Budur ki Dellâklar nâm karyeden Bekr bin Mehmed Mûsa bin Ramazân mahzarında da‘vâ idüb karye-i mezbûre kurbünde bir tarafı Sefer bağı ve bir tarafı Gedüs ve iki tarafı tarîk-i ‘âmm ile mahdûd olan eski kazık bağı babamdan intikâl idüb birkaç sene fuzûlî mahsûli aldıkdan sonra yine bana yirmi guruşa bey‘ itdi su‘âl olunsun didikde gıbbe’s-su‘âl mezbûr Mûsa Zikr olunan bâğı vâlidem Kamer hâtûn bana hîbe idüb benim mülk-i mevrûsum olmağın bin ikiyüz akçeye bey‘ itdim didiği kayd şüd
61/21-5
Ba‘dehu mezbûr Mûsa cevâbında Benim hemşîrem Râziye hâtûn bunun babası Mehmed’in zevcesi olub fevt oldukda mezbûr bâğ hemşîrem mezbûreye virilüb ba‘dehu hemşîrem fevt oldukda babam ile vâlideme intikâl etmeğin ba‘dehu ânlar bana hibe itdi didiği kayd şüd
61/21-6
Ba‘dehu merkûm Bekr Hemşiresinin hissesi ikimizin iken ziyâde virilmiş didüğü şüd
Şuhûdü’l-hâl
El-Hâc Nebî bin Mehmed Veli bin Ahmed Süleymân bin Mahmud Ömer bin Mahmud Budâk bin Ramazân ve gayruhum 61/21-7
Ba‘dehu merkûm Mûsa Mersûm Bekr yaylâk evinde iken bir çıkrık ile bir tahta sandukun almış didikde mezbûr Bekr Babası bana virdi ben babasından aldım didüğü kayd şüd
61/21-8
Ba‘dehu mezbûr Bekr Mûsa mahzarında Vâlidem fevt oldukda mezbûr bir altun zincir ve bir altun perîşan ve münakkaş üç yasdık ve iki döşek ve bir yük perdesi almış didikde gıbbe’s-su‘âl merkûm Mûsa inkâr itdüğü kayd şüd
Es-sâbıkûn
61/21-9 Yevmü’l-Cum‘a 2 Rebî‘ü’l-evvel lisene 1039
Budur ki Veli Halîfe ibn-i El-Hâc Ca‘fer İsma‘il ibn-i El-Hâc Ahmed mahzarında da‘vâ idüb mezbûrun zimmetinde beşyüz asıl yetmişbeş mu‘âmeleden
cem‘an beşyüz yetmişbeş akçem vardır didikde gıbbe’s-su‘âl mütevelli-i vakfa beşyüz akçe deynim vardır didiği kayd şüd
Şuhûdü’l-hâl Şa‘bân bin Receb İbrahim bin Mehmed Abdülgaffâr bin Sefer ve gayruhum 61/21-10
Budur ki İsa bin Mustafa mahfil-i kazâda Hüseyin bin Piri mahzarında takrîr-i kelâm idüb mezbûrda ikibin ikiyüz akçem olub sekizyüz akçelik buğdâyın ve bin ikiyüz akçeye bir kısrağın almışdım kısrâk sakat itâle olmağla yine evine iletüb ihâle idüb teslîm itdim didikde merkûm Hüseyin itâleyi inkâr itdüğü kayd şüd
61/21-11
Ba‘dehu mezbûr Hüseyin itâle etmedim deyû yemîn itdüğü kayd şüd 21-12
Ba‘dehu Şa‘ban bin Hasan ve Budâk bin Memi nâm kimesne bin akçe buğdây ve tuza ve soğân aldı deyû şehâdet iderler
61/22-1
Yâ Müfettiha’l-ebvâb Yâ Fettâh Yâ Fettâh Yâ Fettâh Yâ Fettâh
Yevmü’s-sebt 3 Rebî‘ü’l-evvel lisene tis‘a ve selasîn ve elf Yâ Müfettih iftahlenâ Hayre’l-bâb
Budur ki Kassâb Hasan Beşe’nin Sultân Murâd ‘imâretine virdüğü lahm bahâdan beşbin yüz akçesi zuhûr idüb nâzırı Mehmed Bey’den lâzım gelmeğin edâya tenbîh olunduğu kayd şüd
Es-sâbıkûn
61/22-2
61/22-3
Yevmü’l-isneyn 5 Şehr-i Rebî‘ü’l-evvel sene 39
Budur ki Râziye bint-i Mustafa nâm hâtûn zevci Mirtazâ bin Mustafa muvâcehesinde da‘vâ idüb mezbûr Murtezâ beni ve kızım Fâtıma bint-i Süleymân’a darb idüb kahbe lafzıyla şetm ider diidikde gıbbe’s-su‘âl mezbûr Murtezâ ikrâr idüb benim emrime muhâlif taşra çıkar ana binâen darb itdim didüğü kayd şüd
61/22-4
Ba‘dehu mezbûre Bana kahbe diyüb ve anama cimâ lafzıyla şetm eyledi didikde gıbbe’s-su‘âl inkârı kayd şüd
Şuhûdü’l-hâl Şa‘bân bin Receb İbrahim bin Mehmed Abdülgaffâr bin Sefer ve gayruhum mine’l-hazırîn 61/22-5
Yevmü’l-selâsâ 6 Rebî‘ü’l-evvel sene 39
Budur ki Muharrem bin Şa‘bân El-Hâc Ali bin Mehmed mahzarında da‘vâ idüb Bundan akdem mezbûrdan dörtyüz elli akçeye bir merkeb alub ikiyüz yetmiş akçesin virüb ba‘dehu bana merkebi teslîm idüb itâle itdi akçemi taleb iderim didikde gıbbe’s-su‘âl ben merkebi Uzun Ali’den üçyüz yetmiş akçeye aldım didiği kayd şüd
Bâ‘isü’l-mezbûrûn 61/22-6
Budur ki El-Hâc Mehmed bin El-Hâc Osman Cemile bint-i Hasan nâm hâtûn tarafından vekîl olan Mustafa bin Şa‘bân mahzarında da‘vâ idüb Dellâlzâde Hüseyin Bey’den tarlasıyla alduğum bir ağac zeytûn benim mülk-i müşterâm olub her sene mahsul alurken merkûm Mustafa bu sene varub zeytûna dahl eylemiş didikde gıbbe’s-su‘âl merkûm Mustafa cevâbında Yer zevcem mezbûrenin olub yeri bu almış zeytûn sâtılmamışdır didüğü kayd şüd
61/22-7
Ba‘dehu mezbûr El-Hâc Mehmed Ben zeytûn tarlasıyla Hüseyin Bey’den aldım mezbûre hâtûnun babası mülkü idüğün bilmezin deyû yemîn billâh itdüğü kayd şüd
El-muhzırûn Şuhûdü’l-hâl Halil bin Pir Ahmed Şa‘bân bin Receb
Mehmed El-Hâc Ali bin
Mûsa El-Hâc Hüseyin bin
Karamân ve gayruhum
61/22-8
Budur ki Nefise bint-i Veli nâm hâtûn mahfil-i şer‘e gelüb târih-i kitâbdan bir gün mukaddem oğlum Ahmed nâm emred dükkândan eve gelürken El-Hâc Kerim oğlu Mehmed Beşe ve Sârı Mustafa ve Nebî bin El-Hâc Hüseyin ve Murâd bin Bayrâm nâm kimesneler bıçak ile urub mecrûh etmişler didikde gıbbe’s-su‘âl mezbûr Murâd cevâbında dünkü vakt-i asırda Ağam merkûm Mehmed Beşe odasına alub gitmek isteyüb oğlân muhâlefet etmek ile bıçâk ile urub mecrûh eyledi didüğü kayd şüd
Tahrîren fî 6 Rebî‘ü’l-evvel sene 39 Şuhûdü’l-hâl
Durmuş Beşe bin Bâlî
El-Hâc Mehmed bin El-Hâc Osmân Halil bin Bekr Ahmed Yusuf İbn-i El-Hâc Mehmed Mustafa bin
El-Hâc Mehmed ve gayruhum
61/23-1