• Sonuç bulunamadı

287 NUMARALI ŞER’İYYE SİCİLİNİN TRANSKRİPSİYONU 1 Sayfa / 1 Belge

4. Sayfa / 13.a Belge

Mübayâca bakayası içün sâdır olan emr-i calişân

Düstûr-ı mufahham nizâmü’l-calem müdirü’l-umuru’l-cumhur bi’l-fikrü’s-sâkıb müttemim mehâmü’l-enâm bi’rre’yi’s-sa’ib mümeyyid-i devlet ve’l-ikbâl müşîeyid erkânü’s-sacadet ve’l-iclâl el-mahfuf-u bisûrûful avatıfil melikü’l-acla hala Adana vâlisi vezirim Seyyid el-hac Hüseyin paşa edamallahi tecala iclâlehu ve mefahirü’l-kuzât ve’l-

mekârim mecadini’l-fazl ve’l-kelâm Adana ve Tarsus Sancaklarında vakic kazaların

kadılar ve nâcibleri zîde fazlihûm ve mefahirü’l-emâsil ve’l-akrân ve vücûh-ı memleket ve işerleri zîde kadrehûm tevfic refci hümâyun vâsıl olacak maclum olaki sen ki vezir-i müşârün-ileyhsin senin tarafından vârüd olân tahrîrât mefhumunda asitane-i sacâdetim lazimesi içün iki yüz otuz üç senesine mahsuben Adana ve Tarsus sancakları kazalarından kapucu başı müteveffa cÖmer macrifetiyle mübâyacası müretteb olan maclumü’l-mikdâr rayic hıntasından gayr-ı ez-i cavf ve irsâl kusur kalan hınta bedele

katc olunub icâb iden bedeliyesinden râyic-i fisi bacde’l-mahsûb kusur lazım gelen kırk bir bin sekiz yüz seksan üç buçuk guruşun yerlü yerinden ve icâb ve iktiza idenlerden tamamen tahsîl ve dergâh-ı mucalam gedüklülerinden kabzına me’mur Mustafa Beğe eda ve teslîm olunmak bâbında isdâr ve tesyâr olunân emr-i şerîfimin vusulünden bahsle livaim mezburteyn kazalarından müretteb olub edasına tacahhüd olunan hıntadan Tarsus Sancağı kazaları hissesi olân on üç bin kile hıntadan üç bin iki yüz altmış altı kilesi ve Adana Sancağı hassası olan on beş bin keyl hıntadan dört bin kilesi müteveffayı muma- ileyhime eda ve teslîm olunub küsûr Tarsus Sancağı kazalarında ğayri-ez teslîm bakaya kalan dokuz bin guruş yedi yüz otuz dört kile hıntanın beher kile ikişer guruşdan lazım gelen on dokuz bin dört yüz altmış sekiz guruşu tamamen ve Adana sancağı kazaları hissesi olan hıntadan gayrı-ez teslîm kusur kalan on bir bin kile hıntanın icâb iden yiğirmi iki bin guruş bedeliyesinden on dört bin guruşu Adana valisi sâbık Celâl Pâşâ edâmallahi tecala iclâlehu macrifetiyle tahsîl ve gedüklüleri muma-ileyhe eda ve teslîm ve yedinden makbuz senedi ahz olunmuş ve sâlifü’z-zikr Tarsus Sancağı kazalarından müteveffa-yı muma ileyhe teslîm olunan üç bin iki yüz altmış altı kile hıntanın raci maktüesiyle icâb iden on bir bin dört yüz otuz bir guruş bahasından müteveffa-yı muma-ileyh ashâb-ı zahireye fakat üç bin beş yüz guruş virüb kusur yedi bin dokuz yüz otuz bir guruşu ve Adana Sancağı kazalarından müteveffa-yı muma-ileyhe teslîm olunmuş olan dört bin keyl hıntanın lazım gelen on dört bin guruş bahasından altı bin guruşu virib macada sekiz bin guruşu müteveffa-yı muma-ileyh zimmetinde matlubları kalmış olduğu beyân birle sâlifü’l-beyân Adana Sancağı kazalarının bedeliyesi olan meblâ-ı mezbur yiğirmi iki bin guruş hınta bahasından ğayrâz tahsîl müteveffa-yı muma-ileyh zimmetinde matlûbları sekiz bir guruşu ve Tarsus Sancağı kazaları ahalisinin hınta bahasından ğayri-ez teslîm küsurû muma-ileyh zimmetinde matlubları olan yedi bin dokuz yüz otuz bir guruşun otuz dört senesi bedeliyesine mahsûb olunması niyâzında olduklarını sen iki kıtca kâ’imende ve Adana ve Tarsus kadıları iclâmlarında tahrîr ve inha eylediğiniz ecilden emr-i şerîfi mezkur kaydı ve gelen poliçenin teslîmi keyfiyetini bacde’l-ihrac iktizası ricâl-ı devlet-i caliyyemden halâ zahire nazırı iftiharü’l-emâcid ve’l-ekârim mîr-i cali dâme mecdehudan isticlâm

olundukda mübayacacı muma-ileyhin me’muriyetinde makbuzâtı olân mebâliğden ve

tahsîl eylediği zehâyirden zimmeti zuhûr ider ise edasına sarraf ta’ifesinden Tanğir oğlu Agob bezirgan ba-temessük tacahhüd itmiş olmağla ber mantuk-ı der-kenâr mübâyacacı

müteveffa-yı muma-ileyhe virmek üzere sarraf-ı mersûm zahire hazinesinden cale’l- hesâb virilen mebaliğden ğayrı-ez mahsûb zimmeti olân altı bin beş yüz doksan beş guruş ve sâlifü’z-zikr Adana sancağı virdikleri hınta bahasından ğayrâz makbuz sekiz bin guruş ve Tarsus Sancağı ahalilerinin yedi bin dokuz yüz otuz bir guruş ki cemcan yiğirmi iki bin beş yüz yiğirmi altı guruşun muktezayı tacahhüdü üzere sarraf-ı mersumdan zimmet pusulası tahrîriyle bacde’t-tahsîl sekiz bin guruşun otuz üç senesine ve yedi bin dokuz yüz otuz bir guruşun otuz dört senesine mahsûbi ve dört yüz on beş guruşun Adana ahalisinden tahsîl olunmak üzere emr-i şerîfim tasdîri husûsunu memhûr iclâm itmekden naşi bu muceb iclâm mübayacacı muma-ileyhin zimmeti olan meblağ-ı

mezbur yiğirmi iki bin beş yüz yiğirmi altı guruşun zahire hazinesi tarafından zimmet pusulası tahrîriyle sarraf-ı mersûmdan bacde’t-tahsîl sekiz bir guruşu otuz üç senesi ve yedi bin dokuz yüz otuz bir guruşu otuz dört senelerine mahsûb olunarak macada dört yüz on guruşun ahali-i merkumdan tahsîli içün emr-i şerîfim tahrîr ve tasdîri ber-mantuk rey-e calişânım idüğü ba-takrîr lede’l-arz mucebince tanzîm edâ-yı tasdîrine irâde-i seniyyem tacalluk itmekle mucebince camel ve hareket olunmak fermânım olmağın hasseten işbu emr-i calişanım isdârıyla irsâl olunmuşdur imdi vusulünde işbu emr-i şerifim maclûmun oldukda ber-vech-i muharrer ğayrı-ez mahsûbani padişahani merkûmenin zimmetleri olan dört yüz on beş guruşu macrifet-i şerci ve inzimâm rey-ı macrifetiyle tahsîl ve der-sacadetime irsâl ve zahire-i hazine teslîme sarf-ı miknet eyleyesiz şöyle bilesiz calâmet-i şerîfe ictimâd kılasız tahrîr el-yevmü’l-rabi aşer min şehr-i saferü’l-hayr sene sitte ve selasin ve mi’eteyn ve elf (1236)

Benzer Belgeler