B.70: Selanik Mollâsı’na ve Selanik Mütesellimi’ne ve zikr-i ati firârilerin

bulundukları mahallin Kâdîsı’na ve Kavala Kal‘ası Dizdarı’na hüküm ki

Bâbü’s-sa‘âdetü’ş şerîfem Ağası nezâretinde olan evkâfdan İstanbul’da Kırkçeşme kurbünde vâki‘ merkûm Bâbü’s-sa‘âde Ağası işbu Asaf Ağa evkâfından Selânik Kazâsı muzâfatından Kestebare Cezîresi mukâta‘ası karyeleri re‘âyâlarından Kocabaşı Acî Hıristodolaki ve oğlu Yano nâm zımmîler kendü hallerinde olmayub cezîre-i mezbûre re‘âyâlarını hilâf-ı şer‘-i şerîf ve envâ-i mezâlim ve te‘addî birle tecrîme ibtidâr eylediklerinden nâşî bundan akdem diyâr-ı ahere nefy ve iclâlarına sâdır olan emr-i şerîfime ‘adem-i itâ‘at birle bir takrîb firâr ve Selânik muzafâtından Demfize hassı firârlarından mümkün ve ‘adet-i müstemireleri olan fesâdât kâl-evvel mübâşeret ve cezîre-i mezbûre re‘âyâlarını hafîyeten taraflarına celb ve fitne ve fesâtdan hâlî olmadıkların ve bu def‘a cezîre-i mezbûre derûnunda sünûh ta‘bîr olunan keşîşân iğvâ ve ihtilâl ve çiftliklerinden bâ-emr-i ‘âlî matlûb olan zehâyirin cem‘ ve ‘adem-i tahsîline bâdî oldukların ve mesfûrân Hıristodolaki ve oğlu Yano nâm zımmîler bulundukları mahallde ahz ve Kavala Kal‘ası’na nefy ve kal‘abend olunmalarıçün siz ki mevlânâ ve mütesellim mûmâ-ileyhümâsız size hitâben emr-i şerîfim sudûrını hâlâ bâbü’s- sa‘âdetü’ş-şerîfe Ağası Osman dâme ‘ulvehu bâ-‘arize istid‘â itmekle vech-i meşrûh üzere Ağa-i mûmâ-ileyhümâ tarafından ta‘yîn olunan çûkadâr mübâşeretiyle mesfûrân bulundukları mahalde ahz ve Kavala Kal‘ası’na irsâl ve kal‘abend olunmaları fermânım olmağın imdi siz ki mevlânâ ve mütesellim mûmâ-ileyhümâsız ber-vech-i muharrer müfsid-i mezbûrun zımmîler ma‘rifetiniz ve bâbü’s-sa‘âdatü’ş-şerîfem Ağası mûmâ- ileyhin tarafından ta‘yîn olunan çûkadâr-ı mûmâ-ileyh mübâşeretiyle bulundukları mahalde ahz ve Kavala Kal‘ası’na irsâl ve tesyîrlerine ihtimâm ve dikkat eyleyesiz ve sen ki dizdâr merkûmsun vusûllerinde mesfûrânı kal‘a-i mezkûreye muhkem habs ve

kal‘abend olunduklarını mübâşir mûmâ-ileyh ile Der-‘aliyyeme tahrîr ve iş‘âra mübâderet eylemeniz bâbında

Fî evâ`il-i CE (Cemâziye’l-ahir) sene 1205

S.21/B.71: Merkûmândan merkûmân ‘Alemdâr Süleyman Deli Ahmed’in mübâşir ma‘rifetiyle bulundukları mahalde ahz ve Ankara’ya ihzâr ve ba‘de’t-terâfü‘ ve’l-ihkâk Ankara Kal‘ası’na kal‘abendleriçün emr-i ‘âlî yazılmışdır

Fî evâhir-i C (Cemâziye’l-ahir) sene 206

Ayaş Kâdîsıyla zikr-i âti kimesnelerin bulundukları kazânın kâdîsı ve Beğbazarı Voyvodası (boş) ve Haymana Voyvodası Hâcı Abdi Pâşâ-zâde Mîr Hüseyin zîde mecdühümâya ve Ankara Kal‘ası Dizdârı’na hüküm ki

Bundan akdem hakkında bi’d-defa‘ât evâmir-i ‘aliyye sâdır olan müftî-i sâbık Abdulhalim’in ‘avânesinden Ayaş Kazası’na tâbi‘ Uruş nâm Kasaba sükkânından Hâcı Köse’nin karındaşıoğlu Süleyman ve Varancık Karyesi’nden Cura Osman ve Küfla (Süfla) Kasabası’ndan Deli Ahmed ve Karakollukçuoğlu Mustafa nâm şakîler birbirleriyle yek-dil olarak ihtilâl-i kazâ ve ta‘tîl-i umûr-ı mühimmeye bâ‘is olduklarından mâ‘adâ müftî-i merkûm zamânında Uruş Kasabası’nda sâkin Hâfız Ağa nâm kimesneyi katl ve emvâl ve eşyâsını nehb ve garet ve kasaba-i mezbûrde sâkin ehl-i ‘ırz ve zerdemendan makûlelerini bilâ cürm ahz ve habs ve tercîm ve bu vecihle hilâf-ı şer‘ (çizik) ve mugâyir-i rızâ harekât-ı kabîheye ictisâr eyledikleri bundan akdem bâ-‘arz ve mahzar ve ‘inâyet-i istad‘â olundukda kâ`immakâm-ı ‘âlî makâm mühürdâr (çizik) yamâklarından âher husûsa me`mûr Mustafa zîde kadruhu ma‘rifetiyle eşkiyâ-yı merkûmların hâl-i keyfiyetleri tahkîk ve hakîkatı üzere Der-‘aliyyeme iş‘âr olunmak bâbında iş bu sene-i mübareke evâ`il-i rebî‘ü’l-âhirinde sâdır olan emr-i şerîfim mübâşir mûmâ-ileyh ile mahallîne lede’l vusûl merkûmlar fî’l-asl şekâvet ile mekûf haşarât makûlesinden olduklarından mazmûn-ı emr-i ‘âlî kendülere ifâde ve mütecâsir oldukları harekât-ı şeni‘eden men‘ ve tecvîz oldukda bir dürlü mütenezzim ve mütenebbih (çizik) olmadıklarından Hâcıoğlu Mustafa nâm bî-cürm mazlûmu dahî bigayri hakk-katl sükkânında müftî-i sâbık merkûmun kethüdâsı Sinanoğlu İsmail nâm şakiyi taraflarına

celb ve birbirleriyle münakafâ başlarına yüzden mütecaviz haşarât cem‘iyle Ayaş kasabasını basub nice fukarâyı perişân eyledikleri ve eşkiyâ-yı merkûmların zulm ve te‘addîleri gün begün mütezâ`id olub harekât-ı bâgiyâneye ibtidârlarından bir dürlü irâh-i ‘iyâd meslûb oldığı ve merkûmların fezâhetleri sâ`ir mahallere dahî, sârî olacağı zâhir idüğün sen ki Beğbazarı Voyvodası mûmâ-ileyhsin bu def‘a Der-‘aliyyeme vârid olan tahrîrât ve mübâşir-i mûmâ-ileyhin bir kıt‘aya ‘arzuhâlinde derc ve tastîr olunmuş olmağla siz ki voyvodagân-ı mûmâ-ileyhümâsız ma‘rifetiniz ve mübâşir-i mûmâ-ileyh ma‘rifetiyle merkûmlar bulundukları mahallerde ‘alâ eyy-i ma‘rifetiyle ‘ahz ve huzûr-ı şer‘e ihzâr ve ta‘yîn-i mâdde iden husemâteleriyle kirâren kirâren terâfü‘-i şer‘ ve zimmetlerinde sübût-yâfte olan hukûk ‘alâ eyy-i hâlin ashâbına ba‘de’l-istirdâd ıslâh-ı nefs içün Ankara Kal‘ası’na kal‘abend ile keyfiyyet Der-‘aliyyeme ‘arz ve i‘lâm olunmak fermânım olmağın imdi zamân-ı ‘adâlet-nişân-ı mülükânemde ahâlî ve re‘âyâ fukarâsına ve sâ`ir bir ferde zulm ve te‘addî olunduğuna kat‘en rızâ-yı şâhânem olmayub ref‘-i erbâb-ı ta‘allül ve kâde ve arâm ve asâyiş-i hâl-i ‘ibâde kemâl-ı itinâ ve dikkat olunmak matlûb-ı hümâyûnum idüğü ma‘lûmunuz oldukda ber-minvâl-i muharrer eşkiyâ-yı merkûmları mahallerde ‘alâ eyy-i hâlin ahz ve mahallinde huzûr-ı şer‘e ihzâr ve ta‘yîn-i medde iden husumâlarıyla ‘ale’l-infirâd terâfü‘-i şer‘ ve zimmetlerinde sabit ve mütehakkik olan hukûk-ı fukarâ her ne ise ashâbına istirdâd ve ihkâk-ı hakk oldukdan sonra şakî-i mezbûrları mübâşîr-i mûmâ-ileyh ile Ankara Kal‘ası’na (çizik) irsâl ve tesyîre müsâre‘et ve keyfiyeti Der-‘aliyyeme ‘arz ve ‘ilâma mübâderet eyleyesiz sen ki Ankara Kal‘ası Dizdârı merkûmsun vusûllerinde dizdârı olduğun kal‘a-i mezbûreye vaz‘ ve kal‘abend eyleyüb bilâ emr-ı şerîf ıtlâk ve firârlarından tahâşî ve mücânebet ve vusûl kal‘abend olunduklarını der-bâr-ı şevket-karârıma tahrîr ve işâret eylemen bâbında

Fî evâ’il-i C (Cemâziye’l-ahir) sene 1205

S.22/B.72: İş bu emr-i ‘âlî mütesellim mûmâ-ileyh tarafından mübâşir ile Karamürsel’e lede’l-vusûl kurâ-i merkûme ahâlîleri meclis-i şer‘e ihzâr ve muvâcehelerinde ba‘de’l-kırâ`e kurâ-i merkûme ahâlî ve re‘âyâları merkûm Koca Mehmed’i tav‘en karyelerine komamağa ve iclerinden kimesneyi celb itdirmemeğe ve ihzârı mümkün olmadığı halde sirren ihbâra cümlesi müte‘ahhid olub eğer ta‘ahhüdlerine mugâyir harekât kendülerinden zâhir olur ise Mubah-ı Hümâyûn’a on bin

gurûş nezr eylediklerini nâtık Karamürsel Nâ`ibi’nin vârid olan i‘lâmının mefhûmı bâ- fermân-ı ‘âlî şerh virildi

Fî 7 B (Receb) sene 205

Kocaili Sancâğı Mütesellimi Mehmed zîde mecduhuya hüküm ki

Karamürsel Kazâsı’nda bundan akdem vâki‘ olan ihtilâle sebeb ve ‘illiyet olanlardan Tonbazoğlunun kazâ-ı mezkûrden tard ve teb‘îdî ve Koca Mehmed’in dahî beher hâl ahz ve mahall-i menfâsı olan Limni Cezîresi’ne irsâliçün sen ki mütesellim-i mûmâ-ileyhsin sana hitâben evâmir-i ‘aliyyem îsdâr ve irsâl olundukdan sonra şakî-i merkûm ve Koca Mehmed’in Dedegöz Karyesi’nde ikâmeti ve Karamürsel Kasabası’na sû`-i kast irâde-i fâsidesinde olduğı tahkîk oldunduğuna mebnî Yalakabad ve Bazarköy ve İznik kazâları zâbitân ve işerleriyle bi’l-ittifâk şakî-i mezbûrun üzerine varulur ber- vech-i suhûlet ahz ve mahall-i menfâsına irsâle mübâderet ve mezbûr Tombozoğlu’nu dahî beher hâl kazâ-i mezkûrdan tard ve teb‘îde müsâre‘et eylemek bâbında mû`âhheren dahî sana ve kazâ-i mezkûrenin zâbitân ve işerlerine hitâben iki kıt‘a evâmir-i ‘aliyyeme îsdâr ve irsâl olunmuş olub mezâmîn-i evâmir-i ‘aliyyeme nazaren merkûm Koca Mehmed’in ahz ve menfâsına irsâli ve Tombozoğlu’nun dahî tard ve teb‘îdîyle infâz-ı irâde-i‘aliyyem ikdâm ve dikkat ve kazâ-i mezbûrun esbâb-ı te`mîni istihsâline mübâderet eylemek lâzimeden iken henüz hareket ve ‘azîmet ve husûs-ı mezkûre mübâşeret olunmadığı bu def‘a tarafından Der-‘aliyyeme vârid olan tahrîrâtın mefhûmundan müstebân olmağla mukaddem ve mû`âhher şeref-efzâ-yı sudûr olan evâmir-i ‘aliyyem mûceblerince bi’n-nefs hareket ile kazâha-i mezkûrenin zâbitân ve iş erleriyle bi’l-ittifâk ne vecihle ve ne tarîkle olur ise merkûm Koca Mehmed’in üzerine varılub ber-vech-i suhûlet ahz ve mahall-i menfâsına irsâline ve merkûm Tonbozoğlu’nun dahî beher hâl tard ve teb‘îdîne ve merkûmların ‘avânelerinden bir ferdin kazâ-i mezkûrde bulunmamasını asâyiş-i hâl ve rahat-ı ahâlîyi mûceb olur hâlâtın istihsâline mübâderet ve edna kusûr ve rehâvete tecvîzden kemâl-i ittikâ ve mübâ‘edet eylemek fermânım olmağla te`kîden ve isti‘câlen ve ikdâmen ve ihtimâmen rikâb-ı hümâyûnumda işbu emr-i şerîfim îsdâr ve (boş) ile irsâl olunmuşdur imdi sen ki mütesellim-i mûmâ-ileyhsin merkûm Koca Mehmed’in ne vecihle olur ise ahz ve mukaddemâ sâdır olan evâmir-i ‘aliyyem mûceblerince mahall-i menfâsına irsâli ve

merkûm Tombozoğlu’nun dahî tard ve teb‘îdîyle ‘avânelerinden bir ferdin kazâ-i mezkûrde bulunmaması ve irâhe ve asâyiş-i hâl ve ahâlîyi mûceb olur hâlâtın istihsâline müsâre‘et olunmak beher hâl senden matlûb-ı kat‘î-i mülükânem idiğü ve bu bâbda tarafından serimû kusûr ve rehâvet vukû‘ı hakkında mûceb-i vehâmet ve terâmet olacağı muhakkak olduğı ma‘lûmun oldukda mazmûn-ı emr-i şerîfimi ve mukdezayı me`mûrini gereği gibi mü`emmel ve mülâhaza eyleyerek bi’n-nefs hareket ve mû`âhheren sâdır olan emr-i şerîfim mazmûn-ı münîfi üzere kazâhâ-i mezkûrenin zâbitân ve işerleriyle bi’l- ittifâk merkûm Koca Mehmed’in bulunduğu mahalde üzerine varub ber-vech-i suhûlet ele getürülmesine ihtimâm ve dikkat ve mahall-i menfâsına irsâl ve tesbîline ve merkûm Tombozoğlu’nun dahî tard ve teb‘îdîne ve ‘avânelerinden bir ferdin kazâ-i mezkûrde bulunmamasına ve irâhe-i ‘ibâd‘ı mûceb olur hâlâtın istihsâline tenhîz-i mezâmin-i evâmir-i ‘aliyyeme cedd-i li’l-hesâb ve serimû kusûr ve rehâveti tecvîzden ve bu vesîle ile tarafından ve adamlarının taraflarından ahâlî fukarâsına hilâf-ı şer‘-i şerîf ve mugâyir- i rızâ-yı münîf mikdâr-ı zerre te‘addî ve rencide vukû‘uyla mazhar-ı ‘ukûbat ve cezl olmakdan gâyetü’l-gâye tehâşî ve ittikâ eylemen bâbında

Fî evâ’il-i C (Cemâziye’l-evvel) sene 1205