ol dahî semen-i merkûm ile iştirâ ve kabûl eylemeğin meblağ-ı merkûmu ve buğdayı mezkûr yedinden bi’t-temâm ahz ve kabz eyleyüp teslîm-i mebî‘ eyledik ba‘de’l- yevm mülk-i müşterâsıdır keyfe mâ-yeşâ ve yehtâr zabt ve tasarruf eylesün didiklerinde gıbbe’t-tasdîk mâ-vaka‘a bi’t-taleb ketb olundu fî’l-yevmi’l-hâmis min Cemâziye’l-âhir li- sene ‘aşere ve mi’ete ve elf (5 Cemâziye’l-âhir 1110 / 9 Aralık 1698).

Seyyid ‘Alî bin ‘Abdurrahman, İsma‘îl bin el-Hâc Ahmed, Mustafâ bin Himmet, Seyyid ‘Abdulkâdir bin Süleymân, Seyyid Mehmed bin Mustafâ, Seyyid İbrahîm bin Seyyid Ahmed.

58-1 Mülk Satışı (Mîrâs Hissesi Satışı)

Mahmiye-i Konya’da Sarıya‘kûb Mahallesi sâkinlerinden olup müte‘âkıben fevt olan Hâcı bin ‘Abdurrahman ile zevcesi Ümmühânî’nin verâsetleri sulbî oğulları ‘İvaz ve Receb’e münhasıra olduğu şer‘an mütehakkık oldukdan sonra mezkûr Receb meclis-i şer‘-i hatîr-ı lâzımü’t-tevkîrde bâ‘isü’l-kitâb mezkûr ‘İvaz mahzarında ikrâr-ı tâm ve takrîr-i kelâm idüp babamızın ve vâlidemizin bi’l-cümle muhallefâtını beynimizde mezbûr ‘İvaz ile bi’t-tav‘ ve’r- rızâ taksîm ve tahsîs ve hisseme isâbet iden bi’l-cümle eşyâmı ahz ve istîfâ idüp ve mahalle-i merkûmede vâki‘ ma‘lûmü’l-hudûd olup muhallefât-ı merkûmeden olan mülk menzilden nısf hisse-i şâyi‘amı mezkûr ‘İvaz‘a yirmibeş guruşa bey‘-i kat‘î-i sahîh-i şer‘î ile bey‘ idüp ol dahî semen-i merkûm ile iştirâ ve kabûl eylemeğin meblağ-ı mezbûru mezkûr yedinden bi’t- temâm ahz ve kabz eyleyüp teslîm-i mebî‘ eyledim ba‘de’l-yevm mülk-i müşterâsıdır mutasarrıf olsun müteveffiyân-ı merkûmânın terekelerinden bir akça ve bir habbe hak ve ‘alâkam kalmadı mezbûrânın terekelerine müte‘allık de‘âvî ve münâza‘âtımdan mezbûrun zimmetini ibrâ-i ‘âmm kâti‘ü’n-nizâ‘la ibrâ ve iskât eyledim deyüp ve merkûm ‘İvaz ben dahî menzil-i mezbûrdan mezkûrun nısf hissesini iştirâ ve teslîm-i semen idüp ve sâ’ir bi’l-cümle muhallefâtlarından dahî hisse-i şer‘iyemi bi’t-temâm ahz ve istifâ idüp bu husûsa müte‘allık da‘vâlarımdan mezbûr Receb’in zimmetini ibrâ ve iskât eyledim min ba‘d bir akça ve bir habbe hak ve ‘alâkam kalmadı deyüp biri birlerini tasdîk itmeğin mâ-vaka‘a bi’t-taleb ketb olundu fî’l-yevmi’l-hâmis min Cemâziye’l-âhir li-sene ‘aşer ve mi’ete ve elf (5 Cemâziye’l- âhir 1110 / 9 Aralık 1698).

İbrahîm Beşe bin Mustafâ, Ahmed bin Mehmed, Süleymân bin ‘Alî, Ahmed bin Himmet, Nebî bin ‘Alî, Mehmed bin Müslim.

58-2 Mülk Satışı (Bağ Tasarrufu Tefvîzi)

Mahmiye-i Konya’da Dolabucu Mahallesi sâkinlerinden Sâ’ime bint-i Mûsâ meclis-i şer‘-i hatîr-ı lâzımü’t-tevkîrde bâ‘isü’l-kitâb Seyyid Mehmed bin Mehmed mahzarında ikrâr-ı tâm ve takrîr-i kelâm idüp mahmiye-i mezbûre kazâsına tâbi‘ Penbeci nâm karyede vâki‘ bir tarafdan mezbûr Seyyid Mehmed mülkü ve iki tarafdan Koca zimmî mülkü ve bir tarafdan tarîk-i ‘âmm ile mahdûd iki badem ve iki aluc eşcârını müştemil ‘Abdulmü’min Vakfı’na senede yirmibir akça icâresi olan on beş puşta ve bir mikdâr müstevî yedimden mülküm olan bağımı bir ceviz ağacından hums hissem ile ma‘â merkûm Seyyid Mehmed’e yirmi vakıyye bakır evânî ile üç guruşa bey‘-i kat‘î-i sahîh-i şer‘î ile bey‘ ve zemîninde olan hakk-ı tasarrufumu mütevellisi ma‘rifetiyle meccânen tefvîz idüp ol dahî semen-i merkûm ile iştirâ ve tefevvüz ve kabûl eylemeğin meblağ-ı merkûmu ve bakır evânîyi bi’t-temâm mezbûr yedinden bi’t-temâm ahz ve kabz eyleyüp teslîm-i mebî‘ ve müfevvez eyledim ba‘de’l-yevm mülk-i müşterâ ve müfevvezidir keyfe mâ-yeşâ ve yehtâr zabt ve tasarruf eylesün didikde gıbbe’t-tasdîk mâ-vaka‘a bi’t-taleb ketb olundu fî’l-yevmi’t-tâsi‘ min Cemâziye’l-âhir li-sene ‘aşere ve mi’ete ve elf (9 Cemâziye’l-âhir 1110 / 13 Aralık 1698).

125

58-3 Vasî Ta‘yîni

Mahmiye-i Konya’da Sarıhasan Mahallesi sâkinlerinden iken bundan akdem fevt olan Mehmed bin Bayram’ın sulbiye sagîre kızı Fâtıma’ya babası müteveffâ-yı merkûmun muhallefâtından irsen intikâl iden emvâl ve erzâkını zabt ve sâ’ir vâki‘ olan umûr-ı şer‘iyesini tesviyeye bir vasî lâzım ve mühim olmağın hâkim-i mevki‘ü’l-kitâb tûbâ lehu ve hüsn-i me’ab hazretleri sagîre-i merkûmenin vâlidesi bâ‘isetü’l-kitâb Râbi‘a bint-i Pîrli nâm hatunu mukaddeme ve müstakîme olmağla vasî nasb ve ta‘yîn eyledikde ol dahî vesâyet-i merkûmeyi kabûl ve hidmet-i lâzımesini edâya te‘ahhüd ve iltizâm itmeğin mâ-vaka‘a bi’t-taleb ketb olundu fî’l-yevmi’l-‘aşîr min Cemâziye’l-âhir li-sene ‘aşere ve mi’ete ve elf (10 Cemâziye’l- âhir 1110 / 14 Aralık 1698)

Durmuş Çelebi bin el-Hâc Hamza, ‘Osmân bin Kadrî, ‘Abdullah bin ‘Abdullah.

59-1 Sultân ‘Alâ’eddîn Câmi‘i Ta‘mîr Keşfi Hücceti

Mâ-fîhi mine’l-keşf ve’t-tahmîn ve’t-tahrîr vâki‘-i nemekahü’l-fakîr ileyhi sübhânehu ve te‘âlâ el-Hâc Yûsuf el-mevlâ hilâfet-i be-medîne-i Konya el-mahmiyetü’l-mahrûse ‘afâ ‘anhu.

Husûs-ı âtiyyü’l-beyânın mahallinde istimâ‘ ve tahmîn ve tahrîri içün gıbbe’l-iltimâs savb-ı şer‘den bu fakîr mahmiye-i Konya’da vâki‘ merhûm ve mağfûr lehu Sultân ‘Alâ’eddîn tâbe serâhu câmi‘-i şerîfine varup mahmiye-i mezbûrede mi‘mâr olan Şa‘bân bin İbrahîm ve zeyl-i kitâbdan muharrerü’l-esâmî olan sâ’ir ehl-i vukûf bî-garaz müslimîn ile ‘akd-ı meclis-i şer‘-i şerîf olundukda câmi‘-i mezbûr evkâfının mütevellisi olan bâ‘isü’l-kitâb fahrü’l-akrân el-Hâc Ahmed Ağa ibn (boş) nâm kimesne meclis-i ma‘kûd-ı mezbûrede takrîr-i kelâm ve ta‘bîr-i ‘ani’l-merâm idüp mürûr-ı eyyâm ve kürûr-ı şühûr ve a‘vâm ile câmi‘-i mezbûrun ba‘zı mevâzi‘i harâba müşrif olmağla bundan akdem cânib-i şer‘den keşf olundukda câmi‘-i mezbûrun cânib-i garbîsinde vâki‘ yirmi altı kemerlerin ağaç ve tahta ve mıh ve üstâdiye ve ırgâdiye ve sâ’ir bi’l-cümle mesârifi içün her birine otuzar guruşdan yediyüzseksen guruşa ve zikr olunan kemerlerin kurbunda bâb-ı şimâli dâhilinde müceddeden dört kemer iktizâ itmekle bi’l-cümle mesârif içün her birine seksener guruşdan üçyüzyirmi guruş ve kıble divarından zirâ‘-i binâ ile tûlen yirmi ve kadden on iki zirâ‘ ve şimâl divarından tûlen on dokuz zirâ‘ mevzi‘lerinin tecdîdi içün bi’l-cümle mesârifine üçyüzotuz guruş ve câmi‘-i mezbûr içinden tûlen kırk üç ve ‘arzen yirmi dokuz zirâ‘ ‘arsaya taban tahtası ve sâ’ir bi’l-cümle mesârif içün yetmiş guruş ve on sekiz ‘aded pençerelere müceddeden cam vaz‘ olunmağa bi’l-cümle mesârif içün elli guruş ve zikr olunan kemerlerin ve kubbe-i küberânın çamur ve beyaz sıvaları ve sâ’ir levâzım ve mesârifi içün ikiyüz guruş ve dershânenin ‘imâreti içün otuz guruş ve hünkâr mahfeli ve divarının ve sakfının bi’l-cümle mesârifi yüzelli guruş ve şimâl kapusu taşrasında olan tûlen on sekiz zirâ‘ ve ‘arzen altı zirâ‘ örtmenin sakfına ağaç ve kamış ve saçak tahtası ve mıh ve üstâdiye ve ırgâdiye bi’l-cümle mesârif içün altmış guruş ve türbe kapusu önünde olan örtmenin sakfına ve saçağı ve bi’l-cümle mesârifine seksenaltı guruş ve zokak kapusu içinde olan örtmenin bi’l-cümle mesârifine otuz guruş ve iskele mühimmâtı ve mu‘temed ücreti yüzotuz guruş ve câmi‘-i mezbûrda kenif nakli mesârifi otuz guruş ve su kuyusu içün taş ve kireç ile istihkâm üzere temâmen ‘imâret itmeğe kırk guruş ki min haysi’l- mecmû‘ ikibinüçyüzaltı guruş tahmîn ve hüccet olunup ben dahî me’zûnen ta‘mîrine şürû‘ idüp zikr olunan taban tahtasına vaz‘-ı yed itmeyüp mâ‘adâsı ‘imâret ve meremmet ve itmâm- ı mesâlih idüp lâkin mukaddemâ tahmîn olunan meblağ mevâzi‘-i merkûmeye kifâyet itmediğinden gayrı bi-hasebi’l-iktizâ üç buçuk kemerlerini dahî tecdîd itmem ile beşyüzdoksanyedi guruş ziyâde harc olunup cem‘an ikibindokuzyüzüç guruş sarf olunmuşdur mevâzi‘-i merkûmenin ‘imâret ve meremmet ve itmâm-ı mesâlih olunduğuna nazar ve mühimmât ve levâzımının meblağ-ı merkûma tahammülü olduğu tahmîn ve tahrîr olunması matlûbumuzdur didikde mi‘mâr-ı mezbûr ve sâ’ir zeyl-i kitâbda muharrerü’l-esâmî olan

126

müslimîn bi’l-cümle mevâzi‘-i merkûmeye nazar idüp sâlifü’z-zikr taban tahtasından mâ‘adâsı ‘imâret ve meremmet olunup ve mukaddemâ keşf hüccetinde mestûr olan mevâzi‘den ziyâde üç buçuk kemer dahî tecdîd olduğunu mütehakkık olup havâyic ve levâzımının meblağ-ı mezbûra tahammülü olduğunu tahmîn-i sahîh ile tahmîn ve icmâ‘ ve ittifâkla ihbâr itmeğin mâ-vaka‘a bi’t-taleb ketb olundu fî’l-yevmi’t-tâsi‘ ve’l-‘ışrîn min Cemâziye’l-âhîr li-sene ‘aşere ve mi’ete ve elf (29 Cemâziye’l-âhir 1110 / 2 Ocak 1699).

Kıdvetü’l-meyâyihi’l-‘izâm ‘umdetü’s-sâdâti’l-kirâm eş-Şeyh el-Hâc es-Seyyid Şa‘bân Efendi ibn Hazret-i Mevlânâ, Zübdetü’l-müderrisîni’l-fihâm eş-Şeyh Mustafâ Efendi el- müftü-i be-Konya hâlâ, Fahrü’l-kuzât ‘Abdulkerîm Efendi Sarâc-zâde, İftihârü’l-kuzât es- Seyyid Ahmed Efendi Nakîb-zâde, Zehrü’l-kuzât es-Seyyid ‘Abdulkâdir Efendi Mesnevîhân- zâde, Mevlevî Mehmed Efendi Vehbi, Fahrü’l-meşâyih eş-Şeyh es-Seyyid Mehmed Efendi el-vâ‘iz-i bi’l-câmi‘-i el-mezbûr, ‘Umdetü’l-hutabâ Mehmed Efendi el-hatîbü’l-câmi‘-i el- merkûm, Zehrü’l-e’imme İbrahîm Efendi el-imâmü’l-câmi‘-i el-mezkûr, ‘Umdetü ashâbü’l- me‘ârif Mevlevî eş-Şeyh es-Seyyid Yûsuf Efendi eş-şehîr bi-Nesîb Çelebi, Emrullah Efendi bin Şeyh Mehmed Efendi, el-Hâc Mahmûd bin Molla Mehmed, Molla Mehmed el-mü’ezzin-i bi’l-câmi‘-i el-mezbûr, es-Seyyid Şeyh Sun‘ullah bin (boş), Derviş ‘Abdullah el-kayyım-ı bi’l-câmi‘-i el-mezbûr, Hatîb İbrahîm Halîfe bin İsma‘îl Halîfe, Seyyid ‘Alî Çelebi bin Seyyid Hamza.

59-2 Darb ve Küfür Da‘vâsı (Anasına Küfreden Oğlan)

Mahmiye-i Konya’da Hoşhân Mahallesi sâkinelerinden bâ‘isetü’l-kitâb Emine bint-i Sunkur nâm hatun meclis-i şer‘-i hatîr-ı lâzımü’t-tevkîrde oğlu Mehmed Beşe ibn Halîl mahzarında üzerine da‘vâ ve takrîr-i kelâm idüp mezbûr Mehmed Beşe benim mülk menzilimi cebr ve ikrâhla bi-gayr-ı hak yedimden alup içine kuyu kazdırmak sadedinde olmağla ben men‘ eylediğimde târîh-i kitâb günü beni mezbûr Mehmed Beşe yumruğla darb ve vâlideme zinâ ve bana kahbe lafzıyla şetm itmişdir su’âl olunup mûcib-i şer‘îsi icrâ