adet Saray kethüdâsına boğça 1 adet Başkapı gulâmına boğça 1 adet İkinci başkapı gulâmına boğça 1 adet Zülüflüler kethüdâsına

boğça 1 adet.

Üslûb-ı mezkûr üzre rikâb-ı hümâyûna arz ve makbûl-i tab‘-ı pâdişâhî oldukda bi’l-cümle erbâb-ı alay vaz olunan hayme-gâha inip sağdıç paşa ve Musâhib Paşa tevâbii dahi vaz olunan nişîmenler üzerine gelip kahve ve şerbetler ve gül-âb ve buhûrlar verilip ikrâmlar olunduğundan gayri taraf-ı şehriyârîden sağdıç paşaya semmûr kaplı hil‘at-ı fâhire ve beraber gelen dâmad paşa kethüdâsına ve kâtiblerine ve emîn-i sûra vesâ’ir hademe-i sûr-ı

arûsa hila‘-ı fâhire ihsân olundu. Vesâir alay olan yeniçeri ağası ve kapıcı- başılara ve dîvân hocalarına dahi hayme-gâhda kahve ve şerbetler verilip, bunlardan mâadâ çavuşân ve müteferrikagân atlarından inmeyip etrafta durarak nişân-ı hümâyûn makremesi ihrâcına muntazır oldular. O esnâda Enderûn-ı Hümâyûn’dan dârussaâde ağası yediyle altın tepsi içinde inci işlenmiş nişan makremesi çıkıp sağdıç paşa hazretlerine teslîm olundukda onlar dahi sûr emîni Mehmed Efendi’ye verip el üstünde tutarak alay ile vezîr-i müşârun-ileyh Dâmad paşa hazretlerine envâ‘-ı i‘zâz ve ikrâmlar ile teslîm ve paşâ-yı mükerrem hazretleri dahi kemâl-i şevk ve sürûr ile kabz u kabûl buyurdular.

O Gün Sağdıç Paşaya ve Ashâb-ı Alaya Verilen Birinci Ziyâfettir

Taâm sofra 5 adet, şerbet 150 vukıyye, kahve 20 vukıyye. Kahve ve şerbetler verildikten sonra defterdâr paşa ve sağdıç Ahmed Paşa hazerâtına birer mükemmel at verilip, sâ’irlerine azîm iltifât ve ihsân ü ikrâm eyledi- ler. Bundan sonra sarây-ı hümâyûna nişân esvâbıyla gelen sandık şekerleri ve hayvânât sûretlerinde olan şeker işleri bazı a‘yân ve eşrâfa teberrüken ihsân olunmak kânûn-ı kadîm olmağın [o gün ber-vech-i tebrîk bazı a‘yân ve eşrâfa ve selâtîn-i hânumâna irsâl olunan şeker işleridir. Ser-cümle Sarây-ı Atîk teber-dârları yollarınca mevcûd bulunanlara getirdikleridir: Güherhân Sultân’a şeker sandık 1 adet, sûret 1 adet. Bîcan Sultân’a şeker sandık 1 adet, sûret 1 adet. Rukiyye Sultân’a şeker sandık 1 adet. Ayşe Haseki Sultân’a şeker sandık 1 adet. Kalender Haseki Sultân’a şeker sandık 1 adet. Dördüncü sultâna sandık 1 adet. Haseki Sultân’a sandık 1 adet. Sekizinci sultâna sandık 1 adet. Rukiyye Hanım’a sandık 1 adet. Rukiyye Sultân kızı hanıma sandık 1 adet. Hanzâde Sultân’a sandık 1 adet. Haseki Müfrez Sultân’a sandık 1 adet. Sultân Süleyman vâlidesine sandık 1 adet. Sadrazam vâlidesine sandık 1 adet. Hâce Kadın’a sandık 1 adet. Vâlide sultân kethüdâsı yoldaşına sandık 1 adet. Haseki Sultân kethüdâsı yoldaşı- na sandık 1 adet. Vânî Efendi yoldaşına sandık 1 adet. Harem-i hümâyûna tevzî‘ olunan sandık 18 adet. Dârussaâde [s.255] ağalarına sandık 2 adet. Hazînedâr Ali Ağa’ya sandık 2 adet. Başkapı oğlanına sandık 2 adet. Vâlide sultân ağasına sandık 1 adet. Haseki Sultân ağasına sandık 1 adet. Ağa odalılarına sandık 1 adet. Şehremîni efendiye sandık 1 adet. Vezîriazam kethüdâsına sandık 1 adet. Baltacılar odasına sandık 1 adet. Teber-dârân kethüdâsına sandık 1 adet. Cerrâhbaşıya sandık 1 adet. Ağa kâtibine san-

dık 1 adet. Mîrahûr ağaya sandık 1 adet. Kapıcılar kethüdâsına sandık 1 adet. Bostancıbaşıya sandık 1 adet. Haseki ağaya sandık 1 adet.

Vezîr-i Mükerrem Dâmad Paşa Hazretlerinin On Sekiz Gün Ashâb-ı Devlete Ettiği Ziyâfet Tertîbi Ve Sûr-i Arûs Ahvâli Beyânındadır

Mâh-ı Rebiulevvelin yirmi dokuzuncu günü ki Cumartesidir, ser- cümle sûr-ı hitân-ı hümâyûnda mevcut olan kullar ve hayâl-bâzân ve kuklacıyân ve bi’l-cümle Musâhib Mustafa Paşa hazretlerinin sarây-ı dil- güşâlarında [akdemce Sarây-ı Atîk, badehû Hadîce Sultân Sarayı, el-yevm Mekteb-i İdâdî-i Askerî olan mahalde] vech-i mezkûr üzre taraf-ı mey- danda vaz‘-ı alâyim-i sûr-ı arûsa mübâşeret ve vüzerâ ve vükelâ ve erkân-ı devlet ziyâfete azîmet buyurdular. Bu gün Sadrazam Ahmed Paşa hazret- leri ile vüzerâ-yı izâm ve tevâbi‘ ve levâhıkı davet-ı ziyâfet olunup, kahve ve şerbetler ve buhûr ve gül-âb ve anber-i sârâ verilip taâm geldikde cümle mürettebâtı sîm ve mutallâ sahanlar ile gelip vaz‘-ı makâm olundu. Taâm-ı sofra 20 adet, simât-ı sahan 800 adet, şerbet 100 vukıyye, kahve 30 vukıyye. Taâm tamâmında yine kahve ve şerbetler verilip bu vechile encâm buldu.

Ziyâfet-i yevm-i sânî: Rebiulevvelin selhi ki yevm-i Ehaddır,

şeyhulislâm ve sadreyn efendiler ve müderrisîn ve mevâlî-i izâm davet-i ziyâfet olunup geldiklerinde kemâl mertebe ikrâm olundular. Taâm-ı sof- ra 20 adet, şerbet 150 vukıyye, simât-ı sahan 900 adet, kahve 30 vukıyye.

Ziyâfet-i yevm-i sâlis: Rebiulâhirin gurresi ki yevmü’l-isneyndir.

Meşâyih-i izâm ve e’imme ve hutebâ davet-ı ziyâfet olunup taâm-ı sofra 20 adet, simât-ı sahan 900 adet.

Ziyâfet-i yevm-i râbi‘: Rebiulâhirin ikinci günü ki yevm-i Selâsedir,

sipâh ve silâhdâr ağaları ve bi’l-cümle ocak ağaları ve ocak halkı davet olundu. Taâm-ı sofra 25 adet, simât-ı sahan 1200 adet, kahve 40 vukıyye, şerbet 200 vukıyye.

Ziyâfet-i yevm-i hâmis: Rebiulâhirin üçüncü günü ki yevm-i

Erbaâdır, yeniçeri ağası ve kul kethüdâsı ve ocak halkı davet olundu. Taâm-ı sofra 30 adet, simât-ı sahan 1500 adet, şerbet 300 vukıyye, kah- ve 40 vukıyye. Yevm-i mezbûrda mukaddemâ Hadîce Sultân hazretlerine ihsân olunan cihâz Hâs Oda’ya nakl olunup, taşradan bazı umûr-dîde ve sarây-ı hümâyûn emek-dârlarından kâr-âzmûde ustalar harem-i hümâyûna davet ve cihâz-ı arûsu yerli yerine tertîb eylediklerinde mu‘tâd-ı kadîm üzre vezîria‘zam ve vüzerâ ve yeniçeri ağası ve şeyhulislâm ve sadreyn efendiler

cihâz esvâbını seyre gelip tehî-dest gelmemek için dest-âvîz getirdiler. Bu günün davet-i ziyâfeti Râşid Târihi’nde ber-vech-i âtîdir:

Şöyle ki yevm-i mezbûrda vüzerâ-yı izâm ve ulemâ-yı a‘lâm ve yeniçeri ağası ve bölük ağaları izn-i hümâyûn ile Hâs Oda’da müretteb olan cihâz-ı hazret-i sultân-ı ismet-ünvânı temâşâ eylediler. Bu cihâz-ı zînet-tırâzda mevcûd ve manzûr olan envâ‘-i cevâhir-i gâliyetü’l-esmân ve huliyy-i girân- bahâ-yı şevket-nişân ne meşhûd-ı âdemiyân ve ne mesmû‘-ı âlemiyân ol- muş idi. Kıymetine hazâ’in-i mülûk-i âlem vefâ etmek değil bunda olan cevâhir-i şâhânenin mislini mâl ile tedârik muhâl olduğu bedîhî ve âşikârdır. Zikr olunan huzzâr gereği gibi temâşâsıyla rûşenâ-bahş-ı enzâr olduklarından sonra dâmâd-ı bülend-isti‘dâd hazretlerinin nâil olduğu devlete tarîk-ı reşkden sarf-ı efkâr ederek nazar der-kafa ile yerlerine ric‘at eylediler. Kaymakam Mustafa Paşa hazretlerine dahi küçük sultân haz- retleri akd ve tezvîc olunmak üzre va‘d-i hümâyûn-ı mülûkâne sudûr edip dûş-ı ibtihâcına hil‘at-ı dâmâdî ilbâs buyuruldu. Râşid Târihi’nin makâlesi burada tamâm oldu.

Ziyâfet-i yevm-i sâdis: Rebiulâhirin dördüncü günü ki yevmü’l-

Hamîsdir, dergâh-ı âlî kapıcıbaşıları ve müteferrika-gân ve çâşnî-gîrân davet olundu.

[s.256] Taâm-ı sofra 20 adet simât-ı sahan 800 adet, şerbet 200 vukıy-

ye, kahve 30 vukıyye. Bu gün dahi cihâze-i sultân ve hanımlar davet olunup seyr eyledikten sonra Hatice Sultân hazretlerine tayin buyurulan ağayân ve baltacıyân, mukaddem Paşa Sarayı’na varıp, bazı levâzımât görmek üzre emr olunmagın, baş tayin olunan Abdurrahman Ağa’ya cihâz ile gitmeye sâlih olmayan altın ve gümüş ve bakır evânîleri defter ile teslîm ve tayin olunan kırk nefer teber-dârâna birer donluk çuka ihsân olunup, o gün dâmad sarayında olan mekânlarına gittiler.

Ağalara ve Teber-dârlara Dâmadpaşa Hazretleri Tarafından Verilen Döşeme Vesâir Levâzımâtın Defteridir

Baş ağa oda döşemesi mükemmel 1 adet, sahan sofra mükemmel 1 adet, kebîr nühâs sini 2 adet, kahve ibriği kebîr ve sağîr 2 adet, abdest ib- riği kebîr 1 adet, leğen ma‘a ibrik-i dest 2 adet, ocak güğümü kebîr 1 adet, güğüm 1 adet, abdesthâne ibriği 1 adet, peşgîr mükemmel 1 adet, kaşık deste 2 adet, hoşaf kaşığı deste 2 adet, köşeli sofra 1 adet, hoşaf tası ma‘a tepsi 1 adet.

Başkapı oğlanına oda döşemesi mükemmel 1 adet, sahan sofra mü- kemmel 1 adet, sini nühâs orta, kahve ibriği, leğen ma‘a ibrik, güğüm, çeş- me ibriği, maşraba 1 adet.

Yayla başkapı oğlanına oda döşemesi, sahan, sofra mükemmel sini nühâs orta, kahve ibriği, leğen ma‘a ibrik, güğüm, çeşme ibriği, maşraba.

Nefer ağalara sahan, iki sini nühâs kebîr 2 adet, leğen ma‘a ibrik 2 adet, hoşaf tası 2 adet, peşgîr 2 adet, çeşme ibriği 4 adet, güğüm 2 adet, maşraba 2 adet, hoşaf kaşığı deste 2 adet.

Baltacılar kethüdâsına oda döşemesi sahan sofra 1 adet, sini nühâs kebîr 1 adet, abdest ibriği 1 adet, leğen ma‘a ibrîk-i dest 1 adet, kahve ib- riği kebîr sağîr 1 adet, çeşme ibriği, ocak güğümü, maşraba hoşaf tası 1 adet, peşgîr 2 adet, kösele sofra 1 adet, kaşık-ı hoşaf deste 2 adet, kaşık deste 2 adet.

Baltacılar neferâtının odası mühimmâtına: Kaliçe vefâ ettiği mik-

tar, sahan ve sofra mükemmel 1 adet, sini nühâs kebîr 2 adet, maşraba 4 adet, güğüm-i kebîr 2 adet, ocak güğümü kebîr 2 adet, hoşaf tası 2 adet, çeşme ibriği 5 adet, peşgîr-i tire 2 adet, çamaşır leğeni kebîr 1 adet, hoşaf kaşığı deste 4 adet.

Ziyâfet-i Yevm-i Sâbi‘: Rebiulâhirin beşinci günü ki yevmü’l-

Cumadır. İzzetli mîrahûr-ı evvel ve sânî ve izzetli kapıcılar kethüdâsı ve bos- tancıbaşı ağalar davet-i ziyâfet olunup geldiklerinde kemâl mertebe ikrâm olundular. Taâm-ı sofra 22 adet, simât-ı sahan 500 adet, kahve 20 kıyye, şer- bet 50 kıyye.

Ziyâfet-i Yevm-i Sâmin: Bu gün saâdetlü Hatice Sultân hazretleri-

ne akd-i nikâh olunup ve cihâz-ı sultânî alay ile Musâhib Paşa Sarayı’na nakl olunduğudur. Mâh-ı mezbûr Rebîu’l-âhirin altıncı günü ki yevmü’s- Sebttir, ol gün Hatice Sultân hazretlerini musâhib ve musâhir Mustafa Paşa hazretlerine akd-i nikâh ve cihâz-ı sultânî paşâ-yı müşârun-ileyh hazretleri sarây-ı dil-güşâlarına kaldırılmak münâsib görülüp, sadrazam ve şeyhulislâm hazerâtı ve sadreyn efendiler ve umûmen ocak halkı vesâir erbâb-ı sarây alay ile sarây-ı hümâyûna gelip bâlâda nişân günü zikr olun- duğu üzre vaz olunan hayme-gâhda kapıcıbaşılara ve müteferrika-gân ve çavuşâna kahve ve şerbetler verilip misâfir odası münâsip esvaplar ile döşenip akdhâne olmaya sezâ görülmekle vüzera ve şeyhulislam ve sad- reyn efendiler ve ser-sübha-i meşâyih-i izâm Vânî Mehmet Efendi oda-i

mezbûra teşrîf buyurup kahve ve şerbetler verildikten sonra vüzerâ mah- zarında akd-i nikâha mübâşeret olunup, mukaddemâ Dâmad paşa haz- retleri tarafından sağdıç tayin olunan paşa ve Hatice Sultân tarafından tayin olunan dârussaâde ağası Yusuf Ağa hazretleri vekîl nasb olunma- larıyla vekâletlerinin sıdkına beyyine talep olunduğunda, dârussaâde hazretlerinin vâlide sultân ağası Süleyman Ağa ve başkapı oğlanı Süley- man Ağa şehâdet edip ve sağdıç paşa hazretlerinin sıdkına reîs efendi edâ-yı merâsim-i şehâdet eylediklerinde şehâdetleri makbûl olup fazîletli şeyhulislâm sellemehü’s-sselâm Ali Efendi hazretleri bir sâat-i mübârekede akd-i nikâh edip tamâmında fazîletli Vânî Efendi [s.257] hazretleri duâ ve senâ eylediler.

Dâmad paşa hazretleri bu haber-i meserret-esere dîde-güşâ-yı taras- sud olup müjde olunmak resm-i kadîm olmakla dârussaâde ağası hazretle- ri kahvecibaşısı ağa-yı müşârun-ileyh tarafından müjde-resân olup hil‘at-i fâhire ve atiyye ile behre-yâb olundu.

O gün cemî-i vüzerâ ve erkân-ı devlet ve erbâb-ı saâdete hila‘-ı fâhire ve kürkler giydirilmek kânûn olmağın sadrazam ve kaymakam paşa ve Nişâncı Abdi Paşa hazerâtına semmur kaplı hil‘at-ı fâhireler ihsân olunup şeyhulislâm ve sadreyn efendilere semmur kaplı hil‘atler giydirildikten son- ra Vânî Efendi’ye ancak çukaya kaplı semmur ihsân olundu. Vesâ’ir yeniçeri ağası ve kul kethüdâsı ve kapıcıbaşılar ve mîrahûr ağalar ve bostancıbaşı ve mîr-i alem ve bölük ağalarına ser-cümle hil‘atler ihsân olundu. O gün hazret-i pâdişâh kapı üzerinde dârussaâde ağalarına mahsûs kasr-ı âlîye nüzûl buyurup hil‘at-ı pür-nişânı temâşâ eylediler.

Bu esnâda harem-i hümâyûndan cihâz-ı sultânî çıkıp ayaklı sandıklar ve serâser mefreşler cümle katara tahmîl olunup elde gidecek olanları da Sarây-ı Atîk teber-dârlarına verilmekle teber-dârlar kethüdâsına murassa‘ yüz yastığı verilip cümlenin önüne düşerek sâ’ir cevâhirleri baş eskilerine aşağıda yollarınca teslîm ve defter olunup yerli yerince hâzır ve âmâde ey- lediler.

Yine vüzerâya ve hayme-nişînâna tekrar kahve ve şerbetler ve buhûr ve gül-âblar verilip merâsim-i ikrâm tamâmında hazret-i pâdişâh dârussaâde ağasına dahi semmur kaplı hil‘at-ı fâhire ihsân buyurup cihâz-ı sultânî nakli için fermân buyurduklarında o gün vüzerâdan mâ‘adâ cemî-i ashâb-ı alay resm-i mezkûr üzre ileri yürüyüp badehü saraya gelen kırk adet nahl-i sagîr ve nişân esvâbı ile gelen iki kıta şeker bahçeleri tersâne şahbâzlarına tahmîl

olunup akablarında katar yürüyüp geçtikten sonra cibinlikler ile vüzerâ geçip tersâneliler tamam oldukta teber-dârân yürüyüp dört kıta pullar di- kilmiş fenerler ve cevâhirler ser-cümle sîm siniler içinde eller üzre geçip cihâz ashâbı tamam oldukta sadrazam ve sağdıç Ahmed Paşa ve Abdi Paşa ve Kaymakam Mustafa Paşa hazerâtı geçip badehû mehter-hâne hezârân- gûnâ iftirâkât-ı negamât icrâ ederek geçtiler.

Hatice Sultân hazretlerine ihsân olunan cevârî ve taşradan davet olu- nan ustalar dahi arabalarla geçip kırk nefer ağalar ve kırk nefer Sarây-ı Atîk teber-dârları alay ile geçtikten sonra merâsim-i alay-ı cihâz tamam olup alayın ucu Cisr-i Saraçhâne’ye vardıkta teber-dârlar kethüdâsı murassa‘ yüz yastığı ile alaydan ayrılıp ileriye müjde-resân dâmadpaşa hazretlerine vardıkta hil‘at-ı fâhire ve bir kîse ile nevâziş buyurdular.

Alay dahi Cisr-i Sarachâne’den doğru Üç Şerefeli Câmi-i şerîfi önün- den kâğıtçılar ve çadırcılar ve kitapçılar içinden dolaşıp Kapan Hanı önün- den Sultân Selîm Hamamı kurbundan doğru Dâmad paşa sarayına varıp teslîm olundukta cevâhir getirenlere cümle hil‘atler ihsân olunup vesâ’ir kırk nefer teber-dârlara bir kîse akçe ihsân buyuruldu. Ve ağayâna baş olan ikinci başkapı oğlanına semmur kürk ve atiyye ihsân olunup, sâir ağalara dahi hil‘at-i fâhire ve surre ihsân olundu.

Yine cümle ağaları ve baltacıyân-ı sarây-ı hümâyûnu davet edip ancak cevârî-i arûs ile giden harem ile birkaç ağalar zifâf-hâneyi döşemek vesâir esvâb-ı cihâzı yerli yerine yerleştirmek üzre kaldılar.

O gün yine ashâb-ı alaya ve Enderûn’dan gelip cihâz tertîbi için kalan ağalara ettikleri ziyâfettir: Taâm-ı sofra 25 adet, simât-ı sahan 800 adet.

Ziyâfet-i yevm-i tâsi‘: Rebiulâhirin yedinci günü ki yevmü’l-Ehaddır,

umûmen dîvân hocaları ve hulefâları davet ve ziyâfet olunup onlara et- tikleri ziyâfettir. Taâm-ı sofra 30 adet, Simât-ı sahan 1000 adet, kahve 30 vukıyye, şerbet 200 vukıyye.

Ziyâfet-i yevm-i âşir: Rebiulâhirin sekizinci günü ki yevmü’l-

İsneyndir, cümle vüzerâ kethüdâlarına ve kapı kethüdâlarına ettikleri ziyâfettir. Taâm-ı sofra 30 adet, simât-ı sahan 900 adet, şerbet 300 vukıyye, kahve 45 vukıyye.

Ziyâfet-i yevm-i hâdî aşara: Rebiulâhirin dokuzuncu günü ki

yevmü’s- [s.258] Selâsedir. Hatice Sultân hazretleri için âmâde olunan nahleyn-i kebîreyni sağdıç paşa tarafından alay ile meydan mukâbelesinde

olan Kasr-ı Cedîd kenâresine sitâde eylediler. O gün defterdâr paşa hazret- lerine, tevâbiiyle mahsûs ziyâfet tertîb buyurdular. Taâm-ı sofra 25 adet, simât-ı sahan 900 adet, şerbet 200 vukıyye, kahve 40 vukıyye.

Ziyâfet-i yevm-i sânî aşara: Rebiulâhirin onuncu günü ki yevmü’l-

Erbiâdır, saâdetlü Hatice Sultân hazretlerine Musâhib Paşa hazretleri sarayında kına gecesi tertip olunmak münâsip görülmekle o gün yine cümle vüzerâ ve erkân-ı devlet alay ile sarây-ı hümâyûna teşrîf eyleyip zikr olunduğu üzre misâfir odasına nüzûl ile kenâre-i leb-i Tunca’da olan Cirid Köşkü’nde ve etrâfında cem oldular. O gün kahve ve şerbetler verilmeyip hareket-i kudûm-ı arûsâneye muntazır oldular.

Vâlide Sultân hazretleri akdemce Kasr-ı Saraçhâne’ye varıp tertîb-i ala- yı onda temâşâ eylediler. O esnâda gelin sultân hazretlerinin zât-ı âlîlerine mahsûs olan sîm araba ve yedek arabası ve yedek atı âmâde olmakla sâ’ir harem-i hümâyûn arabaları dahi hazır olup gelin sultân ve cümle kendile- riyle gidecek harem arabaları süvâr oldukta yine resm-i kadîm üzre vüzerâ ve erkân-ı devlet alay ile geçip badehü kebîr nahiller ve iki kıta sîm nahl ve şeker bahçeleri geçtikten sonra yüz nefer kule sofusu tabir olunan bevvâb ve ikiyüz nefer Sarây-ı Atîk teber-dârları yayan kisvetleriyle geçip bade- hü rahle üzre kelâm-ı izzet-ber kadd-i kâmet sâhibi teber-dârlara tahmîl olunup geçtiler. Ve beş nefer teber-dârâna ikişer kîse tahmîl olunup dö- kündükçe akçe verir idi. Toplar geçip badehü dârussaâdeti’ş-şerîfe ağası hazretleri dahi mükemmel alay tertîbi üzre geçtiler. Saâdetli Hatice Sultân hazretleri sîm araba ile geçip Haseki Sultân hazretlerinin ikinci ağası ve başkapı oğlanı akçe taşıyıp etrafta olan seyirciyân üzre öyle nisâr eylediler ki arsa-i zemîni mânende-i şükûfe-zâr eylediler. Ondan sonra yedek araba- sı ve ardınca mehter-hâne geçip badehü yirmi beş kıta harem-i hümâyûn arabaları geçtiler. Her bir arabanın yanınca üçer nefer harem-i hümâyûn ağaları ikişer nefer Sarây-ı Atîk teber-dârları geçip, ağalar cümlesi Selîmî ve Yusufî üstlük ile geçtiler.

Bu vech üzre alay tertip olunup Cisr-i Saraçhâne’ye vardıklarında seyre nâzır olan sultânlar derhâl arabaya süvâr olup Sultân Selîm yolun- dan Damad paşa sarayına mukaddemce vardılar. Dâmad paşa sultânların teşrîfini işitip akdemce kapı arasında hazır bulunmakla araba ile teşrîf ey- lediklerinde yer öpüp merâsim-i istikbâli edâ eylediler. Alay-ı arûs dahi Cisr-i Saraçhâne’den Küçükpazar nâm mahalden doğruca harem ka- pısına geldiklerinde ileri gelen vüzerâ gelin sultânın selâmına durdular.

Mukaddemâ Dâmad paşa hazretleri makdem-i arûsa muntazır olup kapı arasında hazır olmalarıyla teşrîflerinde

Beyt Râm eyledim niyâz ile ol şîve-kârımı Şehbâz-ı dest-i himmetim aldım şikârımı

Nesr: deyip Hatice Sultân’ı âğûşa alarak zifâf-hâneye götürdüler. Bundan sonra içeriden defter çıkıp Edirne’de mevcut bulunan saraylılar- dan ve Âsitâne’den gelen sultânlar ve hanımlar davet olunmakla her birine teber-dâr gönderilip derhal cümlesi geldiler. Bu gece leyle-i kına olmağın defterdâr paşa tarafından yine sandıklar içinde şekerler ve tablalar ile şişe içinde envâ‘-ı şekerelemeler ve fil ve gergedân şeker işleri gelip Enderûn’a verdiler. O gün derûn ve bîrûna verilen taâmdır: Sofra 30 adet, simât-ı sahan 1000 adet, kahve 300 kıyye.

Ziyâfet-i yevm-i sâlisü aşara: Rebiulâhirin on birinci günü ki

yevmü’l-Hamîsdir leyle-i zifâf olmağın vakt-i asrdan sonra Enderûn’dan sîm ü zer şamdanlar ve dört kıta sîm pullu fenerler çıkıp cümle müzehheb şem‘ler dikilip şamdanları hareme ve fenerleri vüzerâ oturduğu [s. 259] meydana nâzır kasra getirdiler.

O gün cümle vüzerâ ve şeyhulislâm davet olunup yine ziyâfetler olunduktan sonra mu‘tâd-ı kadîm üzre yatsı namazı edâ olundukta cümle vüzerâ Dâmad paşayı zifâf-hâneye getirip cümlenin önünde dârussaâde ağası hazretleri ardınca vüzerâ ve şeyhulislâm ve Feyzullâh Efendi ve imâm-ı şehriyârî ve sadreyn efendiler bi’l-cümle zifâf-hâneye varıp o ma- halde halka olup fezîletli Vânî Efendi teberrüken duâ eyleyip tamamında izz ü ikbâl ile dâmad paşayı zifâf-hâneye gönderdiler.

Vüzerâ ve efendiler taşrada oturup kahve ve şerbetler verildikten son- ra taşra çıktıklarında Dâmad paşa tarafından cümleye kürk ve kaftanlar giydirdiler. Cümle vüzerâ o gece Dâmad paşa sarayında nısfü’l-leyle kadar oturup azîm şâdumânî oldu.

O gün vüzerâ ve Enderûn’a olan ziyâfettir: Taâm-ı sofra 25 adet, simât-ı sahan 1000 adet, kahve 50 kıyye, şerbet 200 kıyye.

Ziyâfet-i yevm-i râbi‘u aşara: Rebîu’lâhirin on ikinci günü ki yevm-i

Cumadır, mu‘tâd üzre paça günü olup cümle vüzerâya ve şeyhulislâm hazretlerine ve sadreyn efendiler ve Vânî Efendi’ye ve imâm-ı şehriyârîye zerdûz bohçalar ile çamaşırlar gönderilip ve âyende ve revendeye azîm ihsânlar olundu.

O gün devletli vâlide sultân ve haseki sultân hazerâtı ve hazret-i pâdişâhın üç hemşireleri sultânlardan gayri sâir taşradan davet olunan