C. VEFAT VE MİRAS İŞLEMLERİ
II. 1465 NUMARALI MESUDİYE ŞER’İYYE SİCİLİNİN TRANKRİPSİYONU
İşbu defter yetmiş beş sahîfeden ibâret olduğu tasdîk kılındı. Fî 15 Rebî‘üʹl-evvel sene 323
ve
fî 7 Mayıs sene 321 (mühür) Tevfik Numro: I
Bismihî tebâreke azze ve celle veʹs-salâtü alâ nebiyyinâ muhammedin ve alâ âlihî ve sahbihî ecma‘în. Çekirge ismiyle müsemmâ olan cerâd-ı münteşire haşerât maʻlûmunuz ola ki bâʻisüʹl-mürâsele Abdullahʹın tarlasında olan hububât ve mezrûʻâtını telef ve ızrâr eylediğize binâen meclis-i şerʻe gelüp sizden teşekkî itmekle biʹt-taleb işbu mürâsele tahrîr ve irsâl olundu. Vusûlünde gerekdir ki mezbûrun tarlasında olan hububât ve mezrûʻâtını telef ve ızrâr itmeyesiz. Ba‘deʹl-yevm eğer iderseniz sizden Hâlikuʹl-arz veʹs-semâvât olan Hakk celle ve alâ hazretlerine ve habîb-i muhteremine havâle olunursuz. Şöyle bilip mûceb-i mürâsele-i şerʻiyye ile âmil olasız.
Fiʹl-yevmiʹl-ihdâ veʹl-işrîn min Rebî‘üʹl-âhir li-sene selâse ve işrîn ve selâse mi’e ve elf. Nemakahû hâdimüʹş-şerîʻat-i şerîfe Hâfız Ahmed Tevfik ufiye anh
Sahîfe: 1 Numro: II
Hüve
İzzet-meâb şerîʻat-nisâb Razlık nâib-i sâbıkı Ahmed Tevfik Efendi kâmyâb baʻdeʹt-tahiyyetiʹl-vâfiye inhâ olunur ki;
Sivas vilâyeti dâhilinde kâin Milas nâm-ı diğer Hamidiye Kazāsıʹnın umûr-ı ahkâm-ı şerʻiyyesi meclis-i intihâb-ı hükkâmüʹş-şerʻden vâkiʻ olan ifâde üzerine zât-ı sâmî-i hazret-i fetvâ-penâhînin re’y ve tensîblerine ve nezâret-i âmmemize binâen bin üç yüz yirmi üç senesi şehr-i rebîʻüʹl-evvelinin on beşinci gününden iʻtibâren umde-i behiyyelerine ihâle ve tefvîz olunmuştur. Gerekdir ki, kazā-i mezbûru yevm-i mezbûrdan biʹn-niyâbe zabt idü beyn-i ahâlî icrâ-yı ahkâm-ı şerʻ-i âlîye saʻy ü gayret ve vukūʻ-yâfte olan terekâtın mûceb-i tahrîr olanlarının tahrîr u terkîm ve beyneʹl-verese biʹl-farîzatiʹş-şerʻiyye tevzîʻ ve taksîmi husūsuna ihtimâm ve dikkat eyleyesiz.
el-Kadıasker-i Anadolu es-Seyyid Ahmed Nureddin
Bi-hürmeti nebiyyinâ sallaʹllâhü teʻâlâ aleyhi ve sellem ceʻaleʹllâhu umûrenâ muvaffakatü liʹş-şerʻi veʹs-savâb ve baʻdeʹl-mesnûl (?) en yüsebbitenâ alâ-şerîʻatiʹr-rasûli mekîn sene selâse ve işrîn ve selâse mi’e ve elf.
Fiʹl-yevmiʹs-sâmin veʹl-âşir min-Rebîʻüʹl-evvel büdiet fiʹl-yevmiʹl-mezkûr. ed-Dâʻî Ahmed Tevfik Nâib-i Kazā-i Hamidiye Hafezahû an-…
Sahîfe: 2 Numro: 1
Hamidiye-i Şarkī Kazāsıʹna tâbiʻ Maden Karyesi ahâlîsinden ve tebaʻa-i Devlet-i aliyyeden Rum milletinden olup bundan akdem fevt olan Dimitri veled-i Haçi Mihailʹin verâseti zevce-i metrûkesi Orsane binti Hristos ve sulbî kebîr oğlu Hristo ve sağīr oğlu Kireki ve diğeri Anastas ve sulbiye-i sağīre kızı Eleni ve Bartıneʹye münhasıra olduğu ledeʹş-şerʻiʹl-enver zāhir ve nümâyân oldukdan sonra verese-i merkūmûndan sağīrân-ı merkūmûna hey’et-i ihtiyâriyelerinden ehliyeti tasdîk olunup taraf-ı şer‘îden vasī nasb olunan amucaları millet-i merkūmeden İlya veled-i Haçi Yaniʹnin talebi ve hey’et-i ihtiyâriye hâzır olduğu hâlde fevt olan merkūm Dimitriʹnin muhallefâtı ber-vech-i zîr beyân olunur.
Fiʹl-yevmiʹl-hâdî veʹl-işrîn min Rebi‘üʹl-âhir li-sene selâse ve işrîn ve selâse mi’e ve elf.
Cinsi Miktarı Kıymeti
Yatak Üç kat 240 guruş
Nühâs Yirmi kıyye 120 guruş
Müstaʻmel kilim Dört aded 200 guruş
Cicim Dört aded 100 guruş
Çaput minder Sekiz aded 50 guruş
İnek Bir re’s 200 guruş
Öküz Bir çift 400 guruş
Merkeb Bir re’s 100 guruş
Ganem Beş aded 200 guruş
Hane maʻa ahûr 1000 guruş
Samanlık harman 300 guruş
Bostanlık 100 guruş
Yekün 3010 guruş
Resm-i kısmet 75 guruş
El-ihrâcât minhâ 90 guruş Sahhuʹl-bâkī liʹt-taksîm beyneʹl-verese 2920 guruş
Hisse-i zevce-i metrûke Orsane 360 guruş
Hisse-i veled-i kebîr Hristo 638 guruş 30 para Hisse-i veled-i sağīr Kireki 638 guruş 30 para
Hisse-i diğeri Anastas 638 guruş 30 para
Hisse-i binti Eleni 319 guruş 15 para
Hisse-i diğeri Bartıne 319 guruş 15 para
Sağīrân-ı merkūmânın hisseleri amucaları vasī-i merkūm İlyaʹya teslîm olunduğu işbu mahalle şerh virildi.
Sahîfe: 3 Numro: 2
Hamidiye-i Şarkī Kazāsıʹna tâbi‘ Türk Karyesi ahâlîsinden olup bundan akdem vefât iden Zülfikaroğlu Hüseyin Ağaʹnın verâseti zevce-i metrûkesi Fatıma binti Süleyman ve sulb-i kebîr oğulları Ahmed ve Aziz ve Mehmed ve Memiş ve İsmail ve sulbiye-i kebîre kızları Ümmügülsüm ve Hatice ve Hasibeʹye münhasıra olduğu ledeʹş-şerʻiʹl-enver zāhir ve nümâyân olmağla oldukdan sonra verese-i merkūmûndan gāib Ahmed ve Aziz ve Mehmedʹin hisselerinin hıfz ve vürûdlarında kendilerine teslîm itmek üzere taraf-ı şer‘-i şerîfden gāibûn-ı merkūmûna bir kayyım nasbı ehem ve elzem olmağla ehliyet ve istikāmeti hey’et-i ihtiyâriyeden tasdîk olunan müteveffâ-yı merkūmun mahdûmu Memiş ibn Hüseyinʹe merkūm Memişʹin talebi ve hey’et-i ihtiyâriye hâzır olduğu hâlde mütevaffâ-yı merkūmun muhallefâtı ber-vech-i zîr beyân olunur.
Fiʹl-yevmiʹs-sâdis veʹl-âşir min-Cemâziyeʹl-evvel li-sene selâse ve işrîn ve selâse mi’e ve elf.
Cinsi Miktarı Kıymeti
Ganem On aded 240 guruş
Camuş ineği Bir aded 250 guruş
Nühâs On beş kıyye 100 guruş
Yatak Üç kat 100 guruş
Cicim İki aded 50 guruş
Hane maʻa ahur 1200 guruş
Samanlık harman 200 guruş
Bostanlık 150 guruş
Araba Bir aded 60 guruş
Çift edevâtı 15 guruş
Camuş ineği Bir aded 250 guruş
Kovan Beş aded 200 guruş
Ağılhane 600 guruş
Yekün 3465 guruş
Resm-i kısmet 86 guruş 25 para
5 guruş
Kaydiyye 30 guruş
… kalemiyyesine 121 guruş 15 para
El-ihrâcât minhâ 3344 guruş
Sahhuʹl-bâkī liʹt-taksîm beyneʹl-verese 2926 guruş
Hisse-i zevcesi Fatıma 419 guruş
Hisse-i sulb-i kebîr Ahmed 450 guruş
Hisse-i Aziz 450 guruş
Hisse-i Mehmed 450 guruş
Hisse-i Memiş 450 guruş
Hisse-i İsmail 450 guruş
Hisse-i Ümmü Gülsüm 225 guruş
Hisse-i Hatice 225 guruş
Sahîfe: 4
Numro: 3
Medîne-i Sivas mahallâtından Cedîd-i Kebîr Mahallesinde müste’ciren sâkin olduğu hâlde bundan bir buçuk sene mukaddem Sivas Vilâyetine mülhak Karahisâr-ı Şarkī Sancağıʹna tâbi‘ Hamidiye Kazāsıʹnda fevt olan tebaʻa-i Devlet-i Aliyyeʹnin Ermeni milletinden Vanlıoğlu Darendeli Samail veled-i Haçi Bayo nâm kimesnenin zevcesi ve vârisi olduğunu iddiʻâ edüp nefsinden asīle ve sadrî oğlu Barki ve sadriye-i sağīre kızları Varşalos ve Sanoş ve Heftadiye her birinin tesviye-i emrilerine bâ-hüccet-i şerʻiyye cânib-i şerʻîden vasiyye-i mansûbeleri tebaʻa-i ve milleti-i merkūme nisvânından Odacıoğlu kızı Marinos ibnet-i Manas nâm kadın tarafından zikr-i âtî husūsunda daʻvâ ve kabza vekâlet iddiʻâ iderek hüccet-i vekâleti ibrâz iden Sivasʹın Berberci Tarlası mahallesi sâkinlerinden ve tebaʻa-yı Devlet-i Aliyyeʹnin Ermeni milletinden Kafesçioğlu Maksor veled-i Tekfur Hamidiye Kazāsı mahkemesinde meclis-i şerʻde mal sandığı müdîri Ahmed Besim Efendi tarafından mersûl hazîne vekîli Nuri Efendi ibn ( ) muvâcehesinde müvekkilim mezbûre Marinos ibnet Manasʹın fevt olan zevci mezbûr Samail veled-i Haçiʹnin muhallefât esmânından Hamidiye mal sandığında mahfûz ve emânet olan altı yüz yetmiş beş guruşu biʹl-vekâle taleb iderim deyü daʻvâ itdikde mûmâ-ileyh Nuri Efendi ibn ( ) meblağ-ı mezkûrun sandık-ı mezkûrda emâneten mahfûz olduğunu ikrâr ve vekâlet-i merkūmeyi tasdîk itmeğin mûcibiyle meblağ-ı mezkûr altı yüz yetmiş beş guruşun vekîl-i mezbûr Maksor veled-i Tekfurʹa edâsıyla mûmâ-ileyh Nuri ibn ( ) ilzâm olunduğu iʻlâm olundu.
Fiʹl-yevmiʹl-işrîn min-Cemâziyeʹl-evvel li-sene selâse ve işrîn ve selâse mi’e ve elf. Nâib Ahmed Tevfik
Numro: 5
Hamidiye Kazāsıʹna tâbiʻ Maden Karyesi ahâlîsinden ve tebaʻa-i Devlet-i Aliyyeʹnin Rum milletinden Erzincanlıoğlu Kora veled-i ( ) karye-i merkūme ahâlîsinden ve tebaʻa-i Devlet-i Aliyyeʹnin Rum milletinden Kazancıoğlu Yorika nâm kimesne muvâcehesinde târîh-i iʻlâmdan bir mâh mukaddem mezbûr Yorika iki yüz yetmiş guruş kıymetli bir re’s merkebi sağīr mahdûmum Yani yedinden gasb idüp iki buçuk sâʻat mesâfe olan Koyulhisarʹın Hasanlı Karyesiʹne götürüp öldürmüş olduğu illetden
kurtarmak üzere mezkûr merkebin yüz ve dudaklarını kat‘ iderek helâkine sebeb olmağla kıymetini tazmîn taleb iderim deyü daʻvâ olduğu ber-mûceb-i iddiʻâ ikrâr itmekle alâ-mûceb-i ikrârihî kıymet-i mezkûre iki yüz yetmiş guruşun bi-hükmiʹz-zamân müddeʻî-i merkūm Koraʹya edâsı lâzım gelmekliği merkūm Yorikaʹya tenbîh olunduğu huzūr-ı âlîlerine iʻlâm olundu.
Fiʹl-yevmiʹs-sâmin veʹl-işrîn min-Cemâziyeʹl-ûlâ li-sene selâse ve işrîn ve selâse mi’e ve elf. Ahmed Tevfik Numro: 6
Koyulhisar’a tâbi‘ Fenanse Karyesi sâkinelerinden müteveffâ Yüzbaşı İbrahim Ağaʹnın zevcesi Hayriye binti Zekeriya nâm hâtun Hamidiye hazîne vekîli Nuri Efendi ibn Mehmed hâzır olduğu hâlde meclis-i maʻkûd-ı şer‘de daʻvâ ve takrîr-i kelâm idüp târîh-i târîh-iʻlâmdan çend gün mukadddem karyemtârîh-ize btârîh-ir buçuk sâʻat mesâfede Genlerctârîh-ik nâm merʻâda gayb olan yedi yaşında siyah renk sağ kulağı delik bir re’s camuşu ve yine üç yaşında siyah sağ kulağının ön tarafı delik camuş düğesi Yade nâmıyla Hamidiye sandığında mahfûz olmağla mezkûr hayvânâtımı biʹl-istihkāk alıvermesini taleb iderim didikde mûmâ-ileyh Nuri Efendi dahi ol vechile camuşların belediye idâresinde mahfûz olduğunu ikrâr ancak müddeʻiyenin malı olduğunu inkâr idicek müddeʻiye-i mezbûre Hayriye Hanımdan daʻvâsına mutābık beyyine taleb olundukda Koyulhisarʹa tâbi‘ Koruseki Karyesiʹnden Davudoğlu İsmail bin Salih ve Fenanse Karyesiʹnden Abdurrahman oğlu Abdurrahman nâmân kesân meclis-i şer‘de hâzır oldukları hâlde eserüʹl-istişhâd müddeʻâ-bih iki re’s camuşların müddeʻiye Hayriye Hanımın malı olduğuna ber-nehc-i şerʻ îfâ-yı şehâdetle ve ledeʹt-tezkiye makbûlüʹş-şehâde oldukları anlaşılmakla maʻaʹl-usûl müddeʻiye-i mezbûre müddeʻâ-bih camuşları bir gûnâ mesleğinden ihrâc itmediğini yemîn-i biʹllâh itmeğin mûcebince mezkûr iki re’s camuşların mezbûre Hayriye Hanıma teslîmi iktizā itdiği mûmâ-ileyh Nuri Efendiʹye tenbîh olunduğu iʻlâm olundu.
Fiʹl-yevmiʹs-sâdis min-Cemâziyeʹl-âhir li-sene selâse ve işrîn ve selâse mi’e ve elf. Nâib Ahmed Tevfik
Sahife: 5 Numro: 7
Hamidiye Kazāsıʹna tâbiʻ Yeveli Karyesi ahâlîsinden Balcıoğlu İbrahim bin Mehmed ve Balcıoğlu Mehmed bin Mehmed ve Abdioğlu Osman bin Ali nâm kimesneler meclis-i şer‘de zikr-i âtî hayvânatı be-tarîkiʹl-iltikât cânib-i hükûmetden me’mûriyeti hasebiyle vâzıʻuʹl-yed olan hazîne vekîli Nuri Efendi ibn Mehmed muvâcehesinde cerîde-i şer‘iyyede evsâfı muharrer üç re’s camuş malına (malları) olup târîh-i iʻlâmdan on beş gün mukaddem zâyiʻ olmuşdu. El-hâletü hâzihî vekîl-i mûmâ-ileyh yedinde bulmamızla biʹl-istihkāk taleb ideriz deyü baʻdeʹd-daʻvâ veʹl-istintâk vekîl-i mûmâ-ileyh cevâbında ... camuşlara taraf-ı hükûmetden yave olmak üzere vazʻ-ı yedini ikrâr lâkin müddeʻî-i merkūmûnun mâlı olduğunu inkâr itmekle müddeʻî-i merkūmûn ber-vech-i muharrer müddeʻâsını şâhidîn-i muʻaddilîn şehâdetleriyle vekîl-i mûmâ-ileyh muvâcehesinde baʻdeʹl-isbât mûcibiyle zikr olunan üç re’s camuş müddeʻî-i merkūmûn İbrahim bin Mehmed ve Mehmed bin Mehmed ve Osman bin Aliʹye defʻ ve teslîme vekîl-i mûmâ-ileyh Nuri Efendiʹye tenbîh olunduğu i‘lâm olundu.
Fiʹl-yevmiʹs-sâmin min-Cemâziyeʹl-âhir li-sene selâse ve işrîn ve selâse mi’e ve elf.
Numro: 8
Ordu Kazāsıʹna tâbi‘ Ulubey Nâhiyesiʹnin Koşaca nâm karye ahâlîsinden sâhib-i arzuhâl Melekoğlu Emin Usta ibn Salih ve Keşcioğlu Hasan ibn Ahmed Hamidiye [Kazâsıʹnda] mahkeme-i şer‘iyyeye mahsūs odada ma‘kūd-ı meclis-i şer‘-i şerîfden zikr-i âtî hayvânâtı be-tarîkiʹl-iltikât cânib-i mîrîden me’mûriyeti hasebiyle vâzıʻuʹl-yed olup cânib-i şerîʻat-ı garrâdan husūmete i‘tibâr olunan hazîne vekîli Nuri Efendi ibn Mehmed muvâcehesinde evsâfları cerîde-i şer‘iyyede muharrer iki re’s kısrak ve bir re’s tay mülkleri olup târîh-i iʻlâmdan on beş gün mukaddem zâyiʻ olmuşidi. El-hâletü hâzihî vekîl-i mûmâ-ileyh yedinde bulmamızla biʹl-istihkāk taleb ideriz deyü baʻdeʹd-daʻvâ veʹl-istintâk vekîl-i mûmâ-ileyh cevâbında zikr olunan bârgîr kısrak ve tay tarafımızdan yave olmak üzere vazʻ-ı yedini ikrâr lâkin müddeʻiyân-ı merkūmânın mülkleri olduğunu inkâr itmekle müddeʻîyân-ı merkūmândan ber-vech-i muharrer müddeʻâlarını şâhidîn-i muʻaddilîn şehâdetleriyle vekîl-i mûmâ-ileyh muvâcehesinde baʻdeʹl-isbât [veʹt-tahlîf] mûcibiyle zikr olunan iki re’s kısrak ve bir re’s tayı müddeʻiyân-ı merkūmân Emir Usta
ve Keşcioğlu Hasanʹa defʻ ve teslîme vekîl-i mûmâ-ileyh Nuri Efendiʹye tenbîh olunduğu i‘lâm olundu.
Fiʹl-yevmiʹl-vahid veʹl-işrîn min-Cemâziyeʹl-âhir li-sene selâse ve işrîn ve selâse mi’e ve elf. Numro: 9
Fatsa Kazāsıʹna tâbi‘ Komadan Karyesi sâkinelerinden zâtı zeyl-i vesîkada esâmîsi muharrer müteʻarrifîn taʻrîfleriyle muʻarrefe Dildare binti Mamu nâm hatun hâmil olduğu verâset i‘lâmını ibrâzla Hamidiye merkezinde mahkeme-i şer‘iyyeye mahsūs odada ma‘kūd-ı meclis-i şerʻ-i şerîfde zikr-i âtî akçeye cânib-i mîrîden me’mûriyeti hasebiyle vâzıʻuʹl-yed olup cânib-i şerîʻat-ı garrâdan husūmete i‘tibâr olunan hazîne vekîli Nuri Efendi tarafından mersûl sandık emîni Ali Osman Efendi ibn Hüseyin muvâcehesinde mezbûre Dildare Hanım takrîr-i kelâm idüp târîhden dört sene mukaddem Hamidiye mevkūfhânesinde ecel-i mev‘ūduyla vefât iden zevcim Fatsa Kazāsıʹnın Komadan Karyesiʹnden Subaşıoğlu Ali Ağa ibn Osmanʹın muhallefât esmânı olan üç yüz altmış iki guruşun zevcim müteveffâ-yı mezbûr Ali Ağaʹda cihet-i mihr-i müsemmâdan alacağım olan üç bin bir guruşa mahsûbu icrâ olunmak üzere sandık-ı mezkûrda olan üç yüz altmış iki guruşun alıvirilmesini taleb ve daʻvâ iderim didikde ol dahi müteveffâ-yı mezbûr Ali Ağaʹnın meblağ-ı mezkûr üç yüz altmış iki guruşun sandıkda mevcûd olduğunu ikrâr ancak müddeʻiye-i mezbûrenin cihet-i mihrden zevc-i merkūmda alacağı olduğunu inkâr idicek müddeʻiye-i mezbûreden ber-vech-i muharrer iddiʻâsını Fatsaʹnın Komadan Karyesi sâkinlerinden Deli İsmailoğlu el-Hâcc Ahmed ibn Şerif ve yine Fatsaʹya tâbi‘ Akçahisar Karyeli Yalkıoğlu Hasan ibn Ali nâmân kesân ile mûmâ-ileyh Ali Osman Efendi muvâcehesinde ba‘deʹl-isbât ve ledeʹt-tezkiye şâhidân-ı merkūmânın makbûlüʹş-şehâde oldukları beyân olunmağın mûcibince meblağ-ı mezkûr üç yüz altmış iki guruşun mezbûre Dildareʹye
Sahîfe: 6
defʻ ve teslîme mûmâ-ileyh Ali Osman Efendiʹye tenbîh olunduğu iʻlâm olundu.
Fiʹl-yevmiʹt-tâsi‘ veʹl-işrîn min-Recebiʹl-mürecceb li-sene selâse ve işrîn ve selâse mi’e ve elf.
Numro: 10
Karahisâr-ı Şarkī Hamidiye Kazāsıʹnda mahkeme-i şer‘iyyeye mahsūs o(da)da ma‘kūd-ı meclis-i şer‘-i şerîfde şahsı ta‘rîf-i şer‘î ile muʻarrefe an-asl Hamidiyeʹnin Gergeçi Karyesiʹnden olup Tokadʹın Leveke Karyesiʹnde mutavattın Kara Hasanoğlu kerîmesi Altun binti İsmail nâm bikr-i bâliğa tâlibi işbu râfiʻuʹl-kitâb an-asl Orduʹnun Davrak Karyesiʹnden olup Tokadʹın Leveke Karyesiʹnde mutavattın Bektaşoğlu Alişan bin Salih muvâcehesinde bi-tav‘ihâ ikrâr ve takrîr-i kelâm idüp mezbûr Alişan iki yüz guruş mihr-i muʻaccel ve üç yüz guruş mihr-i müeccel tesmiyesiyle beni tezevvüce tâlib ve râğıb olmağla ben dahi mihreyn-i mezkûreyn üzerine nefsimi merkūm Alişan bin Salihʹe akd ve tezvîc eylediğimde ol dahi ber-minvâl-i meşrûʻ muharrer tezevvüc ve kabûl itmeğin beynimizde akd ü nikâh münʻakid olmuşdur didikde gıbbeʹt-tasdîkiʹş-şer‘î mâ-hüveʹl-vâkiʻ biʹt-taleb ketb olundu.
Fiʹl-yevmiʹs-sâlis min-Şa‘bâniʹl-mu‘azzam li-sene selâse ve işrîn ve selâse mi’e ve elf. Şuhûdu:
- Mübâşir Raif Efendi
-Gergeçi Karyeli Bektaşoğlu Ömer
-Hamidiye gardiyanı Kılınçzâde Mehmed Efendi Numro: 11
Şarkī Hamidiye Kazāsıʹnda hükûmet konağında mahkeme-i şer‘iyyeye mahsūs odada ma‘kūd-ı meclis-i şer‘-i şerîfde kazā-i mezkûra tâbi‘ Gergeçi Karyesiʹnden müstedʻî Hasan bin Ali nâm kimesne Tokadʹın Leveke Karyesiʹnde mutavattın Kara Hasanoğlu kerîmesi zâtı zeyl-i vesîkada muharrer müslimîn taʻrîfiyle muʻarrefe Altun binti İsmail hâzır olduğu hâlde takrîr-i kelâm ve ikrâr-ı tâm idüp mezbûre Altun nefsini bana tezvîc itdi deyü fî 11 Temmuz sene 321 târîhli Hamidiye Kazāsı kâimmakâmlık makâmına iʻtâ itmiş olduğum arzuhâlde da‘vâ itmiş isem de el-hâletü hâzihî mezbûre Altunʹu tezevvücden fâriğ olup husūs-ı mezkûra müteʻallika katʻan ve kātıbeten daʻvâ ve nizâʻım olmamağla baʻdeʹl-yevm mezbûre Altun binti İsmail nâm kimesne nefsini dilediği kimesneye tezvîc ve nikâh eylesün didikde gıbbeʹt-tasdîkiʹl-muʻteber mâ-vaka‘a biʹt-taleb ketb olundu.
Fiʹl-yevmiʹs-sâlis min-Şa‘bâniʹl-mu‘azzam li-sene selâse ve işrîn ve selâse mi’e ve elf. Nâib-i kazā-i Hamidiye (mühür)
Şuhûdu:
-Gergeçi Karyesiʹnden Bektaşoğlu Salih
-Hamidiye gar[di]yanı Kılınçzade Mehmed Efendi Numro: 12
Şarkī Hamidiye Kazāsıʹna tâbi‘ Arıkmusa Karyesi ahâlîsinden bundan akdem vefât iden Veli Beyoğlu Hamdi ve diğeri Rasimʹin hâl-i hayâtlarında mahlût emvâl birâder ve müşterekleri Mehmed ve Şükrüʹnün … irslerinden dolayı müteveffâ-yı merkūmânın muhellefâtlarından hisselerine isābet iden sehimlerinin tefrîki bâbında mahkeme-i şer‘iyyesine mürâcaʻatları üzerine ümenâdan kâtib-i sânî Amil Efendi mahalline i‘zâm olunarak mûris-i merkūmân müteveffâ Hamdi ve Rasimʹin vârisleri ve hey’et-i ihtiyâriye hâzır oldukları hâlde tahrîr olunan tereke-i müteveffâ-yı merkūmânın kâtib-i mûmâ-ileyhe ve hey’et-i ihtiyâriyenin musaddak inhâsıyla ber-vech-i zîr beyân olunur.
Fiʹl-yevmiʹs-sâlis min-Recebiʹl-mürecceb sene selâse ve işrîn ve selâse mi’e ve elf.
Cinsi Miktarı Kıymeti
Döşek âdî 7 aded 200 guruş
Yün döşek 3 aded 140 guruş
Yorgan âdî 7 aded 100 guruş
Diğer evsat yorganı 7 aded 250 guruş
Yastık 5 aded 80 guruş
Şal döşek 2 aded 50 guruş
Kilim 4 aded 350 guruş
Çul 6 aded 120 guruş
Cicim 2 aded 40 guruş
Kıl kilim 3 aded 180 guruş
Yatak 1 kat 120 guruş
2 aded 20 guruş
Siyah bakır 39 kıyye 312 guruş
Sandık 2 aded 40 guruş
Hırdavât-ı beyyite An-kısmeti 100 guruş
Tüfenk 2 aded 50 guruş
Hâne 1 bâb 250 guruş
Samanlık 1 bâb 1300 guruş
Camuş ineği 1 re’s 150 guruş
Camuş balağı 1 re’s 80 guruş
Koyun 9 re’s 225 guruş
Keçi 11 re’s 308 guruş
Oğlak 8 re’s 82 guruş
Sahîfe: 7
Cinsi Miktarı Kıymeti
Toklu 70 re’s 70 guruş
Öküz 2 re’s 200 guruş
Camuş öküzü 1 re’s 250 guruş
Kısrak 1 re’s 300 guruş
Ester 1 re’s 300 guruş
Merkeb 1 re’s 100 guruş
Tay 1 re’s 200 guruş
İnek 4 re’s 400 guruş
Düğe 2 re’s 100 guruş
Tosun 1 re’s 30 guruş
Bağçe 2 kıtʻa 400 guruş
Bostan 2 kıtʻa 200 guruş
Çayır 2 kıtʻa 200 guruş
Değirmen 1 bâb 1000 guruş
Hâne diğer 1 bâb 200 guruş
Çuval 40 aded 40 guruş
Bal kovanı 2 aded 40 guruş
Kalem 42 aded
Kıymetin yekünü 10957 guruş 13 para
An-kısmeti Merkūm Mehmedʹin hissesi minhâ 3652 guruş 7305 guruş
Minhâ 3652 guruş
Müteveffâ merkūm Hamdiʹnin vereseleri hissesi
Zevc(es)i Aişe An-kısmeti 228 guruş
Diğer zevcesi Aişe An-kısmeti 228 guruş
Ah Mehmed An-kısmeti 862 guruş
Oğlu Şükrü An-kısmeti 862 guruş
Merkūm Hamdiʹnin hissesi olan
İmâm Fatıma An-kısmeti 610 guruş
Binti Fatıma An-kısmeti 431 guruş
Binti Eslem 431 guruş
Müteveffâyı merkūm Rasimʹin vereseleri hissesi 3652 guruş Müteveffâ Rasimʹin muhallefâtı esmânı
Zevcesi Gülbeyaz An-kısmeti 456 guruş
Ümm-ü Fatıma An-kısmeti 608 guruş
Ahi Mehmed An-kısmeti 1294 guruş
Ahi Şükrü An-kısmeti 1294 guruş
Ber-vech-i bâlâ verese-i merkūmûnun hisseleri yedlerine teslîm ve eytâm-ı merkūmûnun hisseleri vâsî-i mezbûrları ammileri Durmuş yedine teslîm olunduğu ber-minvâl-i muharrer vâki‘ olan inhâ üzerine tasdîk olundu.
Fiʹl-yevmiʹl-âşir min-Şa‘bâniʹl-mu‘azzam li-sene selâse ve işrîn ve selâse mi’e ve elf.
Numro: 13
Hamidiye hükûmet konağında mahkeme-i şer‘iyyeye mahsūs odada ma‘kūd-ı meclis-i şer‘-i şerîfde zâtı ta‘rîf-i şer‘î ile mu‘arrefe Demircili Karyesiʹnde sâkin müteveffâ Ahmed Onbaşı bin Osmanʹın zevce-i menkûhası Zeyneb binti Hüseyin nâm hâtun mal müdîri rifʻatlü Besim Efendi tarafından vekâleten mersûl sandık emîni Ali Osman Efendi ibn Hüseyin hâzır olduğu hâlde da‘vâ ve takrîr-i kelâm idüp zevcim jandarma