B.65: Seddü’l-bahir Kal‘ası Dizdârı’na hüküm k

Kâ`immakâm-ı ‘âlî-makâmı Tatarlarından Seyyid Mehmed nâm Tatar me`mûr olduğu umûr-ı mühimmede hilâf-ı marzî harekete ibtidâr itmekle bundan akdem li-ecli’t- te`dîb ba-fermân-ı ‘âlî Seddü’l-bahir Kal‘ası’na kal‘abend olunmuşidi el-hâletü’l-hazihi merkûmu vâlidesi ‘alîle ve merhamet şâyân ve ahvâli diğer gûn olmağla oğlu merkûmun cürmî ‘afv ve kal‘a-i merkûmeden ıtlâk ve sebîli tahliye olunmak bâbında emr-i şerîf sudûrını istid’â eylediğine binâ`en merkûmı ‘afv ve ıtlâkıyla sebîl-i tahliye olmak fermânım olmağın imdi sen ki dizdâr-ı merkûmsun merkûm Mehmed’in cürmî ‘afv olunmağla mezbûr kal‘a-i merkûmdan ıtlâk ve sebîlin tahliyeye mübâderet eylemek bâbında

Fî evâhir-i CÂ (Cemaziye’l-evvel) sene 205

S.19&20/B.66: (S.19) Dergâh-ı Mu‘allâm Kapucıbaşıları’ndan Kütahya

Mütesellimi Abbas dâme mecdehuya hüküm ki

Bundan akdem ordu-yı hümâyûn Davud Pâşâ sahrâsına hîn-i hurûcında dergâh-ı mu‘allâm gedüklülerinden Acem Ali Ağa-zâde Mustafa mübâşeretiyle ıstabl-ı ‘âmire-i lâzimesiçün Anadolu Eyâleti’nden elli katâr şütûrân mübâya‘ası tertîb olunub mâ-nafaka bahâ lâzım gelen on beş bin yediyüz elli guruş bahâlarının nısfı ber-vech-i peşîn fukarâ Gedüklü-yi merkûma teslîm ve irsâl olundukdan sonra aralık aralık şütûrân-ı mezkûrenin isti‘câli içün evâmir-i şerîfem istid‘â eyledikce me`mûr olduğu husûs umûr-ı mühimme olmak hasebiyle mü`ekked evâmir-i ‘aliyyem îsdâr ve irsâli husûsunda zerrece tecvîz-i

kusûr kalmamışiken Gedüklü-yi merkûm iş bu me`mûriyetini sefer-i hümâyûnumdam kendüyü halâsa vesîle ittihâzıyla şütûrân-ı mezkûrenin mübâya‘a ve tekmîli husûsunda kat‘en takayyüd itmediğinden gayrı zimmetine geçirdiği yedibin sekizyüz gurûşu dahî üç seneye karîb beyhûde yedinde meks ve tevkîf husûsuyla her çant ki isti‘câli hâvî evâmir-i ‘aliyyem isdâr ve irsâl olundukca kâh küsûr kalan nıfs yerlerinin irsâline ta‘lîk ve kâh ta‘ahhüd i‘lâmâtı irsâliyle imrâr-ı evkât idüb ma‘-hazâ Gedüklü-yi merkûm havâli-i merkûmede te`ehhül ve tavattun idüb yedindeki mîrî akçeyi dahî itlâf ve izâ`et ve ba‘zı dest-ramak olabildikce bede’t-tahsîline dahî cesâret eylediği ve bundan böyle her ne kadar te`kîd ve isti‘câl olunsa mukayyed olmayacağı ba‘de’t-tahkîk siyânetü’l-mîrî Gedüklü-yi merkûm sen ki Kütahya Mütesellimi mûmâ-ileyhsin ma‘rifetinle Kütahya’ya ihzâr ve yedinde olan mâl-ı mîrîden kazâlara tevzî‘âtı var ise kazâ ahâlîlerinden ve eğer telef ve izâ‘et itmiş ise kendüsünden tahsîl içün Kütahya Kal‘ası’na kal‘abend ve emvâl ve eşyâsından tazmîn ve tekmîl olunmak bâbında iş bu sene-i mübâreke evâ`il-i muharreminde Divân-ı Hümâyûnum’dan mü`ekked emr-i şerîfim sâdır olmuşidi bu def‘a emr-i şerîf-i mezkûre cevâb olarak tarafında Der-‘aliyyeme vârid olan tahrîrâtın me`al-i emr-i şerîf-i mezkûrun icrâ ve infâzına tarafından kat‘en mübâderet olunmuşidi mukaddemâ Gedüklü-yi merkûmun hidmet-i me`mûresinde güyâ kusûr ve rehâveti olmayub gayret ve sadakâtini beyândan ‘ibâret olub ancak Gedüklü-yi merkûm iş bu maslahat-ı mühimmeye me`mûr olalı tamâmen üç sene karîb olduğundan gayrı ber-vech- i meşrûh verâsından te`kîd ve isti‘câli hâvî bi‘d-defa‘ât ve ba‘dehu kendüyü terhîb ve tehdîdi muhtevi güzâk müte‘addid evâmir-i ‘aliyyem îsdâr ve bi’l-ahere tehdîdât-ı mezkûrenin ibkâsıçün sana hitâben dahî ber-vech-i meşrûh mü`ekkid emr-i ‘âlîşânım îsdâr ve irsâl olundukdan sonra tertîb-i mezkûreden kıst olunmuş atmışbeş mehâr deve irsâl ve istablı ‘âmireme teslîm idüb mâ‘adâ ikiyüz otuzbeş deve ‘ala hâle pesmânde kalub üç seneden berü aldiği akçe kadar deve göndermemişiken şimdi senin civâr-ı saltanât-ı ‘âliyyem’de hilâf-ı rızâ-yı ‘aliyyem bi-mehâyâ bu misillü siyânet ve irtikâbı gütşî gibi zâhir ve bâhir olan başıbağlu hademe-i Devlet-i ‘âliyyem’den olan kimesneyi istishâb birle hilâf-ı vâki‘ muhasenâtdan bahis ile himâyet ve emr-i şerîf-i mezkûrun infâzında tehâvün eylemek sana töhmet-i ‘azîme kabîlinden olduğundan mâ‘adâ bundan böyle umûr-ı mühimme-i müsta‘cile zımnında hevâli-i mezkûreye neşv olacak evâmir-i ‘aliyyemin dahî ‘adem-i nüfûzuna sebeb-i müstakil olacağı umûr-ı bedihyâtdan olmağla

mücânebet iderek mukaddemâ sâdır olan emr-i şerîfim mûcebince Gedüklü-yi merkûmun makbûzu olan mâru’z-zikr yedibin sekiz yüz gurûşdan gönderdiği altmış beş mehâr deveden mâ‘adâ küsûr zimmetinde kalan mebâliği ‘alâ eyy-i hâl emvâl ve eşyâsından ve eğer kazâlara tevzî‘ itmiş ise kazâlardan tahsîl ve ibreten lî’s-sâ’irîn Gedüklü-yi merkûmı dahî Kütahya Kal‘ası’na kal‘abend eyleyüb ba‘dehu kal‘abend olduğunı müş‘ir dizdârı yedinden ‘arz ve mahalline kaydiçün Der-‘aliyyeme irsâl ve tesyîre ikdâm ve serimû kusûr ve rehâvetden ittikâ`-i tamm eylemen bâbında Divân-ı Hümâyûnum’dan emr-i şerîfim sudûrını hâlâ rikâb-ı hümâyûnumdan başdefterdârım olan Osman dâme ‘ulvuhu i‘lâm itmekle vech-i meşrûh üzere ‘amel olunmak fermânım olmağın tekîden ve isti‘câlen ve tehdîden ve inzâren rikâb-ı hümâyûnumdam iş bu emr-i şerîfim dahî ısdâr ve (boş) ile irsâl olunmuşdur imdi sen ki Kütahya Mütesellimi kapûbâşı (S.20) mûmâ- ileyhsin ber-vech-i meşrûh sudûr iden emr-i şerîfim mazmûn-ı münîfi infâz ve icrâda vâki‘ kusûr ve rehâvetin ve merkûmı tasahhub ve himâye birle hüsn-i hâlinden bahsle tahvîrat irsâline mehâsûnın her vecihle rızâ-yı hümâyûnumı hilâf-ı olduğı ve bundan sonra dahî Gedüklü-yi merkûmı himâye birle infâz-ı emr-i şerîfimde tekâsül ve tehâvül iderisen anın hakkında îfâ‘ olunacak ‘ukûbât bilâ imhâl senin hakkında icrâ olunacağı muhakkak olduğı ve merkûmun zimmetinde kalan emvâl-i mîrîyenin ‘alâ eyy-i hâl emvâl ve eşyâsından ve eğer kazâlara tevzî‘ itmiş ise kazâlardan tahsîl ve ‘ibreten lî’s-sâ`irin kal‘abendiyle tenfîz ve irâde-i ‘aliyyeme ibtidâr olunmak matlûb-ı ka‘tî‘i mülükânem idiğü ma‘lûmun oldukda mazmûn-ı emr-i şerîfimi gereği gibi mütâla‘a ve encâm-ı karî tefekkür ve mülâhaza iderek ana göre ‘amel ve hareket birle ber-vech-i muherrer mukaddemâ sâdır olan emr-i şerîfim mûcebince Gedüklü-yi merkûmun makbûzı olan maru’z-zikr yedibin sekizyüz gurûşun gönderdiği beş mehâr deveden mâ‘adâ küsûrı zimmetinde kalan meblâğı ‘alâ eyy-i hâl emvâl ve eşyâsından ve eğer kazâlara tevzî‘ itmiş ise kazâlardan tahsîli ve kendüsünü dahî Kütahya Kal‘ası’na kal‘abend eyleyüb ve kal‘abend oldığını müş‘ir dizdârı yedinden i‘lâm ahz ve mahalline kayd olunmak içün serî‘en Der-‘aliyyeme irsâl ve tesyîre ihtimâm ve dikkat ve hilâf-ı emr ve rızâ hareket vukû‘ıyla mazahhar-ı ve ‘îdâd-ı hüsrevânem olmakdan nefsini siyânet eylemen bâbında

Fî evâhir-i CÂ (Cemâziyel’l-evvel) sene 205