Sahife No : 61
Hüküm No : 223
Tarihi : H. 1210/M. 1795 Bir sûreti
Hurpişte kazâsı nâibine ve a‘yân ve zâbitân ve vücûh-ı memleket ve iş erlerine: Kazâ-i mezbûrun harb ü darb erbâbından elli nefer asker tahrîr ve başbuğuyla ma‘iyyet- i müşârun-ileyhe irsali içün .
***
Sahife No : 61
Hüküm No : 224
Tarihi : H. 1210/M. 1795 Bir sûreti
Filibe mollasına ve hâcegân-ı Dîvân-ı Hümâyûn'dan Filibe'de tevzî‘ât defterleri nâzırına ve a‘yân ve zâbitân ve vücûh-ı memleket ve iş erlerine: Kazâ-i mezbûrun harb ü darb erbâbından iki yüz nefer asker tahrîr ve başbuğuyla müşârun-ileyh ma‘iyyetine irsali içün . *** Sahife No : 61 Hüküm No : 225 Tarihi : H. 1210/M. 1795 Bir sûreti
Pazarcık kazâsı nâibine ve a‘yân ve zâbitân ve vücûh-ı memleket ve iş erlerine: Kazâ-i mezbûrun harb ü darb erbâbından yüz elli nefer asker tahrîr ve başbuğuyla ma‘iyyet-i müşârun-ileyhe irsali içün .
***
Sahife No : 61
Hüküm No : 226
Tarihi : H. 1210/M. 1795 Bir sûreti
Şehirköy kazâsı nâibine ve a‘yân ve zâbitân ve vücûh-ı memleket ve iş erlerine: Kazâ-i mezbûrun harb ü darb erbâbından yüz nefer asker tahrîr ve başbuğuyla ma‘iyyet- i müşârun-ileyhe irsali içün .
***
Sahife No : 61
Hüküm No : 227
Tarihi : H. 1210/M. 1795 Bir sûreti
Berkofça kazâsı nâibine ve a‘yân ve zâbitân ve vücûh-ı memleket ve iş erlerine: Kazâ-i mezbûrun harb ü darb erbâbından yüz nefer asker tahrîr ve başbuğuyla ma‘iyyet- i müşârun-ileyhe irsali içün .
***
Sahife No : 61
Hüküm No : 228
Tarihi : H. 1210/M. 1795 Bir sûreti
Razlık kazâsı nâibine ve a‘yân ve zâbitân ve vücûh-ı memleket ve iş erlerine: Kazâ-i mezbûrun harb ü darb erbâbından elli nefer asker tahrîr ve başbuğuyla ma‘iyyet- i müşârun-ileyhe irsali içün .
***
Sahife No : 61
Hüküm No : 229
Tarihi : H. 1210/M. 1795 Bir sûreti
İhtiman kazâsı nâibine ve a‘yân ve zâbitân ve vücûh-ı memleket ve iş erlerine: Kazâ-i mezbûrun harb ü darb erbâbından elli nefer asker tahrîr ve başbuğuyla müşârun- ileyh ma‘iyyetine irsali içün .
***
Sahife No : 61
Hüküm No : 230
Tarihi : H. 1210/M. 1795 Bir sûreti
Serfiçe kazâsı nâibine ve a‘yân ve zâbitân ve vücûh-ı memleket ve iş erlerine: Kazâ-i mezbûrun harb ü darb erbâbından elli nefer asker tahrîr ve başbuğuyla ma‘iyyet- i müşârun-ileyhe irsali içün .
***
Sahife No : 61
Hüküm No : 231
Tarihi : H. 1210/M. 1795 Bir sûreti
Preznik kazâsı nâibine vesâire: Kazâ-i mezbûrun erbâb-ı harb ü darbından elli nefer asker tahrîr ve ma‘iyyet-i müşârun-ileyhe irsali içün .
***
Sahife No : 61
Hüküm No : 232
Tarihi : H. 1210/M. 1795 Bir sûreti
İznebol nâibine ve a‘yân vesâire: Kazâ-i mezbûrun erbâb-ı harb ü darbından elli nefer asker tahrîr ve müşârun-ileyh ma‘iyyetine irsali içün .
***
Sahife No : 61
Hüküm No : 233
Tarihi : H. 1210/M. 1795 Bir sûreti
Pirlepe nâibine vesâire: Kazâ-i mezbûrun harb ü darbından elli nefer asker tahrîr ve ma‘iyyet-i müşârun-ileyhe irsali içün .
***
Sahife No : 61
Hüküm No : 234
Tarihi : H. 1210/M. 1795 Bir sûreti
Görice nâibine ve a‘yân vesâire: Kazâ-i mezbûrdan yüz nefer asker tahrîr ve başbuğuyla ma‘iyyet-i müşârun-ileyhe irsali içün .
***
Sahife No : 61
Hüküm No : 235
Tarihi : H. 1210/M. 1795 Bir sûreti
Behişte nâibine ve a‘yân vesâire: Kazâ-i mezbûrdan elli nefer asker tahrîr ve başbuğuyla ma‘iyyet-i müşârun-ileyhe irsali içün .
***
Sahife No : 61
Hüküm No : 236
Tarihi : H. 1210/M. 1795 Bir sûreti
Çırpan nâibine ve a‘yân vesâire: Kazâ-i mezbûrun harb ü darbından elli nefer asker tahrîr ve başbuğuyla ma‘iyyet-i müşârun-ileyhe irsali içün .
***
Sahife No : 61
Hüküm No : 237
Tarihi : H. 1210/M. 1795 Bir sûreti
Zağra-i Atîk kazâsı nâibine vesâire: Kazâ-i mezbûrdan yüz nefer asker tahrîr ve başbuğuyla ma‘iyyet-i müşârun-ileyhe irsali içün .
***
Sahife No : 61
Hüküm No : 238
Tarihi : H. 1210/M. 1795 Bir sûreti
Köstendil mutasarrıfına ve kâdîsına ve a‘yân vesâire: Kazâ-i mezbûrdan yüz nefer asker tahrîr ve başbuğuyla ma‘iyyet-i müşârun-ileyhe irsali içün .
***
Sahife No : 61
Hüküm No : 239
Tarihi : H. 1210/M. 1795 Bir sûreti
Toyran nâibine ve a‘yân vesâire: Kazâ-i mezbûrun harb ü darbından elli nefer asker tahrîr ve başbuğuyla ma‘iyyet-i müşârun-ileyhe irsali içün .
***
Sahife No : 61
Hüküm No : 240
Tarihi : H. 1210/M. 1795 Bir sûreti
Karaferye kazâsı nâibine ve a‘yân vesâire: Kazâ-i mezbûrdan elli nefer asker tahrîr ve başbuğ ile ma‘iyyet-i müşârun-ileyhe irsali içün ber-vech-i meşrûh.
***
Sahife No : 62
Hüküm No : 241
Tarihi : 20 Rebiulahir 1210 [3 Kasım 1795]
Eyâlet-i Rumeli elviyesi alay beylerine hüküm
Siz ki elviye-i mezkûre alay beyleri mûmâ-ileyhimsiz bundan akdem sancaklarınızın eşkinci zu‘amâ ve erbâb-ı timarıyla hâlâ Rumeli vâlîsi olup Vidinli Pâsbânoğlu nâm şakînin ahz ve izâlesine me’mûr olan vezîrim Seyyid Mustafa Paşa iclâluhûnun ma‘iyyetinde isbât-ı vücûd ve emr ü re’yiyle lâzım gelen hıdemâtının te’diyesine ikdâm ve bezl-i mechûd etmek üzere me’mûr ve ta‘yîn kılınmışdınız. El- hâletü hâzihî Vidinli şakî-i mezkûrun kizb ü dürûğuna i‘timâd ve ibrâz-ı vâhî mülâhazâta tebe‘iyyet ile mezkûr Pâsbânoğlu şimdiyedek Devlet-i Aliyyem me’mûrlarına teslîm ve içlerinden tard ve teb‘îd husûsunda izhâr-ı ta‘allül ve tereddüd üzere olduklarından mecmû‘ Devlet-i Aliyyem me’mûrlarına ol taraflarda kışla mahalleri ta‘yîniyle şakî-i mezkûrun kış içinde dahi ele getirilmesi tedâbîrinin icrâsı bu def‘a Rumeli vâlîsi vezîr-i müşârun-ileyh ve Vidin ve Belgrad muhâfızları ve Eflak voyvodası vesâir iktizâ edenlere mahsûs evamir-i şerîfem ısdârıyla gereği gibi tenbîh ü te’kîd ve müceddeden ba‘zı mahallerde dahi meştâ askeri tertîb olunmağla sizin dahi sancaklarınız neferâtıyla kemâ-kân Rumeli vâlîsi vezîr-i müşârun-ileyh ma‘iyyetinde kıyâm ve re’y ü emriyle bu bâbta ta‘yîn istihdâm eylediği hıdemâtın derhâl te’diyesine ez-dil ü cân sarf-ı vüs‘ ü ikdâm eylemeniz husûsuna irâde-i aliyyem ta‘alluk etmeğin meştâya me’mûriyetinizi şâmil hâssaten işbu emr-i âlî-şânım ısdâr ve ( ) ile irsâl olunmuşdur. İmdi keyfiyet-i me’mûriyetiniz ma‘lûmunuz oldukda ber-vech-i meşrûh
amel ü harekete bi'l-ittifâk kemâl-i ikdâm ve dikkat ve fermân-ı hümâyûnuma muhâlif ve müşârun-ileyhin re’y ve rızâsına münâfî hareketi tecvîzden gâyetü'l-gâye tehâşî ve mücânebet eylemeniz bâbında.
Fî evâsıt-ı R. sene [1]210 [3 Kasım 1795] ***
Sahife No : 62
Hüküm No : 242
Tarihi : 20 Rebiulahir 1210 [3 Kasım 1795]
Mîr-i mîrân-ı kirâmımdan Rumeli vâlîsi ma‘iyyetine olup bu def‘a kendiye Çirmen Sancağı tevcîh ve ihsân olunan Mehmed dâme ikbâlühûya hüküm
Sen ki mîr-i mîrân-ı mûmâ-ileyhsin sen mîr-i mîrân-ı kirâmımın yarar ve kâr- güzâr ve dirâyet ve gayret ile şöhret-şi‘ârlarından olup bu ânadek me’mûr ve müstahdem olduğun hıdemât-ı Saltanat-ı Seniyyem'in ber-vefk-i rızâ te’diye ve tesviyesinde ibrâz-ı âsâr-ı sadâkat ve istikâmette mezîd-i i‘tinâ ve dikkat üzere olduğun bedîdâr ve bundan böyle dahi senden rızâ-yı yümn-i iktizâ-yı şâhâneme muvâfık harekât-ı mergûbe zuhûru me’mûl-i zamîr-i ilhâm-semîr-i tâc-dârânem idiği zâhir ve âşikâr olduğuna binâen bu def‘a avâtıf-ı aliyye-i şâhâne ve avârif-i behiyye-i hüsrevânemden şeref-yâfte-i sudûr eden hatt-ı hümâyûn-ı inâyet-makrûnum mûcebince Rumeli vâlîsi ma‘iyyetinde ibrâz-ı hidmet ve gayret eylemen şartıyla Çirmen Sancağı ber-vech-i arpalık sana tevcîh ve ihsân-ı mülûkânem olup sen kemâ-kân vâlî-i müşârun- ileyh ma‘iyyetinde hıdemât-ı lâzımeye kıyâm ve ibrâz-ı âsâr-ı gayret ve sadâkate mezîd- i dikkat ve ikdâm ve livâ-i mezbûru mütesellim ile zabta mübâderet ve ihtimâm ve ahâlî ve sekeneseni vücûh-ı mezâlim ve ta‘addiyâtdan vikâyeye sa‘y-i mâ-lâ-kelâm eylemen fermânım olmağın me’mûriyetini hâvî işbu emr-i şerîfi ısdâr ve tevcîh hükm-i münîfime matviyyen ( ) ile irsâl olunmuşdur. İmdi keyfiyet ma‘lûmun oldukda ber-vech-i meşrûh sen kemâ-kân Rumeli vâlîsi müşârun-ileyh ma‘iyyetinde lâzım gelen hıdemâtın ber- vefk-i rızâ te’diye ve tesviyesinde ibrâz-ı âsâr-ı gayret ve sadâkate sarf-ı vüs‘ ü liyâkat ve livâ-i mezkûru zabt u rabt-ı memleket ve (…) ve himâyet ve sıyânet-i fukâra ve zu‘afâya muktedir muttasıf ve re‘âyâ-perver mütesellim ile zabta mübâderet ve himâyet- i ahâlî ve re‘âyâ husûslarında lâzım gelen vesâyâ ve tenbîhâtı mütesellimine ifâde ve tefhîme müsâra‘at ve bu bâbda senden me’mûl ve muntazır-ı şâhânem olan gayret ve sadâkati izhâra dikkat ve her hâlde tahsîl-i rızâ-yı hümâyûnuma nisâr-ı cehd ü tâkat ve
hilâf-ı me’mûl ednâ mertebe hâlet ve hareket vukû‘undan tehâşî ve mübâ‘adet eylemen bâbında.
Fî evâsıt-ı R. sene [1]210 [3 Kasım 1795] ***
Sahife No : 62
Hüküm No : 243
Tarihi : 20 Rebiulahir 1210 [3 Kasım 1795]
Berkofça taraflarında ( ) nâm mahalde meştâya me’mûr kılınan ( ) zîde mecduhûya hüküm
Vidinli Pâsbânoğlu Osman nâm şakînin ahz ve izâlesi murâd-ı kat‘î-i hüsrevânem olduğundan mevsim-i şitâda dahi me’mûrların ol taraflarda kışlamaları husûsuna ve iktizâ eden mahallerden müceddeden meştâ askeri ihrâcına irâde-i kâtı‘a-i dâverânem ta‘alluk etmiş olmak hasebiyle sen ki mûmâ-ileyhsin sen dahi mikdâr-ı kifâye asâkir ile mahall-i mezkûrun mevsim-i şitâda rûz u şeb gereği gibi muhâfazasına dikkat ve şakî-i mezkûrun def‘-i gâilesi emrine taraf-ı hümâyûnumdan bi'l-istiklâl me’mûr olan hâlâ Rumeli vâlîsi vezîrim Seyyid Mustafa Paşa iclâlühûnun bu bâbda sana vâki‘ olan emir ve tenbîhi muktezâsı üzere harekete bezl-i makderet ve hâlâ Vidin muhâfızı olup Lom kasabasında kışlamağa me’mûr olan vezîrim Osman Paşa iclâlühû vesâir me’mûrlar ile dâimâ muhâbere ve levâzım-ı ittifâk ve ittihâda ri‘âyet ve mikdâr-ı zerre kusûr ve rehâvet vukû‘undan ve Rumeli vâlîsi vezîr-i müşârun-ileyhin re’y ve rızâsına muhâlif hareketden tehâşî ve mücânebet eylemen fermânım olmağın me’mûriyetini hâvî mahsûsan işbu emr-i âlî-şânım ısdâr ve ( ) ile irsâl olunmuşdur. İmdi keyfiyet ma‘lûmun oldukda ber-minvâl-i muharrer amel ü harekete mezîd-i dikkat ve ikdâm ve senden me’mûl olan sadâkat ve gayret levâzımını ibrâza sa‘y-i mâ-lâ-kelâm ve ser-i mû kusûr ve rehâvetden tehâşî ve ittikâ-i tâm eylemen bâbında.
Fî evâsıt-ı R. sene [1]210 [3 Kasım 1795] ***
Sahife No : 63
Hüküm No : 244
Tarihi : 20 Rebiulahir 1210 [3 Kasım 1795] Bir sûreti
Yine Berkofça taraflarında ( ) nâm mahalde meştâya me’mûr kılınan ( ) zîde mecduhûya aslına tatbîk olunarak siyâk-ı meşrûh üzere başka bir kıt‘a.
***
Sahife No : 63
Hüküm No : 245
Tarihi : 20 Rebiulahir 1210 [3 Kasım 1795] Bir sûreti
Kazâlardan müretteb olan meştâ asâkiri vürûduna kadar el-yevm mevcûd olan asâkirden mikdâr-ı kifâye neferât ile Belgradcık palankasına başbuğ ta‘yîn olunan ( ) zîde mecduhûya. Palanka-i mezkûre muhâfazasında leyl ü nehâr kıyâm ve Belgradcık ahâlîsiyle bi'l-ittifâk harekete ikdâm ve Rumeli vâlîsi müşârun-ileyhin emr ü re’y ve tecrübe ve sipârişi muktezâsı üzere icrâ-yı kâr-güzârî ve sadâkate sa‘y-i mâ-lâ-kelâm eylemesi içün.
***
Sahife No : 63
Hüküm No : 246
Tarihi : 20 Rebiulahir 1210 [3 Kasım 1795] Belgrad muhâfızı vezîrim Mustafa Paşa'ya hüküm
Bi'd-def‘a‘ât şeref-yâfte-i sudûr olan evâmir-i şerîfemde iş‘âr ve beyân olunduğu vechile mağdûb-ı pâdişâhânem olan Vidinli Pâsbânoğlu Osman nâm şakînin ahz ve izâlesi murâd-ı kat‘î-i dâverânem olup Vedinli şimdiyedek şakî-i mezkûru Devlet-i Aliyyem me’mûrlarına teslîm ve içlerinden tard ve teb‘îd ile icrâ-yı sadâkete ikdâm eylemeleri iktizâ eder iken mezkûrun kizb ü dürûğuna i‘timâd ibrâz-ı vâhî mülâhazâta tebe‘iyyet ile bu âna dek elevermekde tereddüd ve şakî-i mezkûra mümâşât üzere olduklarından Devlet-i Aliyyem me’mûrlarına ol taraflarda kışla mahalleri ta‘yîn ve iktizâ eden mahallerden meştâ asâkiri tertîbiyle Vidinlinin şakî-i mezkûru tasahhubdan keff-i yed eylemeleri zımnında zahîrelerinin kat‘ı ve Vidin tarafı mevsim-i şitâda dâiren-mâdâr muhâsara şekline konularak şakî-i mezkûru teslîm edinceyedek Vidin'de olanların tazyîkleri husûsuna irâde-i kâtı‘a-i şehriyârânem ta‘alluk etmiş olmağla sen ki Belgrad muhâfızı vezîr-i müşârun-ileyhsin leyl ü nehâr Belgrad ve havâlîsi muhâfazasına ve sevâhil-i Tuna ile Belgrad cânibinden Vidin'e bir habbe zahîre sevk olunmaması emrine tarafından mezîd-i ikdâm ve dikkat ve şakî-i mezkûrun ahz ve izâlesine bi'l-istiklâl me’mûr olan Rumeli vâlîsi vezîrim Seyyid Mustafa Paşa iclâlühû Vidin'in karşısında olan Kalafat'ın vesâir mecmû‘-ı mevâzi‘-i mukteziyenin gereği gibi sedd ü bend ve muhâfazasına dikkat ve kendi dahi Soyfa'da kışlayıp her tarafa ihâle-i
enzâr-ı basîret eylemek üzere bu def‘a me’mûr kılınmış olmağla gerek müşârun-ileyh ve gerek Lom kasabası kendiye meştâ ta‘yîn olunan Vidin muhâfızı vezîrim Osman Paşa iclâlühû vesâir lâzım gelenler ile her bâr kış içinde dahi mükâtebe ve muhâbereden hâlî olmayarak ve Belgrad tarafında olan kâffe-i ma‘âbir ve mesâliki sedd ü bend ve muhâfazaya dikkat eyleyerek şakî-i mezbûrun def‘-i gâilesini mûcib olur esbâb ve hâlâtın istikmâline ve senden me’mûl ve muntazır-ı mülûkânem olan etvâr-ı gayûrâne ve reftâr-ı sâdıkâneyi bu bâbda dahi ibrâz ve izhâr ile meşkûru's-mesâ‘î olmağa dâmen- dermiyân-ı gayret ve lâzımü'l-inhâ ahvâl ve keyfiyâtı peyderpey Der‘aliyyem'e tahrîr ve işâret eylemen bâbında.
Fî evâsıt-ı R. sene [1]210 [3 Kasım 1795] ***
Sahife No : 63
Hüküm No : 247
Tarihi : 20 Rebiulahir 1210 [3 Kasım 1795] Bir sûreti
Dergâh-ı Âlî kapıcıbaşılarından Üsküb Nâzırı Hüseyin dâme mecduhûya: Fîmâ ba‘d ilerilere asker geçmemek üzere yolların gereği gibi sedd ü bendi vesâir mevâzi‘-i mukteziyyenin hıfz u hırâset ve muhâfazaları için aslında münderic emr-i şerîf iktizâsına göre hikâye olunarak.
***
Sahife No : 63
Hüküm No : 248
Tarihi : 20 Rebiulahir 1210 [3 Kasım 1795] Bir sûreti
Eflâk Voyvodası Aleksandır Voyvoda'ya: Belgrad muhâfızı müşâr ve Üsküb nâzırı kapıcıbaşı-i mûmâ-ileyhimâya bâlâda münderic olduğu vechile bâ-evâmir-i aliyye tenbîh ü te’kîd olunduğu hikâye olunarak Rumeli vâlîsi müşârun-ileyh ile bi'l-muhâbere Kalafat tarafının beşli neferâtın teksîri ve vücûh-ı sâire ile gereği gibi takviyeti husûsuna vesâir ma‘âbir ve mesâlikin kış içinde etrafıyla sedd ü bend ve muhâfazası emrine bezl-i makderet ve ser-i mû kusûr u rehâvet vukû‘unu tecvîz ile mübtelâ-yı eşedd-i ikâb-ı pâdişâhânem olmakdan tevakkî ve mübâ‘adet eylemesi içün.
***
Sahife No : 64
Hüküm No : 249
Tarihi : 10 Cemaziyelevvel 1209 [3 Aralık 1794]
[Yan yazılan yazı]
[Şerh]: Ber-mûceb-i emr-i âlî ber-vech-i suhûlet i‘dâmı mümkün olamayıp şakî-i merkûm bu esnâda Siroz'dan katı vâfir eşhâs ile bağteten Selanik'e duhûl ve hânesine nüzûl ve izâlesine her ne kadar tedbîrü'l-uhrâ(?) üzere bir vechile kârgîr olunamayıp mukâbeleye ictirâ etmekden nâşî müşârun-ileyh neferât-ı vefîre ile tüfenkçibaşı ve delîlbaşı ta‘yîn ve yeniçeri ağası ocaklı ile merkûmun etrafını sedd ü bend ve kal‘adan bir kıt‘a top ihrâc ve iki gün iki gece muhârebe olunduğundan etrafında vâki‘ menâzili ihrâk ve hasâret-i azîme edeceği melhûz ve Selanik haşerâtından çoğu şakî-i merkûma tebe‘iyyet etdiklerinden ahâlîye dehşet-târî ve cümlenin hâb ü râhatları meslûb olduğuna binâen ahâlî şakî-i mezkûrun taşra hurûcunu istid‘â eylediklerinden bu makûle derûn-ı şehirde muhârebe-i azîme mûcib-i şenâ‘at olacağı lede'l-müşâhede tekrar müşârun-ileyhden muhârebenin def‘i ve şakî-i mezkûrun taşra ihrâcına ruhsat talebleriyle cümle ahâlînin tekeffüllerine binâen merkûm taşra hurûc ve Siroz tarafına firâr birle kat‘-ı şemâtet olunduğunu mübeyyin müşârun-ileyhin vârid olan kâime ve mektûbu ve şakî-i merkûmun tahassun eylediği menzili kal‘a misâli olup suhûlet ile zafer mümkün olamayıp muhârebe mütemâdî ve fukarâ pâzede-i hasâr olacağı âşikâr olduğundan nâşî şakî-i mezkûrun taşra ihrâcına ruhsat birle belde-i mezbûreden def‘-i şemâtet olunduğunu şâmil Selanik kâdîsının i‘lâm ve ahâlîsinin mahzarları mefâhimi bâ-fermân-ı âlî şerh verildi.
Fî 22 R. sene [1]210 [5 Kasım 1795]
[Şerh]: İki yüz nefer ile Hakkı Paşa ma‘iyyetine gelmek şartıyla afv için emir yazılmışdır.
Fî evâil-i L. sene [1]210 [18 Nisan 1796]
[Şerh]: Battâlı R sene [1]210 tobrasında mahfûzdur. Hâlâ Selanik Sancağı mutasarıfı vezîrim Ferhad Paşa'ya
Humbaracı ze‘âmetine mutasarrıf olup hâlâ Selanik'de ikâmet üzre olan Ali Ruşen oğlu Abdurrahman nâm müfsid kendi hâlinde olmadığı ve dâimâ îkâz-ı fitne ve fesâd ve ızrâr-ı ibâd ile me’lûf şekâvet-kârândan olduğu tahkîk-gerde-i şehriyârânem olup bu makûle muzırr-ı ibâd ve sâ‘î fi'l-arz bi'l-fesâd olan habâset-pîşelerin ibreten
li's-sâirîn haklarında lâzım gelen mücâzâtın icrâsıyla tathîr-i bilâd ve irâha-i ibâda ikdâm ehem-i mehâmm-ı lâzımü'l-ihtimâmdan olmakdan nâşî sen ki vezîr-i müşârun- ileyhsin vusûl-i emr-i şerîfimde merkûmun tarafına bir fûne ser-rişte verilmeyerek ve firârını mûcib olur sû’-i tedbîr vukû‘a gelmeyerek alâ eyyi halin ahz ve cezâ-yı mâ- yelîkını icrâya ikdâm eylemen fermânım olmağın mahfiyyet ve mektûmen işbu emr-i şerîfim ısdâr ve memhûren ve mestûren ( ) ile irsâl olunmuşdur. İmdi keyfiyet ma‘lûm-ı dirâyet-meczûmun oldukda ber-vech-i meşrûh şakî-i mezkûr tarafına ser-rişteyi mûcib ve firâra ruhsat-yâb olmasını müstevceb hâlât hudûsünden mübâ‘adet olunarak bi eyyi hâlin ahz ve müstahıkk olduğu mücâzâtı derhâl icrâ ve keyfiyeti Der‘aliyyem'e tahrîr ve inhâya müsâra‘at ve tenfîz-i emr-i irâde-i şâhâneme ikdâm ve dikkat ve mikdâr-ı zerre kusûr ve rehâvetden ve bu vesîle ile vedî‘a-i Cenâb-ı Rabb-i İzzet olan fukarâ-yı ra‘iyyetin pâzede-i huyûl-i hasâr olmalarını tecvîz ile mahzar-ı itâb-ı pâdişâhânem olmakdan gâyetü'l-gâye tehâşî ve mücânebet eylemen bâbında.
Fî evâil-i Ca. sene [1]209 [3 Aralık 1794]
***
Sahife No : 64
Hüküm No : 250
Tarihi : 10 Cemaziyelevvel 1210 [22 Kasım 1795] Silistre Vâlîsi Vezîr Seyyid el-Hâc Abdi Paşa'ya hüküm
Sen ki vezîr-i müşârun-ileyhsin bu def‘a tarafından der-bâr-ı şevket-karârıma vârid olan tahrîrâtın ve Şumnu kâdîsının i‘lâmı mefhûmlarında bundan akdem cezâsı tertîb olunan Silahdâr Osman Haseki'nin avanesinden olup Aydos kazâsına tâbi‘ vakıf karyelerinden Kiremidlik nâm karye sâkinlerinden zümre-i eşkıyâdan Odacıoğlu Seyfullah ve avanesinden maktûl-i mezkûrun bölükbaşısı Asarlı(?) Boşnakoğlu nâm şakî vakf-ı mezkûr kurâsının ehl-i ırz makûlelerine îsâl-i dest-i ta‘addîye ibtidâr ve dağlı eşkıyâsından Kara Feyyâz ve Arabacıoğlu demekle ma‘rûf şakîler ile müttefikan Şumnu kazâsı hem-civâr olduğundan başlarında olan eşkıyâyı kazâ-i mezkûr ve etrafında vâki‘ kazâ ve kurâ ahâlîleri üzerlerine taslît birle gasb-ı emvâl ve hetk-i a‘râz ve ihrâk-ı büyût misillü hilâf-ı şer‘-i şerîf ve mugâyir-i rızâ-yı münîf nice gûne harekâta ictisâr etmekde oldukları ve ahz-ı intikâm sevdâsıyla kazâ-i mezkûr kurâsını tahrîb etmeğe sâ‘î ve gün be-gün şekâvetleri müzdâd olmakda idiği ve ahâlî fukarâsının âciz ve dermânde oldukları beyânıyla şakî-i mezkûr ve avanesinin lâzım gelen te’dîbleri icrâsıyla irâha-i ibâd ve âsâyiş ve te’mîn-i bilâd husûsu matlûb-ı şâhânem olmağla sen ki vezîr-i
müşârun-ileyhsin merkûmlar dahi şer‘an müstahıkk-ı te’dîb iseler ahz ve lâzım gelen te’dîbâtları icrâsına ikdâm ve müsâra‘at eylemen fermânım olmağın işbu emr-i şerîfim ısdâr ve ( ) ile irsâl olunmuşdur. İmdi vedî‘atullâh olan ahâlî fukarâsına bu derecelerde zulm ü ta‘addîye ictisârları tahakkuk eden eşkiyânın beher hâl te’dîbât-ı meşrû‘ları îfâsıyla şerr ü şekâvetlerinin fukarâ üzerlerinden men‘ u def‘i ve tathîr-i bilâd ve te’mîn- i irâha-i ibâdı mûcib olur hâlâtın istihsâli ehass-ı metâlib-i dâverânem olduğu ve bu vesîle ile sekene-i vilâyete ve bî-cürm makûlesi zu‘afâya mikdâr-ı zerre ta‘addî vukû‘na bir vechile rızâ-yı hümâyûnum olmadığı ma‘lûmun oldukda ber-vech-i meşrûh amel ü harekete ihtimâm ve dikkat ve âsâyiş-i hâl-i fukarâyı mûcib olur hâlâtın istihsâline bezl- i mâ-hasal vüs‘ ü liyâkat ve zinhâr ve zinhâr hilâf-ı şer‘-i şerîf ve menâfî-i emr ü tenbîhât-ı pâdişâhânem ser-i mû vaz‘ u hâlet vukû‘unu tecvîz ile mazhar-ı ikâb olmakdan gâyetü'l-gâye tehâşî ve mücânebet eylemen bâbında.
Fî evâil-i Ca. sene [1]210 [22 Kasım 1795] ***
Sahife No : 65
Hüküm No : 251
Tarihi : 10 Cemaziyelahir 1210 [22 Aralık 1795]
[Şerh]: Paşa-yı mûmâ-ileyh Limni'den fekk-i râbıta-i karâr birle Cemâziye'l- âhir'in yirmi birinci günü Tekfurdağı'na vâsıl olduğunu mübeyyin paşa-yı mûmâ-ileyhin vârid olan kâimesinin mefhûmu bâ-fermân-ı âlî şerh verildi.
Fî 29 C. sene [1]210
Mukaddemâ vezâreti ref‘ile Gelibolu'da ikâmet üzere iken bundan akdem Limni Cezîresi'nde ikâmete me’mûr olup bu def‘a cezîre-i mezkûreden ıtlâk ile Tekfurdağı'na