B.10: Dergâh-ı Mu‘allâm Kapûcubâşıları’ndan hâlâ Bozok Sancâğı mutasarrıfı

ve mîrâhûr-ı evvel pâyesiyle bi’l–istiklâl ‘asker sürücüsü olan Çapar-zâde Mîr Süleyman dâme mecduhuya ve Kayseriye Kâdîsı’na (boş) Kal‘ası Dizdârları’na hüküm ki

Bir müddetden berü Kayseriye Kazâsı’nda ba‘zı zaleme ve mütegallibe gürûhundan kimesneler a‘yânlık dâ‘iyyesiyle umûr-ı memleket ve mesâlih-i fukarâya karuşub kazâ-i mezbûreden müretteb olan şütûrân mübâya‘ası bedellerine vesâ‘ir evâmir-i şerîfemde vâki‘ olan matlûbât ve mürettebât-ı seferiyye ve vilâyet mesârifi te‘addî ve defter

idhâl birle hilâf-ı şer‘-i şerîf ve mugâyir-i rızâ-yı münîf ahâlî-i fukarâ fukarâsından cebren ve kerhen tahsîl iderek ve deve mübâya‘sını dahî virmeyüb ve envâ‘-i gûna mezâlim ve te‘addîyâta cesâret olunurak emr-i defterden ziyâde fukarâdan bir sene zarfında zulmen beş yüz yetmiş kiseden mütecâviz akçe tahsîl olunduğu ve bu vecihle ahvâl-ı fukarâ diğer gûn ve müteferrik ve perîşân oldukları ve matlûbât-ı mühimme ve umûr-ı seferiyye külliyen mu‘âttal olunduğundan mâ‘adâ ‘asker dahî ihrâc itmeyüb tavâ‘if-i ‘askeriyyenin dahî şîrâze-i nizâmı halel-pezîr olduğı bi’l-ihbâr tahkîk gerde-i şâhânem mülâbesesiyle vedî‘atu’l-lah fukarâ-yı ra‘iyyet ve ahâlî-i memleketin bu derecelerde âzürde ve remîde olmaları rızâ-yı hümâyûnumun vücûhla hilâfı olmakdan nâşî sen ki Caparzâde mîr-i mûmâ-ileyhsin ma‘rifet-i ihtimâmınla sicilde mukayyed olan tevzî‘at defteleri mûceblerince müddet-i merkûmede vâkî‘ olan mesârifât ve tevzî‘atın muhâsebelerini ma‘rifetin ve ma‘rifet-i şer‘le rû`yet ve yegân yegân mâddelerine terfîk ve terkîm iderek fukarâya tard ve zulmen tahsîl olunan mebâliğ zâhire ihrâca ve müfredâtı üzere terkîm ve defter idüb sâbit ve müteveccih olan hukûk-ı fukarâ tahsîl olunan yerlerine her ne ise teveccüh idenlerden ma‘rifetin ve ma‘rifet-i şer‘le beher-hâl tahsîl cânib-i mîrîye ve ashâbına redd ve teslîm ve yahûd memleketin girîne mesâriflerine medâr olmak içün me`mûr mahalde hıfz olunmasını taht-ı zâbiteye idhâl birle ihkâk-ı hakk mübâlât ve zimmetlerinde hukûk-ı fukarâ sâbit olub menâfî`-i şerî‘at-ı garrâ edâda muhalefet ve izhâr sûret-i tereddüd ve mumâna‘at idenleri her kim olur ise taraf-ı hümâyûnumdan sana i‘tâ olunan istiklâl ve ruhsat-ı kâmile-i şahânem muktezâsı üzere ahz ve tahsîl oldukca ıtlâk olmamak üzere beher hâl kal‘abend ile te`dîbleri icrâsına mübâderet ve vâki‘ olan mezâlim ve te‘addînin men‘ ve def‘ine ve fî-mâ-ba‘d ahâlî fukarâsına bu makûle mezâlim ve te‘addîyâta kimesne zarfında cesâret vukû‘a gelmemesi halâtı ve mevâdd-ı mühimmenin ber-vefk-i matlûb icrâsı ve nizâm-ı ‘askeriyyenin dahî istihsâl-ı şirâze-i zâbitesi temakkûle tadâbire tavakkuf ider ise imhâl icrâsına teşmir-i sâ‘at-ı sâlet ve sûret-i nizâmını Der-‘aliyye’me i‘lâma müsâre‘et eylemen fermânım olmağın rikâb-ı hümâyûnumdan iş bu emr-i şerîfim ısdâr ve (boş) ile irsâl olunmuşdur imdi zamân-ı me‘adelet nişân-ı pâdişâhânemde ref‘-i mezâlim ve te‘addîyâta mesarrâf ve zimâm-ı himmet ve ikdâm-ı mülükânem istihsâl-i esbâb-ı asâyiş ve refâh-ı fukarâ cânîbine mevtûf idüğü ve Kayseriye ahâlîsinden hilâf-ı şer‘-i şerîf ve mugâyir-i rızâ zulmen ahz olunan akçelerinin ve deve bedeliyesi ve matlûbât-ı mîrîye deyü tahsîl olunub edâ olunmayan emvâlin muhâsebâtı rû`yet olunub sâbit olan hukûk-ı

fukarâ tahsîl ile ihkâk-ı hakk ve vâki‘ olan mezâlim ve te‘addîyâtın kûlliyen men‘ ve def‘iyle istihsâl-i esbâb-ı asâyiş-i ‘ibâda mübâderet husûsu matlûb-i kat‘î-i mülükânem olduğu sen ki Çaparzâde mîr-i mûmâ-ileyhsin ma‘lûm-ı dâyet mezûmun oldukda ber- vech-i meşrûh Kayseriye sicîlinde mestûr olunan tevzî‘ât defterleri mûceblerince müddet-i ma‘lûmede vâki‘ olan mesrûkât ve tevzî‘atın muhâsebâtı ma‘rifetin ve ma‘rifet- i şer‘le vucûh-ı ahâlî mahzarlarında kemâl-i hidmet ve nesa‘at üzere rû`yet ve mâddelerini yegân yegân terfîk ve tahrîr birle ve emr-i defterden ziyâde fukarâdan zulmen tahsîl ve ahz olunan mebâliği zâhire ihrâca ve ne mikdâr bâliğ olur ise müfredâtı üzere terkîm ve defter idüb sâbit ve mütehakkik olan fukarâya ve memleketden tahsîl olunub edâ olunmayan matlûbât-ı mîrîyeyi ve tevcîh idenlerden temâmen ve kâmilen ‘alâ eyy-i hâl-i vech-i kân tahsîl ve ashâbına ve mahaline redd ve teslîm veyahûd fukarâya reddi iktizâ iden mebâliğin ber-vech-i muharrer-i âtiye mesâriflerine medâr içün mü`emnen mahalde hıfz-ı râbıtasına dikkat birle ihkâk-ı hakk mübâderet ve zimmetlerinde hukûk-ı ‘ibâd matlûbât-ı mîrîye sâbit olanlardan hilâf-ı şer‘-i şerîf edâ te‘allül ve muhâlefet-i izhâr idenleri muktezâ-yı istiklâl ve ruhsatın üzere der-‘akab ahz li-ecli’t-tahsîl kal‘abend ile te`dîbleri icrâsına mübâderet ve vâki‘olan mezâlim ve te‘addîyâtı külliyen men‘ ve def‘ fî-mâ-ba‘d kimesne tarafından ahâlî-i fukarâsına serimû zulm ve te‘addî vukû‘a gelmemesi hilâtına ve mevâd-ı mühimmenin bir vekf-i matlûb tediye ve tanzimleri ve nizâm-ı ‘askeriyenin dahî istihsâl-ı şirâze-i râbıtası ne makûle tedbîr ve harekâta müteveccih ise bilâ tevkîf icrâ ve ve nizâm-ı kaviye rabıta ve tevsîk bilâ sûret-i nizâmat-ı der-sa‘âdetime mesâre‘et ve mikdâr-ı zerre kusûr ve rehâveti tecvîzden be-gâyet tehâşî ve mübâ‘edet eyleyesin ve sen ki mevlânâ-yı mûmâ-ileyhsin mazmûn-ı emr-i şerîfime ‘amel ve hareket ve bu bâbda kapucıbaşı mîr mûmâ-ileyh ile bi’l-ittifâk ihkâk-ı hukûkı mûceb devlet-i hâlâtın istihsâline sûret-i mukarreret ve itâ-ı hakk ve gadr mûceb olacak harekâtı tecvîzden gâyetü’l-gâye tehâşî müba‘edet ve sen ki dizdâr merkûmsun kapucıbaşı mûmâ-ileyh tarafından kal‘aya irsâl olunanları kal‘abend eyleyüb defterleri temâmen tahsîl olunmadıkca itlâklarında mücânebet eylemek bâbında

Fî Evâ‘il-i R (Rebî‘ü’l-ahir) sene 1205