Budur ki Osmâncalu nâm karyeden Mustafa bin Mehmed’in hakkında karye-i mezbûreden El-Hâc Osmân bin Durmuş ve Himmet bin İlyâs ve Bekr bin Nebî ve Hüsrev bin Muzaffer ve Orta nâm karyeden El-Hâc İlyâs bin Bekr ve Hüseyin bin Bekr ve Hasan bin Emirşâh ve Süleymân bin İlyâs ve sâ‘iri Eyu adamdır biz sû-i hâline vâkıf olmadık didikleri kayd şüd Ba‘dehu Receb bin Mehmed nâm kimesne karındâşı merkûm Mustafa’ya kefîl olduğu kayd şüd fî selh-i rebî‘ü’l-evvel sene 39
Şuhûdü’l-hâl Abdülgaffâr bin Sefer Şa‘bân bin receb Mustafa bin Hasan Mustafa bin Osmân ve gayruhum 61/32-2 Yevmü’l-Cum‘a 30 Rebî‘ü’l-evvel sen 39
Budur ki Yaviler mahallesinden Yusuf bin Hasan ve Ivaz ibn-i El-Hâc Mustafa ve Mustafa bin Veli ve Osmân (tahrip olmuş) ve Receb bin Sâtılmış ve Hasan bin Ali ve Pîrî bin Ahmed nâm kimesneler hâzırûn olub mahalle-i mezbûreden (tahrip olmuş)
Emir’in hakkında Yaramazdır mahallemizde Mustafa bin Veli’nin ‘avratı Emine ile mu‘âmeleye (tahrip olmuş) hattâ bir yerde mezbûre Emine ile merkûm Ali’yi görüb zinâ iderken ahz etmeğe tatlik idüb ba‘dehu mezbûra hâtûnu kendüye ‘akd-i nikâh itdirdi yaramazdır deyû haber virdikleri kayd olundu
Tahrîren fî selh-i Rebî‘ü’l-evvel sene 39 Şuhûdü’l-hâl Musa Ağâ El-serdâr Osmân bin Çukadâr Mustafa bin Osmân Şa‘bân bin Receb ve gayruhum 61/32-3
Yevmü’s-sebt gurre-i Rebi‘ü’l-âhir sene 39 Yâ Fettâh Yâ Rezzâk
Budur ki Âşık El-Hâc nâm karyeden Halil bin Kâsım mahfil-i kazâda bundan fevt olan
61/32-4
Budur ki Reftâr bint-i Abdullâh nâm hâtûn zevci-i mutallakı Arslan Bey ibn-i Zülfikâr mahzarında da‘vâ idüb mezbûrun zimmetinde onbin akçe mihr-i mü‘eccelin olub taleb iderim didikde gıbbe’s-su‘âl merkûm Arslân Bey cevâbında beşbin akçe mihr-i mü‘ecceli var idi ikibin akçesin hibe idüb bâki üçbin akçe mihri kaldı didiği kayd şüd
61/32-5
Ba‘dehu mezbûre hâtûn Gürhâne mahallesinde vâki‘ evinin nısfını bana hîbe itdi merkûm Arslân Bey deyû yemîn ittüğü kayd şüd
Şuhûdü’l-hâl İbrahim Çâvuş Dergâh-ı Âlî Ahmed Çâvuş El-Kethüdâ Osmân Beşe Çukadâr ve gayruhum
61/32-6
Ba‘dehu mezbûre hâtûn Onbin akçenin üçbin akçesin hibe itdim didüğü kayd şüd
Es-sâbıkûn
61/32-7
Budur ki Medîne-i Ma‘nisâ’da vâki‘ merhûm Koca Lâlâ Pâşâ Câmi‘-i Şerîf evkâfına bi’l-fi‘il mütevelli olan Ahmed Çelebi İbn-i Hürrem Bey mahfil-i şer‘de El-Hâc Mûsa bin Hüseyin muvâcehelesinde ikrâr idüb evkâf-ı mezbûreden Sârma nâm karye suyunda dâ‘ir olan bir göz vakf değirmen mürûr-ı eyyâm ile harâb olmuş vakfın müsâ‘adesi olmağla mezbûr El-Hâc Mûsa divârın ve sakfını ve sâ‘ir yerlerini tamâmen meremmet eylemişidi eyle olsa bin otuzsekiz Ramazân-ı Şerîfinden onbeş seneye varınca beher sene beşeryüz akçeye mezbûra îcâr idüb ol dâhî istîcâr ve kabûl eyledi didikde merkûm Mûsa dâhi vech-i meşrûh üzre kabûl ve tasdîk etmeğin kayd şüd
Tahrîren fî gurre-i Rebî‘ü’l-âhir sene 1039 Şuhûdü’l-hâl Musluhiddin Efendi El-Müderris Mehmed bin Veli Süleyman bin Ali Halil bin Dede
Mahmud Halîfe bin İbrahim
Ebubekr bin
İbrahim ve gayruhum
61/33-1
Yevmü’l-ahad fî 2 Rebi‘ü’l-âhir lisene 1039 Yâ Fettâh Yâ Müfettiha’l-ebvâb Budur ki Lâlâ Pâşa mahallesi sükkânından Bahşi bin Mehmed mahfil-i kazâda hem civârı olan İbrahim bin Muslu muvâcehesinde takrîr-i kelâm idüb merkûm târih-i kitâb gecesi vakt-i mağribde meyhâneden sarhoş evine gelüb bana ve de ‘avratıma şetm itdi bundan mâ‘adâ sağ elimi taş ile urub mecrûh idüb hâşâ din ve imanıma şetm eyledi didikde gıbbe’s-su‘âl ve’l-inkâr kayd şüd
61/33-2
Budur ki Erine bint-i Mihâl nâm zimmiyye mahfil-i kazâda hâlâ nâ‘ibü’ş-şer’ü şerîf Sefer Efendi Hazretleri muvâcehesinde ikrâr idüb Mümâ-ileyh Efendi’ye karzdan
yüz ‘aded kâmilü’l-‘ayâr guruş ile onbeş guruş ribhden cem‘an yüz onbeş guruş deynim vardır didikde İskâd veled-i Yorgi nâm zımmî emr-i kabûlü hâvî kefâlet ile ‘akıl bâlî oldukdan sonra mezbûra dahî Karamanlı Kiryako veled-i Kablân nâm zimmî kefîl-i bi’l-mâl olduğun kayd şüd
61/33-3
Ba‘dehu Horos kurbünde vâki‘ ‘inde’l-cîrân ma‘lûmü’l-hudûd yine mümâileyh Efendi’den iştirâ olunan bâğı rehn va‘z eyledüm didikde mezbûr efendinin tasdîki kayd şüd
Hüddâm-ı Mahkeme 61/33-4
Budur ki Murâdiye önünde olan habbâzın etmeği çiğ bulunduğu kayd şüd 61/33-5
Ba‘dehu merkûm İbrahim’e İmâm Alâaddîn Efendi kefîl olduğu kayd şüd 61/33-6
Budur ki Ayn-ı Ali mahallesinden İsmihân bint-i Durmuş nâm hâtûn tarafından Selîm bin Nebî ve Muharrem bin Ali şehâdetleriyle vekâleti sâbite olan zevci Murtezâ bin Mustafa mahfil-i şer‘de Mustafa bin Abdi mahzarında da‘vâ idüb mezbûre hâtûnun müteveffâ karındâşı Osmân’dan müntakil mezbûrun yedinde yirmibeş re‘s keçisi olub taleb iderim didikde gıbbe’s-su‘âl merkûm Mustafa inkâr itdüğü kayd şüd
61/33-7
Ba‘dehu merkûm Mustafa mezbûre İsmihân’ın karındâşı müteveffâ Osmân’dan müntakil bende keçisi yokdur deyû yemîn billâh itdiği kayd şüd
Şuhûdü’l-hâl Hızır bin Receb Şa‘bân bin Receb Süleyman bin Ali Mustafa bin Hasan ve gayruhum
61/33-8 Yevmü’l-isneyn 3 Rebî‘ü’l-âhir sene 39
Budur ki Kemâlzâde nâm karyede sâkin Yahyâ Bey ibn-i Mehmed mahfil-i şer‘de Ma‘nisâ’da emîn-i beytü’l-mâl olan Sârı Çâvuşzâde Mustafa Çâvuş mahzarında da‘vâ idüb Sarıca nâm karye ve gayrıden beşbin akçe tımâra mutasarrıf olan Mahmud Ağâ’nın tımârı mahsûlü ile Palâmud nâm karye ve tâbi‘i tımârına mutasarrıf Zülfikâr Ağâ’nın tımârının binotuz sekiz mahsûlün alub mutasarrıf ile tımarın mahsulün der anbâr itdiğimde mezbûr Zülfikâr Ağâ’nun fevt olub muhallefâtı beytü’l-mâla râci‘ oldukda defter ile kabz idüb bâkîsin virmede ta‘allül ider didikde gıbbe’s-su‘âl Mahmud Ağâ’nın tımârı mahsûlü olub halt olduğu ma‘lumum değildir deyücek Osmân Çâvuş bin Hamza Çâvuş ve El-Hâc Ahmed Bey bin El-Hâc Bayrâm şehâdetleri kayd şüd
Şuhûdü’l-hâl Süleyman bin Ali El-Hâc Hızır Beşe İbn-i Ahmed İbrahim Efendi El-Müderris Nebi bin Veli Hızır bin Receb ve gayruhum Arpa kile Mahmud 70 Şa‘îr-i Zülfikâr 150 Buğdây Mahmud Kile 30 Hınta-i Zülfikâr 98,5 61/34-1
Yevmü’s-sülâsâ 4 Şehr-i Rebiü’l-âhir sene 39 Yâ Fettâh Yâ Rezzâk
Budur ki İzmir kazâsına tabi‘ Burûnâbâd nâhiyesinde Hamidli nâm karyede vefât iden El-Hâc Mehmed’in oğlu Durmuş mahfîl-i şer‘de nâhiye-i mezbûre nâibi olan Hürrem Efendi ibn-i Hamdi mahzarında da‘vâ idüb târih-i kitabda altı ay mukaddem babam mezbûr vefât itdikde mezburun muhallefâtını tahrîr olunub resm-i kısmet içün dört bin akçem aldı didikde gıbbe’s-su‘âl (tahrip olmuş) cebren mezbûrı kısmet idüb
resm-i kısmetin içün dört bin akçesin alub yine aynî dört bin akçemi Efendi Hazretleri Ali Efendi irsâl idüb ana bi’t-tamam teslîm itdim meblağ-ı merkûmu bende kalmamışdır deyû yemîn billâh itdüğü kayd şüd
Şuhûdü’l-hâl Piyâle Çâvuş-ı Dergâh-ı Âlî Mustafa Beşe bin Abdullah Mehmed Efendi bin Abdullâh Süleyman bin Ali
Îsa Efendi ibn-i Mustafa Mustafa bin Osman Abdurrahman Çelebi El-Müderris Kethüdâ Ahmed Çâvuş İbrahim Çâvuş ibn- Hasan El-Hâc Hüseyin bin Derviş Mehmed
ve gayruhum 61/34-2
Budur ki Ebubekir Pâşâ hazretleri tarafından husûs-ı âtiyü’l-beyân kıdvetü’l-emâcid ve’l-ekârim Mehmed Ağâ tarafından vekîli olan Hüseyin Bey İbn-i Ali mahfil-i şer‘de meclis-i şer‘i (tahrip olmuş) İbn-i Şa‘ban mahzarında ikrâr ve i‘tirâf idüb Medîne-i Ma‘nisâ’da Tahte’l-kal‘a önünde vâki‘ Ebubekir Hamâmını târih-i kitâbdan sene tamâmına varınca otuz üç bin akçeye îcâr idüb istîcâr ve kabûl eyledi didikde merkûm El-Hâc Halil Çelebi vech-i meşrûh üzre istîcâr idüb vekil-i merkûmun kelimât-ı meşrûhaskelimât-ınkelimât-ı vîcâhen tasdîk itdikden sonra mâhüve’l-vâki‘ bi’t-taleb ketb olundu,
Tahrîren fi’l-yevmü’l-râbi‘ min Rebiü’l-âhir sene 39 Şuhûdü’l-hâl
Piyâle Çâvuş-ı Dergâh-ı Ali
İbrahim Çâvuş-ı Dergâh-ı Ali
El-Hâc Hüseyin bin
Mehmed ve gayruhum
61/34-3 Yevmü’l-erba‘a 5 Rebiü’l-âhir sene 39
Budur ki bundan akdem fevt olan Hüseyin’in vâlîdesi Semine bint-i Nasuh nâm hâtûn mahfil-i şer‘de Mehmed bin El-Hâc Osman mahzarında da‘vâ idüb Abâcıyân ûvkude bir tarafı (tahrip olmuş) dükkânı ve bir tarafı Karamânîzâde Mehmed Efendi dükkânı ve iki tarafı tarîk-i âmm ile mahdûd bir bâb (tahrip olmuş) dükkânımın sakfı
oğlum mezbûrun mülkü ve arsası Tâdin Hâtûn vakfı olub icâre ile mezbûr sâkin olurken merhûm fevt oldukda muhllefâtı Âlâ tarîkü’l-inhisâr bana intikâl itmişken vaz‘-ı yed idüb mâlikâne zabt ider su‘al olunsun didikde gıbbe’s-su‘âl mezbûr cevâbında (tahrip olmuş) deyû mütevellîsi bana bey‘ eyledi didüğü kayd şüd
Hüddâm-ı Mahkeme
61/34-4
Budur ki düstûr-ı mükerrem müşîr-i müfahham nizâmü’l-‘âlem El-mahfûf-ı avâtıfü’l-melikü’l-a‘lâ hâlâ vezâretle başdefterdâr olan Ebubekir Pâşâ Dâmet-i mâ‘âlimehû taraf-ı âlilerinden vekîl-i şer‘îleri olan iftihârü’l-emâcid ve’l-ekârim câmi‘ü’l-mücâhid vel-mekârîm (eksik) İbn-i El-merhûm Hüseyin Ağâ meclîs-i şer‘-i hâtır-ı lâzımü’ttevkirde Medîne-i Ma‘nisâ sükkânından El-Hâc Halil muvâcehesinde ikrâr-ı tâm ve takrîr-i merâm kılub Pâşâ-yı Rûşen-Zamîr hazretlerinin Medine-i mezbûrede Tahte’l-kal‘a kurbünde vâki‘ memlûkü olub hâlâ ihyâ itdüğü Hamam icâreye virilmek lâzım gelmeğin sûk-ı sultânide beyne’t-tâlibîn müzâyede olundukda bir senesi otuz üç bin akçeye merkûm Halil’in üzerinde karâr itmeğin binotuz dokuz Cemâziye’l-evvelîsi gurresinden sene tamâmına değin vekâletim hasebiyle hamâm-ı mezkûrun otuzüç bin akçeye icâr itdim ba‘de’l-yevm müddet-i merkûme tamamına varınca (tahrip olmuş) didikde merkûm El-Hâc Halil dahi vech-i meşrûh üzre isticâr ve kabûl idüb mukırr-ı müşârü’n-ileyhi minvâl-i muharrer üzre câri olan ikrârın vîcâhen tasdîk ve tahkîk itdikden sonra mâhüve’l-vâki‘ bi’t-taleb ketb olundu
Tahrîren fî evâil-i Rebi‘ü’l-âhir sene tis‘a ve selasin ve elf Şuhûdü’l-hâl
Dergâh-ı Âli Çâvuşlarından Piyâle Çâvuş bin Abdullah
İbrahim Çâvuş İbn-i Mustafa
El-Hâc Hüseyin İbn-i Derviş Mehmed Şa‘ban bin Receb Abdulgaffâr bin Sefer Abdulgaffâr bin Sefer ve gayruhum mine’l-hazırîn
61/35-1
Budur ki Bâzarlı nâm karyeden Mehmed bin El-Hâc Memi mahfil-i şer‘de İbrahim bin Mehmed mahzarında da‘va idüb mezbûr karyemizin sığırları ücretli ra‘y idüb senesi tamâm olmadık sığırları salu virüb gitmek ile camus ineğim nehr-i Gedüz suyuna vardıkda saylâbunda helâk olmuş su‘âl olunsun didikde gıbbe’s-su‘âl mezbûr cevâbında müddetim tamam oldukda mezbûrun hâtûnuna vârub tenbîh eyledim didikde merkûm Mehmed fi’l-vâki‘ Hâtûnuma tenbîh eylemiş didüğü kayd şüd
Es-sâbikûn
61/35-2
Budur ki Sırtlânlu nâm karyeden Ali bin Nimetullah mahfil-i şer‘de Gürleye âmili Mehmed mahzarında da‘vâ idüb karındâşım (tahrip olmuş) fevt olub evlâdı olmamak ile tasarrufunda olan otuz dönüm yeri müstehakk-ı tapu oldukda hakk-ı tapu benim iken âhere virmek ister didikde gıbbe’s-su‘âl âmil-i merkûm mezkûr yeri beş yüz akçeye Kara Hasan nâm kimesneye virdim didiği kayd şüd
El-Mezburîn
61/35-3
Budur ki Mehmed Bey bin Hüseyin mahfil-i kazâda Ömer’in mahzarında eğer firâr idüb şer‘-i şerîfe gelmez isem da‘vâsı sahîh olsun didüğü
Hüddâm-ı Mahkeme
61/35-4
Budur ki El-Hâc Hasan bin Abdullah nâm kimesne mahfil-i kazâda Musa veled-i İshak nâm Yahudi mahzarında takrîr-i da‘vâ idüb Kirbâs bahasından üçyüz akçe hakkım vardır hâlâ taleb iderim didiği kayd şüd
Hüddâm-ı Mahkeme
61/35-5
Yevmü’l-Cum‘a 7 Rebîü’l-âhir sene 39 Yâ Müfettiha’l-Ebvâb İftahlenâ Hayre’l-bâb Yâ Rezzâk.
Budur ki Medine-i Ma‘nisâ’da Sâz mahallesinde fevt olan Ümmî bint-i Himmet nâm Hâtûn’un ki sagîre kızı Hadice’ye babası İbrahim İbn-i El-Hâc Mahmud kıbel-i şer‘den vasî‘ nasb olunduğu kayd şüd
Şuhûdü’l-hâl Ali Efendi İbn-i Mehmed
Halil bin Abdi
El-Hâc Hasan bin Hızır Mustafa bin Osman El-Hâc Hızır bin Ahmed ve gayruhum 61/35-6
Ba‘dehu sagîre-i mezbûre Ümmü Hâtûn’un kızı Hadice’ye anâsından intikâl iden mâl-ı mevrûslarından yevmî yedişer akçe nafaka vâlîdesinin vâlîdesi Fâtıma bint-i Hâcı Ca‘fer talebiyle takdîr olunduğu kayd şüd
Hüddâm-ı Mahkeme
61/35-7
Ba‘dehu sagîre-i mezbûrenin vasîsi olan babası mezbûr üzerine merkûme Fâtıma Hâtûn nâzır nasb olunduğu kayd şüd
61/35-8