B.189: Ber-mantûk-ı emr-i ‘âlî Kocagözoğlu Ahmed ve Yanık Osman ve Tiryâkioğlu İbrahim ve Turnalıoğlu Ömer ve Kel Ahmed nâm kimesneler ahz ve

mübâşirine teslimen sefîne ile Sinob Kal‘ası’na irsâl olunub mâ‘adâ dört neferden Topal Salih fevt olub mâ‘adâ Kalender Ömer ve Emir ve Hasan Ağa firâr eyledikleri ihbâr ve hîn-i vürûdlarında ahz ve habs ve Der-‘Aliyyeye i‘lâm olunduğını nâtık Şile Nâ’ibi’nin vârid olan i‘lâmının mefhûmı bâ-fermân-ı ‘âlî şerh virildi

Fî 16 ZÂ (Zi’l-ka‘de) sene 205

Sekiz nefer merkûmların ıtlâkları içün emr-i ‘âlî yazılmışdır Fî evâhir-i Z (Zi’l-hicce) sene 205

Dergâh-ı mu‘allâm kapucıbaşılarından bahr-ı siyâh boğazı muhâfızı Kolcu Mustafa dâme mecdehuya ve Şile Nâhiyesi Nâ`ibi’ne ve Yeniçeri zâbitânı ve şehir ve kethüdası ve işerleri zîde kadruhuma ve Sinob Kal‘ası Dizdârı (boş) zîde hıfzıhuya hüküm ki

Şile Kal‘ası’nın ve sâ`ir iktizâ iden mahallerden ‘alâ tarîkü’l-münâvebe muhâfaza olunmasıçün bundan akdem südûr iden emr-i şerîfim çukadarın İsmail yediyle mahalline irsâl olunmuş olmağla Şile sâkinlerinden Doğancı-zâde Hâcı Hüseyin zîde kadruhuya emr-i ‘âlî başbuğ olarak ‘alâ tarîkü’l-mülâvebe Şile Kal‘ası’nın muhâfazasında mukîm olduğu ve nevâhisi kurâlarında Kiraslı ve Togancı ve Alacalı ve Doslu Karyeleri ahâlîlerinin hilâf-ı emr-i ‘âlî emr-i muhâfazada ‘adem-i itâ‘atlarını hâvî Şile Hâkim’i mevlânây-ı mûmâ-ileyhin bundan akdem bir kıt‘a i‘lâmı tevârüd itmişiken hidmetlerinde kıyam iderler mülâhazasıyla i‘lâm-ı mezkûr Der-‘Aliyyeme gönderülmeyüb tenbihâtı hâvî tarafından buyruldu tahrîr ve cüz`ine Darik İsmail ile ahâlî-i fukarâ-i mezkûre taraflarına irsâl olundukda zikr olunan Togancı Karyesi’nde Kocagözoğlu Ahmed ve Kiraslı Karyesi’nden Yanık Osman ve Tiryakioğlu İbrahim ve Topal Salih ve Emir ve Kurtluoğlu Ömer ve Alacalı Karyesi’nden Hasan ve Kalender ve Kel Ahmed nâm

kimesneler eser-i cem‘iyyet olub emr-i muhâfazada ‘adem-i itâ‘at eyledikleri sen ki kapucıbuşı mûmâ-ileyhsin bu def‘a Der-‘Aliyyeye takdîm olunan bir kıt‘a takrîr ve mevlânâ-yı mûmâ-ileyhin iki kıt‘a i‘lâmında tahrîr ve inhâ olunmuş husûs-ı mezbûr hâlâ rikâb-ı hümâyûnumda sekbanbaşı olan Mustafa dâme mecdehudan isti‘lâm olundukda sâbık salefü’z zikr yedi nefer merkûmun kendülerini te`dîb ve emsâllerini terhîb içün ocakdan ta‘yîn olunan mübâşir ma‘rifetiyle merkûmun ahz ve ıslâh-ı nefs oluncaya kadar li-ecli’t-te`dîb Sinob Kal‘ası’na kal‘abend olunmaları bâbında size hitâben emr-i şerîfim sudûrını i‘lâm itmekle siz ki kapucıbaşı ve mevlânâ ve yeniçeri zâbiti ve sâ`ir mûmâ- ileyhümsüz i‘lâmın mûcebince mezbûrü’l-esâmî yedi nefer kimesnenin ocakdan ta‘yîn olunan mübâşir ma‘rifetiyle ahz ve li-ecli’t-te`dîb Sinob Kal‘ası’na kal‘abend olunmaları fermânım olmağın imdi siz ki kapucıbaşı ve mevlânâ ve yeniçeri zâbiti ve sâ`ir mûmâ- ileyhümsüz ma‘rifetiniz ve ocakdan ta‘yîn olunan mübâşir mûmâ-ileyh ma‘rifetiyle bâlâda mastûrü’l-esâmî yedi nefer kesânı ocakdan ta‘yîn olunan mübâşir-i mûmâ-ileyh ma‘rifetiyle ahz ve li-ecli’t-te`dîb Sinob Kal‘ası’na bend olunmalarına ihtimâm ve dikkat eyleyesiz ve sen ki dizdâr merkûmsun merkûmûn vusûllarında kal‘a-i merkûmeye vaz‘ ve muhkem habs ve kal‘abend idüb bilâ emr-i şerîf ıtlâk ve bir takrîb firârlarından ittikâ ve mücânebet ve vusûl ve kal‘abend olunduklarını mübâşir mûmâ-ileyh ile Der- ‘Aliyyeme ve ocâğ-ı ‘amirem tarafına inhâ ve iş‘âra müsâre‘et eylemen bâbında

Fî evâsıt-ı L (Şevvâl) sene 205

S.46&47/B.190: Itlâkıçün emr yazılmışdır

Fî evâsıt-ı ZÂ (Zi’l-ka‘de) sene 6

Dergâh-ı mu‘allâm kapucubaşılarından Kara Osman-zâde dâme mecdehuya ve zikr- i atî kimesnelerin bulundukları mahallin kâdîsına ve Lefkoşa Nâ’ibi’ne hüküm ki

Vâlide sultân dâmet ‘ismetuhâ ve zâdet iffetuhânın ‘uhdesine olan Menemen Hassı mukâta‘ası iş bu bin ikiyüz beş senesine mahsûben hâlâ İzmir Voyvadası olan Danlı el- Hâc Osman zîde mecdehuya ihâle ve iltizâm ve yedine zabt temessükü i‘tâ olunub ancak hassı mezbûrun sâbık mültezimi Şeyh Ahmedoğlu Mahmud ve Sucu Ahmed nâm kimesneler mukâta‘a-i mezbûri kendülere fâkil itmeleriyle ahere ihâle olunduğuna rızâ-

dâde olmayub mücerred garez ve nefsâniyetlerinden nâşî hassı mezbûr re‘âyâlarından ba‘zı kimesneleri tahrîk ve derûn-ı mukâta‘aya ilkâ-yı fitne ve fesâd ve el-yevm voyvada-i mûmâ-ileyhe zabt itdirmeyüb merkûmân hassı mezbûrun şirâze-i nizâmına halel îrâsıyla müşâru’n-ileyhanın varidâtının kesr ve noksân-ı terettübüne bâdî ve merkûmân hâssı mezbûr derûnunda mevcûd iken hassı mezbûrun zabtı mümkün olmayacağı beyânıyla merkûmân li-ecli’t-te’dîb Kıbrıs Cezîresi’ne nefy ve iclâ olunmak bâbında müşârü’n-ileyhin kethüdâsı olub darbhâne-i ‘âmirem nâzırı olan Yusuf dâme ‘ulvuhu bâ-takrîr istid‘â itmekle çavuş mübâşeretiyle bulundukları mahalde ahz ve li- ecli’t-te`dîb Kıbrıs’a nefy ve iclâları bâbında iş bu sene-i mübâreke evâsıt-ı Şa‘bânı’nda siz ki kapucıbaşı ve mevlânâ-yı mûmâ-ileyhümsüz size hitâben eğer çi emr-i şerîfim sâdır olmuşdur ancak bu def‘a müşârü’n-ileyhümânın kethüdâsı mûmâ-ileyhin Der- ‘Aliyyeme takdîm eylediği bir kıt‘a takrîrinde hassı mezbûrun ikiyüz beş senesi iltizâmını voyvadası Hasan rızâsıyla sana ihâle itmek mülâsebesiyle merkûm Şeyhoğlu Mahmud voyvadalığı tahsîl iderim dâ‘iyesiyle emr-i ‘aliyye ‘adem-i itâ‘at birle mahall-i menfâsına gitmeyüb lakin merkûmun fî-mâ-ba‘d voyvada olmasından kat‘ı nazır derûn-ı hass-ı mezbûrda ikâmeti dahî hass-ı mezbûre zurr olmağla hass-ı mezbûrı sen ki kapucıbaşı-ı mûmâ-ileyhsin tarafından bir münasib kimesneye ihâle birle merkûmânın makbûzları olan mebâliği ma‘rifetinle (S.47) tamâmen ba‘de’t-tahsîl kendüleri ol tarafdan tard ve teb‘îd ve mukaddemâ sâdır olan emr-i şerîfim mûcebince mübâşir ma‘rifetiyle mahall-i menfâlarına irsâl olunmaları bâbında müceddeden emr-i şerîfim sudûrını istid‘â ve rikâb-ı müstetâbda Divân-ı Hümâyûnum kaleminde mahfûz kuyûd-ı ahkâma mürâca‘at olundukda vech-i meşrûh üzere emr-i şerîfim virildiği mestûr ve mukayyed bulunmağın mübâşirin ma‘rifetiyle mukaddemâ sâdır olan emr-i şerîfim mûcebince ‘amel olunmak fermânım olmağın imdi sen ki kapucıbaşı-ı mûmâ-ileyhsin ma‘rifetin ve ta‘yîn olunan mübâşir-i mûmâ-ileyh ma‘rifetiyle merkûmânı ahz ve makbûzları olan mebâliği tamâmen ba‘de’t-tahsîl mukaddemâ sâdır olan emr-i şerîfim mûcebince mübâşir-i mûmâ-ileyh ma‘rifetiyle mahall-i menfâları olan Lefkoşa’ya irsâl eyleyesin ve sen ki Lefkoşa Nâ`ibi mevlânâ-i mûmâ-ileyhsin vusûllerinde merkûmânı cezîre-i mezbûrede menfiyyen meks ve ikâmet itdirüb bilâ emr-i şerîf ıtlâk ve bir takrib ile firârlarından mücânebet ve vusûllarını Der-‘Aliyyeme tahrîr ve inhâya müsâre‘et eylemen bâbında

Fî evâsıt-ı L (Şevvâl) sene 205