B.48: İsti‘câli hâvî mu`ahheren dahî emr-i şerîf yazılmışdır

Evâhîr-i CÂ (Cemâziye’l-evvel) sene 205

Zikr-i atî kimesnenin bulunduğu mahallin kâdîsıyla Limni Cezîresi Nâ`ibi’ne ve Kocaili Sancağı Mütesellimi’ne hüküm ki

Karamürsel sâkinlerinden serdengecdi ağvâtından Koca Mehmed dimekle ma‘rûf şahıs kendü hâlinde olmayub serdengeçdi bayrağıyla sefere ‘azîmet ideceğim diyerek katl-ı nüfûs ve gasb-ı emvâle cesâret ve ihtilâl-i memleketi mûceb olur harekâta cür`et eylediği ve bu vecihle fezâhete ibtidârından sonra Karamürsel’den firâr itmiş olduğı bundan akdem tahkîk olmağla merkûm Koca Mehmed Karamürsel ve hevâli ve etrafında bulunduğu mahalde ocakdan ta‘yîn olunan mübâşir ma‘rifetiyle ahz ve Limni Cezîresi’ne nefy ve iclâsı bâbında bundan akdem sudûr iden emr-i şerîfim mazmûnuna nazaren merkûmun bu ana kadar ele götürülüb mahall-i menfâsına irsâl ile tenfîz emr-i şerîfime mübâderet olunmak lâzimeden iken el-yevm ahz olunmadiği tahkîk olunmağla sen ki Kocaili Sancâğı Mütesellimi mûmâ-ileyhsin ma‘rifet ve ihtimâmın ve bu def‘a ocakdan müceddeden ta‘yîn olunan mübâşir ma‘rifetiyle merkûmun ‘alâ eyy-i hâlin ele getürüb mukaddemâ sâdır olan emr-i şerîfim mûcebince mahall-i menfâsına îsâl ve tesbîle müsâre‘et eylemek fermânım olmağın tekîden ve ihtimâmen rikâb-ı hümâyûnumda iş bu emr-i şerîfim ısdâr ve ocakdan mübâşir ta‘yîn olunan (boş) ile irsâl olunmuşdur imdi sen ki mütesellim-i mûmâ-ileyhsin merkûm Koca Mehmed’in beher-hâl bulunduğu mahalde ahz ve savb-ı menfâsına irsâl birle infâz-ı emr-i şerîfime müsâre‘et olunmak matlûb idiğü

ve bu bâbda kusûr ve rehâvet vukû‘-ı hakkında mûceb-i tedâmin olacağı ma‘lûmun oldukda ber-vech-i meşrûh merkûm Koca Mehmed’i ma‘rifet ve ikdâmın mübâşir-i mûmâ-ileyh ma‘rifetiyle Kocaili Sancağı dâhilinde olduğu mahalde beher hâl ele getürüb ahz ve mukaddemâ sâdır olan emr-i şerîfim mûcebince cezîre-i mezkûreye nefy ve iclâya müsâre‘et ve kusûr ve rehâvetden tehâşî ve mübâ‘edet eyleyesin ve sen ki Limni Cezîresi Nâ`ibi mevlânâ-yı mûmâ-ileyhsin vusûlünde merkûmı cezîre-i mezkûrede menfiyyen meks ve ikâmet itdirüb bilâ emr-i şerîf ıtlâk ve mahall-i ahere hareketine irâ`et-i ruhsâtdan mübâ‘edet ve vusûlünü Der-‘aliyyem’e i‘lâm ve inhâya mübâderet eylemen bâbında

Fî evâsıt-ı CÂ (Cemâziye’l-evvel) sene 205

S.15/B.49: Mukaddem sâdır olan emr-i ‘âlî vürûdundan on gün mukaddem a‘yân-ı merkûmun Der-‘aliyyede olan sarrâfı tarafından emr-i meskûrun mefhûmı tafsîlen tahrîr olunmağla a‘yân-ı merkûm dahî kethüda ve ısdârına ve aher etbâ‘larıyla hufûd ve ba‘zı eşyâsını an re`s katıra tahmîl ve istishâb birle Cemâziye’l-evvel’in sekizinci günü firâr ve Sığla Sancâğı’nın kazâlarından ‘Ubur ve Nazilli kazâsına vardığı tashîh ve ondan kankı canibe râhî olduğu ma‘lûm olmayub ancak a‘yân-ı merkûm Der-‘aliyye tarafına azîmet ve tebdîl-i câme ile Asitane’de ihtifâ eylediği sarrâf-ı merkûmun zikr olunan tahrîrinden müstebân olduğu sûretle çavuş mübâşiri bilâ-hitâmü’l-maslaha ‘avdet eylediği nâtık Becik Kâdsı’nın vârid olan i‘lâmının mefhûmu bâ-fermân-ı âlî şerh virildi.

Fî 29 CÂ (Cemâzile’l-evvel) sene 205

Mukaddem Ömer’in ‘afv ve kapucıbaşılığı ibkâ olunub yine beldesinde ikâmet ve ilkât olunmak içün evâmir-i ‘aliye yazılub mühimme defterinde mukayyeddir.

Fî evâsıt-ı ZÂ (Zi’l-ka‘de) sene 205

Dergâh-ı Mu‘allâm Kapucıbaşları’ndan Menteşe Mütesellimi Hasan Çavuş-zâde el- Hâc Ebubekîr dâme mecduhuya ve Milas Kâdîsı’yla Midillü Cezîresi Nâ`ibi’ne ve Sığla Mütesellimi İlyas-zâde Halil ve Hassa Silahşorlarından olub Milas A‘yânı Ömer’in kapucıbaşılığı ve mukâta‘a ref‘iyle Midillü Cezîresine nefy ve iclâsı ve kâffe-i emvâl ve eşyâsın cânib-i mîrîçün zabtına bundan akdem Der-‘âliyyem’den mübâşir ta‘yîn olunub

el-yevm Milas tarafında olan Murad Pâşâ Mütevelli’si Hasan zîde mecdehümâya ve Milas Kâdîsı Zâbitine hüküm ki

Merkûm Ömer beş yüz nefer ‘asker ile bundan akdem meştâ-yı hümâyûnuma me`mûr kılınmış iken me`mûriyetini hâvî ve ba‘de isti‘câli muhtevî sâdır olan evâmir-i şerîfem ‘adem-i itâ‘at birle savb-ı me`mûriyete ‘azîmet izhâr-ı tereddüd ve muhâlefet eylediğine binâ`en te`dîbi icrâsıyla sâ`ire ‘ibret kılınması lâzım gelmeğin kapucıbaşlılığı ve mukâta‘ası ref‘olunub kendüsünün cezîre-i merkûmeye nefy ve iclâsı ve sen ki silahşor mûmâ-ileyhsin ma‘rifetin ve ma‘rifet-i şer‘e emvâl ve eşyâsının dahî cânib-i mîrîçün zabtı husûsuna irâde-i ‘aliyyem ta‘alluk idüb ol bâbda evâmir-i şerîfeme nazâran şimdiye dek merkûmun mahall-i menfâsına irsâli ve emvâl ve eşyâsında cânib-i mîrîçün zabtıyla mezâmin-i evâmir-i şerîfemde icrâsı lâzım iken merkûman bu ana kadar mahall-i menfâsına gönderilmediği ve emvâl ve eşyâsının zabtına ibtidâr olunmadığı merkûm bu esnâda Der-‘aliyyem’de ba‘zı mahallere ilticâ ile evvel bahârda sefer-i hümâyûnuma ‘azîmet itmek şartıyla kayd-ı nefyden afv ve ıtlâkı husûsuna temşiyyet itmesinden istidlâl olunmağla bu makûle muğâyir emr ve rızâ-i harekete cesâret idenlerin fezâyihinde iğmâz bir vecihle mümkün olmadığına binâ’en (çizik) hümâyûn-ı şevket-makrûnum şeref-yâfte- i sudûr olmağla siz ki Hasan Çavuş-zâde Sığla Mütesellimi İlyas-zâde ve zâbitân-ı mûmâ-ileyhsiz ma‘rifetiniz ve mübâşir-i silahşor mûmâ-ileyh ma‘rifetiyle merkûm Ömer mukaddemâ sâdır olan evâmir-i şerîfem mûcebince ‘alâ eyy-i hâl Midillü Cezîresi’ne irsâl ile tenfîz evâmir-i ‘aliyyem ve kâffe-i emvâl ve eşyâsının dahî cânib-i miriçün zabtına ikdâm ve dikkat eylemeniz fermânım olmağın me`mûriyetinizi ve te`kîdi ve isti‘cali hâvî rikâb-ı kamyâbımdan hasseten iş bu emr-i şerîfim ısdâr ve (boş) ile irsâl olunmuşidi imdi siz ki kapucubaşı ve İlyas-zâde ve zâbitân mûmâ-ileyhsiz merkûm Ömer’in beher hâl mukaddem fermân olduğu üzere serî‘en mahall-i menfâsına irsâl-i hâlâtından istihsâline müsâre‘ed ve tenfîz irâde-i hümayûnum mübâderet eylemeniz matlûb kat‘en mülükânem idüğü ve kaffe-i emvâl ve eşyâsının dahî ma‘rifet-i şer‘ ve mübâşir-i mûmâ-ileyh ma‘rifetiyle cânib-i mîrîçün zabt ve ve rabtına ihtimâm ve dikkat-i tâmm olunmak âhass-ı kârib-i dâverânem olduğu ve eğer bundan sonra dahî mahall-i manfâsına ‘azîmetin dakîka-i vâhide terâhi ve tavakkuf itmek lâzım gelür ise bilâ-emânin tertîb-i cezâsını ibtidâr olunacağı muhakkak olduğun ma‘lûmunuz oldukda ber-vech-i meşrûh-ı ‘amel ve hareket iderek merkûm Ömer’i ne vecihle ve ne tarîkle olur ise

ma‘rifet ve ikrâmınız ile beher hâl savb-ı menfâsına irsâl ve tesbîl birle tenkiz evâmir-i ‘aliyyem bezl-i makderet ve serimû kusûr ve rehâvet vukû‘uyla te`hîr-i maslahat-ı matlûbeyi mûceb hâlât-ı tecvîzden gâyetü’l-gâye tehâşî ve ittikâ-i tâmm eyleyesiz ve siz ki Milas Kâdîsı Mevlânâ ve Mübâşir-i silahşor mûmâ-ileyhsiz merkûm Ömeri ma‘rifet ve ihtimâmınız ve kapucubaşı ve İlyas-zâde ve sâ`ir mûmâ-ileyh ma‘rifetleriyle beher hâl-i savb-ı menfâsına irsâl birle mukaddemâ sâdır olan emr-i şerîfim mûcebince kaffe-i emvâl ve eşyâsını ma‘rifet-i şer‘le cânib-i mîrîçün müttebât ve girift ve tahrîr ve terkîm birle serî‘en defterini irsâle mübâderet ve kusûr ve rehâvetden tehâşî ve mübâ‘edet eyleyesiz ve sen ki Midillü Cezîresi Nâ`ibi Mevlânâ-yı mûmâ-ileyhsin merkûm Ömer vusûlünde cezîre-i mezbûrede menfiyyen meks ve ikâmet itdirüb bilâ emr-i şerîf ıtlâk ve mahall-i ahere hatve-i vâhide hareketini tecvîzden ittikâ ve mübâ‘edet ve vusûl ve ikâmetini Der-‘aliyyem tahrîr ve iş‘âra mübâderet eylemen bâbında

Fî evâsıt-ı CÂ (Cemâziyye’l-evvel ) sene 1205