İstanbul Gümrük Emini Seyyid İshak Zide Mecdühûya hüküm ki:
Ali nam kimesne bundan akdem serika töhmetiyle ahz olub Tersâne-i ‘Âmire’mde küreğe vaz‘ olunmakla mezbûr fî-mâba‘d İstanbul ve havalisine gelmeyub ve bu ma‘kule serika töhmetiyle ahz olunacak olur ise bilâ-emân ceza-i tertib olunmak şartıyla vilayeti olan Sofya’ya nefiy ve iclâ olunmak içün ıtlâk olunmak fermânım olmağla sen ki gümrük emini mûmâileyhsin ma‘rifetinle Tekfurdağı’na giden sefâinden birine vaz‘ ve Tekfurdağı’na ve andan dahi Sofya’ya tesyâr ve îsâl olunmak üzre sefine-i mezkûre reisine tenbih olunmak bâbında fermân-ı âlişânım yazılmışdır
Fi evâsıt-ı RA (Rebi‘ül- evvel) sene 1158
2-1
(...) Kal‘ası Dizdâr’ına hüküm ki:
İslimiye sâkinlerinden onyedi bölüğün bender serdengeçti ağalarından Salih Mehmed zîde kadruhû südde-i saâdetime arzuhal idub mûmâileyh kendu halinde ırzıyla mukayyed iken İslimiye kazasında zuhûr iden ba‘zı eşkıyanın fesâd ve şekavetlerini mûmâileyh dahi gadr ve nisbet ile kal‘a-i mezbûrede kal‘âbend içün bir takrîb ile emr-i şerifim ısdâr ve mağdûr olduğun sebep afv ve ıtlâk olunmak bâbında emr-i şerifim rica itmeğin mezbûrun töhmeti mezkûrda alâka ve medhale olmadığına binâen İran canibine me‘mur asâkir-i Tatar….Şiârın seraskeri olan halûk’üs-selâtin-i i‘zâm-ı şeref-ül-havâkîn ikrâm (silik) sultan dâme ‘uluvvuhunun mayyetine istishâb ile istihfâ itmekle mûmâileyhin iltimâsları mûcebince afv ve ıtlâk olunmak içün yazıldı
Fi evâhir-i RA (Rebi‘ül- evvel) sene 1158
2-2
Arım Kâdısına ve İstanbul Gümrük Emini es-Seyyid İshak Zîde Mecdühûya hüküm:
87
Canik Sancağında Arım kazâsı sâkinlerinden es-Seyyid Mehmed Efendi dimekle ma‘ruf kimesne kendu halinde olmayub Muhsine Hatun vâkfında bir mezra‘a tarla içün İstanbul kadısı i‘lâmıyla şer‘le cevab verilmişken bir dürlü mücâb olmayub davâ-i mücerred ile tacizden hüsn-ü olmamağla sen ki Gümrük Emini mûmâileyhsin ma‘rifetinle mezbûr Seyyid Mehmed’i Samsun ve ol-havâliye giden sefâinden birine vaz‘ ve vilayeti olan Arım’a nefiy ve iclâ’ ve sen ki mevlâna-ı mûmâileyhsin vusûlüne tekrar emr-i Ali sadır olmadıkça bir hatve mahalle-i âhere tecavüzüne ruhsat göstermeyub ve ol-havâliye vusûlüne müş‘ir kâdısından arz alub götürmek üzre sefine-i mezkûre reisine tenbih ve te’kid olunmak bâbında fermân-ı âlişân yazılmışdır.
Fi evâhir-i RA (Rebi‘ül- evvel) sene 1158
2-3
Ba-işaret-i şeyhü’l-islâmı ıtlâk olmuşdur Evâhir-i RA (Rebi‘ül- evvel) sene (1)159
Mezbûr Ali Efendi Ilgın Voyvodasına teslim olduğunu müş‘ir Osman Çavuş yediyle gelen Ilgın kâdısı i‘lâmı muhit olunub ba-fermân-ı ali şerh olmuşdur.
21 Ş (Şaban) sene (1)158
Eskişehir ve Ilgın Kâdılarına hüküm ki:
Eskişehir kazâsı ahalisi gelub halen kazâlarında müfti olan Ali Efendi dimekle ma‘ruf kimesne kendu halinde olmayub dâimâ ibkâyı hakk fitne ve fesâd idub fukarâ- yı raiyyeti envâ’-i derz ile mutazarrır ve ehl-i örfe gamz ile tecrîm ‘âdet-i müstemirresi olub mezbûrun yedinden ve lisanından cümlesi mutazarrır olmaları ile merkûm bundan akdem Seddülbahir kal‘asına nefiy ve iclâ’ olmuşken bir tarikle ıtlâk olunub elân evvelkide ziyâde şerr ve mazarrat-ı îsâl eyleyub cümlesi perâkende ve perişân olub nizâm beldelerinde ihtilâline bâis ve bâdî olduğun bildurub mezbûr min ba‘d vilayetlerine müfti olmamak üzre fetvadan hacr olunub ve diyar-ı âhere nefiy ve iclâ’ ve şerr ve mazarratından halâs olmaları bâbında inâyet-i rica ve bu def‘a ve mukaddemân sâdır olan emr-i şerifimde mezkûr müfti Ali’nin sû-i hali ihbâr olunmağla fetvadan hacr olub vatan-ı kadîmi olan Ilgın kazâsında sâkin olub min ba‘d
88
Eskişehir beldesinde meks ve ikâmet itmemek üzre emr-i şerifim sudûru bâbında bi’l- fi‘l Şeyh-ül islâm ve Müftiyü’l-Enâm olan Mehmed Piri-Zâde Edâme Allahu ta‘ala Feza‘ilehu(?) işaret itmeleriyle işaretleri mûcebince amel olunmak içün yazılmışdır.
Fi evâhir-i RA (Rebi‘ül- evvel) sene 1158.
2-4
İstanbul Gümrüğü Eminine hüküm ki:
Mihalic sâkinlerinden….Şeyh Ebubekir âsitâne-i saâdetime gelub…..kasdıyla tacize cesaret eylediği cihetden Bursa hayrât-ı harîrî mukataasından kendusune dört akçe vazife verilub Âsitâne-i Saâdetime gelmemek ve Mihalic’de meks ve ikâmet eylemek şartıyla berât-ı ihraç ve yedine imdi mezbûr sen ki gümrük emini mûmâileyhinsin ma‘rifetinle Mihalic’e giden sefâinden birine vaz‘ ve Mihalic iskelesine irsâl ve fermân olduğu üzre Mihalic’de meks ve ikâmet itdirilub iskele-i mezbûra vusûlatı müş‘ir kâdısından arz alub bu tarafa getirmek sefine-i mezkûr reisine tenbih olunmak içün yazıldı
Fi evâhir-i RA (Rebi‘ül- evvel) sene (1)158.
2-5
Itlâkı içün emr-i şerifim yazılmışdır Fi evâil-i RA (Rebi‘ül- evvel) sene(1)159
Ağrıboz Muhâfızı’na Talanda Kazâsı Nâibine ki:
Senki Talanda kazâsı nâibi mevlâna Derviş Ali zide ilmuhusun mektub gönderub Talanda kazâsında sekene ulemâ’ ve sulehâ ve eimme ve hutebâ’ ve meşâyih ve a‘yân ve eşrâf vesâ’ir fukarâ ve zuafâ ve re‘âyâ meclis-i şer‘a varub yine kazâ-i mezbûrda sâkin Yahya Bölük Başı dimekle ma‘ruf kimesne kendu halinde olmayub muzırr-ı nâs ve şerir olub dâimâ re‘âyâ fukarâsını voyvodalara gamz ve ifk ve iftira ile tecrîm ve ibâdullah kendunden ta‘ciz ve re‘âyâ fukarasının perâkende ve perişân olmalarına bâis olmağla merkûm Yahya nefiy ve iclâ’ olunmak bâbında vâkî-i hal
89
hükm-ü hümâyûnum verilmek ricasına bi’l-iltimâs arz eylediği ecilden şer‘le görülüb töhmet-i mezkûr üzerine sâbit olur ise diyar-ı âhere nefiy ve iclâ’ olunmak içün yazıldı.
Fi evâhir-i RA (Rebi‘ül- evvel) sene (1)158
2-6
Seddülbahir Kal‘ası Dizdâr’ına hüküm:
Gelibolu kazâsı nâibi mevlâna Yusuf zide ilmuhu südde-i saâdetime mektub gönderub medine-i Gelibolu kazâsında Karababa(?) nâhiyesi kuralarından Bayır (?) nam karye mütemekkinlerinden Kalyoncu Kostantin ve oğlu Bani nam zimmiler kendu hallerinde olmayub bundan akdem ıslâh-ı nefs idince mezbûranın Seddülbahir Kal‘asında kal‘abend içün emr-i şerifim sâdır ve kal‘a-i merkûmede kal‘abend olunub lâkin zimmi-i mesfûrların ıslâh-ı nefs itdiklerini karye-i mezbûr ahalileri bi-serihüm(?) meclis-i şer‘a’de ihbâr itmeleriyle hallerine merhameten mesfûrlar kal‘a-i merkûmeden ıtlâk ve cürmleri afv olunmak bâbında emr-i şerifim verilmek ricasına vâki‘ hüsn-ü bi’l-iltimâs arz eylediği ecilden vech-i meşrûh üzre afv ve ıtlâk olunmaları içün yazılmışdır
Fi evâhir-i RA (Rebi‘ül- evvel) sene 1158
3-1
Taraklıborlu Kâdısı Mevlâna Mehmed ve Samsun Kal‘ası Dizdâr’ına hüküm ki:
Taraklıborlu kazâsına tâbi Konarı(?) nam kârye sükkânından olub sâbıka Yörügan Taraklıborlu kazâsı nâibi olan Mehmed Efendi dimekle ma‘ruf kimesnenin bundan akdem sû-i hali ilâm’ olundukda Viranşehir kâdısı...ta‘yîn olunub Bolu Voyvodası mübâşiretiyle mahalinde ashâb-ı hukuk ile teraki ve şer‘an sâbit olan ashâb-ı hukuk ba‘de-l-istidâd mezbûr Mehmed Samsun kal‘asına kal‘abend olunmak bâbında emr-i şerifim mücebince mübâşir mûmâileyh merkûm Mehmed’i ihzar-ı şer‘a ve……mahalinde murâfaa ve üzerine şer‘an bir nesne sâbit ve zâhir olub fakîr’ül-hal ve kesir’ül ıyâl merhamete sezâ kimesne olduğunu ehl-i kazâdan cem‘-i gafir ve cem‘- i kesir ihbâr ve husus-u merkûm minvâl-i meşrûh üzre olunduğu Yörügan Taraklıborlu
90
nâibi mevlâna İbrahim zide ilmuhu dahi başka arz itmeğin mezbûr Mehmed’in haline ve ıyâline merhameten kal‘a-i merkûmeden afv ve ıtlâk vesilesiyle tahliye olunmak bâbında hükm-ü hümâyûnum verilmek ricasına bi’l-iltimâs arz eylediğin ecilden vech- i meşrûh üzre ıtlâk olunmak içün yazılmışdır
Fi evâhir-i RA (Rebi‘ül- evvel) sene 1158
3-2
Limni Ceziresi Nâibine hüküm:
Niğde ahalisinden Deli Ali nam kimesne yine kazâ-i mezbûr ahalisinden es- Seyyid el-Hac Mehmed Bin Veliüddin içün bundan akdem kızı Aişe Hatun bana tezvîc ve inkâh itmek üzre va‘d itmişken mezbûre Aişe râzı olmamağla babası mezbûr Seyyid el-Hac Mehmed mezbûreyi irzâ ve tezvîcün iknâ ider diyu mezbûrun dâmâdı dimekle(?) Seyyid Mahmud bin yüz elli altı senesi Muharreminde Mahmud Paşa nâibi mevlâna Mehmed hıfzıhu zide ilmuhu huzurunda da‘vâ ve tağrîr-i meşrûhu üzre nikah şer‘a müteakkıd olmamağla davası lağv olmakla bevc-i muârazadan men‘ olunub ve merkûm Deli Ali husus-u mezkûru mezkûr Seyyid el-Hac Mehmed’in mahalinde bi- d-def‘ât dava-i ve bevc muârazadan men‘ olmuşken kanâat itmeyub şerrine sülûk ve guna gun ifk ve iftira ile mezkûr Seyyid el-Hac Mehmed’i vesâir ahaliye ehl-i örfe gamz ile tağrîm ve tecrîm ve ehl-i ırzın ırzlarına taarruz ve zümre-i eşkıyadan olmağla mezbûr Seyyid Hacı Mehmed’in bâ-dikkat(?) vâki ehl-i ve iyâl’iyle sâkin olduğu menzilini basub sû-i hal üzre olduğun kazâ-i mezkûr ahalisi mahzar ve Niğde kadısı mevlâna Mehmed zîde fazluhu arz ve yine ahaliden âsitâne-i celile’den mevcud altı nefer kimesneler zikr olunan mahzar ve arzın mazmûnları tasdik ve mezbûr Deli Ali’nin minvali muharrer üzre haline Mahmud Paşa mahkemesine haber ve mezbûr Deli Ali Niğde kal‘asına bâ-ferman-ı ali kal‘a-bend olduğun mevlânayı mûmâileyh Mehmed hıfzın virdiği hüccetin……..olmak üzre Mahmud Paşa mahkemesi sicillâtından…...vekil mezbûr es-Seyyid Mehmed’in arzıyla……..mastûr olan suret-i hüccet-i nâtıka ve mezbûr Deli Ali kal‘a-i mezbûrdan afv ve ıtlâk olunmadan firar eylediği nümâyân olmağla sâbıka-i Niğde kadîsı Müslimiddin zîde fazluhu ile ahaliden Seyyid Sâid ve el-Hac Mustafa ve Seyyid Osman ve diğer Seyyid el-Hac Osman ve Mustafa Çelebi ve Seyyid Ömer ve Seyyid Mehmed ve Seyyid Ali ve diğer Seyyid
91
Mehmed dimekle ma‘ruf kimesneler…..mezbûr Deli Ali hakkında bâlâda tafsîl olduğun üzre sudûr iden mugaderet bi’l-cümle vâki’ mutabık ve nefs-ül-emre muvâfıkdır diyu mezbûrun kendu halinde olmayub şerir ve müzevvir ve zümre-i eşkıyadan olmağla bu misüllü fesâd ve şekâvet ‘âdet-i müstemirresi olduğu meclis-i şer‘an mezbûr Deli Ali’nin muvacehesine her biri haber virdiği bi’l-fi‘l Rumili kazaskeri olan mevlâna Mehmed Esad edâme Allahu ta‘ala feza‘ilehu i‘lâm itmeğin mevlânayı müşârünileyhin i‘lâmı mûcebince Limni ceziresine cezirebend olunmak içün yazıldı
Fi evâhir-i RA (Rebi‘ül- evvel) sene (1)158
3-3
Mezkûrun ıtlâkıiçün emr-i şerif yazılmışdır Evâil-i CA ( Cemâziye’l-evvel) sene 1158
Hâmit Sancağında Vâki’ Ağlasun Maa İncir(li)pazarı ve Kıbrıs Ceziresi Nâiblerine ve Hamit Sancağı Mütesellimine hüküm ki:
Sen ki Ağlasun Maa İncir(li)pazarı nâibi el-Hac Ömer Zide İlmuhusun mektub gönderub kazâ-i mezburda sâkin ulemâ’ ve sulehâ ve re‘âyâ ve berâya bi-cemihüm meclis-i şer‘a varub Ağlasun kazâsında sâkin Halil İbrahim Efendi dimekle ma‘ruf kimesne kendu halinde olmayub ba‘zılarını bi-gayr hakk gamz ve tecrîm ve tekâlifleri vukûnda ehl-i vesâire ve celîl(?)-i şer‘i raiyyet itmeyub kendu ameli üzerlerine ziyâde- i akçeler zam ve tevzi‘ ve cebren tahsil ve deâvî şer‘îyeleri zuhûrunda murâfaa ve ahrak-ı hakka râzı olmayub mücerred kendu ma‘rifetiyle tarafından…….der-karalar ahz ve îsâl hakk ve mukaddemân ma‘rifet-i şer‘a tahsil olunmuş davâları îkâza ve nice tezvîrâta şu kitle-i nizâ kesire…..hevâsına tâbi olmayub kendu halinde olan ibâdullah üzerlerine müzevvir……kendu dahi şahit... olmayub dâimâ ısdâr ‘ibâd’dan hüsn-ü olmadığından maada kazâlarına vârid ve nâzik olan umur-u mühimmede hevasına tâbi eşirrâyı tahrik ve tecemmuât(?) birle ve îbtâline mübâderet ve bu güne fesâd ve şekâvetinin def‘ ve ref‘i içün kazâ-i mezbûr ahalileri bundan akdem Isparta mahkemesine varub merkûmu kirâren ve mirâren dâvet-i şer‘a itdiklerinden adem-i itâat ile her birilerini taciz ve tekdirden hüsn olmamağla merkûm ıslah-ı nefs idince
92
Kıbrıs Ceziresinde ıslah-ı nefs içün cezirebend ve fîmâba‘d bu makule fesâdatın………kendu halinde…..mu‘temed kimesneleri ahz ve Isparta mahkemesinde tescil ve himmet-i şer‘a olduğu arz ve i‘lâm olmadıkça ıtlâk olunmak bâbında emr-i şerifim verilmek ricasına vâki‘ hüsnü(?) sen ki Ağlasun Nâibi mûmâ- ileyhinsin sen ki Isparta kâdısı el-Hac Süleyman ve sen ki hamit Mütesellimi Mustafa zîde kadrühusun başka başka arz eylediğiniz ecilden vech-i meşrûh üzre imdi mezbûr cezirebend olmak içün yazılmışdır
Fi evâhir-i RA (Rebi‘ül- evvel) sene 1158
4-1
Deryâ Kapudân Mustafa Paşa’ya ve Resmo Kazâsı Nâibi’ne hüküm ki:
Resmo kazâsının Edirne kapu mahallesi sâkinlerinden Süpürgeci Oğlu İbrahim ve karındaşları Süleyman ve Musa ve Ali Nasuh dört nefer kimesneler südde-i sa‘âdetime arzuhâl idub bunlar kendu halinde kimesneye hilâf-ı şer‘i şerif ve taadîleri olmayub dahl olunmak icab itmeziken umerayı deryadan Mustafa Paşa bundan akdem Cekdirim sefinesiyle mahali mezbûra nüzul eyledikden bunlardan……tâleb ve bunlar virmedikleri içün bunlar içün sâriklerdir diyu Hanya muhâfızı vezirim Numan Paşa’nın buyruldusu ve mukaddemâ Resmo kazâsı nâibi Derviş İbrahim Zide İlmuhu’nun i‘lâmıyla mîr-i mîran mûmâ-ileyhin sefinesine vaz‘ olunub ol-vechle mağdûr oldukların bildirulub ıtlâk olunmaları bâbında istid‘â(?) merhamet eyledikleri ecilden sen ki vezir-i müşârün-ileyhinsin ma‘rifetlu ma‘rifeti şer‘le mezbûrun mahalinde keyfiyet-i ahvalleri alâ-vechi...tefahhus ve…..töhmet-i mezkûra ikrar olub berât-ı zimmetleri zâhir olur ise sebebleri tahliye olunmak bâbında fermân-ı alişanım içün yazılmışdır
Fi evâhir-i RA (Rebi‘ül- evvel) sene 1158
4-2
Ber-vech-i Arpalık Selanik Sancağı Mutasarrıfı Sadr-ı Esbak Vezirim es- Seyyid Mehmed Paşa’ya ve Selanik Kazâsı Muzâfatından Sidre-Kapısı Nâhiyesi Nâibi Mevlana (…) Zide İlmuhu ve Bar Kal‘ası Dizdârı (…) Zide Hıfzıhuya hüküm ki:
93
Sen ki Sidre-Kapısı nâhiyesi nâibi mevlâna es-Seyyid Saâdeddin zide ilmuhusun südde-i saâdetime mektub gönderub Selanik sâkinlerinden Çavuş-Zade Ali zîde kadrühunun mâlikâne uhdesinde olan Sidre-Kapısı maadeniyye hidemâtından i‘mâl ve istihdâm olunan re‘âyânın lazım gelen ücretleri mûmâileyh tarafından tamamen eda olunub anlar dahi hizmet-i lazimesi gelen bilâ-kusur eda eylemeleri muktezâ iken içlerinden Şimo Oğlu Erkebir ve Hatman Minnacı ve Koca Angele nam zımmîler müfsid ve şerir olduklarından ol-mâkule mâden re‘âyâsını sâir kâra sevk ve yanlarına guna gun fesâdat ilkâ iderek hizmet-i maadeni me’muriyet ve eda da tehâvün ve tekâsül itmeleriyle bâis ve bâdî olub birkaç seneden beru ihraç eyledikleri cevherden hâsıl olan sim-i asıl masarifata vefa itmediğine binâen irâd-ı maâden tedennî ve tenezzül olub canib-i-ı miriye mûmâileyh mûcib hasâret olmağın ibreten’ül- gayr mesfûrun zımmîler Bar kal‘asına nefiy ve iclâ’ olunmaları içün sen ki nâibi mûmâileyhsin sen arz ve mûmâileyh dahi arzuhaliyle emr-i şerifim iltimas itmegin maaden-i mezbûrun bu makule ihtilâl ve ifsâdatına sebeb ve bâdi olan re‘âyânın âher- i mahale nefiy ve iclâ’sı içün bundan akdem ellidört senesinde emr-i şerfim verilmekle nizâm-ı maadeni ihtilâlden ve mal-ı miriye ve mâlikane mutasarrıfı hasâretden ziyan içün mesfûrun zımmîler Bar kal‘asına nefiy ve iclâ’ olunmak üzre emr-i şerifim tahriri bâbında bi’l-fi‘l başdefterdârım olan Yusuf dâme uluvvuhu i‘lâm itmeğin evlad ve iyâllerine taarruz ve müdahale olunmamak şartıyla i‘lâmı mûcebince mesfurun üç nefer zımmîler Bar kal‘asına nefiy ve iclâ’ olunmak içün yazılmışdır
Fi evâhir-i RA (Rebi‘ül- evvel) sene (1)158
4-3 (TERKİN)
Mezbûrun şer‘le üzerine bir nesne sâbit olmaz ise hilâf-ı şer‘i taaddî itdirmemek şartıyla sâdır olan ferman-ı ali mûcebince terkin olunub emr-i şerif yazılmışdır
Evâsıt-ı R (Receb) sene (1)159
İshaklı Kazâsı Naibine ve Konya Mütesellimine ve Konya Kal‘ası Dizdar’ına hüküm ki:
94
Sen ki İshaklı kazâsı nâibi mevlâna Yusuf zide ilmuhusun mektub gönderub İshaklı kazâsına tâbî‘ Çiftlik nam karye ahalileri ba-serihüm meclis-i şer‘i varub yine karye-i mezbûr sakinlerinden Herum Oğlu Salih ve refiki Abdurrahman nam kimesneler zulme-i nâs ve mütegallibeden olub ehl-i ırz olanların ırzına taarruz itmeleriyle bundan akdem otuzkırk mikdarı eşkıya ile karye-i mezbure sakinlerinden serdengeçti ağalarından Hasan Ağa dimekle ma‘ruf kimesnenin tarikini kat‘ ve iki evladları yatağan bıçağıyla darb ve mecruh eylediklerinden maâda yine karye-i mezbûre sâkinlerinden el-Hac Ömer nam kimesnenin dahi evini basub kesr-i ırz ve mezbûr el-Hac Ömer’in fuzuli bir mikdar malını alıb yine tekrar habs idub bir mikdar malını dahi ahz ve zulm ve taaddîlerinin nihayeti olmayub ser-cemîyyet olmalarıyla sen ki mütesellim mûmâ-ileyhsin mübaşiretinle mezbûrlar ıslah-ı nefs içün Konya kal‘asına kal‘a-bend olunub tekrar Konya nâibi arzıyla ıtlâkları içün emr-i şerifim sâdır olmadıkça kal‘a-i mezbûreden ıtlâk olunmamaları içün vâki hüsn-ü ilhâhlarıyla hükmü hümâyûnum verilmek ricasına arz eylediğin ecilden zâbit-i ma‘rifetiyle töhmet-i mezkûre muvacelerinde şer‘a sâbit olur ise vech-i meşrûh üzre kal‘a-bend olunmaları bâbında fermân-ı alişânım yazılmışdır
Fi evâhir-i RA (Rebi‘ül- evvel) sene 1158
4-4
Trabzon Kâdîsı’na İstanbul Gümrüğ Emini Seyyid İshak Zîde mecdühûya hüküm ki:
Erzurum eyaletinde vâki İspir kazâsı sakinlerinden Mehmed nam kimesne âsitâne-i saâdetime gelub……..ikâmet ve Bozhan(?)……..mezkûr arzuhal tahririne cesaret eylediği cihetten ahz olunub vilayeti olan mahal-i mezbûra nefiy ve irsâli fermânım olmağla imdi sen ki İstanbul gümrüğü emini mûmâileyhsin ma‘rifetinle mezbûr Trabzon İskelesine giden sefainden birine vaz’ ve iskeleyi mezkûreye irsâl ve andan vilayeti olan İspir’e gitmek üzre mahalli merkûme nakl ve îsâl olunduğuna mezbûr Trabzon kadîsından arz alub bu tarafa getürmek üzre sefine-i merkûm reisine tenbih ve te’kîd eylemen bâbında fermân-ı alişânım yazılmışdır
95
4-5
Gediz Kazâsı nâibine ve Kütahya Kal‘ası Dizdârına hüküm ki:
Sen ki Gediz kazâsı nâibi mevlâna Seyyid İbrahim südde-i saâdetime mektub gönderub kazâ-i mezbûra tâbi Göynük nam karye sâkinlerinden eşirrâdan Molla Ali ve Câbi(?) karyesinden Halil Beg Oğlu Hüseyin ve Abbas nam kimesneler kendu hallerinde olmadıklarından nâşî ve sâir eşkıyadan Cabir Oğlu Mustafa nam şâki ile yek-dil ve yek-cihet ve nicelerini bî-gayr-ı hakk ehl-i örfe gamz ve tecrîm ve mallarını ahz ve memleketlerinin ihtilâline bâis ve ol-vechle ümmett-i muhammedi mutazarrır…..‘âdet-i müstemireleri olub…….mu‘in ve yedlerinden bir-vech emn ve rahatları olmamağla mezbûrlar ıslâh-ı nefs idince Kütahya kal‘asına kal‘a-bend olunmak bâbında Adem Resûle arz ve i‘lâm idiyor diyu ilhâh ve iltimâs itmeleriyle vâki’ hüsn-ü bil-iltimâs arz eylediğin ecilden vech-i meşrûh üzre kal‘abend olunmaları içün yazılmışdır
Fi evâsıt-ı C (Cemâziye’l-âhir) sene 1158
5-1
İzmir Kazâsı Nâibine Gümrük Emini İshak Zîde Mecdühûya hüküm ki: Medine-i Manisa sâkinlerinden İbrahim nam kimesne âsitâne-i saâdetime gelub serseri geşt û güzâr ve kelimât-ı mücânebetden ibâret mezkûr(?) ref‘-i ref‘ine ictisâr eylediği cihetden bu mâkule mechûlü’l-ahvâl mecûzubun bu tarafdan tard ve îgali muktezâ olmağla imdi sen ki gümrük emini mûmâileyhsin ma‘rifetinle mezbûr İbrahim’i İzmir’e giden sefaînden birine vaz’ ve İzmir iskelesine irsâl ve andan vilâyetine gitmek üzre iskele-i mezkûreye nakl ve îsâl olunduğunu müş‘ir mevlânayı mûmâileyhden arz alub bu tarafa getirmek üzre sefine-i mezbûre reisine muhkem tenbih ve te’kîd eylemek bâbında fermân-ı alişânım yazılmışdır
Fi evâhir-i RA (Rebi‘ül- evvel) sene 1158
5-2
96 Evâil-i CA (Cemâziye’l-evvel) sene (1)159
Akşehir ve (…) Kâdîsı’na ve Konya Mütesellimine Konya Kal‘ası Dizdârına hüküm ki:
Akşehir kazâsına tâbi’ Kocabaş nam karye ahalilerinden Ahmed nam kimesne ile sâirleri südde-i saâdetime arzuhal idub bunlar kendu hallerinde olub hilâf-ı şer‘i şerif kimesneye vaz‘ ve taaddîsi olmayub ve üzerlerine şer‘an bir nesne sâbit olmayub bir-vechle dahl olunmak îcâb itmez iken bundan akdem isyân ve tuğyân ve isâl-i mazarrat ‘adet-i müstemiresi üzre eşkıyaların zulme ve mütegallibe ve cebâbiresinden karye-i mezbûr sâkinlerinden Süleyman Bölükbaşı dimekle ma‘ruf şâki kendu halinde olmayub mukaddemân binyüzelli senesinde Akşehir sâkinlerinden Hacı Celil nam