Bi’s-mühü te‘âlâ
Hâzihi Kuyûd-ı Ahkâmü’ş-Şikâyât-ı Fî Zamân-ı Sadr-ı Sudûrü’l Vüzerâ Hazret-i Alî Pâşâ Yessurullahi Mâyeşâ’ ve Fî İbbân Muhammed Râgıb Efendi
Reîsü’l-Küttâb Yetemennâhü s.1
1. Hüküm
Bosna vâlîsine ve Sarâybosna mollâsına hüküm ki
Zu‘amâdan Mustafâ zîde kadrühü gelüb Kilîs ve Bosna sancaklarında … ve gayrî nâhîyelerde ve … nâm karye ve gayrıdan on dört bin beş yüz elli ber vech tekmîl yirmi bin akçe ze‘âmete berât-ı şerîfimle mutasarrıf olub ze‘âmeti ikdâmından Sarây nâhîyesine tâbi‘ bin iki yüz kırk akçe yazar … nâm karye ve icmâline dâhil olan kıraç müşterekleri olanlar vâki‘ olan ve rüsûmun berâtları yazularına göre hisselerine düşeni almağ kanâ‘at etmeyüb hilâf-ı defter-i hâkânî ve mugâyir-i berâthisselerinden ziyâdeye tecâvüz ve mûmâileyhin berâtı yazusuna göre hissesine düşen mahsûl ve rüsûmu dahi tegalüben ahz ve kabz edüb ze‘âmeti mahsûlüne gadr eylediklerini bildürüb Sarây nâhîyesine tâbi‘ sâbıku’l-beyân karye ve icmâline dâhil olan ber mûceb defter-i hâkânî müşterekleri kendüye zabt ve vâki‘ olan mahsûl ve rüsûmundan herkes berâtları yazularına göre hisselerine düşen kânûn ve defter mûcebince ahz ve kabz etdirülüb müştereklerini hilâf-ı defter-i hâkânî berâtları yazularından ziyâdeye tecâvüz etdirilmemek bâbında emr-i şerîfim ricâ ve defter-i hâne-i ‘âmiremde mahfûz olan rûznâmçe-i hümâyûn ve defter-i icmâle mürâca‘at olundukda Sarây nâhîyesine tâbi‘ bin iki yüz kırk akçe yazı karye-i… ma‘ gayruhü dört binakçe yazu ile defter-i icmâle Mehmed kalemiyle tahrîr ve bir icmâl ve icmâl-i mezbûrun bin yüz akçesi Kilîs sancağında … nâhîyesinde karye-i … ve gayruhü ile birikdirilüb İsmâ‘îl Kemâl bin Şehsüvâr’ın kırk kırk dört rûznâmçesinde berâtla üzerinde iken fevtinden bin kırk beş senesinde oğlu Mehmed’e tevcîh ve tevârîh-i muhtelife ve ‘atîkasında gelüb yüz elli bir senesine rûznâmçesine mûmâileyh Mustafâ’nın kaydında karâr ve icmâl-i mezbûrun üç bin akçesi dahi bin kır dört senesine rûznâmçesinde Bosna defteri çavuşlarından Mehmed çavuşun berâtla üzerinde
26
iken bin elli tarihinde tahrir-i berat ve tevârîh-i muhtelife ile ‘atîkasından ol dahi gelüb dört bin akçe … üzerine yüzkkırkbeş rûznâmçesinde yine Bosna’nın defteri çavuşlarından derkenârda mastûr olduğu üzere Mehmed veled-i Dervîş’in berâtı dâhilinde olmağla bu takdîrce bin akçe tecâvüz etmiş olur mezbûrânın eslâfı icmâl-i mezbûrdan ez kadîm tevcîh-i mutasarrıf oluna gelmiş idiyse yine bu teveccühle zabt etdirilmek için iftihârü’l-emâcid ve’l-ekârim bi’l-fi‘il defter emîni olan Halîl Şerîf dâme mecdühü ‘arz eteğin ‘arz mûcebince ‘amel olunmak emrim olmuşdur.
Fî evâil-i C.Evvel sene 1155
2. Hüküm
Bosna vâlîsi sadr-ı a‘zam-ı sâbık vezîre ve İzvornîk sancağına vâki‘ mevlânâ … kâdîsına hüküm ki
Breçka kal‘esi dizdârı zîde hıfzuhü ile kal‘e-i mezbûre kethüdâsı Süleymân ve kal‘e-i câmi‘i kayyımı Mustafâ ve sâir müstahfizânı gelüb İzvornîk sancağına ve kazâ-i mezbûr muzâfâtından … nâhîyesinde … nâm karye ve gayrıdan üç bin otuz akçe gedük tîmâr ile kal‘e-i mezbûre dizdârlığı mûmâileyh Mustafâ Böğürdelen nâhîyesinde Suhûselne nâm karye ve gayrıdan gedük tîmâr iki bin dört yüz akçe ile kal‘e-i mezbûre kethüdâlığı dahi merhûm Süleymân … nâhîyesinde … nâm karye ve gayrıdan bin dört yüz akçe gedük tîmâr ile kal‘e-i mezbûre müstahfızlığı İbrâhîm ve … nâhîyesinde Dolenomne nâm karye ve gayrıdan bin dört yüz akçe gedük tîmâr ile kal‘e-i mezbûre müstahfızı Hasan ve … nâhîyesinde ... nâm karye ve gayrıdan bin altı yüz akçe gedük tîmâr ile kal‘e-i mezbûre câmi‘i şerîfi kayyımlığı dahi Mustafâ ve … nâhîyesinde İsolice nâm karye ve gayrıdan bin dört yüz akçe gedük tîmâr ile kal‘e-i mezbûr müstahfızlığı Hüseyin ve … nâhîyesinde … ve gayrıdan bin beş yüz akçe gedük tîmâr ile kal‘e-i müstahfızlığı İsmâ‘îl ve … nâhîyesinde Mlkonya nân karye ve gayrıdan bin dört yüz akçe gedük tîmâr ile kal‘e-i mezbûre müstahfızlığı diğer İbrâhîm ve … nâhîyesinde … nâm karye ve gayrıdan bin dört yüz akçe tîmâr ile kal‘e-i mezbûre müstahfızlığı Mehmed ve Niyosol nâhîyesinde … nâm karye ve gayrıdan bin dört yüz akçe gedük tîmâr ile kal‘e-i mezbûre müstahfızlığı Alî’nin üzerlerine ve kal‘e-i mezbûreye mahsûs gedük tîmâr kurâ olub merkûmûn mutasarrıflar iken istîlâ-yı düşmen takarrübüyle … bilutfullahi te‘âlâ ve yed-i a‘dâdan tahlîs ve mücedden binâ olmakla dizdâr ve kethüdâ ve sâir neferâtı kadîmîsi üzere Breçka kal‘esi muhâfazasına ta‘yîn olunmak için sen ki vezîr-i müşârünileyhsin tarafından sâdır olan buyuruldu mûcebince zikr olunan gedük tîmârlar kadîmîsi üzere Breçka kal‘esi muhâfazasında kıyâm ve hizmet-i lâzımların i‘âde etmeleri şartıyla merkûmûn tevcîh ve hâl başka başka berât-ı şerîfimle üzerlerine olduğun buyurub zikr olunan gedük tîmâr bu yedlerinde olan berât-ı şerîfem mûcebince kendülere zabt ve vâki‘ olan mahsûlden ve rüsûmâtlarıyla kânûn ve defter mûcibince herkese ahz ve kabz etdirilüb hilâf-ı defter-i hâkânî ve berâtlarına mugâyir âhiri dahl ve ta‘arruz etdirülmek bâbında hükm-i hümâyûnum ricâ ve defterhâne-i ‘âmiremde mahfûz olan rûznâmçe-i hümâyûnuma mürâca‘at olundukda zikr olunan tîmârlarının yüzellibeş senesinde
27
cemâzîye’l-ûlânın onuncu gününde vech-i meşrûh üzere … tevcîh ve hâl başka başka berevât-ı şerîfemle üzeerlerine mastûr olduğu mukayyed bulunmağın defter-i hâkânî mûcibince ‘amel olunmak için yazıldı.
Fî C.Evvel sene 1155 s. 3
3. Hüküm
Nevesin kâdîsına hüküm
Kilîs sancağında Novesi kazâsında Ostreniçe-i ‘atîk kal‘esi kapudânı olan Dervîş Sâlih zîde kadrühü mektûb gönderüb … veled-i …ve Nikola ve İlya ve … ve İstobaki ve Bafo ve Mihaylo ve ve nâm zimmîlerin Nüvesin kazâsına tâbi‘ Kistonefçe Nâm karye toprağında bi’l-fi‘il zabt ve tasarruflarında tekâlîf olunmak îcâb eden emlâk ve yerleri olmayub tekâlîf talebiyle ta‘addî ve rencîde olunmaları îcâb etmez iken karye-i mezbûr ahâlîsi birbirleriyle yekdil ve vâkî‘ olan tekâlîfden siz dahi bizimle ma‘an hisse verin deyü hilâf-ı kânûn ta‘addî eylediklerinden mâ‘adâ ehl-i ‘örf tâifesi taraflarından dahi bilâ emr-i şerîfim tekâlîf-i şâkka mutâlebesiyle mesfûrları ta‘addî ve rencîde etdirülmeyüb zâhir olan ta‘addîleri men‘ ve def‘olunmak bâbında emr-i şerîfim verilmek ricâsına ‘arz etmeğin hilâf-ı kânûn ta‘addî etdirilmemek içün yazıldı.
Fî evâil-i C.Evvel sene 1155
4. Hüküm
Bosna kâdîsina ve defterdârına hüküm ki
Dobrucalı İbrâhîm harâmî reîsi demekle ma‘rûf kimesne südde-i sa‘âdetime ‘arz-ı hâl edüb bunun Dobruca kal‘esi toprağında ebâ ‘an cedd mutasarrıf olduğu Komlet ve Milteniç nâm çiftlikleri yerlerinin resm-i florisi edâ edüb ve ba‘de’l-feth çiftliklerinin tapu temessükleri buna iktizâ eder iken sen ki defterdâr-ı mûmâileyhsin zikr olunan çiftlikleri tama‘-ı hâmından nâşî buna vermeyüb Dobrucalı Bosto oğlu İbrâhîm Ağa demekle meşhûr kimesnenin ziyâde akçesin alub bunun ebâ ‘an cedd mutasarrıf olduğu çiftliklerini mezbûr İbrâhîm verüb iki üç seneden berü mezbûr İbrâhîm’in zabtında olmağla çiftliklerinin temessükünü bundan taleb eyledükde vermekde ta‘allül eylediğini bildirüb ecdâdı çiftliklerinin temessükleri mezbûr İbrâhîm’in ref‘inden kendüye verilmek bâbında emr-i şerîfim birle etmekde sen ki vezîr-i müşâr ve defterdâr-ı mûmâileyhimâsın Kadîmden zabt ve tasarrufunda ise yine buna alıverilüb temessükü verilmek bâbında fermân-ı ‘âlîşân sâdır olmuşdur deyü yazılmışdır.
28
5. Hüküm
Bosna vâlîsine ve bakîye-i Neve/Nove civârında vâki‘ mevlânâ … kâdîsına hüküm
Bakîye-i Neve kazâsına tâbi‘ Dobrucalı İbrâhîm Dami Başı südde-i sa‘âdetime ‘arz-ı hâl edüb bunun Grâdoşka kal‘esi dizdârı Yûsuf zîde hıfzuhünün tîmârı mülhakâtından zikr olunan DevinçeKal‘esi toprağında ebâ‘an cedd mutasarrıf olduğu mülk-i av yeri ve çiftlik emlâki ve bâğçelerine âhirden bir vechile dahl olunmak îcâb etmez iken hâlâ bakîye-i Neve kazâsı nâibi olan Petroçeli Alî nâm nâib bin yüz elli senesinde fuzûlî zabt edüb küllî gadr eylediğin bildiriüb verilen temessük olduğunu şer‘le bildirüb zikr olunan av yeri ve bâğçeleri kendüye alıverilüb zabt etdirilmek bâbında hükm-i hümâyûnum ricâ etmeğin şer‘ile görülüb hilâf-ı şer‘ ta‘arruz ve müdâhele etdirilmemek emrim olmuşdur deyü yazılmışdır.
Fî Evâil-i C.Evvel sene 1155
6. Hüküm
Bosna valîsi vezîr-i a‘zam-ı esbak vezîr Mehmed Pâşâ’ya ve Foça ve … kâdîlarına hüküm Vinyoğan Hersek ve tevâbi‘i mukâta‘ası mülhakâtından Koç kazâsına tâbi‘ tetimme-i Foça re‘âyâsı gelüb zirâ‘atleriyle hâsıl eyledikleri ‘öşrleriyle sâir hukûk ve rüsûmları kânûn ve defter mûcebince edâda kusûrları yoğiken mukâta‘a-i mezbûre mültezimleri kanâ‘at etmeyüb kânûn ve defterden ziyâde a‘şâr ve sâir hukûk ve rüsûm taleb ve cebren aldıklarından mâ‘adâ ‘aynî ‘öşürleri dahi almayub hâsıl olan a‘şâra … ve… kıymet takdîr ve cebren ve kahren diledikleri mikdâr akçe aldıklarından gayrı onar on beşer atlu ile varub konub müft ve meccânen yem ve yiyecek ahz ve bunun emsâli …ve mezâlim tarh ve tahmîl ol vechile ahvâlleri diğer gûn perâkende ve perîşân olmalarına bâ‘is ve bâdî olmalarıyla bundan akdem a‘şâr ve rüsûmların kânûn ve defter mûcebince verdiklerinden sonra hilâf-ı kânûn ve defter ziyâde talebi ve ‘aynî ‘öşr almayub kıymetinden ziyâde akçe talebi mütâlebesi ve sâir mezâlim ve ta‘addiyât ile cevr ü ezîyet etdirilmemek içün yedlerine buyuruldular verilmiş iken mültezimi olan Hersek sancağı alaybeyisi yedlerinde olan buyuruldulara ve kânûn ve deftere muhâlif ber minvâl-i muharrer zulüm ve ta‘addî eylediğin bildirüb zirâ‘atleriyle hâsıl eyledikleri terekeleri ‘öşrleriyle ve sâir hukûk ve rüsûmların kânûn ve defter mûcebince verdiklerinden sonra hukûk-ı kânûn ve defter ziyâde mütâla‘ası ve ‘aynî ‘öşr almayub akçe ahzı ve kânûn ve defterden ziyâde hukûk ve rüsûm talebi ve ber minvâl-i muharrer vücûh-ı mezâlim tarh ve tahammülü ile fukarâya cevr ve ta‘addî etdirilmeyüb âsûde-hâl olmalarına dikkat olunmak bâbında hükm-i hümâyûnum ricâ eyledikleri ecilden kânûn ve defter mûcîbince ‘amel olunmak içün yazılmışdır.
29 Fî Evâil-i C.Evvel sene 1155
s. 5
7. Hüküm
Sâbıkâ vezîr-i a‘zam olub hâlâ Bosna vâlîsi olan vezîrim Hâcı Mehmed Pâşâ’ya ve Mostâr ve Domne ve … kâdîlarına hüküm ki
Mostârlı Dervîş Mehmed nâm kimesne gelüb Bosna eyâletinde Hersek sancağında medîne-i Mostâr mahallâtından Kanber Ağa mahallesi sâkinelerinden Âişe binti el-Hâc Yûsuf nâm hatun bin yüz kırk dört senesine müteveffîye oldukda Domne kazâsında mutasarrıfe olduğu çiftlik ’arsasında olan kârgîr binâ kule ve yirmiden mütecâviz ma‘mûr dört mülk dam mülk dam ve mülk harman ‘arsaları ve sâir emlâki ırs-i şer‘le oğlu İbrâhîm ve zevci Şeyh Mustafâ’ya intikâl ve … çiftlik ahâlîsi dahi tapuya müstehak ve hakk-ı tapu oğlu mezbûr İbrâhîm’in olub henüz tapu ile mezkûr İbrâhîm ile der-‘akab babası mezbûr Şeyh Mustafâ fevt olmalarıyla bu müteveffâ-yı mezbûr Şeyh Mustafâ’nın lieveveyn karındaşı olmağla emlâk-i mezbûr ırsen kendüye intikâl etmekle arâzî-i mezbûru dahi sene-i merkûmede sâhib-i arzın tapuya mâdûn vekîli Hüseyin sipâhîden tapu ile alub yedine verüb/vermeyüb tapu temessükü mûcibince zabt ve zirâ‘at ‘öşr ve resmin sâhib-i arza edâ eder iken şimdi mütegallibeden Kara Alî oğlu Mustafâ nâm kimesne toprağından zuhûr ve yine ol yerleri senden sonra tapu ile aldım deyü sâht temessük ve mezbûr hüccet ... niza‘ etmekle küberâ ve … vülât huzûrlarında murâfi‘-i şer‘ olduklarına iddi‘âsı hiâf-ı kânûn olduğu zâhir olmağla yedinde olan mürûr temessükü … ve zabtiçün bunun yedine üç kıt‘a buyuruldu ve taraf-ı şer‘den mürâsile verilüb ve tekrâr mezbûr Mustafâ’nın oğlu Mehmed’in vekâletiyle murâfi‘ olduklarına mu‘ârazadan men‘ birle sâbit olan hüccet-i şer‘îyesi imzâ ve bir kıt‘a dahi mürâsile ve müteverrid fetevâ-yı şerîfe verilüb kat‘-ı nizâ‘ olunmayub bu makûle on sene mürûrlarından arâzî da‘vâsının istimâ‘ı memnû iken mezbûr Mustafâ hevâsına tâbi‘ … bezl-i-i ırs ile aldığı mürûr-i hüccet ve i‘lâm ile bunun yedinde olan senedâta mugâyir bu sene-i mübâreke[de]ol yerleri fuzûlî zabt ve gadr eyledüğin bildirüb yedinde olan senedâtı mûcebince hâsıl arâzî-i mezbûr alıverilüb kemâkân kendüne zabt edilmesini istirhâm ve sâdır olan fermân-ı âlî üzere yedinde olan senedâta imrârü’n-nazar iddi‘âsını te’yîd etmekle arâzî-i mezkûr merkûm Dervîş Mehmed’e aldırılub yedinde olan tapu temessükü mûcebince ve sâir senedleri mûcebince ber-karâr-ı sâbık zabt ve zirâ‘at etdirilmek bâbında emr-i şerîfim sudûrunu iftihârü’l-emâcid ve’l-ekârim bi’l-fi‘i lreîsü’l-küttâb olan Mehmed Râgıb dâme mecdühü i‘lâm etmeğin i‘lâm mûcibince ‘amel olunmak içün yazılmışdır.
30
8. Hüküm
… ve Banaluka ve Fostâniçe ve … kâdılarına hüküm ki
Erbâb-ı tîmârdan Hasan nâm sipâhî südde-i sa‘âdetime ‘arz-ı hâl edüb berât-ı şerîfimle mutasarrıf olduğu tîmârı karyelerinden Kilîs sancağında Gölhisâr Nâhîyesinde … ve …ve… nâm karyelerinin defterde mukayyed ra‘îyyet ve ra‘iyyeti oğullarından ba‘zîları kadîmi karyelerinden kalkub varup taht-ı kazânızda vâki‘ kasabât ve kurâ ve sâir ‘askerî çiftliklerinde sâkin ve mütemekkin olmalarıyla bu dahi kadîmî karyelerine nakl ve iskân etdirmek istedikde hilâf-ı kânûn ta‘allül ve tîmârı mahsûlüne gadr olunmamağın buyurub ol makûle defterlü re‘âyâsı bulundukları mahallerden kaldırılub kadîmî karyelerine nakl ve iskân etdirilmek bâbında hükm-i hümâyûnum ricâ etmeğin kânûn üzere ‘amel olunmak emrim olmuşdur buyuruldu.
Fî Evâil-i C.Evvel sene 1155
9. Hüküm
Bosna vâlîsine ve Trâvnîk kâdîsına hüküm ki
Kıdvetü’l-emâsil ve’l-akrân Mehmed zîde kadrühü gelüb sâbık mutasarrıf olan Ahmed Efendi demekle ma‘rûf kimesne sâhibü’l-hayrın Travnik kasabası sûkunda binâ ve vefk eylediği hamâmın tevlîyeti hâlâ berât-ı şerîfim bunun üzerinde olub âhirden bir vechile hâsıl olunmak îcâb etmez iken merkûm Alî ben evlâd-ı vâkıfdan … deyü bilâ berât ve bilâ sened fuzûlî dahl ve ta‘arruz ve bunun zabtına mümâna‘at ve gadr murâd eylediklerin bildirüb tevlîyet-i mezkûr berâtı mûcebince buna zabt etdirilüb merkûm Ahmed’i ve gerek Alî’nin bîvech ve bilâ berât ol vechile zâhir olan müdâhele ve ta‘addîleri men‘ ve def‘ olunmak bâbında emr-i şerîfim ricâ eyledüği ecilden yedinde berâtı mûcebince zabt etdirilmek içün yazıldı.
Fî Evâil-i C.Âhir sene 1155
10. Hüküm
Sarây mollâsına ve kâdîlarına hüküm
Nefs-i Sarây’da vâki‘ merhûm Sultân Mehmed Han ‘aleyhi’r-rahme ve’l-gufrân câmi‘-i şerîfinin müezzini olan Mehmed ve Mustafâ nâm kimesneler gelüb Bosna sancağında sarây nâhîyesinde … nâm karye ve gayrılarından bin beş yüz ellişer akçe gedik tîmâr ile câmi‘-i mezbûrun müezzinliği mezkûrlardan Mehmed ve Mustafâ başka başka berevât-ı …şerîfemle mutasarrıflar olub bin altı yüz kırk akçe yazar gedik timârlarının baş kalemi olan sâlifü’l-beyân karye-i Gradhaniç ve üç yüz kırk akçe yazar ve … karye-i mezbûra ve yine nâhîye-i mezbûreye tâbi‘ altı yüz yirmi akçe … karye-i … nâm-ı diğer Maçanik ‘an … ve Mustafâ ve … Mehmed çiftlik karye ve çiftlik ve … müstakilen kayd ve berâtlarına dâhil olub âhirden dahlîcâb etmez iken yine Sarây nâhîyesinde nefs-i Blaroy ve gayrıdan altı bin dokuz yüz otuz iki akçe tîmâra mutasarrıf
31
veled-i İsmâ‘îl ve yine nefs-i Sarây ve gayrıdan beş bin altmış altı akçe tîmâra mutasarrıf Hüseyin nâm sîpâhîler zuhûr ve tîmârlarının baş kalemi olan nefs-i Blaroy ve mezra‘a-i … ve … karye-i Blâroy’u zabta kanâ‘at etmeyüb bunların gedik tîmârları karyeler ve çiftlikleri içün tîmârları karyeleri ve mezra‘ası olmak üzere hilâf-ı defter-i hakânî fuzûlî müdâhele ve mahsûl ve rüsûmunun ahz ve kabzına mümâna‘at oldukların bildirüb defter-i hakânî mûcibince ‘amel olunub hilâf-ı defter-i hâkânî zâhir olan müdâhele ve ta‘addîleri men‘ ve def‘ olunmak bâbında hükm-i hümâyûna ricâ ve defterhâne-i ‘âmire mahfûz olan rûznâmçe-i hümyûn ve defter-i icmâl ve mufassala mürâca‘at olundukda Sarây nâhîyesine tâbi‘ on bir nefer re‘âyâ ve yedi baştina ve iki çiftlik ve beş zemîn ve hâsılı tahtında resm-i çift ve bennâk ve kendüm ve yekûn ma‘ gayruhâ bin altı yüz kırk akçe yazar karye-i … ve yine nâhîye-i mezbûra tâbi‘ bir baştina ve hâsıl ‘an almağla resm-i çift ve ‘öşr-i giyâh ve gayruhü yekûn ma‘ gayruhü üç yüz kırk akçe yazar ve …karye-i Gradaçaniç ve yine nâhîye-i mezbûra tâbi‘ üç baştina ve altı nefer re‘âyâ ve bir çiftlik ve hâsılı tahtında resm-i çift ve bennâk ve kendüm yekûn ma‘ gayruhâ altı yüz yirmi akçe yazar karye-i … nâm diğer Mehanik ‘an … defter mufassalda muharrir kalemiyle başka başka tahrîr ve defter icmâline bend yazusu mezkûre ile tahrîr ve ma‘ gayrılara birikdirilüb evvelce bin yüz akçe yekûnünden iki def‘a beş yüz ellişer akçeleri nefs-i Sarây’da merhûm Sultân Mehmed Han Câmi‘-i şerîfi müezzinine mahsûs iki ‘aded gedik tîmâr ve hâlâ başka başka berevât-ı şerîfemle mezkûrân Mehmed ve Mustafâ tîmârları olub ve yine Sarây nâhîyesine tâbi‘ otuz beş nefer re‘âyâ ve baştina üç zemîn ve üç çiftlik ve iki mezra‘a ve hâsıl-ı resm-i çift ve bennâk ve mücerred ve dönüm ve resm ve ‘öşr-i meyve yekûn ma‘ gayra dört bin dokuz yüz doksan dönüm akçe yazar nefs-i Bâzâr Blaroy deyü defter-i mufassalda muharrir kalemiyle tahrîr ve icmâl ve icmâl-i mezbûrun iki bin akçesi mezkûr Abdulah veledi İsmâ‘îl’in ve üç bin dokuz yüz dokdan sekiz akçesi dahi mezkûr Hüseyin’in tîmârları aklâmı olub ve yine nâhîye-i mezbûreye tâbi‘ hâsıl-ı ‘ani’l … ve resm-i çift ve ‘öşr-i giyâh ve gayruhü üç yüz elli akçe yazar mezra‘a-i Blaniçe der-kurb-i vâridi Blaroy der-tasarruf-ı Kâsım … der-Halya der-tasarruf- Osmân ve Bâlî şirken deyü defter-i mufassalda olduğu muharrir kalemiyle tahrîr ve defter-i icmâlde Dovrovnik nâhîyesine tâbi‘ … ma‘ hâza birikdirilüb dört bin akçe bir icmâli ve icmâl-i mezbûrun üç bin dokuz yüz akçesi yine mezkûr Abdullah veledi İsmâ‘îl’in tîmârı aklâmı olub bâkîsi müşterek kaydında olduğu mastûr ve mukayyed bulunmağın defter-i hâkânî mûcibince ‘amel olunmak içün yazılmışdır.
Fî Evâil-i C.Âhir sene 1155
11. Hüküm
Bosna vâlîsi olan vezîrim el-Hâc Mehmed Pâşâ’ya Nevesin ve Kâdîlarına hüküm
Blagay kal‘esi müstahfızlarından Alî nâm müstahfız gelüb Hersek sancağında Nevesin nâhîyesinde ... nâm ve gayrıdan bin dört yüz akçe gedik tîmâr ile Blagay kal‘esi müstahfızlığı hâlâ berât-ı şerîfim üzerine olub gedik tîmârı … müşterekiyle kayd ve berâtına dâhil Nevesin nâhîyesine tâbi‘ Dolonehân karyesi toprağında baş … Alî veled-i … Mustafâ Karabayezîd deyü defter-i
32
hâkânide mukayyed kadîmî mutasarrıf olan Kara Yûsuf oğlu Beşîr ve Ca‘fer ve Mehmed ve Ahmed ve Hasan nâm kimesnelerin tasarruflarında olmağla zirâ‘atlarıyla hâsıl eyledikleri terekelerinden kânûn üzere mütevellî olan sekizde bir ‘öşr ile sâlârîyeleri müştereleriyle gedik tîmârı tarafınan ahz ve kabz ola gelmekle bu dahi müşterekleri ile ahz ve kabz murâd eyledikde mezkûrâta Hersek sancağında Koman nâhîyesinde Merke nâm karye ve gayrıdan üç bin sekiz yüz yirmi akçe tîmâra mutasarrıf olan Hamza veledi Dervîş nâm sipâhî ile yekdil ve mezkûr Hamza Bey tîmârı aklâmından Nüvesin nâhîyesinde çiftlik-i Karabâyezîd der-karye-i ...mukayyed çiftlik yerleridir ve çiftlik-i mezbûrdan defter-i hâkânîden mukâta‘a yazılmağla yerler dahi merkû Hamza’ya mukâta‘a veririz deyü müşterek ile senin bie ‘alâkan yokdur deyü hilâf-ı defter-i hakânî