İstanbul Şehir Üniversitesi Arşivi, Belge no: 001635599019
Transkripsiyon Metni:
(Tuġra:)
ʿAbdü’l-ḥamīd bin ʿAbdü’l-mecīd
-el-muẓaffer dāʾimā-
SENED-İ ḪĀḲĀNĪ
Ḥazīneʾ-i Ḫāṣṣaʾ-i Şāhāne Neẓāret-i ʿaliyyesinden mebʿūs̱ 26 Ḥazīran, sene: 1]316 tārīḫli ve yigirmi iki numrolı teẕkirede Çamlıca’da kāʾin Molla İbrāhīm Paşa köşkünüñ yedi biñ lira bedel-i muḳarreriyle Ḥazīne’ce bi’l-iştirā senediniñ devletlü, necābetlü Mecīd Efendi ḥażretleri nāmına tanẓīmiyle ʿarż ve taḳdīmi muḳteżā-yı irādeʾ-i seniyyeʾ-i mülūkāneden oldıġı beyānile, ol-vechle meẕkūr köşküñ muʿāmeleʾ-i ferāġiyyesiniñ icrāsıyla senedātınıñ tanẓīm-i vāris̱ i işʿār ḳılınmış ve Ḳuzġuncuk’da İstavroz maḥallesinde, ʿArabacı caddesi’nde on-bir numro ile muraḳḳam, bir ṭarafı Baġlar-başı’ndan Begler-begi’ne mürūr eden ve yahūdī maşaṭlıġı cihetinde bulunan cadde ve bir ṭarafı İstavroz-deresi’ne mürūr eden ṭarīḳ ve baʿżan Mīr-alāy Seydī’niñ ḫāne ve aḫūr ve baġçası ve bir ṭarafı Ṭopḫāneli-oġlu’ndan İstavroz-deresi’ne müntehī ṭarīḳ-ı ʿāmm ve ṭaraf-ı rābiʿi Çamlıca’ya geçen ṭarīḳ-ı ʿāmm ile maḥdūd, zemīni Ḥamīdiyye Vaḳf-ı şerīfi mülḥaḳından merḥūm ʿAbdu’llāh Aġa Vaḳfı’na senevī yigirmi ġuruş muḳāṭaʿalu maʿa-müsteġallāt ve teferruʿāt ve köşk ve baġıñ zemīn ve ebniyye ve kürūm ve eşcārı müşārun-ileyh İbrāhīm Ḥilmi Paşa ʿuhdesinde oldıġı iki ḳıṭʿa senedinden añlaşılmasıyla müşārun-ileyh ṭarafından ferāġa bir ḳıṭʿa vekālet-nāme mūcebince vekīli ʿOs̱mānlı Siġorṭa Şirketi Heyʾet-i idāresi aʿżāsından Ṭarno Beg bi’l-vekāle ber-mūceb-i irādeʾ-i
seniyye ẕikr olunan yedi biñ lira bedel maḳbūz muḳābilinde ḳatʿiyyen ferāġ ve ḳaṣr-ı yedle ḳaydı maḥalli müşārun-ileyh Mecīd Efendi ḥażretleri ʿumdeʾ-i ʿālīlerine ḳayd u tesvīd olundıġından ʿale’l-uṣūl ebniyye ve kürūm ve eşcārı içün başḳaca senedi tanẓīm ḳılındıġı mis̱illü, zemīni içün daḫı işbu Sened-i Ḫāḳānī tanẓīm ü taḳdīm ḳılındı. / 15 Rebīʿü’l-evvel, sene: 1]318 / 29 Ḥazīran, sene: 1]316.
(Mühür:)